[ مولاتي زينب ع ]

وحشة الشام وكربله عاشتهن ام عون
وحشة الطف من تنگضي للسبي يطلعون
عاشت المرين
من طاح الحسين
__
يعين كلب الفارگت
بالمصاب اتمرمرت
بكربله انذبحت عشيره الله اكبر
جثث ضلو عالترب
بينهم دگت كلب
باتو بلايه خيم والجثث بالبر
الحومه ما تنطب ابد
جسد صاير يم جسد
وكل جسد نيشان بي الا ابو الاكبر
عرفته گوه الصبح
ومن گبل لا ينذبح
هسه ليل وجسمه بالحومه توذر

لازم تگلبها الجثث سبعين مجتول
صارت علامه الجثته ساحگته الخيول
هيج النايشن
من طاح الحسين
__
وحشة الطف جن حلم
شطول ليل ابلا زلم
مو مثل ليلة العاشر خلصت بساع
الليل عيشها برعب
الفجر تسبيها الغرب
شلون حيره حتار بهل ليل الضياع
وين تلگه التل بعد
مضيعه بالحومه جسد
وين تلگه حسين المساوي ويه الگاع
بالاشاير ودعته
بس نحر من عافته
بلايه راس شلون ويه حسين الوداع

يتمنه الي ودع محب يلزم اجفوفه
مو يضل يتلفت اله موذر يشوفه
وللضم ماشين
من طاح الحسين
__
ليل من دون الگمر
عاشته بلوعه وقهر
حسرة ام عون اعله ابو فاضل شگدها
وحشه يالعباس لك
بنص غرب باتو هلك
لا ابساط والخيم هل ليله عدها
هنا يسبع الگنطره
الليل ما يرحم مره
الليله باتت يالگمر زينب وحدها
بعيد دربك مو سهل
لو اجت يابو الفضل
ياهو ياخذها الك ياهو اليردها

كربله ما تنطب ابد من غير عباس
كربله مابيها عرف وبجسمه ضل راس
صعبه الميادين
من طاح الحسين
__
وحشة الطف من گضت
وحشت الغربه بقت
زينب ابنص ديره طبتها بالگيود
شكثر خوان الدهر
شكثر شبعها قهر
ياهو الي صدكها زينب للسبي اتعود
سبي بس مابي حبل
لاكو حرمه ولا طفل
لجن نفس الشام نفس الحادي موجود
نفسه شلعان الكلب
لمه بس ماكو ضرب
السبي الاول لسه منه متونها سود

ومجانها البي گاعده مجاوره الشمات
وادام شماته ويه العدل وشلون اذا مات
ياحسرة البين
من طاح الحسين
__
لحد ما جاها الاجل
وحيده ما عدها اهل
تحتظر وحدها بس الكلب مرعوب
خايفه اتغمض الجفن
بغربه تبقه ابلا دفن
مثل ابو اليمه البقه اعله وجه مگلوب
موحش اعليها الدرب
يمته ابو فاضل يطب
بدت زينب تحتظر وي جيت الغروب
النفس ضاگ وصوفرت
واهل زينب ما درت
ماتت وما صح صوت اعليها محبوب

ماتت ام عون ويا وسف ماتت وحيده
زينب بشلعان الكلب لا مو جديده
تتلوع اسنين
من طاح الحسين
__
جنازه ما الها احد
لا اخوان ولا ولد
اجه السجاد الدفنها وبقه محتار
وصل عمته الوحده
شافها متوسده
جنها توها انسبت زينب نفس الاثار
ذابله من الهضم
صايره جلد وعضم
جنها فاطم من نبت بالضلع بسمار
بلا حزن ام الحزن
ياهو يفزع للدفن
الديره ضد زينب الحره زغار وكبار

السجاد حار بعمته ومشلوع كلبه
مجبور يدفن علي بديار غربه
طبت الدواوين
من طاح الحسين
__

[شهادة مولاتي زينب ع لسان حال مولاي السجاد ع ]

التطشر بالحوافر دفنته اهون عليه
منو يشيل الجنازه ويعرفوها سبيه
الشلت جسمه بحصيره
ابد مو هيج حيره
يعرفوها سبيه
__
عليّ اهون - ادور بالجثث بس يمي وادم جان
رغم ماجان - ابويه جسمه من حر الشمس ذبلان
ادير العين - وحدي بنص سلف كلها الي عدوان
نكسر كلبي - اعله زينب من شفتها مجاوره الديوان

الكبل طبت سبيه عليها ياهو يحزن
منو سامع جانزه تدورلها اعله مدفن
ادير ابعيني حاير
ادورلي اعله ناصر
يعرفوها سبيه
__
انه وزينب - مكتوبلنه نبقه ابحيره وحدنه
كتلني الشام - وكل يوم السبي ما خذنه ويردنه
من هد عاشور - تعودنه اعله غربه ولا عرف عدنه
عرف صرنه - بكثر ما هل سلف يمهم تفرهدنه

گبل فتره قليله وصلنه مگيدينه
علينه الديره طلعت وتسترنه بدينه
بكثر ما شامونه
لهسه ما نسونه
يعرفوها سبيه
__
دفنت اجساد - المسحوگ ابحوافر والوذر شلته
عزاز اعزاز - ولا منهم عزيز ابگطره غسلته
بوسط شمات - اليدفنله عشيره ولا دفن عمته
ادگ بيبان - ما ضل بالسلف جار اله حشمته

ارد وعيوني تجري واگلهم هاي اميره
لو عدله زلمنه ولا صارت اسيره
بوكت عايش گمرها
منو شايف اثرها
يعرفوها سبيه
__
شفت عمتي - لهسه من السبي بيها بقت اثار
الجدم محروك - شكثر ركضت شفتها بكربله اعله النار
اعله معصمها - الحبل اثاره ضلت لونه اسود صار
بوجه عمتي - كل ساعه اشوفن شغله اضل محتار

شفت بس الي شفته نكسر كلبي عليها
بمتنها الله اعلم الضرب شمسوي بيها
مره وستوحدوها
شفتهم من ولوها
يعرفوها سبيه
__
الدرب جبناه - اكثر وحده جانت عمتي ياذوها
ويه كل طگه - كلما طفله تنطگ يمها يلگوها
بوجه كل سوط - تخلي لو منت لو جف يشوفوها
اعله هالحاله - الدرب كله لحد ما هيج وصلوها

شفت شالت رقيه تخاف من اليطگها
تخاف اعلينه جانت شكثر طولت خلگها
ولا تفرغ اديها
الدرب كلنه عليها
يعرفوها سبيه
__
الدهر خوان - زينب للسبي والغربه جرجرها
ادگ ياباب - وكلها من السطوح اتشامر اذكرها
صرت افتر - ومامش وادم الخيره ادورها
عمت عيني - لا عدها ولد لا خوه تحضرها

عكب متن الكفلها متن ماكو النعشها
بوكت عباس اخوها اميره وبعرشها
الاجل زينب اجاها
منو يصرخ وراها
يعرفوها سبيه
__

[ لسان حال مولاي السجاد ع
المولاتي ام البنين ع في اخر لحظات عمرها الشريف ]

حمدي الله ماشفتي گبل لا يذبحونه
يحتظر وحده بكربله وفاتح اعيونه
يأشرلنه بالايد
لمن بقه وحيد
فاتح اعيونه
__
حمدي الله يالحره
ماشفتي ابو العتره
لمن دنه اعليه الاجل ياحال حاله جان

بالحومه ماله احد
ونسونه تتنشد
من الخيمه للحومه درب شي وصل النسوان

كل ميت اليحتظر احبابه جدامه
طيحته بين الزلم ومگابل خيامه
لا هو يرجع كدر ولا نگدر انحظره
غطته خيل وزلم وتعاين ايتامه

يوگف ويوگع ما كدر ما عانه حيله
سلم ابو اليمه الامر جروحه ثجيله
عن عيلته ابعيد
لمن بقه وحيد
فاتح اعيونه
__
ماودي احجيهن
بس انتي ردتيهن
كلتيلي اريد اخر اسم بذني يضل حسين

لمن گضه حيله
وبي سمعت العيله
اباب الخيم وگفت هله ماندري طايح وين

نسمع حوافر ترن وضلوع تتكسر
لمن تسحگه وينگلب ينشاف ابو الاكبر
بنايته كل سا واجن جاوين ابو اليمه
شو ماله حس ياعلي شو ماهو بالعسكر

وشلون اكللهن وگع تحت الحوافر
كلتلهن ابين الزم والخير صاير
يشوفنه ما اريد
لمن بقه وحيد
فاتح عيونه
__
ماينعرف جسمه
مو ذاك ابو اليمه
مابي شبر سالم بقه لو طعنه لو حافر

مابي يلم طوله
ذاك الحلو طوله
شابع سحگ شابع حجر شي صد بقه حاير

ماكسر خاطر بشر ما رحمته الوادم
سبل اديه للاجل بس عالوجه نايم
بطلو عنه الضرب من طلعت الحره
وكفت على التل شافته مابي كتر سالم

من سمع زينب صاحته ها يبو سكينه
مقسومله يشوف الاخت ويسدها عينه
ماكو ابن اجاويد
لمن بقه وحيد
فاتح اعيونه
__
أرتاحي من ضيمج
خليني اسد عينج
الموت اهون اعله ام تنتظر جيت ولد مذبوح

يالعشتي بالحسره
يالجنتي منتظره
كل عمرج العشتي خلص بجروح فوك اجروح

ماضل بشر بالسلف ما سامع ونينج
يسدون عين الگضه وانه الاسد عينج
بس ابو اليمه تره ما سدو اعيونه
ذبحو وراسه ابرمح ومفتح حسينج

صاير دليل اويه الضعن جدام العيال
وعياله تشكي اله شما طگها جمال
حيرنه العميد
لمن بقه وحيد
فاتح اعيونه
__
تغسيله من دمه
وغطه الترب جسمه
ضل عاري وحده بكربله من دون خلگ الله

موذر لجن يعجب
بس هوه متسلب
شلع الكلب مثل البشر محد عليه صله

لميته گوه وعلي وضل منه بالحومه
لا عندي وصلت جفن ومسلبه هدومه
ميت عدل ماله حل ماله ابد جاره
كل صفحه وصله اله ومتعفره ارسومه

ارفع كتر يوكع كتر من الحصيره
حمدي الله ماشفتي شجره بشيخ العشيره
اهونلج ابعيد
لمن بقه وحيد
فاتح اعيونه
__
عالگاع احط خدج
ياحسرتي الولدج
ياهو الادفنه ابكربله أحتار اذا وسده

ماترحم الغبره
مجبور احط نحره
فوك الترب ماعندي حل بس النحر عنده

من احجي گوه تره والروح مفجوعه
الدافن ابو منذبح شي نشف دموعه
ما ريد ازيدج بعد فوگ الالم حسره
عبدالله فوگ الصدر ومهشمه ضلوعه

وداع الله يأم الاربعه متانيج الحسين
مشتاگه اله ومشتاگ الج صار الكم سنين
ملاگه ام والوليد
لمن بقه وحيد
فاتح اعيونه
__

[موشح مولاتي فاطمه ع]

ياهو الي شيل الطفل عن فاطمه
وكعت امن الضلع غاطيها الدمه
__
كلفه من توگع مره ومو اي مره
شلون فاطم تنولي ودمها جره
بين الحجاب وطفلها محيره
ضلوعها بعصرت الباب امهشمه
__
المحسن الطايح يصد اعليها جان
شلون فاطم ناغته بذاك المجان
كتر محروك وكتر غطا دخان
والاطفال اعله المناغه امعلمه
__
تمدله اديها شلون حتى اتشيله
خذت كل الحيل باب اثجيله
بنص حرگ يوميلها وتوميله
حسره ضلت محسن امه اتوالمه
__
مو حضن وگماط طاح اعله الترب
فتح عينه وشافها الوادم غرب
المحسن اول طفل مكسور الكلب
يسمع امه امن الضلع متألمه
__
تفارگو بأول لقاء ام والولد
نفطم من امه ابوكت توه انولد
گبل جيته وبعد ضل خالي المهد
المهد موحش فاله ابد ما والمه
__
الميت يذكرو هله من عشرته
ينذكر بسوالفه وبگعدته
امه ما لحگت تسمع نبرته
بأول وآخره غاطيها الدمه
__

[مولاتي فاطمه ع دارمي ]

كل ما امر عالباب روحي خذاها
يرد بيه ذيج النار ومي وراها
___
لا بيه اضل بالبيت لابيه اعوفه
دم ام حسن عالباب يوميه اشوفه
العاصرها فوك الباب طبعت اجفوفه

الجانت ضوه بالبيت دهري طفاها
___
بأول هجوم الدار اسمع حجيها
ونگطع ذاك الصوت ماندر بيها
بعيني شفتها الباب طبكت عليها

ماجنها خلف الباب مدري شدهاها
___
لانفس لامن صوت ولا ونه حتى
صوت الضلع مسموع والباقي سكته
جن يمي موش ابعيد بذني سمعته

عصرتها عصرت موت ينزف دماها
___
بأول دفعته الباب صوت امي مگطوع
ماتحجي والبسمار متوسط الضلوع
دلاني بيها الدم مو صوت مسموع

مايندره والنار غطت ضواها
___
من رد فتحها الباب طاحت رميه
مغشيه بين الناس شفت الزجيه
بالكوه من النار مديت اديه

من كل كتر جويات وازرك كفاها
___
طيحت غصن ذبلان ويكلبه الريح
مجوايه من كل صوب شنحرك اتصيح
مابيها حتى اتكوم نعدلها واطيح

شبعده دربها صار جم سوط اجاها
___
كل ما يجيها السوط اسمعها تشهگ
لحد ماشفت مصبوغ متن امي ازرگ
لابيها تشگف سوط لا بيها تلحگ

هواي العدد شنصير شنصد وراها
___

[ مولاتي فاطمه ع ]

يوم اصعب من يوم
لأم ضلع المهشوم
منو يحمل عصرتها
تتوجه ابگومتها
__
المكسور من عنده ضلع مو هينه ياناس
ايام واليالي ام حسن تلجمها الانفاس
لا تگدر اتحرك الضلع لا ترفع الراس
شيحملها حرمه تنولي والبيت ينداس

حرمة حامي الجار
تشمت بيها الجار
ما قصرت ديرتها
تتوجه ابگومتها
__
اعله الفقره وأيتام السلف متعلمه تنشد
جانت لحد خيط الفجر تركع وتسجد
كسرو ضلعها وضلت ابحسرتها تگعد
وتأشر وزينب عليها اتروح واترد

تشيل الجف گوه
طگها الما يسوه
محتاره ابنيتها
تتوجه ابگومتها
__
عاشت ظليمه وماتت الزهره ظليمه
كل ديره تحزن لو مشت حرمه كريمه
بس فاطمه ماتت وما گالو هضيمه
والاخس جتال ام حسن صارتله قيمه

صاير رمز الدين
ومنسيه ام حسين
ما طلبو ديتها
تتوجه ابگومتها
__
شيحملها تنطگ المره ولا ذنب عدها
غالي الضنه وبس فاطمه رخصو ولدها
الحد هسه ناس الفازعه محد نشدها
شسوت الزهره وينصطر بالباب خدها

لهسه ابلا نغار
من حرگوها الدار
شي عوض صطرتها
تتوجه ابگومتها
__
صاحب الحگ لمن سكت سولف المطلوب
مو هينه اذا بين السلف غاصب وغصوب
الدنيا العمر متبسمه وحيدر المتعوب
مجبور بالظلمه علي يدفن المحبوب

كسرو كلبه أمرار
محدب حامي الجار
اعله الزهره وحرمتها
تتوجه ابگومتها
__
أول جريمه بكل عصر وبزمن تنعاد
كل يوم للزهره مره تركض عالرماد
كل يوم حرمه امخدره عليها عمر راد
شيحملها تنشاف المره تركض بالوهاد

كل يوم الهم حال
وملاگه ابجتال
ما رحمو عيلتها
تتوجه ابگومتها
__

[ مولاتي فاطمه ع .شور . ]

يا زهراء
بابج باب الله وستره
محترگه وتنطي الفقره
مظلومه وعشنه ابخيرج
يازهراء
__
غريبه الزهره
وگضت بالعصره
رغم شدتها. تحل الشده

عطاء الباري
ويه دمها الجاري
جرحها اشكبره. كريمه ابگده

كسرها وجرحها يألمنها لسه
تغير شكلها لجن جفها نفسه
اليمد الها جفه بعطفها تترسه

اليگصدها
يحفظ روحه من الذله
بعمره ما ينذل كله
يرجع والماي ابوجها
يازهراء
__
شنمد ايدينه
ترد تنطينه
واديها اتجوت. منو يحس بيها

يأول نعمه
النگلها يمه
غريبه وحيده. الكسر ماذيها

نحس بيها يمته التلمنه ابكسرها
العظيمه هضيمه انكر كل قدرها
على الباب بقه الدم لهسه بعصرها

مهضومه
اه ياجرح الما يبرد
عن خدها الجف ماينرد
ماتت والسطره بخدها
يازهراء
__
اليوشل حيله
ومحنته اثجيله
ويدير اعيونه. عليها ابلهفه

ام حسن مازالت
مثل ما جانت
اليجيها اتكرمه. ويحمل جفه

توزع بديها وحرك لسه بيها
الوجع ذاك الاول يرد نفسه ليها
رغم ما المها توزع بديها

محتاره
وجفها المابيها اترفعه
يحس بيها الكسرو ضلعه
ويجر بالگوه أنفاسه
يازهراء
__
الحزن غاطيها
النفس ماذيها
تشهگه بحسره. ضلعها مكسر

رغم محنتها
وثجل طيحتها
نگلها ادخيلج. ولا تتعذر

اعله عيني تگول واثر سطره بالعين
اذا مو عطفها الخليقه مضلين
شنو قيمة الدين بلايه ام الحسين

بالسطره
وما ردت واحد فاطم
بمحنتها وتنطي الوادم
ماتجازه ام العتره
يازهراء
__
الطلب ذريه
ونخه المدميه
السگط محسنها. وترزقه الزهره

ولدها بحيره
ودمه بكل ديره
اليجي ويگصدها. تفرحه بنظره

ولدها مطاريح بقو بالمنيه
مصايبها كلفه شتصير الزجيه
ابو اليمه بالطف تدوسه اعوجيه

عالويلاد
بحال الثكله ومحتاره
ترد السائل ببشاره
بشدتها اتحل كل شده
يازهراء
__
كضت مهضومه
وبقت مظلومه
بوكت عصرتها. السگط شيعوضه

الحرگ دايرها
نكسر خاطرها
اعله ابنها شهگت. وتصيح فضه

وطن للغرايب رغم ما غريبه
حرگ باب والضلوع طبگ فد مصيبه
عجيبه الزجيه اعله كلشي عجيبه

ام حسين
تنطي الفاگته بلوعه
وندري ابفاطم موجوعه
يااقدس حرمه انعرفت
يازهراء
__

[ خدمة مولاتي فاطمه ع ]

لو دمع حيدر دمعتي ماجازي هالنعمه
الما شاف خدمة فاطمه يگضي العمر اعمه
شكرا اذا گول. كلش قليله
وانتي الجليله
اه يالزجيه
__
انه وين وهالامر
شكثر رايدلي شكر
بدائرة خدامج مخليه الي مجان

كرم بابج فاطمه
جاه ينطي الخادمه
شلون بابج محرگ شافته جيران

مو جار بابج بس شفت ياكرم تنطون الجار
الينطيله دمعه للضلع بدائرة رحمتكم صار
جيران الحسين وشفت ياكرم عدكم بالدار
يارحمة الله مو سهل نابت ابضلعج بسمار

ويشوفوج

اعرف احسانج من اهد ماطلعت السطره
يامره مكسورت ضلع بس تنطي للفقره
تنطين الايتام. جن مطيه لحسين
والسطره بالعين
اه يالزجيه
__
طول عمري ابشيمتج
عشره الي ويه مصيبتج
الخير خيرج فاطمه والفضل فضلج

ما اعرف درب الدمع
الا من كسر الضلع
ينگطع وصل الله بينه اخلاف وصلج

لمن وصل قنفذ الج ريته وسمعها احجايه
من گلتي أني فاطمه وعن عمر غير رايه
يذب سوطه ومدنگ يرد ويگول فاطم هايه
عميه العيون الشافتج يأم الحسن مو ايه

هضيمه

من نحجي وياج وعلي جن نحجي وي امنه
الربته فاطم والدمعه ما بشر علمنه
ضايع مضيع. واحدنه دونج
لو لا عيونج
اه يالزجيه
__
ريت اول يوم الي
عايف اعيالي وهلي
ولازم الخدمه مثل ايدج والحجاب

اعض صبعي اعله الوكت
ابلا خدمتج من جنت
وما انوح الطيحتج من طحتي بالباب

فاطمه تنطگ عالوجه والضلع سايل دمه
شتسوه الحياة وفاطمه اعليها الزلم ملتمه
اعله الدنيا اركض والحسن يركض يشاگف لأمه
نادم على ايام الگضت مابيها جانت الخدمه

حسافه

من تالي اجيت الخدمتج ما حاس بيها
الايدين البنار انجوج عايش عليها
تشبع الملهوف. من تنطي فاطم
ولا ضلع سالم
اه يالزجيه
__
الماله بالخدمه عرف
ويه كلشي ينجرف
واحنه لو ما خدمتج جا رحنه لا وين

خدمتج سوت زلم
وفضل ضلع المنهشم
صرنه نعرف خيل سحگت صدر الحسين

طاح ابنج ابين الزلم الها اصل هالوگعه
من كلتي انه الوالده اعرفنه ابو اليمه اوضعه
مايهم ضلعج والكسر وهمج اقرايه ودمعه
كلنه الحسين ابكربله مسحوگ روحه ورجعه

بالخيول

مانعرف ابصدره نسحك لو ما اثر ضلعج
دلانه عالضل بالشمس يافاطمه دمعج
نتسمه خدام. من فضل جودج
وخمشت اخدودج
اه يالزجيه
__
بحركت الباب الخشب
ضعن الحسين انسلب
الداس حدج فاطمه ما يهتم الحد

من وان لام الحسن
للسبي راح الضعن
والسطر خدج بعد يسطر شكو خد

مابيج خطوه اعله المشي وگمتي العلي تردينه
ومن عفتي محسن عالترب ردتي تره اتعلمينه
معناه اكو بالطف ضعن والوادم امسلبينه
وحسين عاري بكربله موذر هلا امخلينه

بلا راس

كلشي انعرف من عصرتج والطيحه والباب
يا غربتج يافاطمه ما بين الاجناب
كسرت الخاطر. منا انعرفت
لحسين ضلت
اه يالزجيه
__
گضت بس مو عشرتج
وتبقه بينه طيحتج
خلصن ايام العزه بس الدمع ضل

خاف قصرنه بأمر
نعتذر عن كل قصر
ان جان تيهنه الدرب خلينه نندل

لو نلطم ونبجي العمر شوغه الج ما وفينه
نطيتينه ايام الحزن بس منها لتحرمينه
تحت ايدج نضل كل وكت يافاطمه خلينه
عليج اخر وداع العلي بهل لمه هم لمينه

ونرد ليج

العوده العزائج فاطمه ما گضت عشرتنه
مو مصلحه وياج وعلي يالجنتي لمتنه
متفضله هواي. وانه المقصر
لو ضلع اكسر
اه يالزجيه
__

[ مولاتي فاطمه ع ]

لاهي غربه وما يعرفوني
انولي الديره يشوفوني
جاوين باب ام الحسن بابي
محد وصل من حترك بابي
عجيبه
__
بت محمد مو غريبه شبيها كلها الناس ضدي
جان اليدك باب بيتي جنت اكرمه ابقوت ولدي
العندي والما عندي اوزعه ما اضم الخبزه عندي
من طحت بالديره وحدي عالترب ضليت وحدي

كوه امشي تعاين الديره
من الخجل غطيت بالحيره
ما جنه يعرفني ابد جاري
ما كال ليش محدبه جاري
__
افتح اعيوني واسدها من الكسر حالي تغير
صوابي ما خله عليه جدامي من النار تسعر
كومت الموته گمتها من شفت مجتوف حيدر
من اصيح يردلي قنفذ مره اطيح ومره اعثر

اعله المشي يدرون ما بيه
اضلوعي تجري وامشي محنيه
مكسور كلبي بالسلف وحدي
وفزع الحيدر بالكسر وحدي
__
ياهو منه ابشده يوگع يبقه وحده يدير عينه
حيدر يخلونه وحده اعله السقيفه الله يعينه
والحسن لا جيش عنده ولا يدفنو بالمدينه
وكلها هينه اعلينه باجرمن يطلعون الضعينه

من الضلع للعاشر صوابي
السطره هينه وطيحتي ابابي
اليتجسر اعليه ب وان باجر
يخلي ابو اليمه ابلا دفن باجر
__
انه ما هم اعله روحي خلي جيش اعليه داير
فضه ركضتلي شفتها حتى لو ما عندي ناصر
شلون بالواگع يعالج وعرضه اشوفه للحوافر
مو الكومه عليه حسره من النفس محروم باجر

دم على اعيونك يغطيها
الحومه زلمه وياك مابيها
يخلونه حاير يلتفت وحده
جدام المخيم يضل وحده
__
شانت الدفعه عليه وبابي محروكه شفتها
بكلبي لسه الحرگه ضلت عال وان من اسمعتها
يبني وين ادير عينك تلكه طفله دللتها
تركض ونار بخدرها ادور اعله امها واختها

الشايف النار انشده باله
شلون اذا تصعد على ذياله
مشرعبه وحدتهن تره يمه
اعرف النار ويه المره يمه
__
امشي واعثر بين وادم كل تتفرج عليه
طلعتني اكيود حيدر لحد ما رد عدل اليه
بنيتي باجر تمشي گوه بين وادم اجنبيه
هاي تالي الباب كلها تنوخذ زينب سبيه

ماكو واحد يسلم ابروحه
من ال وان كل ولدي مذبوحه
بثمنطعش ومفارگه عيالي
ضيم وقهر تتوارث عيالي
__