خروج الضعن

عند خروج الضعن كأني بمولاتي ام البنين صلوات الله وسلامه عليها

يا ام البنين مدد
--
بمتاع الضعون
وديت العيون ، يا عين تنفع ونتة رايح
مهضومة اكلك
تاخذني رتك ، يمة اسكتت وبروحي صايح
بل غربة شلي
و لو ما تردلي ،اگضي العمر اه ونوايح

ما متنطرة هيچ التالي
تفارگني وتكسر دلالي
وبجفوفك صعدت اضعونك
يابو رقية تسولف عيني
ورحت وتوميلك چفيني
اجبر كلبي ودير عيونك

يمة ، يمة ،
كلبي نصيبة
يفارگ حبيبة
وحالي برحيلك
حال الغريبة
--
شتنشفلي شيلة ؟
و ويل العليلة ،ثگلة وي ثگلة تگابلينة
وعگب العلاوي
المغرب نعاوي ، وبچة الحجر ليَكم نعينة
اترافگ الباب
التفگد احباب ، و يمة المدامع تحدي بينة

ابچي الهمهة وتبچي لحالي
وشنهي يهودة الفاگد الغالي
خيام بگلبة تشب وغارة
والصعب يا يمة احچيلك
عن حال الضلت توميلك
ياهو العاش الغربة بدارة

يمة يمة
بدارك لچنة
بل غربة عشنة
متنة وراكم
اهنا يهلنة
--
من حلمي فزيت
وميتة يا ريت ، ولا شاوف حالك بل صحاري
يا مسلم تصيح
ويا جون وتطيح ، استوحدوك الگوم ثاري
ولسه الدهر ضام
نيران الخيام، يا كون حركو بية داري

ومن رحت لوحدك للهيمة
ادير بطرفك صوب الخيمة
و همك لا ماي ولا روحك
همك بل ما طلعت مرة
شلون وتطلع نص الصحرة
لختك زينب سمعو نوحك

يمة ، يمة
يل تدري بل حال ،،
عليهة الحمل مال
زينب غريبة
يصدلهة چتال
--
فزيت والنوح
سولف بل جروح ، من اسمعت بل طف بچيهم
اطفالك تريد
مو ماي يبعيد ، طولك يضل افياي ليهم
وبروحتك هاي
ضلو بلا راي ،ويمة الخيم شبت عليهم

اطفال وكلهة اتريدك حل
وين يفر يمة الما يندل
وبل بر ضاعو ويلي اطفالك
وزينبكم طلعت بل هيمة
بلا اخوه ولا راي وخيمة
صعدت عل تل تبچي لحالك

يمة ، يمة
عل تله اختك
والخيل اجتك
وبطيفي انه
اتگوملهة رتك

سجاد حيدر العكيلي
لطلب اللحن
@ss_tt18

رابط الخاص

خروج الضعن

مولاتي العليلة صلوات الله وسلامه عليها تروي حزنها لحبيبها عبد الله الرضيع صلوات الله وسلامه عليها

يا ام البنين مدد
--
گبل لا يشيل ضعن احسين ويروح
سهرانة بگيت ودمعي مفضوح
عليلة ويم مهد عبد الله ضليت
مجروحة وانوح لگلب مجروح

عبد الله خوية باجر وداع
من يمي ليش تروح شبساع
منك لون اسمعلي چلمة
امتاع تبقة لهجرك متاع

شدت علگ خوية الگلب
شدة اعلة زندك بل غرب
خافن يطر فجر الهجر
ونتوادع وهاذة الصعب

ادموعي تنشاع ،،يا فجر الوداع
__
غافلت الضعن بليل ومشيت
احسب بل محامل وادعي ياريت
لختي وهاذة لمي وهاذة لحسين
محمل رَت الي واشكد تمنيت

رديتلك خوية اتلوة
مشية اسير امشيت كوة
محنية ودموعي اعلة طولي
باجر افارگ ناس تسوة

يا خوية لو صعدو هلي
وضليت محد صد الي
اشبگني گدام الضعن
بلچن ابوي يحن الي

امحضرة امتاع,يا فجر الوداع
__
__
يبلسم علتي ياسباح الدليل
فجر باجر غدة بل هندس يعيل
يعبد الله الگلب دكاتة وياك
اموتن لو اشوف اضعونة تشيل

يمتة العليل يفارگ اهلة ؟
وهوة الوداع بوحدة علة
وكلب اليفارگ ضعن الحسين
شلة بعد ويعيش شلة

للموت عفتوني صحت
بضهر المحامل من طحت
العاشر بگلبي بدة
ونوح الثواكل من نحت

طريت شبساع ، يا فجر الوداع
--
من سار الضعن كمت اعلة حيلي
ركضت ويمي احس يركض دليلي
مشة ضعن الهواشم وانه ضليت
بدموعي بجفاهم يكضي ليلي

شنهي اليهودة البيتة جرحة
تصحة الجروح بليل تصحة
وهضمة شفت بعيون الحسين
راس الحنين براس رمحة

ولضعونة دمعاتة تهل
ايتام ويلمهم حبل
وبعينة شفت اكبر جرح
ام الخدر فوك الهزل

ضاع الخدر ضاع ، يا فجر الوداع
--
سجاد حيدر العكيلي

شهادة مولاي موسى ابن جعفر صلوات الله وسلامه عليه

يا موسى ابن جعفر
--
من زينب اجيت وشام الاحزان
أمن الماتت غريبة ابلاية خوان
من الشيعة اريدن ليَة عوان
ينوح وياي لبني الگاضي مسموم

يم راسة اگعدت كعدت ثگالة
و الكاضم هضيمه يصير حالة
عزيز ابني غريب شلون شالة
وينادي بذل عليه و گلبي مالوم

الجنازة اعله الجسر ضلت رمية
مثل ابني الگضة بل غاضرية
نفس هاي المصيبة ذيج هية
والهن بل دمع دلالي ملچوم

بطامورة گضه نحبة و غربته
ولا عنده اخو يحضر دفنته
بس ابنه اجه و يهل دمعته
و حدب عالجنازة و حيلة مهدوم

ثكيل الگيد وزنه و هم عذابة
يفزز جرحه و يذكره بمصابة
شما عاين عليه يلكه الخرابة
ويصب ادموع عينه وگلبه مهضوم

اطرشمن واگلمن يسرچ الخيل
يصل طيبة وينادي ودمعتة تسيل
ثار نضاف وي ثار المچاتيل
لبو طالب يوصل هاي العلوم

يسل سيفة ويحط لهل وضع حد
الدهر خله العبد تالي تسيد
اليوم الكاظم بغربة توسد
من حدر الترب يا حيد اليگوم

وين الصحته خلف الباب يچبل
ياخذ ثار ولدي و دمعي اليهل
وثار النزلت بموخوش منزل
و الجسر الرصافة يحضر اليوم

سجاد حيدر العكيلي

شهادة مولاي القاسم صلوات الله وسلامه عليه

اللهم بحق ضلامة مولاي القاسم عجل لوليك الفرج

يا قاسم العطاء مدد
--
شحال گلبك سيدي ونتة غريب
تذكر الضل بالفله عاري وسليب
ما نشف منك چفن من النحيب
وا حسيناً وحسيناً ندبتك

لو شفت مهيوبة يمك قافلة
ترسم بعينك خيم نص كربلة
طفلة تركض بل دمع صوب الفلة
ونار تنزل فوك خدك دمعتك

شما تشوف الجاري يمك تنفجع
تبچي حد ما تگضي عينك جن شمع
بحسرة يا مولاي تلطم عل ضلع
وبل دمع مولاي تترس چربتك

هضمة من اصيارك ورابي بجرح
تنوح طف النايبة ليل وصبح
تنحني من تسمع بطاري الرمح
مثل حنيَي هلال بانت حنيتَك

بكل غروب يموت مولاي الدليل
هضمت السجاد بدموعك تعيل
ساعت الجابوهة لضعونة الهزيل
وموگدرهة بهزلة تمشي عمتك

يا چبير الما وصل حدك چبير
عايش بغربة مثل حال الأسير
تدري لو عرفوك بس موتك مصير
سكتة تبچي وموت تنعد غربتك

نار بدليلك تشب تصهر حديد
يابو اه الصعبة لو لحضة تهيد
عليَك تتسيد صعب تالي العبيد
بين عينك ثار بانت هضمتك

مناطر القائم يرد كل الحگوك
ضلع مكسور وضعن راح اعلة نوگ
والمصيبة اسرار طرن ويلي سوك
بطلعت المهدي تهود ونتك

سجاد حيدر العكيلي

شهادة مولاتي فاطمة

يا موسى ابن جعفر مدد
--
ربيتة گلبي اعلة المصيبة
وكلشي يهجرة الة نحيبة
وجرح الزجية يبقة جرحة
جرح الفلا رايدلة طيبة

امنة الزجية ، اليستأذن امن يطب ابوهة
اعظم رزية ،، كسرو ضلعهة ومارعوهة
واجب علية ،،ابچيهة وابرء من عدوهة

امنة الزجية وام الغيارة
واجب عليهة كلبي انكسارة
وبدموعي اواسي حيدر وليهة
الموصة جان وحركولة دارة
ــ
التكرم ابجفهة اليجيهة
ثجيل الجذع ردو عليَهة
واكبر هظم جارحة شافت
محسنهة طايح بين اديهة

ثالث ولدهة ، ،مالحكت اتشيلة بحضنهة
تنوح لفگدهة، ،صبح ومسية تعالة ونهة
وشيبقة عدهة،،ألتشوفة طايح يمهة ابنهة

عل عتبة محسن طايح رمية
وامة تنوح لهاي الرزية
كسرو ضلعهة وحرموهة ابنهة
ومحنية صارت تالي الزجية
---
ماكفو ابكسرة ضلعهة
اتعمدو رادو فجعهة
گادو علي ومن يمهة اخذو
ولحگتهم الزهرة ابدمعة

كالت يسلمان ،مال الحمل يا عم عليَّ مال
بضلوعي نيشان ،وحگي انسلب ورضيت بل حال
لا چنة ما هان ، گبالي علي يجتفونة بحبال

لحيدر تهم متهم بوضعهة
طلعت وره ابهمهة ودمعهة
جفهة مشت عل حايط تسندة
وبجفهة الاخر لزمت ضلعهة
---
روحي العليلة يضل حزنهة
بت النبي سراً دفنهة
امنيتي عدهة مرقد انزور
ونبچي لياليهة ابصحنهة

گلبي يتاني ، اليوم اليرد حگ الزجية
سنين الثواني ، أبغيبتة من تمر علية
لصاحب زماني ، اتنطر الحد المنية

كلبي بعزاهة يجدد وُعيَدة
وادعي ودعائي بدموعي اعيدة
يافاطر ابحق فاطمتك ادعي
حي اعلة ثار الزهرة الشهيدة

سجاد حيدر العكيلي
لطلب الحن
@ss_tt18

رابط الخاص

شهادة مولاتي فاطمة دخيلهة

يا موسى ابن جعفر مدد
--
امعصبة والحيل مهدود
والدار طايح منة عامود
تروة الضمة دمعاتي وتزود
عگدة الحزن بروح معگود

اعلة اليتيمة مُوحش الدار
ولزوم الهة يواسي خطار
ما صار هاذة اوياي ما صار
الّة انه حركو بابي بل نار

بل باب لذت بحيلي بل باب
من اندفع بجفوف الجناب
والباب زاد عليَة الصواب
ما طاب ضلعي نوب ماطاب

حرمة وحيَدة ابيتي ضليت
وموصة جان ابسيفة ابو البيت
أمخدرة وحگي تمنيت
گبل ال وان من ميتة ياريت

تلث ليالي وحگي سلبو
ومثل الضلع دلالي كسرو
من كتلو بروحي الدللو
عل عتبة مرمي وليدي خلو

يم مهدة چبت العلاوي
واتگابلينة بل نعاوي
ناوي يموت الينعة ناوي
اليفگد عزيز يعيش خاوي

انه الضلم كسرو ضلعهة
وعگب النبي ما كف دمعهة
بهل حالة ما رحمو وضعهة
من الهضم رادو فجعهة

نفسة العليَ چلمت وان كال
كايد علي كدامي بحبال
يا حال حيدر والله يا حال
الضيم العلي ما حملتة جبال

ايد اعلة ضلعي وايد دمعي
تمسح ، اخاف يشوف وضعي
ماعوف حيدر انه طبعي
وسلمان چاني وكلي رجعي

چرت النفس ثگلت علية
لمن خذو حامي الحمية
جمرة بدليلي أتسعر بية
ما ارجع الة ايدة بدية

سجاد حيدر العكيلي

يا علي ابن الحسين مدد
عند رجوع الضعن الى كربلاء كأني بمولاي زين العابدين صلوات الله وسلامه عليه يقول
___
ردينة من ذيج الخرابة
ومن هضمت احجاية غرايب
يابوية اجن امدللاتك
بحسرة من شام النوايب

صارت
الصعبة هل صارت
عليَنة الغرب دارت ،، بعد الضماية

بينة
دار الوكت بينة
من بعد اهالينة ، ما عدنة راية

يابو الهلا شچاية اجن ليك المداليل
من طيحتك حد كربلة الهزال اتميل
حتى الهوة بنص الغرب بضعونك يعيل

ايام هنة و الحچي هواي
يابوية هينة شحت الماي
__
من الناكة طاحلك مدامع
عماتي واسرار الظعينه
وتسابگن ليك الثواكل
وبالدمعة صبِح كل حجينه

طاحن
مثل الخيم طاحن
يابو الشيم صاحن ،الفركة صعبة

ليهن
جاوب يواليهن
متربة اعبيهن ، ابممشة غربة

گطعن درب بيهة الهضم ايهد الجبال
من غربة راحن للغرب واليحدي چتال
تلمهن گبل بس خوتك لمتهن احبال

يمشي اعلة هزلة المالة حماي
يابوية هينة شحت الماي
--
من العاشر اليوم اربعينك
مباوگ النوح لمصابك
الهضمة يدرن بل جرالك
وحاديهن السبب غيابك

غربة
الدمعة بل غربة
يابو الضعن صعبة ، اتگلف اسياط

درهة
ام الولد درهة
يابوية يكسرهة ، وتحضن بل گماط

اول ابن لأم الأبن يابوية من راح
تتخيلة چن بل حضن لا مو بل رماح
اول طفل خلة الهل تلزم بل صفاح

محچاها يمه ردلي يضناي
يابوية هينه شحت الماي
--
يا حيرة محتارة العقليه
ما بينك وابين الكفلها
يم الگمر لو رادت تنوح
تشتاگ الك يا كل اهلها

تندب
يخويه من تندب
ويمك دمع تسچب ، تأخذها الشلون

رادت
تروي الترب رادت
عطشان من كالت ، ذبتلك عيون

چلمت ( وحك جدي) انه ياخوية عطشان
مثل الخيم وسط الگلب لاحتهة نيران
سابيهة من گبل الهزل افراك الاخوان

الفرگة جانت بوية حداي
يابوية هينه شحت الماي

سجاد حيدر العكيلي

@ss_tt18

رابط الخاص

كأني بمولاتي عقيلة بني هاشم صلوات الله وسلامه عليها عند رجوع الضعن الى كربلاء

قصيدة الاربعين
يا فاطمة مدد
____
رديت من هضم السبي مكسورة أغصان
ويحديني شوگي لكربلة لگبور الخوان
تسبيحي چان البل درب عطشان عطشان

يامشي درب السبايه
مالي عرفه بالمواجع
جانت تفييلي رايه
هسه عشره اويه المدامع

وبعمري ماضللالي شَيَ
طاحو ومات بعيني ضَيَ
حته النياك تحن عَليَ
___
كل خطوة تمشيهة الهزل تاخذنة الجروح
ولو طاح من هزلة طفل هم يبقة مطروح
مثل البقو فوك الترب مذبوح مذبوح

هاذة حال الراحو اهلة
يبقه بتراب الصحاري
من النياك تطيح طفله
تواسي ذاك الباقي عاري

الملمومة چفينة بحبل
مايگدر يصعد الطفل
شكد عالي يا ضهر الهزل
____
ولمن وصلت لكربلة اذكرت المصايب
اخيامنة الچانت وطن ارماد ابترايب
ياولي من دار الزمن وصرنة غرايب

ينرسم كلشي بخيالي
ركض الأطفال وخيمنه
(بجلمة الفرّنً) دلالي
ضاع وي طيحة علمنه

من طاح بل حومة العلم
ابظهرة طاحتلي خيم
ودرب السبي ليه انرسم
_
بگبوركم لاچن احس اوگفتولي وگفة
تدرون مهضومة واون والهضمة گلفة
مشوني يا خوتي بدرب الماچنت اعرفة

جيتك ابكسرة غربتي
فاگدّة فيكم يخوتي
مرة مانشفت دمعتي
صعبة بچفاكم خطوتي

اسرارك اتماشن غرب
ودرب السبي شلعة گلب
من الصعب نمشي لصعب
___
سجاد حيدر العكيلي
لطلب اللحن
@ss_tt18

شهادة مولاي ابا محمد الحسن المچتبى صلوات الله وسلامه عليه

يا موسى ابن جعفر مدد
--
عندما بقية مولانا الحسين صلوات الله وسلامه عليه وحيد في كربلاء اتجهة الى المدينة وقال
__
حسن خوية
اخوك بنص غرب حاير
ريتك يمي بل عاشر
تدري الما تضلة اخوان
وكفتة تكسر الخاطر

اشكيلك الحال
والصعبة تنگال، وحدي بغيت ابنص صحاري

والمالة خوان
وميضلة عوان ، يستوحدونة الگوم ثاري

بل هيمة يا خوية صحت
وردلي الصدى وانه طحت
ما ضل اخو ويفزع الي
يبن امي وحدي تعلعلت
--
حسن خوية
تضيگ الوسعة بعيوني
شما صدان على ضعوني
ضماية بهيمة من تالي
وانه بحيرة يدروني

لو امشي للماي
ميضلي حماي ، وبي تحتمي اخيام الغريبة

ولو ابقة ياويل
تتگرب الخيل ، اعلة الخيم خوية المصيبة

والبل الخيام امدللة
وما تندل بهاي الفلة
ولو امشي ما ارجع بعد
وتطلع عيالي ابگربلة

__
حسن خوية
رچبت اعلة المهر ودري
تشب اخيام البضهري
فز والحكهن اخيامي
غربة شمتت بكسري

و الدللتهة
خوية اسمعتهة ،من مهرك انزل خوية يحسين
افتحلي صدرك
وگربلي نحرك ، وصتني امي وهاذة هم دين

كالتلي لو ضل بغرب
وحسرة عليَة صار الشرب
قبليلي صدرة بغربتة
وهوني عليَة يمة الصعب

--
حسن خوية
اندبك عل ترب طايح
اخوك وبل خيم نايح
وضعن ام الخدر خوية
عل هزلة لغرب رايح

ويامن گبل صار
عل تربة محتار ، مابيه يفزع يحمي الضعون

گبالة الضعن راح
وروس اهلة بروماح ، وبهل مصيبة يسد العيون

ما صارت بميت قبل
كبالة خذو اهلة بهزل
خوية وبقيت اعلة الفلة
وضعن الخدر لمة الحبل

سجاد حيدر العكيلي
لطلب اللحن @ss_tt18