📝Сөзи: Р.Отарбаев
🎼Намасы Өзбекстан халық бақсысы Ғайратдин Өтемуратов
Жас бақсы Зулхумар Елиўбаева атқарыўында

БУЛ ЎАТАН

Қус заты туўылып, өскен уялар,
Жантақ тамыр урған, шөллер, қыялар,
Алтын ҳәриплерде, жазар сыялар,
Бул ўатандур, бул ўатандур, бул ўатан.

Аспанның кеңлигин, кеўилге жайлап,
Қәлбиңе халық мүлки, алтын сөз сайлап,
Жасаң жети әўладтың, ығбалын ойлап,
Бул ўатандур, бул ўатандур, бул ўатан.

Суў әзиз, жер әзиз, ел деген ерлер,
Инсан қолы менен, гүлленер жерлер,
Журтым деп төгилсин, маңлайдан терлер,
Қәдирин бил, бул ўатандур, бул ўатан.

Шөл гиясы, жупар ийис жуўсан бол,
Бир келдиң дүньяға, таңла туўры жол,
Адам болып туўылдың сен, инсан бол,
Бул ўатандур, бул ўатандур, бул ўатан.

15.04.2024.

ҚУЎАН ХАЛҚЫМ
(2024-жыл 29-февраль куни Өзбекстан Республикасы Президенти Ҳүрметли Ш.М.Мирзиёев қатнасыўында Әмиўдарьяға қурылған жаңа көпирдиң ашылыў салтанатына)

Қуўан халқым Журт атасы жаныңда,
Қуўан халқым бирлик әзел қаныңда,
Қуўан халқым берекет бар, пайыз бар,
Тынышлықта атқан ҳәр бир таңыңда.

Қуўан халқым, пайызлы ҳәр күн ушын,
Қуўан халқым жулдыз толы түн ушын,
Қуўан халқым, көркиңе көрк әйлеген,
Өз ақылың, өз нақылың, өз күшиң.

Қуўан халқым жақын болды жолларың,
Қуўана бер, узаймақта қолларың,
Жаңа көпир, жаңа турмыс нышаны,
Дослар менен абат оң ҳәм солларың.

Қуўан халқым, тасқай дәрья, теңизиң,
Қуўан халқым иске асты лебизиң,
Қуўан халқым, Жайҳун дәрья үстинде,
Жараттың сен абаданлық негизин.

29.02.2024.

Бәҳәр ҳәм инсан

Қуяштың нур шашыўын қара,
Жерге қушақ ашыўын қара,
Қарлығашлар тумсығы менен,
Тынбай ылай тасыўын қара.

Аспан қабақ үйиўин қара,
Жамғыр жерди сүйиўин қара,
Тамшылардан нәр алып әсте,
Жер баўырын ийиўин қара.

Суўлар жапта тасыўын қара,
Қанша жоллар асыўын қара,
Көксин ашып, кебир топырақ
Ишип шөлин басыўын қара.

Нәўбәҳәрдиң келисин қара,
Тәбиятта келисим қара,
Мәўсимлердиң бири-бирине,
Сыйлап нәўбет берисин қара.

Қара, қара адамзат қара,
Жүрегиңниң түбине қара,
Бирлик пенен, қолды қолға бер,
Сен жәҳәнде бәринен дара.

08.02.24.

АППАҚ ҚАРДА ИЗЛЕРИМ ҚАЛДЫ

Ышқы жолдас болғанда әдеп,
Сыр ашпадым илгендей сәдеп,
Сақладымба көбирек әдеп,
Айтылмаған сөзлерим қалды.

Салсамдағы ышқыдан сарай,
Кирмек оған туспеди оңай,
Ҳәўес етип тек қарай-қарай,
Жолларыңда көзлерим талды.

Жүрегимниң түйинлерин шеш,
Тилде қалды айталмадым ҳеш,
Аязлы кеш, енди бәри кеш,
Аппақ қарда излерим қалды.

25.01.2024

Жас бақсы Улзархан Узақбергенова атқарыўында

СИЗЛЕР
(Әзиз ҳәм қәдирдан, мийнеткеш аналарымыз ушын)

Шаңарақтың әлўан сырларын аңлап,
Қыйын-қыстаўларда туўры жол таңлап,
Арыстың бир тәрепинде табанлап,
Турмыстың арбасын тартасыз сизлер.

Өмир дарағына питкен жемисиң,
Перзентлердиң пүтинлейсиз кемисин,
Узақ кетсе, күтип, аман келисин,
Уйқы көрмей, тәшўиш артасыз сизлер.

Дус болсаңда талай сынақ, қыйынға,
Сыр алдырмай бас суғасыз жыйынға,
Ериң-пириң менен артып мойынға,
Балам деп жуўырып-жортасыз сизлер.

Бир кесе шай тийген ўақта еринге,
Айтып өз-өзиңе ҳасла еринбе,
Көп қыйынлық салмайын деп келинге,
Бир қабақ суў артық артасыз сизлер.

ЎАҚЫТ ҲӘМ ЖАҢА ЖЫЛ

Ийнинде  турмыстың тесик дорбасы,
Толтырғысы келер, лекин бири кем.
Бугин дым үмбә-дүм қызған саўдасы,
Лекин, кеўли толмас, айтар бири кем.

О, сен қудиретли бийреҳим ўақыт,
Әззилик қыламыз хүкмиң алдында,
Жүгинип, сораймыз, әўмет ҳәм бахыт,
Қосықлар айтамыз, шыршаң алдында.

Кимниңдур қолына услатып балта,
Кимниңдур қолына ҳаса бересең,
Гүнәдан, саўаптан жүк арта, арта,
Таў, дәрьядан асып, тарта бересең.

Төрт пасыл шайқалған мысалы дарақ,
Төрт пасылға гүўа, он еки шақаң,
Жырлайын мен қайсы өлшемге қарап,
Қайсы теңеўлерге, тең келер баҳаң.

Сениң ҳүкмиң менен келер жаңа жыл,
Өтип барар және гүўалығыңда.
Мен ушын басланған еди жаңа күн,
Қырық үш жыл алдыңғы "Гүўалығым"да.

25.12.2023.