Устазым Малика Жумамуратоваға.

Өзгешеме деймен қонақшыллығы,
Қонаққа келгенин умытты жаслық.
Сонда қайда қалды өмир шынлығы,
Апа! десем күлер, жүзинде жаслық.

Шет елде жүрседе қарақалпақша
Қызлар қолтықласар достындай көрип.
Журтлар қарасады көзи талғанша,
Миллий кийим кийсең басқаша көрик.

Қырықтан өткен сөң тәрки дүньялық,
Жас кеўилди қамап түншықтырамыз,
Бир кеса шай қуйсаң жаслар жыйналып,
Йошлы қосық оқып, күн шықтырасыз.

Он сегиз бәҳәрдиң, бахты күлгендей,
Әрман, үмитлериң туўыла берсин,
Қызлар гүбелекти қуўып жүргендей,
Жас кеўлиң ҳалласлап жуғыра берсин.

✍ Парахат. Сулайманов.

10 - август. 2024 ж.

https://t.me/parahat1982

Дайым Кеңесбай Реймовқа бағышлайман.

Аппақ тырналардың тобы кеңейди.
Шыда, мәрт улыңды алды Кегейли.
Әлўидағлар айтып, қайтып баратыр,
Аралды толтырып, берсең келмейди.

Бир жақсысын сатты, өмир базары,
Саратанның сондай суўық хабары,
Төбеңнен муздай суў қуйғандай болар.
Берип қойдық деген сөздиң ҳазары.

Суўырып сөз қырман, айдар-айдарлап,
Сахый қолларыңды аштың да кеттиң.
Бәрин тыға бермей алағабыңа,
Қустың пайы десе шаштыңда кеттиң.

Поэзия шыңын көрип қайтқандай,
Онша көп сөйлемей даналық еттиң.
Келип турар еди бәрин ысырып,
Ақлықларың менен балалық еткиң.

Жөргекти сағынсаң, кепин жапқаны.
Тағдир есабының дурыс шыққаны.
Тәңри ҳүзиринде, қалған мәшўәрет.
Пүтин болса болды саўап, ийманы.

Тайыңды урладым, дайы десемде,
Енди оянбайсаң, дүнья бир пәлек.
Келип сәўбетиңди алалмағанлар.
Енди ўай-ўай салып жылап жүр, ҳәлек.

Уллы сапарыңа ҳақ жол тилеймен, мәнзилиң жәннет болсын, ажаға.
✍ Парахат. Сулайманов.

3 - июль. 2024 ж.

https://t.me/parahat1982

Сағыныш.
✍ Парахат. Сулайманов.

Тәңрим, жақсы сөзден қыспа тилимди.
Ишим толы зәҳәр шаша бермейин,
Жайнап жасағандай өмир бер енди,
Суўсыз қудығымды қаза бермейин.

Шалса шарасызлық шалғысы менен,
Руўхсыз қансырап жата бермейин.
Түргелип анамның алғысы менен,
Тағдирге ғаремет ата бермейин.

Өлип тирилгеннен өмир болдыма?
Алағап толмады, ярдың кеўлиндей.
Тырқ деген гәплери шыны болдыма?
Қырықтан аржағы қара геўгимдей.

Ай түўе жыллардың қаралығына,
Түсим болғайда деп етемен тәме.
Қайтар аўылыма, балалығыма,
Жеңи ғожалақ боп жүрейин және.

Падасы буйығып тыңлап турғандай,
Шағлайын шопандай қосықлар айтып.
Кеште бүтин аўыл күтип алғандай,
Қайтар мал шаңлаққа, барайын қайтып.

Аўылды сағындым бүлбилсиз жерде,
Ҳәтте шегирткелер шырр етпес бунда.
Ақталсыз, бүлбилсиз, ишимде зерде,
Өмир гоззал емес, қоскөлде, қумда.

24 - июнь. 2024 ж.

https://t.me/parahat1982

Төртлик.

Жаздың о дүньяға мегзеўин қараң,
Күндизи дозақтай қайнап атқаны.
Бирақ, ақшамында унайды маған,
Ҳүр қыздай жулдыздың күлип баққаны.

✍ Парахат. Сулайманов.

https://t.me/parahat1982

Төртликлер.
✍ Парахат. Сулайманов.

Өмир әрўанадай ийип мудамы,
Несийбе дегениң тамшылап турды.
Налына берме деп, қыйнап қуданы,
Ығбалым жаса деп қамшылап турды.

Қараңғы түнлердиң жулдыз, айы бар,
Ҳәтте өпепектиң суўық ғайы бар.
Усы жасқа келип аңлағаным сол
Өмирдиң түңилип кетер жайы бар.

Өмир жолларынан кеттим жуғырып,
Әрман атлы қустың пәрине қызып.
Тәғдир торларына түстим жығылып.
Шарасыз қалғанман мен жерди сызып.

Дос яраным менен ўақты хошлықта,
Өмир бергенине шүкир еткенмен.
Мәҳкүм етилмеген едим жоқлыққа,
дәрт келсе бас ийип, пикир еткенмен.

Атам деген еди айтар ақылым,
Өмир түс көргендей кетер шағыңда,
Дүньяға келген соң инсан затының,
Аты қалыў керек алма бағында.

Өмир жолларында адасып кетсең,
Жулдызларға қарап бағдар аласаң.
Шайтан жолдан урып шатасып кетсең,
Дарғасыз кемедей қырда қаласаң.

Балалықтың көзи қыза берген соң.
Өмир өткен сайын, орның төр болар,
Ақырет уйқысы қыса берген соң,
Аржағы о дүнья, жайың гөр болар.

Сениң көзиң менен өмирге бақсам,
Нәмәҳрем сулыўдай түйилер маған.
Терезе алдында отырсам ақшам,
Жулдыз бойын таслап, күйинер маған.

11 - июнь. 2024 ж..

https://t.me/parahat1982

Руўхымды қамап зиндан төрине,
Тыныш жасайман деп ойлаған едим.
Тилимди сайратып турған руўхыма,
Келешек тағдирин байлаған еди.

Сатқын қыялларым қашқын, қашажақ,
Ҳүжданым лашымды дарға асажақ.
Таңлайым кеўип тур, шөлледим қатты,
Көмсе қәбиримди қумлар басажақ.

Енди ким жағады? өшкен шамларды,
Руўхсыз күтемен нурсыз таңларды...
Кеўил сарайымда байыўлы отыр,
Хатамтайдай сыйлар, гөне тамларды.

Жазалмаслық жаман бәринен бетер,
Илҳәм перисиде қарамай өртер.
Бирақ бир жаңғырық алыс алыстан.
Деп турғандай болар, басыңды көтер.

✍ Парахат. Сулайманов.

5 - июнь. 2024 ж.

https://t.me/parahat1982

Абат аўылдағы К. Маркс атындағы мектебиме сағыныш.
Парахат. Сулайманов.

Гейде аўыл бетке тийсе қәдемим.
Мектеп бетке аўып кетер, нәзерим.
Бабам салып кеткен, гөне мектебим.
Қоңыраў шалғандай түйилер маған.

Сол сәтте ойларым ылағып кетер.
Мектеп қызықларың ядымда екен.
Бизди еркелеткен анамнан бетер.
Қалжан муғаллимим күлип турғандай.

Бар затты үйретти ҳәриптен баслап.
Арасында болды сабақтан қашпақ.
Туңғыш мухабатты сағынсам ҳәр ўақ.
Миннетдар боламан гөне мектебим.

Көп жигиттиң қалған партада аты.
Есине түседи узатқан хаты.
Поса алалмастан қалған пурсаты.
Ўақ - ўақ дегизеди гөне мектебим.

Дослық жорашылық сенде басланды.
Ашықлық дегенәм салар ўайқаңды.
Зыяпат бериўге ақша жыйғанды.
Сеннен үйрендикқо, гөне мектебим.

Гулназ папкиңдеги жарты зағара.
Еле ядымыздан шықпаўын қара.
Сылтаў таўып дерең, Бекштен сора.
Урлап жеген нанлар, езиў тарттырар.

Наспайды жасырып атқан жер едиң.
Еле зар боласаң, оқы! дер едиң.
Ҳәзир муғаллим жоқ урып тебетин.
Қатал ғайбар едиң гөне мектебим.

Устазлар отқандай қойыў саяда.
Қаратал астында скамейкада.
Мени көрип қалса, ҳәзир мабада.
Сабағың жоқпа не дейтиндей маған.

Зәўлим сарай емес ықшам уядай.
Ишиң толыпатқан илим, зиядай.
Қызлар жылап кетти, сени қыйалмай.
Қулама, турабер гөне мектебим.

Гөне мектеп өмиримниң бесиги.
Қушақ ашып турар еди есиги.
Балларың кеткенли таза мектепке.
Сыбап тасланыпты жарма есиги.

Соңғы қоңыраўың соңғысы екен.
Таза мектептеги сыңғырлы бөтен.
Бирақ ойларымда бәрҳәма сенсең.
Бизлер баўыр басқан гөне мектебим.

25 - май. 2022 ж.

https://t.me/parahat1982

Күнлер.

Бир ҳәптедей болып қалды,
Берекет жоқ аспанымда.
Әлем қара бултқа қалды,
Әйне бәҳәр ақшамында.

Жулдызларды жойтып жүрсем,
Жалғыз айды көзим шалды.
Сағынғанлар сезип жүрмен,
Айралыққа күни қалды.

Ашықларда ынтық болып,
Паналайды қара талды.
Булттың көзи жасқа толып,
Бир былағай бола қалды.

✍ Парахат. Сулайманов.

https://t.me/parahat1982

Өмир.
✍ Парахат Сулайманов.

Ғапыл бенделердиң өмир жоллары,
Гейде адастырып сергиздан етер.
Ҳатамтай тағдирдиң сахый қоллары.
Күнди, қасарысып зимистан етер.

Дәртиңди дастанып жатқаның менен,
Мәлҳәм болалмайды тәңриден бөлек,
Азаптың мазасын татқаным менен,
Шыпасын таптым мен жаслықты төлеп.

Еркин қустай ушып қыялларым да,
Өмирден ҳәр күни ҳикмет излеймен
Кеўил қалсадағы жаслық бағында,
Қыраў шалып кеткен салқын гүздеймен.

Гөззаллық сулыўлық инәм еткен соң,
Өмир деген заңғар қунын сорайды.
Жақсы күнлеринен үмит берген соң,
Түрли дәртин берип сынар талайды.

Ээх әттең.

13 - май. 2024 ж.

https://t.me/parahat1982

Қорқыў.

Бултлар ашыў кернеп көксин сөттиме?
Сабалап сабалап кетти жамғырлар.
Найзағайын түйреп жердиң көксине,
Деп турғандай еди қараң батқырлар.

Зимистан, топанның, қорқыўы жанды,
Нуҳтың кемесинен бийнесип қалдым.
Қәдирлисин айтса бул шыбын жанның.
Қудай еске түсип аллалап қалдым.

27 - март. 2024 ж.

✍ Парахат. Сулайманов.

https://t.me/parahat1982