‏طاول الغيم يا راسٍ .. شموخك جبلّة
‏واترك القاع ، ما لك فيه صولة وجولة

‏النزيه ( يتسامى ) ويتوكّل .. على الله
‏ما يخيب الرجا ، في حيل ربي وحوله

‏والخبيث ( يتلوّن ) كل فترة .. بـ حلّة
‏حسب ما تقتضيه المصلحة والسيولة

‏الرجال افلحوا .. واللي ، يراوح محلّه
‏تتبعه معطيات الشك وتحوم حوله

‏يا رهين الشقا .. من زاد حسده وغلّه
‏يشرب من البحر ويقيس عرضه وطوله

‏سولف إن جاء مجال الهرج دقه وجلّه
‏ساعدتك الظروف تعيش دور البطولة

‏فـ التفاصيل .. وغياب الحجج والأدلّة
‏كل من زاد فيه النقص ، يشعب ذلوله

‏ودّي إنّك تطيب وتاخذ المدح !.. كلّه
‏لكن الطيب .. شيٍ ما يجيك بـ سهولة

‏أوسع من الطريق الضيّق .. اللي تدلّه
‏وأعمق من الكلام الفاضي اللي تقوله

يا مُنوة اللي يبي الثنتين دنيا ودين
‏ليا وقف مستوي وليا جلس .. مستوي

‏" أنتي " من اللي ما توخذ غير بالأحمرين
‏من دونها الموت الأحمر والذياب تعوي

‏مدري على وسع عينك كيف ماجاك عين ؟
‏ والناس بعيونها تزوي بعضها زوي

‏عين أشقرٍ مايطيح بفخ ولا كمين
‏لا أحرف على الجول راح الجول منه ثعوي .

دقيق المعنق جعل جمع البني فداه
‏مليحٍ وسط وإللي على الحور حلوبه

‏كن العسل بين الضواحك وبين شفاه
‏على هقوتي ولا فما ذقت مشروبه .

‏- حشان بن مسرع .

صباح الخير - لأدعجٍ تنجرح شمس الضحى من جبينه

الخميس إللّي لبس ثوب الحزن وأعلن حداده
‏قلت له وش فيك ليه ووش بلاك ؟ وقال ودّه

‏من ظلامه يستفزّ اخر ظلام ومن براده
‏الهبوب اللي من القطب الشمالي مستهدّه

‏وآعذاب اللي سهر ذاك الخميس ، ويا هجاده
‏وإن بغيت الحقّ ! ياقوّ الظروف اللي تحدّه

‏إنولد حلم الفقير ، و مات ، عاده في مهاده
‏لا قطع ياسه ولا وصْل الطموح إللّي يودّه !

‏وأنت يا إللّي تدّعي فن المعرْفه ، و القياده
‏وش تقول لمن فتح له باب و أزرى لا يسدّه

‏لا تقول إنّه طلع عقب أنوَر السادات ساده
‏إن بغيت تعدّهم والله ما تلقى اللي تعدّه !

‏والبعير إللّي مع زمل البدو يزهى شداده
‏صفّقو له ، وأنثنا راس البعير ، لصوب بدّه

‏قلت أحاول لأجل أصحّح نظرته وأطلق قياده
‏وأكتشفت إنّه لا زال يعيش في جلباب جدّه

‏وش حشرني جعل ذيب مصلّخه ياكل فواده
‏وأنت لا طاح الجمل يا راعي السكّين ، حدّه

‏الردا ، والذل ، والراي المخالف ، والقراده !
‏تدفع الرجّال ياقف ماقفً ماهوب ، قدّه

‏والرفيق اليا غدت عينه مثل عين الجراده
‏خل من بينك ومن بينه صحاريً مجرهدّه

‏لو تحدك حاجتك تقضي العمر صبر وجلاده
‏إن قدرت تعيش من دون البحر ولا تعدّه

‏صاحبي لهّمتني الله يلهمك الشهاده !
‏مثل ماجبت الخبر يا مودي الأخبار وده

‏لا غريب الا الغريب اللي غريب في بلاده
‏والحضور اللي مايغني عن غيابه لا تعده .

‏محمد الشّمالي

يا وحشة الليل لامال الزمن و استدار
قولي له ان كان باقي معركه ، هاتها

باقي بصدري بقايا احلام بعد الدمار
حصيلة حروب نفسي و انتصاراتها

كني و انا ناجيه منها ، رسوم الديار
اللي سكون البيوت يلملم شتاتها

ماعاد اخاف الطواري مع غياب النهار
وماعاد اخاف الهبايب و اتجاهاتها

متأمله ، في تهادي يانعات الثمار
متطمنه ، في ليالي كنت ما باتها

متماسكه عن شعور الضعف والانكسار
حتى لو احزن من الدنيا و لوعاتها

تركت ركضي وراها لو يفوت القطار
ما شفت قصه تناسبني نهاياتها

زهدت في كل رغبه جابها الانتظار
جتني ، وكل الشعور اللي تبي فاتها

حتى انت ياللي عيونك لايذه بـ الفرار
ماهوب انا اللي ابي منها تلفّاتها

معك الشعور انطفى والصبر ماهو خِيار
قضيت من صبر نفسي و احتمالاتها

من قال سود الليالي لـ الشموع انتصار ؟
و الليل من عمرها و النار من ذاتها

العمر رحله قصيره ، و السعاده قرار
شف غير عيني وطن و اسكن خيالاتها

وصلت معك لـ قناعه ما عليها غبار
الحب لـ امي و ضمتها و ضحكاتها

سافر على يمة النسيان لـ ابعد مدار
ما عدت محراب روحي و ابتهالاتها

الضعف ماهو سبيل و ما اتخذته شعار
اشمخ من الخيل و اعرق من سلالاتها

خليت روحك جناين عايشه فـ ازدهار
بعدي من اللي تبي تملى فراغاتها ؟

رح من حبيب لـ حبيب ومن مطار لـ مطار
ما تعَوضك فيني الارض و مداراتها .

"عن اللذه الكامنه في منطوق من تهوى "

يقول عبدالله بن زويبن :

‏"إليا هرج خدّر هل الذوق تخدير
‏سوالفه ذربه ولاهي كثيره"

‏و أيضاً سفر الدغيلبي عندما قال :

‏"هرجته لا أطعمتها تنّقش عن الكبد اللوايم
‏مايعرف يزل مدري زلته ماهيب زله"

حشمت نفسي عن وكالة يقولون
وعن الكلاب اللي تنابح . . ورانا

الله ! . خلقنا ناس ما نقبل الهون
هذا بلانا . . يا مدور . . بلانا

ما نلتفت للي ورانا . . . يهدون
ميزه من الله ما نناظر . ورانا

وش ذنبنا ياللي علينا تبلون !
ما دام رابي رافع(ن)مستوانا

اسواتنا ! ماهي مثل ما تسون
واسواتكم ماهي بتبحث خفانا

بعض العرب في سلمهم سلم صهيون
طعناتهم دايم تجي في قفانا

وبعض العرب عاله مثل ما يقولون
حمل(ن)علينا بس ماهم معانا

وبعض العرب يا جعلهم ما يهونون
حنا ذراهم مثل ماهم ذرانا

يا قاع ! اللي فوق الناس يمشون
تبطين قاع ولا وصلتي . . سمانا .

استمات القلب من عنفوان العاشقين
‏وانصدم لحظة غروره بشي من العذاب

‏غافلن عن سطوة الحب بين الدالهين
‏ما دريت ان الهوى للهواويه عقاب

‏قلت يمديني على الثقل مثل الطيبين
‏غرني عقلي وسن الفتوه والشباب

‏يوم شفت اللي تبختر على الدنيا بـ لين
‏انهزمت وطحت تحت الاشده والركاب
‏
‏والله اني ماقدرت اتماسك لحظتين
‏ قدم عينن لعن ابوها مثل شلفا ذياب

‏وين راحت قوتي في متاهات السنين
‏ليه اهاب من المحبه وانا ماكنت اهاب

ياجميله صابت عيونك الضلع المتين
‏بس يازين الوجع من عيونك والصواب

‏انتي اللي ما رحمتي قلوب المسلمين
‏كيف عاد العاشق اللي يروعه الغياب

‏وانتي اللي تستحقين مالا تملكين
‏من كنوز الارض ومن الحفاوه والرحاب

‏ وانتي اللي مايضاهيك غير الاكسجين
‏والورود الطايفيه مع انسام الضباب

‏طاولي في عنجهيتك حد الفرقدين
‏وانزلي مثل المطر من عناقيد السحاب

‏وألبسي في عنقك من الغلا عقدن ثمين
‏جعل يفدى عنقك الطايلات من الرقاب

‏واضحكي للوقت من حقك انتي تضحكين
‏ واستبيحي فلسفة كل شي الا العتاب

‏والله انك يوم تمشين بين العابرين
‏ودي ان الارض تحتك ذهب ماهي تراب

‏ماندمت الا على وقتي اللي راح وين ؟
‏والسنين اللي بدونك مثل ريش الغراب

‏ادري انك موتن احمر وطلقة مارتين
‏لكن الدنيا بدونك كآبه واغتراب

‏ صار يطويني على طيفك الجو الحزين
‏واتصدد لا ذكرتك عن وجيه الشباب

‏وصرت اخاف من الجفا والموادع والحنين
‏واتحسس من ذهابن بلا موعد اياب

‏يابعد روحي وقلبي تراك انتي ضنين
‏في هواك اعيش بين الوساوس والرهاب

‏ادركيني فالهوى كان ودك تدركين
‏لاتخليني وانا من عزيزين الجناب .