بسم الله الرحمن الرحيم
قـــدْ طلعَ البدرُ علـــــينا يـــزهرُ  قلتُ فــقالوا  ذاكَ خيرُالبشرِ
فقلتُ لا فقالوا مَـــــنْ ذاكَ ترى  تعني علياً نفسَهُ في الجوهرِ
قلــــــتُ علياً هـــــوَ ذاكَ إسمُهُ  سـميُّ مـــِنْ جاءَ بنصرِ خيبرِ
قالوا إذاً شبلُ الحسينِ الأنجـبُ  فــقــــلتُ لاشكَ نجيبُ الأطهرِ
قالــــــوا إذاً زينُ العبادِ العلــمُ   وهوَ عليُ ابنُ الحسينِ الأنورِ
و شهرُ شعبانَ زمـــانُ المولدِ    فقلت  لكـنْ يومَ حادي العشرِ
قالوا أجبنا أنتَ مَـــنْ تعني إذاً    قلتُ وهل يخفى ضياءُ القمرِ
ذاكَ عــليٌ  وهوَ شِبهُ المصطفى  ذاكَ الــــــذي قدْ لقبَ بالأكبرِ

تمت بفضل الله وتوفيقه والحمدلله رب العالمين اللهُمَّ صلِّ على محمدٍوالِمحمدوعَجل فرجهم
حيدركريم جارالله  الكربلائي

https://t.me/haiderkarem

بسمه تعالى
(نــــورهُ وجـهُ المـساجدْ)
قيلَ سجــــــادٌ فقـلنا شأنكـــــــمْ واللهُ شـاهـدْ
بل وأنتَ مَنْ يــعــمّرْ نــــورُهُ وجـهَ المـسـاجدْ
كنتَ في صلبِ الخليلِ تبـني للبـيتِ القــــواعـدْ
أيُّها المولــودُ شـبلاً للحســـــينِ كـي تعاضـدْ
صـــــبرهُ بعدَ الـبلاءِ وبهِ كـــــــــنتَ تجــاهـدْ
قـــــيَّدوكَ فجعـــلـتَ القـــيدَ للـــــنصرِ قـلائدْ
عندَ عسرٍ عـندَ يسرٍ أنت في الأمـرينِ واحـدْ
بكَ أوصــــافُ علـيٍ ولـــدٌ مـــن خــيرِ والـدْ
ثـــــغرُك ما إنْ تكلمْ أخرسَ الخصـمَ المعاندْ
حيــثُ ماكنتَ تـكونُ راكــــــــــعاً للهِ ســاجـدْ
حدّثَ القرانُ فـضلكْ ذاكَ يكـــــفيكَ محـــامدْ
إنما بالفضلِ يطمــعْ فيكَ مَن يشدو القصائدْ

تمت بفضل الله وتوفيقه والحمدلله رب العالمين
اللهُمَّ صلِّ على محمدٍوالِ محمدوعَجل فرجهم
حيدركريم جارالله الكربلائي

https://t.me/haiderkarem

بسمه تعالى
حَمِد من المســـاجد ياعلي السجــاد
تعاله بكل خشـــوع بيوم ميلادك
ومراسيل التهاني امعطره بقـــداح
عـله الريح اعتنت لحسين وجـدادك
فــرح ﮔلب المـوالي ورتل الــقـران
وتعمه ايصيح كـــون اعيون حسادك
زين العـــابديــن وزيــنة الأكـــوان
يذخر حسين نور وللــشـرع رادك
ربك بالنبي وبالــــزهره والكـــرار
يل كلك شرف هيبه وشـرف زادك
أوصفك بيش وانته الطاهر المعصوم
يـل جـــدك نبي وبــــزودك امجادك
حـﮔـه بمولدك يفخر شهر شعبان
بخامــــس يـوم مـن ايامه ميعادك

تمت بفضل الله وتوفيقه، الحمد لله رب العالمين،
اللهُمَّ صل على محمّدٍ وآلِ محمّدٍ وعَجِّلْ فرجَهم
حيدر كريم جار الله الكربلائي

https://t.me/haiderkarem

اللهم صل على فاطمة وأبيها و بعلها و بينها و السر المستودع فيها بعدد ما أحاط به علمك و ما أحصاه كتابك
٠٠٠٠٠
عظم الله اجورنا واجوركم

https://youtu.be/5kIN4S4BUXs?si=EkN9VdG6b71hW0Zw

بسم الله الرحمن الرحيم
يرضه الرضاچ بكل حال      رب العرش يالزهره

من طهــر طاهر طاهره يالكــــوثر
بنت النبي وكُفئِچ فـــقط بس حيدر
أُم الحسن وحســـين دُر وجـــــوهر
دار الوصي بيــــچ اينور      يل چنتي نوره وعطره

دارچ وگف طه النبـــي بــعــــتـابه
من الــــــدرر والذهب أغله تــرابه
بوب الجنان الســـبعه تعشگ بـابه
يوگف عليهه المختار         يســــتأذن ابكل عمره

دارچ يحــن المسجــد اعله اذكاره
رب الــــبـــريه للمعـــــالي اختاره
تسبيحچ الــــنور اليضوي اكـتاره
بي يبتشر جــبرائيل        وكــــل مَلك من اينظره

للدين واهل الــــدين دارچ قِـــبله
والماعرف قدره غــريگ بجـهله
روضة قـــداسه لـــو نريد انمَثله
كل سائل وكل مسكين       يـــسر العُسر يعـــتبره

انت الكرم واعله البنـــــين اتـوزع
جود الحسن منـــچ فــــرع وتفرع
خــــالي التعــــنالچ أبـــــد مايرجع
يالزهره جود اهل الجود      من بحـــــر جودچ قطره

تمت بفضل الله وتوفيقه والحمدلله رب العالمين
اللهُمَّ صلِّ على محمدٍوالِ محمدوعَجل فرجهم
حيدركريم جارالله  الكربلائي
الفاتحة الى امواتي وبالخصوص والدتي رحمها الله
https://t.me/haiderkarem

بسم الله الرحمن الرحيم
ضعـــــن زينب عـــــاود الطف كربله
بهِمه ياعـــــباس گــــــــــوم استقبله

تســـــرع ابخطواتهه وتطوي الدرب
امحَمل ابآلام وهــــموم الــــگــــــلـب
اتريد يـــــمكم تنفض اتراب الــغـرب
وكـــل غـــــريب ايحن يعباس الـهله

لوردت تعــــرفهه وصـــــلت نينوى
ريحة الخـــــوه تشمهه اويه الهوه
او لودليلك من محنّـــــــــتهه ارتوه
گــــــول ردت بت علي بـــالعايله
*

موغــــريبه اعليهه مــن ردت تـون
من كسرضلـع امهه عاشرهه الحزن
ردت ولـــــيامكم صـــــارت تحــــــن
وينــــــه جسام ويــــگــــلهه ياهله

چـــــانت بظلكـــم وظلكـــــم لم يزل
مـــن تـــــــفزعكم تفــزعون ابعجل
لاچــــــن اشبيده الأخذ روحه الأجل
كل عمرهه بجالكم مـــــــــدلــــلــه

ردتلكم والــــسوالـــــف بالـــــدمع
ابگبرك ومن تحچي زينب تستمع
بالأمس لختك چـــنت سيف ودرع
ومن يميل المحمــــــل انته اتعدله

مــــاتــــسولفــــلـك تعرفك تنهضم
چـــــــم رزيه شافت وشافت ظلم
وگـــــــــفت الديوان دگت بالعظم
وصــــبرت وبِــيزيد نَزلت زلزله

راس اخــوهه بالطشت من شافته
من دمه المنحر خضــــــيبه شيبته
مابچــــت بـــــس الگلــــبهه بچته
يـــــمك اتعــــنت دمــــــعهه تهمله
*
ردت ابلايه رقــــــــــــيه ياگـــــــمر
طفله ياعــــباس مـــــــــوتهه القهر
مــــاتت وبحجـــابهــــــه دم النــحر
دم ابوهه ابدمعه صعبــــــه اتغسله

تمت بفضل الله وتوفيقه والحمدلله رب العالمين اللهُمَّ صلِّ على محمدٍوالِ محمدوعَجل فرجهم
حيدركريم جارالله  الكربلائي
الفاتحة الى امواتي وبالخصوص والدتي رحمها الله. @haiderkarem

بسم الله الرحمن الرحيم
أجيـــت باربعينك خــــويه يحسين
جبت لــــــوعة رقيه ودمعة العين
اجيت اشــــتم ترابك أريد ابچي المصابك
يمذبوح يمذبوح

طفـــوفك كــــل حياتي واشد كـــل نايباتـي
عجيبه وعَـــــدله لسه ولا حـــــانت وفاتي
مصابك مـــاله ثانـــي الــف موته بثواني
صــبرگلبي ســــندني صــبر ربي نطاني
ذبحني العـاشر الماتنسي اجـروحه
صرت مثل العدل واتگطعت روحه
لگيت العـــاشر بيوم أربعــينك
وأحس توه يخويه انحـز وتينك
دمه المنحر خضابك أريد ابچي المصابك
يمذبوح يمذبوح

جبت حـــزن اللـــيالي وضعن من طفله خالي
عفت يمهه دمعـــــتي مـــشت عـــافت دلالي
عـــــزيزه ودللّــــتهه تظل يــــمي ردتـــــهه
يخويه واعله راسك مـــنيــــــتهه لفــــتهه
ماعـــدهه گـــــلب للطــــف ترد اردود
ولا لـــرض المدينه وأنته مــاموجود
عزيزه ومــــاتت ابذيچ الخـــرابه
ودليــــــلي ازداد بالغربه مصابه
هِضَم بـــنتك غيابك أريد ابچي المصابك
يمذبوح يمذبوح

عــله الغبـــره عفتــكم غـــــوالي وفـــارگـتكم
أضاحي اعــله الوطيه ســــــبيّه اودعــــــتكم
يخوي الحـــادي ذباح نظرت الروس برمـاح
ويعذب بالطفل ســوط إذا مــــن ناگـــته طاح
هدم حيلي السبي من كــربله للشام
سچــاچين الــــــدرب وبكل كتر آلام
سياط الــــظالم بظـــهر الــــيتامه
جروح الي بگـــت منهن عـلامه
تعــذبــت العـــــذابك أريد ابچي المصابك
يمذبوح يمذبوح

مـــن الشـــــــام اعتنيتك بلحــد ساكن لـــگـــــيتك
جسد خــــويه بـــلا راس جـبـــت راســـك واجـيتك
برمح چـــان وانظـــره واجـــر كل لحظه حسره
تمر الــريح بالـــــشيب تـــــنوح وتـجري عَبره
وصلتك خــــــويه بـــس مابيّه احچي
وعلى گبــــــــرك ردت بس اگعد ابچي
ذبيح وتبچي لـــمصابه الســـــبيه
يــــــريت اوياك وافتـــني الـــمنيه
نقش دمعــي ابكتابك أريد ابچي المصابك
يمذبوح يمذبوح

ســـوه للطــف اجـــينه يبـــو الروح الحــنـينه
صعـــب خـــويه بلـياك اطب لارض المــــدينه
بقت دارك غــــــــريبه ومـــــــثل گـلبي كئيبه
اذا اوگف عله الــباب اگف واحچي المصيبه
چـــــــــتالك يــــبوالســــجاد چـــــتالي
يظل دمعـــي بمصابك يحــــچي للتالي
ذبيـــح وغــــــربتك صارت ديارك
يبن امـــــي أطب اشلـــــون دارك
إذا دگــــــــــيت بابك أريد ابچي المصابك
يمذبوح يمذبوح

تمت بفضل الله وتوفيقه، الحمد لله رب العالمين
اللهُمَّ صلِّ على محمّدٍ وآلِ محمّدٍ وعَجِّلْ فرجَهم
حيدر كريم جار الله الكربلائي
الفاتحة إلى أمواتي وبالخصوص والدتي رحمها الله. https://t.me/haiderkarem

بسم الله الرحمن الرحيم
جينه للطف جينه       ياهـــــو يتـــلگانه

منهو يتلگـــانه منهو مـــن رجعنه امن الـــسفر
وباللحد شيخ العشيره ودمــــه يجري امن الـنحر
عـــــفته عالغـــــبره ومشيت وجسمه متوذر وذر
عله صدره اخيول داست چم ضــــــلع منه انكسر
مـــنذبح والــــينه      وراســه رد اويانه
  جينه للطف جينه       ياهـــــو يتـــلگانه

آه من عاشر محرم آه من يـــــــــوم اهـــــــدعَش
عــــفت ابو السجـــــاد عفـــته ميته والناگه نــعَش
بگفه نحره ثنعش ضربه بمهجتي جروحي ثنعَش
مثل سعفه صار گلبي من هـــــــوه احزانه ارتعَـش
نشــتكي البارينه          وصبر هوه انطانه
جينه للطف جينه           ياهـــــو يتـــلگانه

منهو يتلــــــگانه منهــــم ياهو ظل وتــــــوقعـــه
وكافلي العــــــباس عــــفته دامــي يَم الــــمشرعه
يَمه جوده ويَمه رايه وگــلبي طاح بــــمصرعــــه
بالعمــــد مصــــــيوب راسه والچـــفوف امگطعه
غافــي دم بعينه        لشوفته عطشانه
جينه للطف جينه       ياهـــــو يتـــلگانه

مايقصرون ولـــــذلك مــــــــاگلت چلمت عتـاب
جيت وشواگ ابدليلي واهمل ادموع الـمصاب
اشلون يتلگاني لكـبر ونـــــدفن جـــوه التراب
منطبر بالـــسيف راسه ومـــثله جسام الشباب
بالحــــزن ردينه        ونبچي من بلوانه
جينه للطف جينه       ياهـــــو يتـــلگانه

بالمثــــل يــــنگال نســـــمع ياغريب اذكر هلك
ها يگلبي اشلون حالك روحي صارت تـــسألك
بالوطن محــــد بگـــــالك بالــــغرب ياهو الإلك
كــــل بني هــــــاشم ذبايح  بيهم انصاب الفلك
      والسمه اتواسينه        تبچي ويّه ابچانه
      جينه للطف جينه       ياهـــــو يتـــلگانه

تمت بفضل الله وتوفيقه، الحمد لله رب العالمين،
وصلِّ اللهم على محمّدٍ وآلِ محمّدٍ وعَجِّلْ فرجَهم،
اللهُمَّ صلِّ على محمّدٍ وآلِ محمّدٍ وعَجِّلْ فرجَهم
حيدر كريم جار الله الكربلائي
الفاتحة إلى أمواتي وبالخصوص والدتي رحمها الله https://t.me/haiderkarem