Hammasi oldingidan-da yaxshi. Ko‘p narsalarni anglayabman. O‘qishga, ishga boraman. Kitoblar o‘qiyman. Xonadoshlarim bilan qiziq mavzularda suhbatlashamiz. Imkon qadar yoqtirgan joylarimga boraman. O‘zimni juda yaxshi his qilaman. Faqat.., faqat endi yozolmay qolyabman..

Oxirgi paytlar odamlardagi bir jihatga ko‘p guvoh bo‘lyabman. Qilmoqchi bo‘lgan ishlari haqida faqat gapirishadi. Amalda maqsadiga erishish uchun hech qanday harakat ko‘rmayman. Yoki nimadir qilish uchun qandaydir fursat kelishini kutishadi. O‘sha vaqt ham keladi, afsuski, hech nima qilishmaydi. Shu tariqa, kunlar, oylar, yillar o‘tib ketadi.

Anglayotganim, odamlarni gapiga emas, hayotiga, yashash tarziga, erishayotganlari va vaqtini nimalarga sarflayotganiga qarab xulosa qilish kerak. Shunaqa paytlar bo‘lganki, suhbatlashib ko‘rib iliq taassurot qoldirgan tanishlarimni yaqindan bilganimda ular haqidagi fikrlarim o‘zgargan. So‘zlari amaliga to‘g‘ri kelmaydi. O‘zi umuman, odam qilayotgan yoki qilmoqchi bo‘lgan ishlarini hammaga jar solishi shart emas. Vaqti kelib, natijaning o‘zi gapiradi.

Bizga berilgan sog‘lik, chiroy, vaqt, imkoniyatlar, har birining javobi bor. Shularni o‘ylasam, hayotimni yanayam tartibga solaman. Ba’zi odamlar Alloh bergan ne’matlar haqqini ado qilmay, umri shunchaki o‘tib ketayotganini ko‘rib achinaman. Ularga yordam bergim keladi. Keyin qayerdadir o‘qiganim o‘sha gapni eslayman.
Boshqalarni qutqara olmas ekansan, o‘zingni qutqar. O‘zingdan so‘ralasan..

Bitta yomon odatim bor:

Ming zo‘r yozsin, kirillda bo‘lsa o‘qigim kelmaydi.

Biror bir ma’noli, yaxshi qo‘shiq yoki musiqa tinglasam Allohning buyukligiga, Uning mo‘jizasiga
yana bir bor amin bo‘laman.

@dilnozajorayeva_blog

Talabalik vaqtlarimda ham, hozir ham Alloh meni yaxshi xonadoshlar bilan siylagan. Bugun yana qizlar bilan choy ustida suhbatlashdik. Hazil-huzul, birinchi qor, adabiyot haqida degandek. Mavzu markazida Aytmatov va Omina opaning asarlari bo‘ldi. (Bizni juda botanik deb o‘ylamang, gurungni zo‘ri bo‘ladi bizda) O‘tkir Xoshimovning “Muallim”, Chingiz Aytmatovning “Birinchi muallim” asarini qizlar maqtashdi. O‘qib chiqmoqchiman. Bugungi suhbatdan hamma o‘zi uchun kichkina falsafalar kashf qildi. Dildan bo‘lgan suhbatlarda ko‘ngil yorishadi rostan.

13.11.2024. Toshkent. Yakkasaroy.

@dilnozajorayeva_blog

Ey men tug‘ilib-o‘sgan qadrli shahar! Senda qolish men uchun qanchalik qiyin bo‘lib borayotganini bilsayding..

@dilnozajorayeva_blog

Izhor
*Ona, sizga tilaklarimni aytgim keldi. Bilasizmi, men aynan sizni qizingiz bo‘lib tug‘ilganim uchun baxtli sezaman o‘zimni. Mehribonsiz, doimo bizni sabrga, yaxshilikka o‘rgatasiz. Eng yaxshi fazilatlarni ko‘raman sizda.

Meni eng ko‘p tushungan, ishongan, qo‘llab-quvvatlagan insonimsiz. Mendagi yaxshi hislatlar ham siz sabab, siz bergan tarbiya sabab.

Ona.., esingizdami, huv o‘sha sizga aytib bergan orzularim? Men ularni albatta amalga oshiraman. Sizga hali dunyolarni ko‘rsatadi qizingiz.

Onajon, tug‘ilgan kuningiz bilan tabriklayman. Sizga atalgan izhorlarim ko‘p. Ammo eng yaxshi ta’rifim shu bo‘la qolsin. Men kelajakda sizga o‘xshagan ona bo‘laman!*
@dilnozajorayeva_blog