Эсир пӗр сехетре мӗнчул ӗҫлесе илме пултарни вӑл сирĕн пӗр сехет каннӑ хакӗ.

Интернетра мӗн те пулин шыранӑ чухне пысӑк е пӗчӗк сас палли ҫырни пӗлтерӗшлӗ мар. Мӗнле шутлатӑр, тепӗр ҫӗр ҫултан пысӑк сас палли пӗтме пултарать-и?
Китай ачисем иероглиф усӑ курнипе пысӑкран тата пӗчӗкрен ҫырмаллине часах тавҫӑрса илеймеҫҫӗ: вӗрентмелле. шупашкар е Шупашкар тесе ҫырсан пӗлтерӗшӗ нумай улшӑнать-и? саша е Саша?

Ӗнер ӗҫре пӗри пушар пусми ҫинче пирус туртать, шӑрши шкулта саралать. Вӑл пӗр эрне каялла ҫеҫ пирĕнпе ӗҫлеме пуҫланӑ. Хӑюллӑ пулса пытӑм та ан турттӑр тесе каларӑм. Пӗртак ҫамрӑкрах пулнӑ пулсан калаймӑттӑм.

Каласа хăвармалла, Китайра ытларах арҫынсем туртаҫҫӗ. Арҫын туртмасан вӑл арҫын мар пекех шутланать. Туртасса ресторанта та, таҫта та туртаҫҫӗ. Хӑш-пӗрисем лифтра та (шӑп туртма чаракан паллӑ патӗнче).

Арча хуппипе сулласа лавкка умĕнчи ҫула ҫулҫӑран тасать.
Ханой, Вьетнам

Эпир шӑмат кун мунчара ларнӑ пек кунти ҫынсем вырсарни кун ирхине ҫиччӗре килнӗ тинĕс хӗрне, шыва ларнӑ та лараҫҫӗ пакӑлтатса.
Санур, Бали, Индонези

Хисеплӗ вулакансем, эпир пӗр ҫулталӑк пӗрле ирттертӗмӗр. Темиҫе куна шутламасан кашни кунах пост тухнӑ теме те пулать. Тавах сире ‘лайх’ тесе палӑртнишӗн. Ку малалла ӗҫлеме хавхалантарнӑ. Паянтанпа постсем сайрарах пулӗҫ. Кулӑшла видео тата ҫулҫӳрев контентчӗ пулӗ. Хӑш-пӗр чухне ӳкерчӗксем тата тӗрлӗ шухӑшсем. Манпа кунта юлас тетӗр пулсан, савӑнӑп, ҫук пулсан, тавах тӗпеле кӗрсе пӑхнишӗн.