https://youtu.be/LaNgyM05CLI?si=Pz2GbP1wzUL2_rSF

بالخطوه الاوله اعله الهزيله
وانه التعب شد بيه حيله
ويلاه ياروحي العليله .. فراك الاهل موت
افراك الحبايب رايد الحيل
وانه كضاني مسابك الخيل
انه بهزل واهلي مجاتيل .. ومسموعلي الصوت

المالمه كلبي ومت اوياه
اتلمه الحصيره واويلاه
والمن مشينه ما ندري
وشنهي اليجيني والالكاه

جرح الكلب ماينوصف
ماكو حجي يكفي المصيبه
انه اميرة حيدره
تالي الوكت اصبح غريبه

يامايله ومحد عدلها
الدنيا اويه روحي بله شلها
يحسين كوم وروح كلها
لا مو وحيده احنه اهلها
___
عنكم مشينه وكلبي ماهاد
ومناشغ اكضيها اعله البعاد
صب الدمع عالميت اشفاد! .. فوك الثره ايضيع
ميتنه مو مثل الكضو موت
ميتنه ما حصلّه تابوت
انلم بحصيره وماكو اي صوت .. ولا عنده تشييع

ميتنه مرمي اتلث ايام
يشاهد خواته بلايه اخيام
كام ووكع ابن امي اهناك
لمن سمع بدروب الشام

اسمي انسبه وخدري انسبه
شنهو اكثر يمر ها يهلنه
طلابه للحك ادري بس
شو محد يرد حكنه النه

هاي الارض مابيها اي روح
لو تنسبي لو تبقه مطروح
الماله اخو عالهزّل يروح
ومثل الحسين اكليبي مذبوح
___
يهل الاصايل يهل الاخيام
ينام الضلام وعيني متنام
سهم الهجر مو مثل السهام .. دلالي محتام
شيبي اخذ حصه بحياتي
لا عدله جيتو لا مماتي
بكاع اهلي موتي امنياتي .. ماريد بالشام

المابمها اهلها اتعيش اشلون
الغربه نهيبه لو تدرون
كلساعه اسمي يغيرونه
لاني الغريبه ولاني ام عون

يهل البخت عيني بجت
من يا زمن هيجي صفينه
مابيدي شي بس الحبل
وخوف قلق داير علينه

من يا وكت ادخل على اجناب
فوك الهزل يحديني سلاب
وانه الجنت ماواصله الباب
واسمي الصفه بكل طاري ينجاب
___
حنيت لايام الصبه اهواي
من جانو اهلي يمي واحذاي
كلشي احتمل وخواني وياي .. جنت انه اميره
ماصدك امشي ابلايه رايه
ماعرف اعوفنكم ورايه
يحجون اخت الكمر هايه .. صارت اسيره

حنينه للكافل وحسين
ماتهده لحضه هاي العين
من ساعة الحركولي اخيام
ومدري اروح وامشي الوين

من حركو اخيامي علي
ومن اركضت لسه يخوتي
بلوه تفض بلوه تجي
ووي كل مصيبه اتمنه موتي

هواي المصايب شحجي احتار
منا عده ومنانه الازغار
بيدي طفيت الخيم والنار
وهسه اشاكف عنهم احجار

علي رضا المحمداوي

كأني بها سلام الله عليها في اخر لحضاتها وهيه لا تتمنى ان تموت في الشام والتفتت الى كربلاء بدموعها وقالت
___
مارايده
وحدي اضل مارايده
جم دوب اضل اعله الدرب
منتضره جيه وكاعده
وحدي اضل مارايده
فت كلبي وضعي ياهلي
مو حيلي حته اعيوني صارت بايده
كلما اشوفنلي اخت
ويه اخوها بالدرب
عيني تصد الكربله
وبيدي اكضنه الكلب
يا عازتي
وميلة ضهر عكازتي
هالحان موتي وما اجه الدكلي الصدر
وكلي امش بحمايتي
مو كافي كل هذا القهر
مو كافي كسران الضهر
مو كافي ليلي ابلا كمر
اسهر بليلي وعالهزل امشي الصبح
يمته اشوفن راحتي
شنهي السبب
ما شفت شي من العمر بس التعب
وللعافني هنا وحدي
أمغوركه عيوني عتب
شيردني ساعه لكربله
وبدمعي اكله واحجي اله
ياخويه
امن الشام اجيتك شارده
مارايده
وحدي اضل مارايده
ما جيتني الشام الهضم
هسه ارد ابادر يالمتت ماعندك ام
هسه ارد اجيلك والهضم ما ينكضم
منضر وداعك عالهزل
ليهسه ضل بالذاكره
مو تدري يا جدم المره
من تطلع ابلايه اخو
نيتها ابد ماراشده
لمن رحت
ما ناشدت .. وين السفر
بس اعله وضعك ناشده
كتلهم ابن امي اريده وما يصح
امشي واعوفه اعله الترب
خويه
ما همني لا هزله رخت
ولا يوجع ايديه الحبل
توجعني خوتنه صدك
توجعني عشرتنه سوه
من جنه نتلاكه مثل عين وضوه
من جان ماعندي جرح
جي انت لجروحي دوه
ولمن غبت
يلجمني ضل حته الهوه
كل ذن على جروحي ملح
كل ذن سؤال ابلا شرح..
والله وفلا ناسيتك
وذيج الخرابه الشاهده
وحدي اضل مارايده

علي رضا المحمداوي

كأني بأشبه الخلق بجدتها فاطمة الزهراء (رقية) صلوات ربي وسلامه عليهن
تتكلم مع جدتها وتشكوا لها ماجرى في ارض الكرب والبلاء:

___
ياجدتي .. انه رقيه واحجي الج كل خوفي
ياجدتي .. من وچت اخيمنه طفت بجفوفي

من طاح وكسر كلبي .. ابوي امن المهر للكاع
دريت اخيمنه محروكه .. وخدرنه ويه المخيم ضاع
بس انه الهضمني حسين .. راح وماشبعت وداع

مو كلي بويه رايح وراد
جا ليش راح وطاح ليغاد
شلون الزغير يسابك الخيل
من طاح اجه اعله الخيم هداد

هبت زلم عالخيمه واحتارينه
جدمي انجوه وتشهدلي اختي سكينه
هم طبت اعله النار مثل الطبو
ارماد المخيم يمه طابع بينه
___
ياجدتي .. من طاح ابوي وكثرت الخياله
يا جدتي .. ايهم ابناته وما يهم الحاله

اجت خياله للغالي .. تدوسه وعيني هماله
الضامي ينسكي بالماي؟ .. لان متدهوره احواله؟
مو فوكاه تدوس الخيل .. وتطب النار لعياله

كوه وصلته وكلبي محروك
احجيله حالي وهضمة الشوك
توني كلتله بويه يحسين
ولنها ترن أجراس للنوك

معقوله يازهراء راح انعوفه!!!!!
ونمشي أسيرات ونطب الكوفه
راحت الخيل واجت ناكه اعليه
ومن شافهن رجفن هواي اجفوفه
____
ياجدتي .. حادينه صيح مابقالج كلشي
ياجدتي .. بكلبي كلتله ما اريدن امشي

من جابو هزل يْمه .. درت عيني على عيونه
كلتله بويه راح نروح .. كام وطاح لضعونه
كام ومنعته اسهامه .. تدرين ابنج شلونه؟

ابنج وحيد ابلايه عوان
فوكه الخيول امخليه نيشان
كام وكع جي بنته عالنوك
شاهد عياله ابلايه وليان

شاهد عياله اعله الهزل مرعوبه
وهوه صريع ونايم ابلا ثوبه
راح الضعن يايمه بس الهضمة
جثة اوليدج عالوجه مكلوبه
_
يا جدتي .. طبينه ديره بس غريبه وكلفه
يا جدتي .. بيها قصر بيها خرابه ووكفه

اباب الساعه يايمه .. وكفونه ثلت ايام
اصد عالراس حاجيته .. بويه شلون وين انام
جاوبني عدوه وصاح .. الخرابه مسكنج بالشام

مادام ماكو هنانه مأمن
طب الضعن للشام المن؟
فوك التراب اغفه اسيره
تدري الخرابه ماهي مسكن

تانيت اشوفه وكمت احسّب يمته
وجابولي راسه بالخرابه وشفته
الطم كمت فوك الطشت يايمه
امن الضيم طلعت روحي بس شابكته
___
علي رضا المحمداوي

حر قلبي على قلبكِ مولاتي ??
____
عباس ياطيب المحاچي
يا زين يالتسوه البواچي
جفني عليك اهواي باچي
ما بطل وما هاد ونته

يالخوتك مامنهه خوه
فوك الهزل كلبي ايتلوه
جي عفنه ناس اهواي تسوه
بهالحضه خويه موتي ردته

للموت ابقه ابجيك للموت
ميته وهزلهم خويه تابوت
من يمته ما صحالي زاتوت
متعوده كافل يزت اخته

حنيتلك ودموعي تجري
عباس بعدك ضيم عمري
تدري انهب ياخويه خدري
والضيم كله بعيني شفته

تمنيت اموت اهواي عباس
بس خاف اموت ابين هالناس
صلفه العيون وفاجده احساس
يشمتون بيه و ابجي سكته

اشكد حشمت بس ما الي جواب
ياخويه اختكم بين الاجناب
بهالحاله لو موجود ابو تراب؟
مايرضه هيج اتصير بنته

(حيدر علي) لو حاضر اليوم
ويسمع غريبه وكلبي مهضوم
جا خويه شفنه ادموم وادموم
لو يدري ضيم العايشتّه

احجيلك مضيچات حالي
افراكك اشد من ضب حبالي
ياهزله وانته اهواي غالي
مو انته كلبي اهناك عفته

شلون انسه ايام الصبه اوياك
لمن جنت ما مل امناغاك
هسه صفيت ابجيك وانعاك
افراكك جبير وكلبي فتّه

ما اعرف امشي ابلايه رايه
ما اعرف اتركّم ورايه
طاوعني جدمي شلون هايه!!
شلون ابعدت .. معقوله عفته؟!
_
علي رضا المحمداوي

السلام على الامام المضطهد المضلوم المكروب المبتلى ???

____
أنه السجاد ياضيمي .. وبيه افتر عكس وكتي
ثاري العله مو بالروح .. عليل وعلتي عمتي
اشوف اكبالي عماتي .. مجتوفات عالناكه
ياروحي شبعد نصبر .. شفنه أشكال ما متي؟

وين نروح .. احنه اهل الوطن واتغربينه
وين انروح .. غير الضيم واحبال شبدينه
وين انروح .. الدنيا انكلبت ودارت علينه

ضعن النبي .. جم كسره بي
والسنسله شمسويه بي
من ياوكت .. هيجي صرت
معصوم وحبالي بدي
-___
اه اشكد تمر عالبال .. مصايب عالبشر كثره
بس ماكو مثل ماصار .. على ابن فاطمة الزهره
وكع والخيل اجت لينه .. وجيب البيه حيل يكوم
وركضة عمتي بالهيمه .. ياويلي شكثر مُره

واويلاه .. من سئلتني زينب دمعي جاري
واويلاه .. ارفعيلي طرف خيمه وقراري..
واويلاه .. فرن عمه زينب بالبراري

طلعن ركض..وانه انتهض
اتجه عالمسند واميل
بهاذا الامر.. ريت العمر
يخلص لمن هدتلي خيل

____
ماريد اجرح بعمتي .. ما اشكيلها همي
ومطمن لان عمتي .. بكل شده تضل يمي
تصبرني واصبرها .. تواسيني و اواسيها
تكلي عمه أنه شبيدي .. وانكال بغرب اسمي

اه الشام .. شسوه بكلبي عذبني وكسرني
اه الشام .. منه ماكو يوم براحه مرني
اه الشام .. ويلي يريد ياخذ ثاره مني

شام الغرب .. يشلع كلب
ضعن الرساله الهاشمي
مجتوفه ادي .. وكلها علي
تنضر وأنه بحبلي احتمي
____
مجروح الكلب مجروح .. وعيني بالخرابه تنام
شنو الاذاك سئلوني .. وجاوبهم الشام الشام
الشام امتعب عيوني .. وتعبت بيه عماتي
شكثر مضلوم واويلي .. بحياتي وبمماتي الام

مامرتاح .. هم وغم بلاء خلصت حياتي
مامرتاح .. ويم وادم غرب صارت مماتي
مامرتاح .. جي بالشام عايفهن خواتي

بارض الكفر .. عفت الخدر
والله الجرح فت الجبد
شلون اهده لا .. وخدري خذاه
شام الغرب ماضن يرد
____
علي رضا المحمداوي

رغم المخاطر جيت
لابن امي وتعنيت
حنيت اله حنيت
يدري بكلب اخيته حنين
امشي وطيح وخوف
شحال العقيله شوف
ارماد الخيم بجفوف
بيدي طفت خيامك حسين

مو بيدي خويه كلبي يريد
ماعرف اشوفك ساعه بعيد
وشلون اعوفك وحدك غريب
ماهم ابد لخيول وزلم
طول المسافه بس بيك اهم
وصار الندائك كلبي مُجيب

كلبي يلبي الدعوتك
والـ صوت الا من ناصر
وجيتك اخفف غربتك
وابعد عليك الحافر
تكلف يخويه شوفتك
ضيعة خيامك باجر
___
جيتك اريد اخوان
عامي النضر دخان
من جابو النيران
يمي ردت تعين الكلب
افراكك يذوب اجبود
يمك كعدت اكعود
هلبت اليه اتعود
هاك ايدي لا تنام بترب

مديت اديه حدرك عذاب
نام اعله اديه مو عالتراب
ماذيني نومك فوك الثره
يطاوعني كلبي عنك اروح
لا مستحيل بهاي الجروح
كلبي ولا ينطيني تره

مو انه التعوفك يخي
ولا انه تنسه الخوه
جسمك ودمعاتي بأدي
وفوكك صرت اتلوه
ما ابجي لجروحي و علّي
ابجيلك انته التسوه
__
بس انته تسوه النوح
وعندي كلب مذبوح
ياخويه وين نروح
أنطيني حل يبعد العمر
مامنلجم متني
خوتنه لجمتني
كلشي انحجه عني
واسمي انحجه وجروحي اشكثر

جلمة وحيده عني انحجت
وياخويه هاي الناكه اجت
وين امشي عنها والليل جل
بين الشريعه وبينك بُعِد
ساعه اروح وساعه ارد
منكم اريدن يخواني حل

يامره التحمل يامره
ياخويه بس جاوبني
بجساد اهلها حايره
شلون الزمان يذبني
شحجيلك الصار وجره
نومك تره معذبني
___
خويه خيم عدنان
ارماد وعلى التربان
عطشانه ياعطشان
انت العذب يبعد العذب
نار وسبي وضلّام
ومسابك الألام
ومشونه لأرض الشام
اجهبنه بشر ولا تنجهب

اختك ابد ما شافت هنه
الحكلي خويه بالشام أنه
محد فزعلي منكم عجيب
صاحو غريبه وانه التفت
أمن لا أبالي خويه اتعبت
ومنين ابو فاضل انه اجيب

بالشام موت ام الخدر
وسفه والف ياوسفه
اسمي الكبل عد اهلي سر
هسه الخليقه اتعرفه
شنسه وشعد وشنتضر
وجرحي عليكم نزفه

علي رضا المحمداوي

يا صادق العلم مدد
___
الصادق أنه .. وبروحي حسره
بداري شفت .. ألنار گبره
وركضت نساوين
داري احترك .. ونسواني ركضن
مثل الامس .. بالهيمه فرن
امن اخيام الحسين

من شبوا النيران بينه
ابالي اجت ركضة سكينه
من اطلعت من الخيم صوب المصارع
حاولت اچوي بنار اديه
حته اواسيها رقيه
بس انه ما عندي ضعن بالغربه ضايع

الله يعين العافت اخوتها
وراحت غريبه وهزله ناكتها
صح انه عايش غربه بس عمتي..
ماكو مثلها الغربه عاشتها
___
ماينتهي .. لال الزجيه
ماينتهي .. ضلم البريه
من طه لليوم
دار الوصي .. امن احترك نيران
معناها ضل .. احسين عطشان
وابقه انه مضلوم

لجدادي أنه مكسور كلبي
لزين العباد الوحده مسبي
شجاب العليل اعله الهزل! ماترهم اعليه
اه يا ابو الباقر عذابه
ينومونه كل ليله بخرابه
ليله كضه هم ودمع..ومحد دره بيه

من حركت اخيام الخدر ناره
َوصوت انسمع ماسامعه جاره
هدت الغاره اعله الخيم ويلي
شلون العليل يسابك الغاره؟
؟؟
___
للكوفه ادير .. اعيوني لوعه
للضل غريب .. اتعينه طوعه
بيا غربه مسلم
الكوفه بجي .. وخلتلي حيره
بيها مره .. دخلت اسيره
والناس تشتم

ديرة ابوها و عذبتها
بناكه هزيله ام عون اجتها
والكوفه اخ الكوفه اجتها ام عون بحبال
والشام ما خلالي راحه
والحادي مايسكت صياحه
ينادي ادخلن للقصر يا نسوة الـ آل

طلعت اميره بكافل وجربه
وتالي صفت مكسوره بالغربه
اه السبي عماتي للكوفه
والشام يوجع بالكلب صعبه
___
ويلي الجرح .. كله مصيبه
راس برمح .. واخته غريبه
وماضاكو الماي
كلما انام .. واهده ليلي
عمتي بحلم .. تنادي كفيلي
محتاجته هواي

كل يوم عندي امصيبه كل يوم
العمته بهزل مايلفي اله النوم
بنهاره يبجي وبالمسه عنده عزيه
ابجي لجسد فوك الترابه
وابجي رقيه تصيح بابا
وليلى ورباب ورمله هم خوله وصفيه

وابجي رضيع اتغسل بدمه
ليهسه ما كايلهه يايمه
بكماطه واتوسد صدر والد
الفوك الثره عاري بقه جسمه

علي رضا المحمداوي

يا هيبة امير المؤمنين مدد
___
يبن امي اشلون .. امشي ابلياك
المفروض ام عون .. مذبوحه وياك

شلت ايديه امن الهزلّ
بس حبل ايدي المايقبل .. ومحسوب اوداع
غارن ياويلي اعيونك
راح امشي واحمي اضعونك .. وجروح امتاع..

اعذرني يمكم ما متت
لا شيعيناكم
لا متنه وياكم
ورحنه بلياكم
فوك الترب كلبي عفت
الحادي حرك دمي
كتله الاخو مرمي
نزلني لابن امي
___
اطمن يحسين .. اعيالك وياي
انطيهم عين .. لو رادو ماي

اوياي اعيالك مامونه
جرحك يحسين اشلونه .. لتهم النه
خويه الكوفه اوصلناها
واختك ابنك وياها .. ما يهملنه

انته اهتم بجرحك بعد
لا تهتم اعليه
والبيك مابيه
الف وتسعميه
خويه العدو بينه زهد
ومحد اجه وكايل
هودجها ضل مايل
فشله امن ابو فاضل
____
مجروحة حيل .. ومجروح احساس
من كد الخيل .. ومن كد الناس

انته الخيل امتعبتك
والناس التجرح اختك .. ابلا شيمه وراي
زينب زينب كلشي يصيح
الطفل الضايع واللي يطيح .. والراد الماي

مرعوبه اطفال الضعن
ومستغربه الحاله
ومحد اجه اباله
تحدينه جتاله
لا وين ودانه الزمن
للشام ووداني
ومحتاجه خواني
والموت ماجاني
__
محنيه النوك .. وكلبي اشكد مات
كاتلني السوك .. وباب الساعات

متعوبه ومحد جاني
يحسين وكلبي امتاني .. تلفون اليوم
اشكد اكعد واتمنه اتمر
ويكتل ياليل الينطر .. ما يهده النوم

المفروض ميته بالخيم
ولا اوصل اهنانه
وماكو اخو ويانه
تعبانه تعبانه
لا انته لا راعي العلم
والوالي من دونه
للشام جابونه
بخرابه خلونه
___
علي رضا المحمداوي