Кўнгил айтмасига кўнмайди, билсанг,
Гул шохи шунчаки синмайди,билсанг,
Одам ҳам ўзича унмайди,билсанг,
Тоғлар ортида ҳам тоғлар бўлади.

Гўзаллик муҳаббат овонида, дил,
Гоҳида санамлар товонида, дил,
Асрорли ҳаётнинг довонида, дил,
Йиғлаб эслайдиган чоғлар бўлади.

Шабнамлар юзида нурлар ўйнаган,
Саболар куйида қирлар ўйнаган,
Қай ошиқ қалбида сирлар ўйнаган,
Диллари бир гўзал боғлар бўлади.

Кўнгилжон, зиёга тўйинмоқни бил,
Ўтар кетар дамлар куйинмоқни бил,
Шукроналар айтиб суйинмоқни бил,
Оҳларинг юракда доғлар бўлади.

https://t.me/joinchat/AAAAAE8jMwFmtw2LMNLlFw

ИЗҲОРСИЗ МУҲАББАТ

Севаман, деб айтмаган асло,
Севаман, деб хатлар битмаган.
Яшамаган бир лаҳза ҳатто,
Хаёлисиз куни ўтмаган.

Севаман, деб айтмаган асло,
Йўқ, бермаган даста-даста гул.
Ҳаммасига бўлиб бепарво,
Фақат кўнгул бергандир, кўнгул.

Севаман, деб айтмаган асло,
Кўнгил уйи – топ-тоза чинни.
Боқмай на ер, на ёруғ само,
Кўзларига термулган, жинни.

Севаман, деб айтмаган асло,
Эргашади, талпинар, не сир.
Қуёшининг ортидан гўё,
Тўхтамайди, айланади ер.

Севаман, деб айтмаган асло,
Авайлаган кафтида тутган.
Сал кўрмаса Мажнуни шайдо,
Лайлосини излаган, кутган.

Севаман, деб айтмаган асло,
Дил лавҳига исмини ёзган.
Чаман ичра гуллар кўп, аммо
Битта гулни бағрига босган.

Севаман, деб айтмаган асло,
Ўйлайдики, изҳор ҳам миннат.
Лек борлиғи ишқдан мутлақо,
Соф муҳаббат, садоқат, ҳиммат.

15.01.2025

https://t.me/joinchat/AAAAAE8jMwFmtw2LMNLlFw

Агар Ватан чорласа, юрма, боргин югуриб,
Ёвлар қаршисига чиқ, арслондайин ўкириб.
Орини асролмаган, асролмайди жонини,
Эгилиб жон бергунча, жонини ол суғуриб.

https://t.me/joinchat/AAAAAE8jMwFmtw2LMNLlFw

АСКАР МАКТУБИ

Чегарада турибман мағрур,
Ортда Ватан, ортда сен борсан.
Хаёлимга бағишлайсан нур,
Юрагимдан кетмас баҳорсан.

Боболардан эшитганим бор,
Мард йигитлар элнинг шонидир.
Фақат шуни унутма, дилдор,
Севги дилнинг ҳаёт-жонидир.

Қўлингдаги, йўқ, мактуб эмас,
Уриб турган юрагим ахир,
Бу оламда Ватан муқаддас,
Бу оламда севги азиздир.

Номаларим кечикса гоҳо,
Сен сабрнинг қўлларидан тут.
Дилда тутиб ишқни доимо,
Ҳузурингга боргайдирман, кут.

Аскарда куч, аскарда тоқат,
Ватан учун ҳар нега шайман.
Сен севгимга айла садоқат,
Мен сен учун юртни асрайман.

https://t.me/gayratmajid