Yolgʻiz uchib borar olovrang yaproq,
Yuragingning yaydoq oʻr-- qirlaridan.
Koʻzimning rangida tovlanar shafaq,
Turnalarning mahzun qur-- qurlaridan..
Tinglayman osuda,qarogʻimda nam
Magʻrur teraklarning munojotini.
Yaproqqa ergashgim keladi men ham,
Shamolga topshirsa... bor hayotini.
Olovrang yaprogʻim ,ey sen muhtaram,
Ming bir xiromingga ming jonim tutash.
Olovrang yaprogʻim-- olovrang olam.
Zaʼfaron kuylaring-- mendagi otash...
Yolgʻiz uchib borar olovrang yaproq,
Mening shuurimda ming oʻy,ming malol.
Assalom fasli ishq,assalom firoq,
Assalom jonoʻrtar mashshoq,ey shamol...
Durposhsho.

Jismim -- tuproq,ruhim cheksiz osmon et,
Dilim,mayli,ming bir oʻqqa nishon et.
Qarogʻimda qalqqan ming bir quyoshdan,
Qorongʻu dillarni Sen charogʻon et..
Durposhsho

ONA TABIAT MADHI
Ey, ulugʻ yoʻllarda mangu qarorgoh--
Qoyasi falakka tutash togʼlarim.
Turasiz askarday hushyor va ogoh,
Zumrad qir-- adirlar, yashil bogʻlarim..

Asraylik bebaho, teran ildizni,
Asraylik yer-- osmon,har bir yulduzni.

Muqaddas dasturxon ona--- yerimiz,
Qutlugʻ bir inoyat-- ming turli maʼdan.
Chamanlar undirsa manglay terimiz,
Har voha, har vodiy-- oʻzi bir chaman.

Asraylik bebaho ,teran ildizni,
Asraylik yer-- osmon, har bir yulduzni.

Buxoro xonguli ohusi misol,
Har giyoh, har maysa unsin qad kerib.
Amu,Sir, Orol ham boʻlsin bezavol,
Turon yoʻlbarsilari yursin oʻkirib.

Asraylik bebaho, teran ildizni,
Asraylik yer-- osmon, har bir yulduzni.

Qizgʻaldoq, lola-- yu, nargiz, naʼmatak,
Xonanda bulbuldek qushlarga oshyon.
Boʻstonliq, Qoraqum, Zomin,Sangardak,
Firdavs--ul aʼlodan mangulik nishon.

Asraylik bebaho, teran ildizni,
Asraylik yer-- osmon, har bir yulduzni.

Olmoqning bermogʻi bordir dunyoda,
Ketmasin saflari aslo buzilib.
Kelajak avlodga yetsin ziiyoda,
Yulduzlar tushmasin axir uzilib.

Asraylik bebaho ,teran ildizni,
Asraylik yer-- osmon, har bir yulduzni.

Durposhsho.

Ту‌нюқуқ--туркларнинг тўнғич жавҳари,
Ватаннинг рамзига айланган исён.
Кўз ўнгимдан ўтар бирма--бир бари
Сeнга бош эгаман бугун бегумон.
Ватанни севишни ўргатдинг кўпроқ,
Яшамоқ завқини туйдим--ҳур, озод.
Қон бўлган кўйлагинг этган-ча байроқ
"Ватан!"-- деб чорлаган энг гўзал имдод---
Овозларинг кетмас ҳеч қулоғимдан,
Муқаддас қонинг бор юрт байроғида.

Кул Тигин-- Элтариш хоқоннинг ўғли,
Довруғли саркарда--улуғ Кул Тигин.
Юрт деса юраги ярали, доғли,
Кўнгли эл меҳрига тўлиқ Кул Тигин.
Тангри ярлақаган бахти бор хоқон,
Молпараст бэкларни гумроҳ билган мард.
"Ватан!"---деганларни эьзозлар осмон,
Замонлар шаьнига юқтирмагай гард.
Буюк Кул Тигиннинг ўлмас сабоғи--
Шаҳидлар қонидир юртнинг байроғи...

Ватан-- жон дегани, жон эса Ватан,
Ўғлим, улуғлардан бу--тенгсиз сабоқ.
Бeзавол бир ҳисни илғаб дафьатан,
Қонингда яшаса эрксевар Широқ.
Ва улғайиб борса ҳар нафасингдан,
Ҳар бир нафасингдан туйсанг ифтихор.
Орзунгдан, умидинг ва ҳавасингдан
Бир Ватан яралса азиз, бeтaкрор--
Широқнинг Сен учун қолдирган боғи--
Тафаккур байроғи, ақл байроғи.

Болам, томирингда аждодлар қони,
Шажаранг унутма, унутма асло.
Ҳидоят дeнгизи билсанг Куброни,
Умрингни ёритгай бир тутам зиё.
Шуурингга сингиб ИШҚ қиёфаси,
Шакллана бошлар муҳташам бир тоғ.
"Ё Ватан, ё ўлим"--- эранлар саси,
Бармоқларни кесиб...олинган байроқ...
Муҳрланиб қолсин қўз қароғингда,
Куброларни кўргин юрт байроғида.

Нажот ҳурликдами, ҳурликми нажот?!
Бани башар унга интилар пинҳон.
Майса ҳам эрк тилаб этса муножот,
Қушлар чуғурлашса, эрк сўраб ҳайрон...
Одам қандай чидар яшаса тутқун,
Қай бир фалокатнинг истибдодида.
Тинмай меҳнат қилса, мустабид учун,
Боши эгик бўлса, нокас олдида.
Билмадим, неларга менгзар сиёғи,
Мағрур ҳилпирамас кўнгил байроғи...

Чингиз босқинидан юракларда қон,
Қиличда ярқираб эрк муддаоси.
Жалолиддин жангда ураркан жавлон,
"Хуббул Ватан..." эди кўнгил нидоси...
Оловли жангларда ўйнатиб шамшир,
Гаровга қўйганда ширин жонини,
Вақтнинг мезонига қўйди бирма-бир
Муаззам ҳаётин, Ватан шонини...
Тарозида юртнинг салмоғи бўлди,
Eлкасида Ватан байроғи бўлди.

Беҳбудию--Фитрат, Қодирий, Чўлпон,
Ватан тимсолига айланган жонлар.
Ломакон кўксида мисли Каҳкашон,
Покиза бир нафас, қутлуғ иймонлар...
Юраклар буржида нақшбанд калом,
Байроқ сийратида нурафшон оят.
Азиз шаҳидларим, Сизга ассалом!
Сизга эҳтиромим, меҳрим бағоят...
Суюк боболарим...видо чоғида,
Қорачиғи ёнган юрт байроғида!

Ҳарб--у зарб сўзидан зада юрагим,
Бугун титраб турар киприкда дунё.
Тирикликни асранг--ёлғиз тилагим,
Ахир ҳаёт ўзи--иньом бэбаҳо
Байроғим--фахримсан, мен ҳам Усмондай
Онтимни авайлаб битиб кетаман.
Сардобада эл деб ўтган ўғлондай
Сeни юрагимда тутиб кетаман.
Насли Туронимга ёруғ маёғим--
Жилваси жонимдан бунёд байроғим!

Дурпошшо

Jamoling jilvasin gullarda ko'rib,
Avaylab-avaylab ko'zimga surtdim.
Toza ixlos bilan rukuda turib,
Ibodat ayladim, o'zni unutdim.

Chechaklar raqsiga bo'lib mahliyo,
Rayhon bo'ylarida nafasing tuydim.
Laylining qavmidan bo'lsam-da, ammo
Majnunday o'rtanib, Majnunday suydim.

Tole qur'asini tashlagan hakam,
Menga sun muqaddas ishq to'la jomni.
Takrorlab uyg'onay mahshar kuni ham
"Muhabbat - Xudodir!" degan kalomni!

✍ DURPOSHSHO

Bir voqeaga uch xil nazar...