ТЎРТ ТЎРТЛИК
Илон бўлсанг, илон бўлиб яшаганинг яхшимасми,
Чаён бўлсанг, чаён бўлиб яшаганинг яхшимасми?
Бутун умр яхши одам ролин ўйнаб юрганингдан,
Ёмон бўлсанг, ёмон бўлиб яшаганинг яхшимасми?

Ростдек чиқди айтган ҳар сўзи,
Ёлғонлигин сезмади кўзи...
Ишонтирди бутун оламни —
Ишонмади худо ва ўзи. **
Бировга айтилмас гап худога айтилгайдир,
Қиймати йўқ арзон сўз гадога айтилгайдир.
Ҳақиқат керак бўлса, дарров баландга чопма,
Дунёда энг кўп ёлғон подшога айтилгайдир.*

Етти ёт жонингга пайванд бўлмайди,
Дилингни банд қилар, дилбанд бўлмайди.
Тиконнинг меваси егулик бўлмас —
Зинонинг меваси фарзанд бўлмайди.*

*✍️Зоҳиджон ОЛОВ*

Мамалакатимиз мустақиллигининг 33 йиллигига бағишлаб янги шеър ёздим. Қасида. Вақти билан эълон қиламан!

Эй дўст, қандингни ур, асло кам бўлма,
Муҳтарам бўлиб юр, муттаҳам бўлма.
Юз йилда дунёга келар битта мард —
Мард бўлолмадингми,
номард ҳам бўлма!*
Зоҳиджон ОЛОВ**

МИЛЛАТ УМИДИ

Жаҳон бешигини тебратиб қўйган,
Илму ирфон нурин таратиб қўйган,
Оламни ўзига қаратиб қўйган
Шу буюк миллатнинг умидиман мен!

Томиримда оқар даҳолар қони,
Ким билмас Хоразмий, Ибн Синони!
Тоғлардан баланддир шавкату шони
Шу буюк миллатнинг умидиман мен!

Номин эшитганда тик туриб дунё,
Беруний бобомга айтар тасанно,
Кўксимда ифтихор, бошимда Ҳумо
Шу буюк миллатнинг умидиман мен!

Замахшарийлари зеҳнин кўрсатган,
Арабларга араб тилин ўргатган,
Илм чўққисига байроқ ўрнатган,
Шу буюк миллатнинг умидиман мен!

Еру кўкда машҳур Имом Бухорий,
Ўзбекнинг ўғлидур бобом Бухорий,
Менга бағишлар куч, илҳом Бухорий,
Шу буюк миллатнинг умидиман мен!

Орўпо эсласа, титрайди ҳамон, 
Темур қиличидан қолдик деб омон,
Йигирма етти тахт соҳиби ҳоқон –
Шу буюк миллатнинг умидиман мен!

Америка учар фазога шўнғиб,
Шоҳ Улуғбек ёзган китобни ўқиб...
Бас, етар, турмайман бир четда қўрқиб,
Шу буюк миллатнинг умидиман мен!

Жадид боболарим, ойдин зотларим,
Очилмай юлинган истеъдодларим,
Бўғзимни куйдирар оҳу додларим,
Шу буюк миллатнинг умидиман мен!

Ўтган кунлар энди тарихдир бешак,
Бу Ватанга янги даҳолар керак,
Мени чорламоқда нурли келажак,
Шу буюк миллатнинг умидиман мен!

Ўзбек яна илм йўлин тутмоқда,
Учинчи Уйғониш қўлин тутмоқда,
Янги Ўзбекистон мени кутмоқда,
Шу буюк миллатнинг умидиман мен!

Менга ёрдир омад, мен билан иқбол,
Ҳали етти иқлим қолар ҳайрон, лол,
Эй Дунё! Боряпман – мени қарши ол –
Шу буюк миллатнинг умидиман мен!

06.04.2024 й.
Зоҳиджон ОЛОВ

https://t.me/zohidjon_olov

*Эй ҳожаи нодон, дунё бехабар,
Кеча-кундуз ғаминг йиғмоқ сийму зар.
Топган бор бойлигинг бир кафанликдир,
Шу ҳам сенга насиб қилган бўлса гар!
*✍️Саъдий Шерозий*(Зоҳиджон ОЛОВ таржимаси)

Асли:
Эй хожа, чаро аз ин жаҳон бехабари?
Рўзону шабон дар талаби симу зари.
Дастмояи ту аз ин жаҳон як кафан аст,
Он ҳам дар гумон аст, бари ё набари.

#Мулоҳаза

Ҳаволанмай кўтар шон-шуҳрат юкин,
Шодлик ҳам, қайғу ҳам топади якун.
Бугун сенга қарсак чалган шу қўллар
Эртага тош отиб турмоғи мумкин.

*?Зоҳиджон ОЛОВ*

Ўша ўқилган шеърлардан биттаси...

Бугун Чирчиқ шаҳридаги Кимёгарлар санъат саройида Ўзбекистон халқ шоири Муҳаммад Юсуф таваллудининг 70 йиллигига бағишланган адабий кечада кимёгар юртдошларимизга ўз шеърларимдан бир жуфтини ўқиб бердим.

ҲОЖИКЎЛ
*Кўклам келса, қишлоқликлар ўтиролмас уйида,
Тирикчилик ташвишлари бош кўтарар ўйида...
Тошматорлар терар эдим мен ҳам Оқжар бўйида,
Бугун кўриб, таниёлмай қолдим мушфиқ даламни,
Ортга қайтиб, шеърга сочдим бор ҳасрату аламни...

Бир замонлар бу жойларда отлар ўтлаб юрарди,
Чўпонлар ҳам ўтни босмай аста четлаб юрарди,
Ҳар гиёҳин азиз билиб, кўзларига сурарди,
Бу кун инсон ором истаб ҳар томонга солди йўл,
Аччиқ-аччиқ кўз ёш тўкар қир бағрида Ҳожикўл.

Сўқоқларга сел келса ҳам қўрқмай қўйди одамзот,
Кўксомса деб ўт қолмади – хижолатдир ҳашарот,
Ерда одам, кўкда варрак – қушлар Ҳаққа солар дод,
Аччиқ-аччиқ кўз ёш тўкиб ачиб кетди Ҳожикўл,
“Аччиқкўл” деб айтди кимдир – чўчиб кетди Ҳожикўл,

Кўҳиқофнинг қадри тушди – етиб бўлди қадамлар,
Тоғу тошлар “турбаза”ю яйлов тўла одамлар,
Шоирларнинг шеърларида қолди гўзал оламлар...
Ёрдам сўраб дарёларни чақиромас Ҳожикўл,
“Мен Аччиқкўл эмасман”, деб бақиролмас Ҳожикўл.

Оҳ ургандим – олифталар дилгинамни чўғлади,
“Оғир бўлинг, кўнгилни сал кенг қилинг”, деб дўқлади,
Нозикбадан нозанинлар қўшотарин ўқлади,
Юрак ютиб кўл бўйига боролмадим, биродар,
Ҳожикўлнинг кўзларига қаролмадим, биродар.

Келинг, азиз меҳмонларим, асло келманг, демасман,
Худо берган бу тоғларда сайр қилманг, демасман...
Билмам, сахиймиман ё йўқ, аммо ҳасис эмасман,
Фақат қўнган жойингизни супуриб ҳам қайтингиз,
Кейин Аччиқкўл деб эмас, Ҳожикўл деб айтингиз!*

17.04.2024 й.
https://t.me/zohidjon_olov

Telegram

Зоҳиджон ОЛОВ ижодхонасида... ✍️

"Сўзда сеҳр, шеърда ҳикмат бор". Ҳадис

ҲОЖИКЎЛ*
Сўқоқларга сел келса ҳам қўрқмай қўйди одамзот,
Кўксомса деб ўт қолмади – хижолатдир ҳашарот,
Ерда одам, кўкда варрак – қушлар Ҳаққа солар дод,
Аччиқ-аччиқ кўз ёш тўкиб ачиб кетди Ҳожикўл,
“Аччиқкўл” деб айтди кимдир – чўчиб кетди Ҳожикўл,Зоҳиджон ОЛОВ*