https://cloud.mail.ru/public/2v96/6HHyxqvBF - фотографии

Уҡ осошондай ғүмер балҡышы!
Гимназия-интернат тарихында иҫтә ҡалырлыҡ итеп ойошторолдо Рәми Ғариповҡа арналған юбилей саралары. Был юлы театрлаштырылған тамаша 16 май М. Ғафури исемендәге Башҡорт дәүләт академия театрында үтте. Ошо уңайҙан белем усағын төрлө йылдарҙа тамамлаған уҡыусылар, ветеран уҡытыусылар, абруйлы ҡунаҡтар йыйылды. Байрам кәйефе менән уртаҡлашырға республикабыҙҙың билдәле сығарылыш уҡыусылары Сәлиә Мырҙабаева, Сәрүәр Сурина, Миңһылыу Усманова, Артур Әлибәков, Рәшиҙә Мәһәҙиева, Байрас Ишбирҙин килде. Шағирҙың балалары Азамат һәм Гөлнара Ғариповтарҙың, ошо арала экрандарға сығасаҡ фильмдың етәкселәре Булат Йосопов, Гөлсәсәк Саламатова, Таңсулпан Бабичеваларҙың килеүе сараға ҙур мәртәбә өҫтәне.  
Шағирҙың көндәлектәренә таянып эшләнгән сәғәт ярымлыҡ тамаша бер тында үтеп китте. Тамашасылар билдәләүенсә, уҡыусылар көсө менән әҙерләнгән сағыу һәм юғары кимәлдәге сығышты күҙ йәштәре аша тетрәнеп тә, һоҡланып та ҡараны, көслө алҡыштарға күмеп, гимназияның бөгөнгө рухлы ҡыҙҙарын һәм егеттәрен – ысын Рәмиселәрҙе күреп ҡыуанды.
Гимназия етәкселеге, педагогик коллектив юбилей сараһының режиссеры, Башҡортостандың атҡаҙанған сәнғәт эшмәкәре Әлмира Ҡыуатова, сценарий авторҙары Сәрүәр Сурина һәм Гөлсәсәк Ҡылысова, «Аманат» фольклор төркөмөнөң, «Аҡйондоҙ» бейеү ансамбленең етәксеһе Рәйес Низаметдинов, Алмаз Такалов, Вячеслав Шарун, продюссер Шәүрә Кейекбирҙина, ҡурай түңәрәге етәксеһе Вәсил Баймырҙин, хор түңәрәге етәксеһе Эмилия Ғарипова, видеограф Батырхан Хәмиҙуллиндарға оло рәхмәттәрен еткерә.
Г.С. Ҡылысова, башҡорт теле уҡытыусыһы