وما أرتاح أحِبَك وانتَ ما تقبل
فكّر باليهمك ، المهم شتريد؟
آنة كل اليهمني المهم لاتزعل ،
بكيفك من اجيت وماجبرتك يوم
ماجبرك بكيفك لو ردت ترحل!

عيونَك و شامة رگبتك خلّن گليبي رچيچ
عطرك إتبده اعلى ثوبي من أثر شبگتنا ذيچ .

لا تعتبرها من الضعف
مِن ما أحاول أحچي
خل خوفك من الـ ما بچّة
مِن چان لازم يبچي .

ولگينا الدنيا ماتنحَب
حزن ودروب ماتنطَب
درب مكتوب بي نبچي
ودرب مكتوب بي نتعَب .

ماظَل شي بعد ينگال
وياك الحچي شينفع؟
العتَب مرّات فشلة يصير
إذا مايلگه اذن تسمع ..

طِلع چذاب
ذاك الگال أطَفي النار
جاب النار كُلها وحَطها بضلوعي .

گلب بارد
رغم ما چان
أحر من لسعة الچيلة
چان إللي يگلي شبيك
ما أسولفله، أغنيله!
بس هسة آني غير أحوال
إذا أسمع عزيز يموت
أگللهم شسويله ..

شلع گلبي الذبح ماخلص بساع
حار السيف والذّباح بارد ..