قصيدة استشهاد مولاي موسى الكاظم (عليه السلام)

آه لمصابك يبن حامي الدخيل
لوحدك بزنزانه مسموم وعليل
ليش ولدك ماتجّيك بهالرحيل
إطّلعك من ظلمه الزنازانه

إطّلعك وإتزّورك حامي الحمه
تروح يمه هناك تبچي لفاطمه
بين باب وحايط ونار ودمه
كظت فاطم جتّدك حزنانه

تروح يم حسين تبچي للشهيد
هناك تكسر منك إكيود الحديد
أدري يم عباس مشتاق وتريد
كَبر يمّه بترّبته ومچانه

ليش أربعطعش عام من العمر
بالسلاسل موسه عاش وبالصبر
والنذل هارون عايش بالقصر
وموسه عايش بالدمع وأحزانه

مات مسموم وبديه السلسله
مات مشتاق لزيارة كربله
مات وحده الكاظم بلا عايله
وين أهله وشيعته وعّوانه

أبد ما ذلوّك يا سابع طهر
إنت نور ووحتدك لا ما تضر
إنت ما تحتاج خدّام وقصر
يمن جبرائيل حار بشانه

ابد ما تنهار من كثر البلاء
لو رفعت الإيد لّله بدعاء
يسخّر املاكه وجنوده والسماء
ليك كلها بخدمتك حيرانه

موسى الكاظم

قصيدة مولاتي أم البنين (عليها السلام)

عظّم الله أجرك يحّماي الحمة
بيوم عرجت ليك ثاني فاطمة
تحمل إجروح ابكَلبها للسمة
إجروح فكَد الاربعة الوفاية

عاشت بآلام وبهم وعذاب
حين راح حسين يم طف المصاب
إنتظرته بأحزان وبهم المصاب
تالي جثته عالترب دماية

دفنت ام عباس بتراب البقيع
إكبور أهل الوفه بالهم الفظيع
تصيح آه يحسين رووك النجيع
وماحظر دفنتها راعي الراية

ماتت وبجروحها هم وألم
ماتت بأحزان زينب والخيم
ماتت وراحت لعد راعي العلم
تنتظر موتتها صار إهواية

قصيدة مولاي رسول الله (صلى الله عليه وآله)

حين غمضت عين طاه المصطفه
ما رعوا حرمه لأهل بيته ووفه
نار شعلوا لاهبه ما تنطفه
أحقاد أعراب البدو طلعوها

حين هجموا سكْطت الزهره الجنين
وما رعوا حرمه لأمير المؤمنين
رادوا يحركون زينب والحسين
كبل عاشر رادوا يحركوها

ثار أصانم الكفر ضد الرسول
طلعوها بفاطمه بنته البتول
وكره حيدر باقي بيهم ما يزول
عكُب طاه أولايته منعوها

عاشت بالآم محمر الجفن
فاطمة الزهره عكُب طاه تون
إبدال ما يواسونها بهذا الحزن
بين باب وحايط يعصروها

ماتت وبعيونها ضرب ودمه
ماتت وراحت لعد رب السمه
تشكي سكْط إجنين حمّاي الحمه
تشكي طاه من الذي هظموها

قصيدة مولاي الامام الحسن المجتبى (عليه السلام)

يمن يهوي الكون كله براحته
ياسليل المرتضه سر هل اته
إنت أصل الكون كله وعلته
والسفينه المنقذه من الفتن

أولايتك علكون من الله فرض
لون إنت تروح تهتز الارض
تنّجي شيعه حيدره يوم العرض
سيدي بحماك من يوم المحن

إنت آية من الكرم ومن السخاء
إنت رابع نور باصحاب الكساء
إنت حجة إعله الارض وإعله السماء
يبن من بالسيف ذل عز الوثن

هيج نور تسمه كَوم الظالمه
مارعوا حرمه لعلي حامي الحمه
ليش أبو محمد چبته مخذمه
ليش كل أعضاء كلبه تكَطعن

بالسهام إنرمت هاي إجنازته
وعن رسول الله بعيده دفنته
بأمر أم الجمل ضربوا جثته
بالبقيع إندفن مظلوم الحسن

موسى الكاظم

قصيدة اليوم العاشر من محرم الحرام

يا ام زينب عفتي زينب بالحزن
رحتي للمرسول جرحچ بالجفن
هاي زينب بالغرب ضلت تون
هيه والأطفال ضلت بالفله

ياام زينب عفتي زينب بالقهر
عافت العباس مرمي عالنهر
راحت وما ودّعت هذا الكمر
تبچي من اسياط شمر وحرمله

يا ام زينب عفتي زينب بالام
كطعوا لجفين من راعي العلم
بالعمود انظرب راسه وانثلم
بالاحزان تعيش بت عقد الوله

ياام زينب راح عبدالله الرضيع
طوكوا بالسهم رووه النجيع
بحظن ابوه حسين وبكتره صريع
بيد ابوه ادماه ضلت سايله

ياام زينب كتلوا أصحاب الحسين
وما بقه ناصر للحسين ومعين
ودع اخته وداع مقهور وحزين
والاملاك بالسمه تبچي اله

يا ام زينب راحن ابنات النبي
عالهزل اخذوا بنات الطالبي
بالسياط تروح زينب بالسبي
حين عافتهم بوادي كربله

قصيدة مولاي القاسم (عليه السلام)

من الخيم طالع كمر صوب العده
حين شاف أصحاب عمه إمدده
يريد ياخذ ثار مصباح الهده
شبل نور الكون إبن المجتبه

برز ياخذ شور الإحسين الحبيب
يكله أريدن آخذ بثار السليب
علي الأكبر مات عطشان وغريب
ريت تأذنلي يبن سيد الإبه

إذن عمه وهملت إدموعه تسيل
وكال صبري ليك يا ربي جميل
برز يشبه عمه عباس الكفيل
نار علكفار شبت لاهبه

حين غار إطايرت منهم الروس
وحار ملك الموت في قبض النفوس
وبجثثهم خيلهم ضلت تدوس
وجيش آل زياد كله رعّبه

تعجز إعقول البشر من إتسمع
طفل طول السيف عافرس صرع
مثل حيدر عالكفر لمن طلع
بحنين الجيش وحده حاربه

لجن غدر الكوم مامنه سلم
إنطبر جاسم بالغدر راسه انثلم
انطبر راسه وطاح من كثر الالم
وناده عمه خامس أصحاب العبه

اجه ليه حسين وادموعه تصب
وعله ام القاسم الموقف صعب
حين سمعت كطعت انياط الكلب
راح منها وهو بعده بالصبه

قصيدة المولى مسلم (عليه السلام)

يا رسول حسين يا نعمه الرسول
جيت لإبن المرتضه وإبن البتول
حسين عالم بيك عالحك ما تزول
مدح بيك وكال يا نعمه الثقه

جيت تهدي الناس لإبن المصطفه
لچن غدروا بيك ماعدهم وفه
نار مرجانه إتلهب ما تنطفه
كلشي عدهم مستباح بلا وقه

إبزرود حسين حين الي وصل
سمع مسلمها بالاحبال انسحل
بالغدر والجور هانيها انچتل
راح مسلم بالجنان الملتقه

كال حامي الضعن عباس البطل
صاحب الراية ويمن كوله فعل
بالكلوب تعيش يا مسلم عدل
يا شجاع ويا ورع يابولتقه

لون دمعت ليك يا مسلم العين
تستحق جنة عدن ويا الحسين
وتنكسي كوثر امير المؤمنين
تعيش ويا هالحقيقة المطلقه

قصيدة استقبال شهر محرّم الحرام

من ارض مكة طلع بالعايله
يريد يوصل لارض وادي كربله
يريد تخضب هامته فوك الفلة
حته دين اللّه يرفع شانه

ربي تخضب هامتي فوك التراب
ربي اشاهد اسرتي بهم المصاب
حته تخلص شيعتي من العذاب
ودين جدي ينرفع سلطانه

لون تحرك للرسول مخيمه
آل مروان وسميه المجرمه
تنرفع رايه لعلي حامي الحمه
وتنجو شيعه حيدره وعوّانه

لون تسحك جثتي الكوم النذال
وتركض من الخوف زينب والعيال
وغدت بين الخيل تتهاوه الاطفال
أمي تشفع للبچه باحزانه

لون كطعوا جثتي بارض الطفوف
وكطعوا لعباس لاثنين الاجفوف
وبالرماح اصحابي راحت والسيوف
الحسن يشفع للمحب ويانه

لون تسبه ابنات طاه المصطفه
ومارعوا حرمه لرسول الله ووفه
نار يشعل لاهبه ما تنطفه
المهدي صاحب ثارنه وعنوانه

**أعوذ بالله من الشيطان الرجيم
بسم الله الرحمن الرحيم
قال الامام الرضا (عليه السلام)
: من كان يوم عاشوراء يوم مصيبته وحزنه وبكائه، يجعل الله عز وجل يوم القيامة يوم فرحه وسروره .

علل الشرائع: ٢٢٥ / ١ و ٢٢٧ / ٢.

قصائد شهر محرّم الحرام**

بسم الله الرحمن الرحيم
اللهم صل على محمد وال محمد
اسعد الله ايامكم بعيد الله الاكبر عيد الغدير الاغر

(تمت زيارة امير المؤمنين (عليه السلام)عن جميع المشتركين)