រដ្ឋាភិបាល គ្រោងចំណាយលុយជិត ១ពាន់លានដុល្លារ ក្នុងវិស័យសុខាភិបាល ដើម្បីពង្រឹង និងព្យាបាលប្រជាពលរដ្ឋ

ភ្នំពេញ៖ ក្នុងពិធីសម្ពោធអគារមណ្ឌលផ្តល់សេវាផ្នែកវះកាត់ នៃមន្ទីរពេទ្យបង្អែកខេត្តសៀមរាប កាលពីថ្ងៃទី២០ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានលើកឡើងថា ក្នុងវិស័យសុខាភិបាលទាំងមូល រដ្ឋាភិបាលគ្រោងចំណាយថវិកាជាតិជិត ១ពាន់លានដុល្លារ សម្រាប់ពង្រឹង និងព្យាបាលប្រជាពលរដ្ឋ។

សម្តេចធិបតី ហ៊ុន ម៉ាណែត បានថ្លែងថា ការពង្រឹងលើវិស័យសុខាភិបាលមិនថយទេ គឺនៅតែបន្តដើរទៅមុខជានិច្ច ហើយនឹងធ្វើឱ្យកាន់តែមានប្រសិទ្ធភាព និងទំនើបកម្មកាន់តែខ្ពស់ជាងមុន គឺធ្វើយ៉ាងណាឱ្យវិស័យសុខាភិបាលកាន់តែមានភាពប្រសើរឡើង និងមានប្រសិទ្ធភាពក្នុងការជួយព្យាបាលមនុស្សឱ្យបានកាន់តែច្រើនជាងមុន។ សម្តេចធិបតី ហ៊ុន ម៉ាណែត បានបន្តថា៖«ខ្ញុំបានចុះហត្ថលេខារួចហើយ ដោយគម្រោងចំណាយថវិកាជាង ១៧០លានដុល្លារ សម្រាប់ពង្រឹងនៅពេទ្យមូលដ្ឋាន និងចំណាយថវិកា ១៤១លាន ដើម្បីពង្រឹងពេទ្យនៅក្នុងតំបន់ទូទាំងប្រទេសក្នុងរយៈពេល ៤ឆ្នាំ»។

សម្តេចធិបតីនាយករដ្ឋមន្ត្រី បានបញ្ជាក់ថា ការចំណាយថវិកាទាំងនេះ គឺមិនទាន់បានបូកជាមួយ នឹងការចំណាយថវិកាសម្រាប់កម្មវិធីជំនួយសង្គមផ្សេងៗ ដូចជា ការជួយប្រជាពលរដ្ឋក្រីក្រ ប័ណ្ណសមធម៌សុខាភិបាល ពាក់ព័ន្ធទៅនឹងជំងឺកូវីដ១៩ និងបញ្ហាហានិភ័យ។ សម្តេចធិបតី ហ៊ុន ម៉ាណែត បានបន្ថែមថា មកដល់ពេលនេះ រាជរដ្ឋាភិបាល បានចំណាយថវិកាជាង ១៤០០លានដុល្លាររួចទៅហើយ ដើម្បីសុខភាព សុភមង្គលរបស់ប្រជាពលរដ្ឋ និងសុខភាពរបស់ជាតិ៕

«ត្រីងៀតខ្មែរ»ជិត៥តោន នាំចេញផ្លូវការទៅអូស្ត្រាលី ខណៈម្ចាស់សហគ្រាសប៉ងពង្រីកទៅទីផ្សារអាម៉េរិក និងញូហ្សែលែន ក្នុងបរិមាណ១០០តោន

ភ្នំពេញ៖ សហគ្រាសខ្មែរ ដែលមានឈ្មោះ Home Taste Food បាននាំចេញត្រីងៀតខ្មែរជាផ្លូវការលើកដំបូងចំនួន ៤.៧តោន ទៅកាន់ប្រទេសអូស្ត្រាលី តាមរយៈការប្រើប្រាស់និមិត្តសញ្ញាគុណភាពផលិតផលជលផលកម្ពុជា ហៅកាត់ថា (CQS) កាលពីថ្ងៃទី៣ ខែមេសា ឆ្នាំ២០២៤។

បើតាមលោកជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនាថ្ងៃទី២៥ មេសា ថា ត្រីងៀតខ្មែរទាំង៤.៧តោននេះ មានត្រីកែច្នៃចំនួន ៣ប្រភេទ រួមមាន៖ ត្រីងៀត ត្រីឆ្អើរ និងត្រីបង្ហើម។ ការនាំចេញ ដែលធ្វើឡើងតាមរយៈការដឹកតាមកប៉ាល់ មានបំពាក់ប្រព័ន្ធត្រជាក់ នឹងទៅដល់ប្រទេសអូស្ត្រាលី នៅថ្ងៃទី២៨ ឬ២៩ ខែមេសា ឆ្នាំ២០២៤ ខាងមុខ។

ក្រៅពីការនាំចេញទៅអូស្ត្រាលី សហគ្រាសខ្មែរ Home Taste Food ក៏មានបំណងពង្រីកការនាំចេញផលិតផលរបស់ខ្លួនទៅកាន់ទីផ្សារសហរដ្ឋអាម៉េរិក និងប្រទេសញូហ្សែលែនផងដែរ ក្នុងបរិមាណជាង ១០០តោន នាពេលខាងមុខ។ លោកជំទាវ អ៊ឹម រចនា បានលើកឡើងថា ក្រសួងកសិកម្ម គាំទ្រនូវវត្តមានផលិតផលត្រីកែច្នៃរបស់ខ្មែរ នៅលើទីផ្សារអន្ដរជាតិ។ រដ្ឋបាលជលផលនៃក្រសួងកសិកម្ម នឹងបន្តធ្វើការជាមួយសហគ្រាសកែច្នៃផលិតផលត្រីនៅកម្ពុជាដទៃទៀត ដើម្បីធានាការត្រួតពិនិត្យគុណភាព និងអនាម័យ តាមស្តង់ដាសុវត្ថិភាព អនុលោមតាមបទប្បញ្ញត្តិជាតិ និងលក្ខខណ្ឌតម្រូវ នៃសុវត្ថិភាពម្ហូបអាហារអន្តរជាតិ។

Home Taste Food ដែលបាននាំចេញផលិតផលត្រីកែច្នៃ ទៅកាន់ទីផ្សារបរទេសជាផ្លូវការដំបូងគេ បានឆ្លងកាត់ការបណ្ដុះបណ្ដាលពីគម្រោងអភិវឌ្ឍន៍ជលផលក្រោយប្រមូលផល (CAPFISH-Capture)។ លើសពីការសហការជាមួយរដ្ឋបាលជលផល នៃក្រសួងកសិកម្ម សហគ្រាសមួយនេះ ក៏បានសហការជាមួយអង្គការ UNIDO ដែលមានគោលបំណងគាំទ្រសមត្ថភាពបច្ចេកទេស ពង្រឹងវិស័យឯកជន លើកកម្ពស់ការប្រកួតប្រជែង និងអនុវត្តនូវប្រព័ន្ធស្តង់ដាម្ហូបអាហារនៅកម្ពុជា ដើម្បីឆ្លើយតបទៅនឹងតម្រូវការជាតិនិងអន្តរជាតិ៕

សម្តេចតេជោ ដឹកនាំការប្រកួតរបស់ក្រុមបាល់ទាត់តារាកម្ពុជា រៃអង្គាសថវិកាជួយមន្ទីរពេទ្យគន្ធបុប្ផា ខណៈដែលសម្តេចបរិច្ចាគ២០០លានរៀល

ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា និងជាគ្រូបង្វឹកកិត្តិយសរបស់ក្រុមបាល់ទាត់តារាកម្ពុជា (Cambodia football super stars) ដែលមានអ្នកចម្រៀងលោក ខេម ជាប្រធានក្រុម បានជួបសំណេះសំណាលជាមួយគ្រូបង្វឹក និងកីឡាករទាំងអស់ ដើម្បីរៀបចំផែនការសម្រាប់សកម្មភាពមនុស្សធម៌រយៈពេលខ្លី មធ្យមនិងរយៈពេលវែងរបស់ក្រុមបាល់ទាត់មួយនេះ។ នេះបើតាមការបង្ហោះសារនៅលើបណ្តាញសង្គមរបស់សម្តេចតេជោ នាព្រឹកថ្ងៃទី២៥ ខែមេសា ឆ្នាំ២០២៤នេះ។

សម្តេចតេជោ ហ៊ុន សែន បានឱ្យដឹងថា កិច្ចការដែលត្រូវធ្វើបន្ទាប់ គឺការរៀបចំការប្រកួតល្ងាចថ្ងៃទី០១ ខែឧសភាខាងមុខ នៅពហុកីឡដ្ឋានអូឡាំពិក ក្រោមមូលបទ៖«រួមគ្នាដើម្បីសប្បុរសធម៌និងប្រយុទ្ធប្រឆាំងគ្រឿងញៀន និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា»។ ទន្ទឹមនឹងការប្រកាសពីការប្រកួតក្រោមមូលបទនេះ សម្តេចតេជោ និងសម្តេចកិត្តិព្រឹទ្ធបណ្ឌិត បានប្រកាសបរិច្ចាគថវិកាចំនួន២០០លានរៀលមុនគេ ដោយសម្តេចបានអំពាវនាវសប្បុរសជនឱ្យចូលរួមជួយថវិកាជួយដល់មន្ទីរពេទ្យគន្ធបុប្ផា ដែលកំពុងត្រូវការសម្រាប់ព្យាបាលដល់កុមារកម្ពុជា។

សម្តេចតេជោគ្រូបង្វឹកកិត្តិយសរបស់ក្រុមបាល់ទាត់តារាកម្ពុជា នឹងចូលរួមដឹកនាំការប្រកួតជាមួយគ្រូបង្វឹកផ្លូវការនៅស្តាតអូឡាំពិកនាល្ងាចថ្ងៃទី០១ ខែឧសភា ឆ្នាំ២០២៤ ដោយចាប់ផ្តើមនូវទម្រង់លេងរបស់សម្តេច គឺ 3.4.3 ខណៈដែលសម្តេចស្នើឱ្យសាធារណជនចូលរួមទស្សនាឲ្យបានច្រើនកុះករ ដើម្បីជំរុញចលនាមនុស្សធម៌និងការប្រយុទ្ធប្រឆាំងគ្រឿងញៀន។

សម្តេចតេជោ ហ៊ុន សែន បានបញ្ជាក់ផងដែរចំពោះសាធារណជន និងសប្បុរសជនដែលចង់ចូលរួមបរិច្ចាគថវិកាដល់មន្ទីរពេទ្យគន្ធបុប្ផា អាចចូលរួមតាមរយៈសម្តេច ដោយទាក់ទងទៅលោក សៀង ទៀង ដែលមានលេខទូរសទ្ទ ០១២ ៩៦១៩៧១៕

សាច់បង្កកខូចគុណភាពដែលនាំចូល ៤,៥តោន ត្រូវសមត្ថកិច្ចជំនាញដុតកម្ទេចចោល

ភ្នំពេញ៖ អគ្គនាយកដ្ឋានគយនិងរដ្ឋាករកម្ពុជា (អគរ) និងសមត្ថកិច្ចពាក់ព័ន្ធ បានដុតកម្ទេចចោលបំណែកសាច់នាំចូលខុសច្បាប់ចំនួន ២ករណី ស្មើនឹង ៤ ៥៥០គីឡូក្រាម។ អគរ បានបញ្ជាក់ថា បំណែកសាច់ទាំងនេះ នាំចូលគ្មានឯកសារ វេចខ្ចប់គ្មានអនាម័យ និងដឹកជញ្ជូនមិនត្រឹមត្រូវតាមស្តង់ដា នាំឱ្យខូចគុណភាពមិនអាចប្រើប្រាស់បាន។

បើតាមការចុះផ្សាយរបស់អគរ កាលពីថ្ងៃទី២៣ ខែមេសា ឆ្នាំ២០២៤ បំណែកសាច់ក្របីបង្កកចំនួន ៣ ៥០០ គីឡូក្រាម ត្រូវបានមន្រ្តីជំនាញ និងមន្ត្រីរាជអាវុធហត្ថបង្ក្រាប និងដកហូតពីឈ្មួញដែលដឹកជញ្ជូនតាមរថយន្តដឹកអ្នកដំណើរ ៣គ្រឿង បង្កប់ជាមួយទំនិញផ្សេងៗ តាមច្រករបៀងក្នុងភូមិសាស្ត្រស្រុកស្វាយជ្រុំ ខេត្តស្វាយរៀង កាលពីថ្ងៃទី២២ ខែមេសា ឆ្នាំ២០២៤។

ចំណែកជើងទា ពោះគោ ជើងជ្រូក និងគ្រឿងក្នុងជ្រូក ១ ០៥០គីឡូក្រាមវិញ មន្រ្តីជំនាញ និងមន្ត្រីរាជអាវុធហត្ថ បានដកហូតពីឈ្មួញដែលដឹកជញ្ជូនដោយរ៉ឺម៉កម៉ូតូនាំចូលមកប្រទេសកម្ពុជា ដោយខុសច្បាប់ តាមច្រករបៀងក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី២២ ខែមេសា ឆ្នាំ២០២៤៕

សម្តេចធិបតី ហ៊ុន ម៉ាណែត៖ ការសម្ដែងក្បាច់គុនសាវលីញ និងគុនល្បុក្កតោនៅអង្គរ បង្ហាញពីសក្តានុពលទេសចរណ៍ខ្មែរ ទៅកាន់ពិភពលោក

ភ្នំពេញ៖ សម្តេចធិតបី ហ៊ុន ម៉ាណែត បានបង្ហាញការគាំទ្រនិងលើកទឹកចិត្តដល់កិច្ចការរៀបចំព្រឹត្តិការណ៍ពិព័រណ៍វប្បធម៌ទេសចរណ៍ និងការសម្ដែងក្បាច់គុនសាវលីញ និងគុនល្បុក្កតោនៅអង្គរ (When Shaolin Meets Bokator At Angkor) ដ៏អស្ចារ្យ នៅបរិវេណខាងជើងប្រាសាទបាយ័ន នាព្រឹកថ្ងៃទី២៤ ខែមេសា ឆ្នាំ២០២៤។ សម្តេចធិបតី បានគូសបញ្ជាក់ថា ព្រឹត្តិការណ៍នេះជាការផ្លាស់ប្តូរវប្បធម៌ និងផ្សព្វផ្សាយវប្បធម៌ទាំងទ្វេភាគី និងពហុភាគី ដើម្បីជាការផ្សព្វផ្សាយសក្តានុពលរបស់កម្ពុជា និងទាក់ទាញអ្នកទេសចរអន្តរជាតិឱ្យបានកាន់តែច្រើនជាអតិបរមា។

ព្រឹត្តិការណ៍ដែលបានរៀបចំធ្វើនៅប្រាសាទបាយ័ន ទឹកដីអង្គសៀមរាបនេះ ដើម្បីជំរុញនូវយុទ្ធនាការ«ទស្សនាសៀមរាប ឆ្នាំ២០២៤» ក៏ដូចជាអបអរសាទរ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤»។ ក្នុងព្រឹត្តិការណ៍ពិព័រណ៍វប្បធម៌ទេសចរណ៍ ដែលក្រសួងទេសចរណ៍ និងរដ្ឋបាលប្រជាជនខេត្តហឺណាន និងរដ្ឋបាលខេត្តសៀមរាប បានសហការរៀបចំនេះ ក៏ជំរុញការផ្សព្វផ្សាយគោលដៅទេសចរណ៍ និងវប្បធម៌រួមគ្នា ដើម្បីទាក់ទាញអ្នកទេសចរមកកាន់កម្ពុជាកាន់តែច្រើន ដោយស្វែងយល់អំពីសក្តានុពលទេសចរណ៍ វប្បធម៌ អរិយធម៌ និងទំនៀមទម្លាប់ប្រជាជនកម្ពុជាផងដែរ។

បើតាមការឱ្យដឹងពីក្រសួងទេសចរណ៍ ព្រឹត្តិការណ៍នេះ មានថ្នាក់ដឹកនាំតំណាងក្រសួង-ស្ថាប័ននានា តំណាងស្ថានទូតចិនប្រចាំកម្ពុជា សមាគមទេសចរណ៍ អ្នកសារព័ត៌មាន ភាគីពាក់ព័ន្ធ វិស័យឯកជន ភ្ញៀវជាតិ-អន្តរជាតិ សិស្សនិស្សិត សាធារណជន ក្រុមក្បាច់គុនសាវលីញ និងល្បុក្កតោ កម្ពុជា-ចិនសរុបជាង ១,៥០០នាក់។ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានគូសបញ្ជាក់អំពីសារសំខាន់នៃការជំរុញការផ្សព្វផ្សាយវិស័យទេសចរណ៍កម្ពុជានៅក្នុងខេត្តហឺណានឱ្យកាន់តែទូលំទូលាយ ជាពិសេស ការបង្កើនចំនួនជើងហោះហើរត្រង់ពីទីក្រុងផ្សេងៗទៀតរបស់ខេត្តហឺណាន មកកម្ពុជាឱ្យបានច្រើនថែមទៀត។

ចំពោះ ឯកឧត្តម SUN Shougang អភិបាលរងខេត្តហឺណាន ដែលបានចូលរួមក្នុងព្រឹត្តិការណ៍នេះ បានថ្លែងសង្កត់ធ្ងន់លើការតភ្ជាប់ហេដ្ឋារចនាសម្ព័ន្ធផ្លូវអាកាស ការធ្វើសមាហរណកម្មឧស្សាហកម្មដ៏ស៊ីជម្រៅមួយ (ប្រទេសពីរ សួនឧទ្យានពីរ / Two Countries, Twin Parks) និងការបន្តសហការគ្នាជំរុញ«ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤» ឱ្យបានទូលំទូលាយបន្ថែមទៀត៕

ការអភិវឌ្ឍមូលធនមនុស្ស និងធ្វើសមាហរណកម្មបច្ចេកវិទ្យា រួមចំណែកបង្កើនផលិតភាពនិងការធ្វើពិពិធកម្មសេដ្ឋកិច្ច

ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ការអភិវឌ្ឍមូលធនមនុស្ស និងការធ្វើសមាហរណកម្មបច្ចេកវិទ្យានៅក្នុងសហគ្រាស គឺមានសារសំខាន់ណាស់ ពិសេសក្នុងវិស័យឯកជន ដើម្បីបង្កើនផលិតភាព និងរួមចំណែកធ្វើឱ្យប្រសើរឡើងដល់ការធ្វើពិពិធកម្មសេដ្ឋកិច្ច។ នេះបើតាមការចុះផ្សាយរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាថ្ងៃទី២៤ មេសា។

ក្នុងពិធីបើកសន្និសីទថ្នាក់រដ្ឋមន្ត្រីនៃអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) ឯកឧត្តម ហែម វណ្ណឌី បានលើកឡើងបន្ថែមអំពីការផ្តល់សារសំខាន់របស់កម្ពុជា ដល់សមាហរណកម្មតំបន់នានា តាមរយៈស្ថាប័នតំបន់អាស៊ាន ដើម្បីជំរុញកំណើនសេដ្ឋកិច្ច និងបង្កើនទំនាក់ទំនងពាណិជ្ជកម្ម។ ឯកឧត្តមរដ្ឋមន្ត្រី បានសង្កត់ធ្ងន់លើតម្រូវការកិច្ចសហប្រតិបត្តិការអន្តររដ្ឋាភិបាល និងអន្តរវិស័យ ដើម្បីជំរុញការផ្លាស់ប្តូរប្រកបដោយនិរន្តរភាព និងធានាបាននូវអត្ថប្រយោជន៍សង្គមពីការរីកចម្រើនផ្នែកបច្ចេកវិទ្យា។ ក្នុងកម្មវិធីដដែល ឯកឧត្តមរដ្ឋមន្រ្តីក្រសួងឧស្សាហកម្ម រូបនេះ បានជំរុញឱ្យមានកិច្ចខិតខំប្រឹងប្រែង ក្នុងការសហការបង្កើតផែនទីបង្ហាញផ្លូវវិទ្យាសាស្ត្រ បច្ចេកវិទ្យា និងនវានុវត្តន៍ ដោយប្រើកម្លាំងរួម ក្នុងទិសដៅកសាងអនាគតមួយកាន់តែមាននិរន្តរភាព។

ក្នុងពិធីបើកសន្និសីទ ដែលធ្វើឡើងក្នុងទីក្រុងប៉ារីស ប្រទេសបារាំង នាថ្ងៃទី២៣-២៤ ខែមេសា ឆ្នាំ២០២៤ ឯកឧត្តម ហែម វណ្ណឌី ក៏បានបញ្ជាក់ការប្តេជ្ញាចិត្តរបស់កម្ពុជាក្នុងការជំរុញកិច្ចសហប្រតិបត្តិការអន្តរជាតិលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ផងដែរ។ អង្គការ OECD បានឱ្យដឹងផងដែរថា អាទិភាពនៃសន្និសីទនេះ ផ្តោតលើការដោះស្រាយបញ្ហាប្រឈមរួម និងការចាប់យកកាលានុវត្តភាពថ្មីៗ ក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍។ អាទិភាពទាំងនោះ រួមមាន៖ ការបង្កើតគោលនយោបាយអភិបាលកិច្ចរហ័សរហួន, ការលើកកម្ពស់ជីវសេដ្ឋកិច្ចដែលមានភាពធន់, ការបណ្តុះបណ្តាលកម្លាំងពលកម្មជំនាញ, ការវិនិយោគលើហេដ្ឋារចនាសម្ព័ន្ធស្រាវជ្រាវ និងការបង្កើនទំនុកចិត្តសង្គមលើគំនិតផ្តួចផ្តើមផ្នែកវិទ្យាសាស្ត្រ បច្ចេកវិទ្យា និងនវានុវត្តន៍៕

ក្រសួងធនធានទឹក ប្រាប់ឱ្យពលរដ្ឋប្រើប្រាស់ទឹកសន្សំសំចៃក្នុងកម្រិតខ្ពស់ នៅខែឧសភា-មិថុនាខាងមុខ

ភ្នំពេញ៖ ក្រសួងធនធានទឹក ប្រាប់ដល់អាជ្ញាធរដែនដី និងសាធារណជនឱ្យចូលរួមសហការថែរក្សា ប្រើប្រាស់ទឹកដោយសន្សំសំចៃក្នុងកម្រិតខ្ពស់ ជាពិសេស នៅបណ្តាតំបន់ជនបទដាច់ស្រយាល ដែលឆ្ងាយពីប្រភពទឹក នៅក្នុងខែឧសភា-មិថុនា ឆ្នាំ២០២៤នេះ។ ទន្ទឹមនឹងនេះ ក្រសួង ក៏បានប្រាប់ឱ្យប្រុងប្រយ័ត្នចំពោះបាតុភូតផ្គររន្ទះ និងខ្យល់កន្ត្រាក់ ដែលនឹងអាចកើតមានច្រើនផងដែរ។

បើតាមការតាមដាន និងព្យាករណ៍របស់ក្រសួងធនធានទឹក និងឧតុនិយម និងពីបណ្តាស្ថាប័នអន្តរជាតិនានា ជាពិសេស អង្គការឧតុនិយមពិភពលោក (WMO) នៅក្នុងដើមរដូវវស្សាចាប់ពីថ្ងៃទី១ ខែឧសភា ដល់ថ្ងៃទី៣០ ខែមិថុនា ឆ្នាំ២០២៤ អាកាសធាតុនៅកម្ពុជា នឹងធ្វើឱ្យនៅតំបន់វាលទំនាប តំបន់ខ្ពង់រាប និងតំបន់មាត់សមុទ្រ មានសីតុណ្ហភាពមធ្យមអប្បបរមា ២៦អង្សាសេ និងសីតុណ្ហភាពមធ្យមអតិបរមា ៣៦អង្សាសេ។ ចំពោះ ស្ថានភាពភ្លៀងធ្លាក់នឹងអាចកើតមានពីមធ្យមទៅបង្គួរ គ្របដណ្តប់លើផ្ទៃដី ៤០% និងបរិមាណទឹកភ្លៀងខ្ពស់ជាងមធ្យមភាគច្រើនឆ្នាំ ជាមួយគ្នាបាតុភូតផ្គររន្ទះ និងខ្យល់កន្ត្រាក់កើតមានច្រើន។

ក្នុងសេចក្តីប្រកាសរបស់ក្រសួងធនធានទឹក កាលពីថ្ងៃទី២២ មេសានេះ ក៏បានឱ្យដឹងពីបាតុភូតសកលមានស្ថានភាពវិវត្តន៍ នៃសីតុណ្ហភាពនៅលើផ្ទៃមហាសមុទ្រប៉ាស៊ីហ្វិកខាងកើត និងតំបន់ អេក្វាទ័រ ចាប់ពីខែឧសភា ដល់ខែមិថុនា បាតុភូតអែលនីណូ (El Niño) នឹងស្ថិតនៅ ១០%។ រីឯ បាតុភូតែអែនសូអព្យាក្រឹត (ENSO-neutral) នឹងកើនឡើងដល់៨៣% នៅក្នុងខែឧសភា។

ស្ថានភាពអាកាសធាតុនៅកម្ពុជា និងបាតុភូតសកលនេះ ក្រសួងធនធានទឹក និងឧតុនិយម បានប្រាប់ដល់ក្រសួង ស្ថាប័នពាក់ព័ន្ធ អាជ្ញាធរដែនដី និងសាធារណជន ឱ្យចូលរួមសហការថែរក្សា ប្រើប្រាស់ទឹកដោយសន្សំសំចៃក្នុងកម្រិតខ្ពស់ និងប្រុងប្រយ័ត្នចំពោះបាតុភូតផ្គររន្ទះ និងខ្យល់កន្ត្រាក់ ដែលនឹងអាចកើតមានច្រើន៕

សម្តេចធិបតី ហ៊ុន ម៉ាណែត ស្នើឱ្យភាគីចិនពិនិត្យលទ្ធភាពក្នុងការ«បង្កើតតំបន់សេដ្ឋកិច្ចពិសេស»បន្ថែមនៅកម្ពុជា

ភ្នំពេញ៖ ក្នុងជំនួបពិភាក្សាជាមួយឯកឧត្តម វ៉ាង យី (WANG Yi) រដ្ឋមន្រ្តីការបរទេសនៃប្រទេសចិន សម្តេចធិបតី ហ៊ុន ម៉ាណែត បានស្នើឱ្យភាគីចិនពិនិត្យលទ្ធភាពក្នុងការជំរុញកិច្ចសហប្រតិបត្តិការ ដើម្បីបង្កើតតំបន់ពាណិជ្ជកម្មសេរីកម្ពុជា-ចិន និងតំបន់សេដ្ឋកិច្ចពិសេសបន្ថែមទៀតនៅកម្ពុជា។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត កាលពីថ្ងៃទី២២ ខែមេសា ឆ្នាំ២០២៤។

ក្នុងជំនួបនេះ សម្តេចធិបតីនាយករដ្ឋមន្ត្រី បានថ្លែងថា កិច្ចសហប្រតិបត្តិការកម្ពុជា-ចិន បានរួមចំណែកយ៉ាងសំខាន់ក្នុងការជំរុញការអភិវឌ្ឍសង្គម-សេដ្ឋកិច្ចកម្ពុជា ឱ្យមានការរីកចម្រើន។ ចំពោះគំនិតផ្តួចផ្តើមខ្សែក្រវាត់ និងផ្លូវ (BRI) វិញ ក៏បានរួមចំណែកផ្តល់លទ្ធភាពដល់កម្ពុជា ក្នុងការកសាងហេដ្ឋារចនាសម្ព័ន្ធ ដូចជាផ្លូវល្បឿនលឿនភ្នំពេញ-ក្រុងព្រះសីហនុ និងអាកាសយានដ្ឋានអន្តរជាតិសៀមរាប-អង្គរ ដែលបានរួមចំណែកដល់កំណើនសេដ្ឋកិច្ចកម្ពុជាផងដែរ។

សម្តេចធិបតី ហ៊ុន ម៉ាណែត ក៏បានវាយតម្លៃអំពីវឌ្ឍនភាពនៃក្របខ័ណ្ឌកិច្ចសហប្រតិបត្តិការត្បូងពេជ្រ ដែលប្រទេសទាំងពីរបានឯកភាពកាលពីឆ្នាំ២០២៣ តាមរយៈការកំណត់យកឆ្នាំ២០២៤ ជាឆ្នាំនៃការផ្លាស់ប្តូររវាងប្រជាជន និងប្រជាជន។ ជាមួយគ្នានេះ ប្រមុខរាជរដ្ឋាភិបាលកម្ពុជា មានជំនឿថា រំហូរវិនិយោគ និងអ្នកទេសចរមកពីប្រទេសចិន នឹងកើនឡើងបន្ថែមទៀតនៅកម្ពុជា។

ក្នុងជំនួបដដែល ឯកឧត្តម វ៉ាង យី ក៏បានបញ្ជាក់ថា ភាគីចិន នឹងជំរុញបញ្ចប់ការរៀបចំផែនការមេឱ្យបានឆាប់ ដើម្បីឱ្យកិច្ចសហប្រតិបត្តិការលើច្រករបៀងមច្ឆា និងអង្ករ និងកិច្ចសហប្រតិបត្តិការច្រករបៀងឧស្សាហកម្ម និងបច្ចេកវិទ្យា លេចចេញជារូបរាងក្នុងពេលដ៏ខ្លីខាងមុខ ព្រមទាំងជួយអភិវឌ្ឍន៍និងធ្វើទំនើបកម្មវិស័យកសិ-ឧស្សាហកម្ម នៅកម្ពុជាផងដែរ៕

ចម្ការដូងចំនួន១៣ និងទីតាំងវេចខ្ចប់ផ្លែដូងស្រស់ចំនួន៥ គយចិន អនុញ្ញាតឱ្យនាំចេញទៅទីផ្សាររបស់ខ្លួន

ភ្នំពេញ៖ រយៈពេលជាង១ឆ្នាំ អគ្គរដ្ឋបាលគយចិនបានអនុម័តចម្ការដូងចំនួន១៣ និងទីតាំងវេចខ្ចប់ចំនួន៥ ជាផ្លូវការ សម្រាប់នាំចេញផ្លែដូងស្រស់ពីកម្ពុជា ទៅកាន់ប្រទេសចិន។ បច្ចុប្បន្ន ចម្ការដូង និងទីតាំងវេចខ្ចប់ទាំងនេះ កំពុងមមាញឹករៀបចំផ្លែដូងស្រស់របស់កម្ពុជា ដោយរំពឹងថា នឹងសម្រេចការនាំចេញទៅទីផ្សារចិនលើកដំបូងនៅឆ្នាំ២០២៤នេះ។

លោកជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកាលពីថ្ងៃទី២២ ខែមេសា ថា ទីតាំងវេចខ្ចប់ចំនួន៥ ដែលមានសិទ្ធផលិតនិងកែច្នៃវេចខ្ចប់ផ្លែដូងស្រស់ទៅកាន់ទីផ្សារចិន រួមមាន៖ ក្រុមហ៊ុន CAMBODIAN BANANA AGRICULTURAL CO., LTD មានទីតាំងស្ថិតនៅភូមិស្រែស្បូវ ឃុំក្បាលដំរី ស្រុកសំបូរ ខេត្តក្រចេះ, ក្រុមហ៊ុន NONGDE AGRICULTURE DEVELOPMENT CO., LTD. នៅភូមិតាក្រុក ឃុំត្រែង ស្រុករតនមណ្ឌល ខេត្តបាត់ដំបង និងក្រុមហ៊ុន HARMONY WIN INVESTMENT CO., LTD. ស្ថិតនៅភូមិស្រែប្រាំង ឃុំត្រពាំងព្រីង ស្រុកតំបែរ ខេត្តត្បូងឃ្មុំ។

ក្រុមហ៊ុន SOMA FARM (CAMBODIA) CO., LTD. ស្ថិតនៅភូមិខ្នារ ឃុំក្រាំងធ្នង់ ស្រុកបាទី ខេត្តតាកែវ និងក្រុមហ៊ុន HUN TY REAL ESTATE CO., LTD នៅភូមិវាល ឃុំកំពង់សីលា ស្រុកកំពង់សីលា ខេត្តព្រះសីហនុ។ គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ និងអគ្គរដ្ឋបាលគយចិន បានចុះហត្ថលេខាលើពិធីសារស្ដីពីលក្ខខណ្ឌតម្រូវភូតគាមអនាម័យ សម្រាប់នាំចេញផ្លែដូងស្រស់ពីកម្ពុជា ទៅកាន់ប្រទេសចិន តាំងពីថ្ងៃទី១៥ ខែកញ្ញា ឆ្នាំ២០២៣។ បន្ទាប់ពីបានទទួលពាក្យស្នើសុំចុះបញ្ជីចម្ការ និងរោងចក្រកែច្នៃនិងវេចខ្ចប់ មន្ដ្រីជំនាញក៏បានចុះវាយតម្លៃស្របតាមនីតិវិធីបច្ចេកទេស ដូចមានចែងនៅក្នុងពិធីសារ ហើយក៏បានបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ទាំងនោះទៅកាន់ភាគីចិន ដើម្បីពិនិត្យ និងវាយតម្លៃ៕

កម្ពុជា បានអនុម័ត ២៦៨គម្រោង ដែលមានដើមទុនសរុបជិត៥ពាន់លានដុល្លារ ក្នុងឆ្នាំ២០២៣

ភ្នំពេញ៖ កម្ពុជា បានអនុម័ត ២៦៨គម្រោង ក្នុងនោះមាន ២៤៧ជាគម្រោងថ្មី និងគម្រោងពង្រីកផលិតកម្មចំនួន២៦ ដែលមានដើមទុនសរុប ៤ ៩០០លានដុល្លារ ក្នុងឆ្នាំ២០២៣។ នេះជាការលើកឡើងរបស់សម្តេចធិបតី ហ៊ុន ម៉ាណែត ក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ នៅខេត្តតាកែវកាលពីថ្ងៃទី១១ ខែមេសា ឆ្នាំ២០២៤។

គម្រោងវិនិយោគនៅកម្ពុជាទាំងនេះ គឺជាសមិទ្ធផលរបស់រាជរដ្ឋាភិបាលអាណត្តិទី៦ និងទី៧ ដែលខិតខំទាក់ទាញវិនិយោគិន នាពេលកន្លងមក ហើយបច្ចុប្បន្ននេះ ប្រមុខរាជរដ្ឋាភិបាល កំពុងបន្តជំរុញ និងទាក់ទាញការវិនិយោគបន្ថែមទៀត។ សម្តេចធិបតី ហ៊ុន ម៉ាណែត បានគូសបញ្ជាក់ថា៖«ការទាក់ទាញការវិនិយោគមកកម្ពុជានីមួយៗមិនងាយស្រួលទេ គឺយើងជាម្ចាស់ផ្ទះ ចាំបាច់ត្រូវបង្កើតគោលនយោបាយលើកទឹកចិត្ត ការគាំទ្រ និងរក្សាសុខសន្តិភាព ស្ថិរភាពដើម្បីជាការផ្តល់ទំនុកចិត្តដល់វិនិយោគិន ដែលជាហេតុនាំឱ្យពួកគេយល់ព្រមបណ្តាក់ទុននៅកម្ពុជា»។

ការទាក់ទាញការវិនិយោគនេះដែរ សម្តេចធិបតីនាយករដ្ឋមន្រ្តី មានប្រសាសន៍ថា ត្រូវមានការខិតខំពីសំណាក់ប្រមុខរាជរដ្ឋាភិបាល មន្ត្រីរាជធានី-ខេត្តក្នុងក្រសួងស្ថាប័នពាក់ព័ន្ធ និងអាជ្ញាធរខេត្តទាំងអស់ ទើបទទួលបានជោគជ័យ។ ការលើកឡើងបែបនេះ ព្រោះសម្តេចធិបតី ហ៊ុន ម៉ាណែត មានតួនាទីទាក់ទាញតែវិនិយោគិនប៉ុណ្ណោះ ចំណែកការសម្របសម្រួលលើកទឹកចិត្ត និងគោលនយោបាយផ្សេងៗ ដែលធ្វើយ៉ាងណាឱ្យមាននិរន្តរភាព សុខដុមរមនានោះ គឺជាកិច្ចការរបស់ក្រសួង និងស្ថាប័នពាក់ព័ន្ធ។

ប្រមុខរាជរដ្ឋាភិបាល បានលើកឡើងបន្តថា នាពេលថ្មីៗនេះ មានវិនិយោគិនមកពីហុងកុង ម៉ាកាវ អឺរ៉ុប និងកូរ៉េមកកម្ពុជា ហើយក្នុងខែឧសភាខាងមុខ សម្តេចធិបតី នឹងទៅប្រទេសកូរ៉េ ដើម្បីទាក់ទាញការវិនិយោគបន្ថែមទៀត។ ក្រៅពីនេះ សម្តេចធិបតីនាយករដ្ឋមន្រ្តី ហ៊ុន ម៉ាណែត ក៏បានបញ្ជាក់ពីការសម្រេចចិត្តយ៉ាងល្អិតល្អន់ក្នុងការអនុម័តគម្រោងផ្សេងៗ តាមរយៈការទាមទារឱ្យគម្រោងនីមួយៗមានទីកន្លែង និងឆន្ទៈច្បាស់លាស់ ក្នុងការអនុវត្តគម្រោងរបស់ខ្លួនផងដែរ៕