سيدة قلبي اللي ماخذتني نهابه
و اتنازل لرغبتها محبه و شيمه

قالت الحب أشوفك ودك تصك بابه
قلت قفت ضعون الحب و أنتي مقيمه

كل بيتٍ عظيم و يستحق الكتابة
ما تعين وراه إلا محبة عظيمة

الشعر ذنبي اللي مابغيت ارتكابه
ودي بمسرحه ماهو بمسرح جريمه

اقدر امدح به الرجال وأخذ ثيابه
واقدر انصفه اللي موجعته الظليمة

ودي اضيع ضيعت ساري في ضبابه
بس ما ذوق لي نصر طعم الهزيمة .

لا زال عهدي في مكانه وانا أياي
والله ماتشمت علينا عدانا

حفظت حبك غصب عن كل وشاي
وغصب عن اللي طامعً في حدانا

مانيب ببوار ولاني بـ حكاي
والله يجملنا على ماهدانا

عهدً علي والعهد اصغر عطاياي
مايحزنك منهو سعى في بلانا .

*فمان الله يا أول من سكن بين الضلوع العوج
عسى دربك سفير و يا عسى الله مـا يخليني

توكل لا توادع رح عسى درب الجفـا المسهوج
يصادف درب فرقى عقبها مـا تلمحك عيني

سمحت من الهوى ومن القصيد ومن زراق الموج
ورميت أغلى مجاديف الغرام وجيت بيديني

أبغرق في عذابك لا رحلت و يصبح المنتوج
قصيد في حياتي سلوتي و أن مت يرثيني

واذا هبن بنات الريح للذكرى بدون سـروج
أبسرج مهرة النسيان و أرحل من عناويني

وبنسى لين أسج و برسل الونات فـوج فـوج
وبنسى دمع عيني ينتثر و أنساك من حيني

صبور أي و الله اني ما ثنيت العزم قبل أدوج
بريضان الجفا و اظما لوصلك لين تسقيني

شجاع اي و الله اني ما عرفت الذل قبل أسوج
قدم رجلي على درب لبيت اهلك يوديني

كريم اي والله اني ما عرفت الشح قبل تروج
دموعي في عيوني ثـم أشـح بحسرتي فيني

أحبك حسبي الله ليت مالك في سماي بروج
و لا لك بالبسيطه كود شي بينك وبيني

دخيلك لا تلتفت رح بفالك و أترك المرجوج
تغانم ما بقى لك و لا أنـا ما عاد يمديني

فمان الله سق ركبك على درب السنين العوج
و لكن طالبك لا اقفيت عني لا تخليني .*

دافعت عنك ولا نفعني دفاعي
وسويت لك قيمة وكبرت مركاك

وصديت عنك وحان وقت الوداعي
والدرس درسك والخطايا خطاياك

واليوم خليتك مطبٍ صناعي
أمر وأنت معترض و اتعداك

وحنا وطينا فوق روس الأفاعي
وشلون ناقف عند مثلك وشرواك .

من عطاني قدري عطيته احترامي
ومن تجاهلني تجاهلته وطفته

ومن يدور قربي عطيته اهتمامي
ومن يقفي عني اهملته وعفته .

يعرف أسمي ويعرف وقفاتي ويبخصني
ويدري إني فوق هِقواته وفوق أماله

ويدري إنه مايزودني ولا ينقصني
لو تغني حنجرة الاِبداع من مواله

كانه أرخصني فهو تافه وإذا ما أرخصني
قلت من ينسى الجِمايل مايسرك حاله

ان نصيته في لزوم أقفى قفاية حصني
وان نصاني جيت من بينه وبين ظلاله .

أنا مهبول وجايزٍ لي هبالي
هبال طيب ولا صحاية رخامه

هذي تواصيفي وهذي خصالي
يقولها اللي مازهف في كلامه

إن جزت لك فـ أنا الرفيق الموالي
وإن عفتني مسموح ومع السلامه .