عباس العبادي

ساكت والخلگ تغرف اجفوف وطوس..
وكل غرفة عفه ابصدر النهر حافر.

ما صحت ابوجه مستحه وعفّة ذات..
و لا ردّيت چف وخشّنت خاطر.

الحِب من طينتي ومن فيض عيني الماي ..
يضوگ إملوحتي ويتحسّر العابر.

وأبحّر باليمر تارس شليله اعثوگ..
بيهن دم صفنتي وخاطري الماذر.

ويمشن والذهب من ينعرض ينباع..
ويخلّي اليمد چف الفشل تاجر.

وأضحك واللسن ترفس ابراگ الماي..
بين اللاذ عنّي وبين الإيكابر.

اتمد إلسانها الما عدها ادين اتلوح..
وأنا لوما إبصده اينولها الباتر.

ضهدنّي الخطيّه ومستحه الناطور..
واليكبر ويعقل واليعف باچر.

روحي الصابره الكسرت اشراعي ابليل..
شكسر ظهر الذهب غير الغضا الصابر.

وعفوي اللبّس الما يستحون اثياب..
فشل ينجاب راسه الأعزل الحاسر.

آ.. يالمستحه الفارش ابروحي افراش..
چتّفني وتشضّت همّة الثاير.

لا يرضى الصبر يخلص وأوزْع الطين..
ولا چلمه التخطّت رگبة الضامر.

وآنه أدري الحيه المشگوگ ما ينراف..
والإتحيطه الذياب الجايعه ايناطر.

وأدري البورحت گصّته السانه ايطول..
واليسمع فحيح السامه ايحاذر.

وأدري الطلّعتهم للضوه اينكرون..
وأدري اليرد سالم ينكر الساتر.

وترك الفارغ امن الناس راحة بال..
الكهف جيه فارغ امن اتجابله ايداهر.

رساله لكل قلم طابع ابراسه الباب..
من گد ما امتاني المالح الشاجر.

ما تعدل مشيتك ريشة الطاووس..
تِبحِر بالمعادن صفنة الناظر.

و تفضحك ترى الشاعر تميزه الروح..
واليتنفّس بروحين مو شاعر.

هذني افضالتي الخشنات مضمومات..
گصر چف النبال وگرّب الطاير.

بس ما وكّرت حتى الزغيره اتطير..
يشد عزم المهر من يثگل الغاير.

المن غايره الظلِّت بأثرها الخيل..
وعليمن هالجمر للحارهم فاتر.

تطلگ شاعريتي وتوم يتبع توم..
بس يتفرهدن من عاجر لعاجر.

ما هدّيت صفنه وردّت ابلا ريم..
يتعب بس يجيب الخاتله الكاسر.

وين النايضه التنّعت للمحچال..
ما تارس شليلي امن الحچي العابر

حسن البركي

(الى امل الانسانية )

عگب كلشي اليخلي الگلب دمه اسود
عمرك ياطويل العمر.. صار شگد
عمر البشر يگصر من يجيسه الظيم
بس عمرك عكس بالظيم يتمدد
واليصعد طويلة نخل وبلاخوف
يشوف المايشوفه الماكدر يصعد
وانت الصاعد اعله الزمن ومخاوي
يحالوب اليغث السنبل المرتد
يالشايف السامع بيهن التاريخ
اليشوف بعينه مو مثل اليگله احد
ياراعي الطلابة الماتريد شهود
يسيف المايشرفك تحتك بمبرد
اليعيش بظل حضارة (هاك لاهنّاك)
يحس بروحه ناصي وصعبة يتمرد
واذا يوسف النية الماضي ماچاوي
يظل ثوب المروة من القبل ينقد
شيخلص النده من المستحة المخنوك
شيطلع العذر من هوسة المحد
شيزيح التراب العشب اعله الدار
شيحد السيوف الباچت من الحد
من يعصف الخوف البي يضيع الصوت
هنا موقف ابنادم يبدي يتعقد
هنا مبدأ الثورة يريد دم خطار
هنا مثل الچمى الشخصية تتفرهد
يالشفت بزمانك چم حضارة اتطيح
وتكوم وتطيح وتحتر وتبرد
خو تندل نقاط الضعف وين تصير
اذا عين العدالة تلگتك مرود
هاي الحكمة من كل هالعصور تعيش
حسب وجهة نظر كل عقل مامرتد
يالماشايفه ولاينحمل فرگاه
يباب ارزاقنا الينفتح من ينسد
ترا المنك وبيك اچماله فوك البيك
شلونك من شفت طشارنا اتعدد
ياطشارنا الماينلظم بالعين
الوعي خطارنا الكاظيها يتنشد
ننهض بالفكر مثل اليريد يطيح
يكبر خوفه دنيا ودغدغة مسعد
صعبة تميز المابي مضرة اعليك
مثل مسحة الشامة من الجتف والخد
من تنظف الوادم تشتهيها ال آخ
وتتوصخ ونفس ال آخ تجدد
يمتى الثقة العمية تصير عدها عيون
وتفرزن اليبچي من الگظاها ارمد
محتاجك سفرجل للوليد الجاي
هم حبلة القضية وگربت تولد
وبعدني اعله السؤال البي بديت وياك
عمرك ياطويل العمر صار شگد

ريسان الخزعلي

سحر أسود
ولا تحزَن ..

لوَن ما ماشفت لون الوجه بمرايَه

ولا تحزن ..

أعمى انت َ إو ..

عصاك

اتشوف

خط

النمل

نص

الليل ../

آيه الماكَبلهه آيه

عصاك

اعله

الحجر

تكتب

سحر

أسود

ولا ينفك بالقرايه ..!
.
.
ولا تحزن ..

أعمى انت َ او ضواك ابروحك اتشوفه

ياهو الشاف كَبلك ظلمه بمرايه ..؟! ...

غآزي ثجيل

صواني اشموع للغايب
يدجلة اچم وچم وديت
تتهادى اويه جاري الماي
وبعيني ملح حطيت

وأتنطر وأعد أيام وحجارة درب ذبيت

أدگ كل باب لعيونك
يجاسي الماعلي حنيت
تدريني يلفني الشوگ
وابدربك انة انذبيت
مر بيَّ ولو طارش واگولن مر علي للبيت

مر بيه ولو شامت
واگولن ليك انه انذريت
مر بينه گلب يفلان
ذابل وارضه لو مريت
شنهي المارچه عيوني
على اعيونك گبل ماجيت

شنهي البدل گليبك يخايب ليش مانشديت

نذر لعيونك عيوني ..
وحنيني ...
وكل بجايا الحيل
يلكلّك طمع عاشج
يعايل ماتعرف العيل
أظن تدري ابحنيني يموت
مالوم اعله چف اسهيل
واشچيلك واحن مگرود
يلوصلك ترافه وهيل
احن چالفاجده امن النوگ
لو فگدت حوار بليل
يالمها گلب مصدوع واتردها مدامع سيل

يطربها الحنين بشوگ
لو حنت ثلث توكات
وروحي الماغداها الفوت
لفها وجمع بيها وفات
يفطمها الهجر واتعود
ترضع بالوصل مرات

ديدان الهوه هذا ..
وصل
وامكابر
وحسرات
لاچن ياحلاة الشوگ لودگ بالگلت نغمات

يدعيلك حماد الروح
روض يعانج النسمات
محفوف ابسواجي الود
عليه أمروز ملتفات
مشتول ابأمل باچر
فرح بجناح فراشات
ترسم للهوه اخيالك
وتهديك بترف نجمات

يلما عاتتك كل شوگ غير اطيافك الحلوة

ينيسان الهوه ابترتيب
ياسلوه اعلى كل سلوه
هواك ابكل كتر چودر وسموك الخلگ بلوه

حيدر شيآع

حـاﭼـيني الـدروب اذنـوب
من يشـتـد عـطش بالـروح
تسبيـح العطش للماي
يرسـم بالفياي احبـوب

يـاقـداح
ياضـحكـة هـرش بعـيون كل فلاح
احـس بعيـوني ليل ودم
صـاحب ثار مايـحلـم
ياذيـني هـوه اجـويريـد
من كـل صـوب صوت ازرگ

ياعشـگ الصبـة والـكاس
حـلات الكاس من يعتـگ
اجـرحني وٲگـولن والمت جـرحي
اطـوش امنيـن ؟
وانت بكـل كتـر برحـي
كلـشي البيـك مامـگـيول للحـايف
ولامـاخـوذ منـك للـغريب امتـاع
حـلاتك عالسـوالف يشـتريك الراي
ماتنبـاع

حـاﭼـيني النـشد موعيب للهايـم
هنيـال الستر يتسمة بسمة الثوب
حـدرة اشـﭼـم گمـر نايـــم

تـعال ابـروحي اناغيـلك
وسـولفلك سبـع شبـگات
عن خصـرك واغنيـلك
وٲبـدي اگـبال عيـنك
دمعتي السمره

اخـاف مـن الـمحابس
وانـته نجـمة ابلـــيل
بعـيون الـزلـم شــذرة
ولـك ياهيـــل
بيـه امنـل خضـار اعله النخل صاعود
واسـتاهـل تلمني ابيـن اصابيعـك ورد ذابــــل

ﭼـم ليل ايتبسم والصبح ناطـور
بـﭼـيت اشـﭼـم قميـص ابـلاعطـر منــك!!!!!

ويـدگ گلبي علـﻰ المامش
اثـاري الـدم رفيق ايسولف الــدمـك

تـدنالي الشتال يعيش گاع الله
ويخضر بالسـواجي الـوان
من يلـگة النفس صدريــن
ياخـذ كل هوه البستـان
علـﻰ يامال؟
ادور بالفتاوي ومالگيت الدين
فتـوة تحلل البـــوســة

علـﻰ يامال؟
لوسولف العاشـگ بالعشگ يلام
واكبار العشاير تنگلب هـوسـة
ماترهـم اگـلادة او جيـد
مـرهون بـحرز ينســام
ولاتـرهم ﭼـگارة حيــف
تنصـاغ الـحلـگ نمام
ﭼا ليش الحجـر مـذمــوم
لو صادف اخدود الـجام

ليش اللام؟
وانه اول دمـــع مستـور
اضـحـك ع الـرحي من اتـدور
واخضـر رغـم غيـض النار
سالـوفة رغيف ابـحلگ كل تنور
اسـبگ للضفاير مسـتحة او حنـه
واطش روحـي اعلـه كل مغـتاض
بـﭼـفوفي هـله وشـاجـور
حـاﭼـيني ابـكثر ما حاولت انساك يالغالي
التلوحـة الجـفوف ارخـيص
مو مثل التـريض وانعشـگ
تالـي.

مـامرة عبايـة وتحـت منها انـتـه
ولابصـمات اديـه
الحضنـة الشباﭾ
مر بيها النـدة وطاح الاثر سكتـه
هـذا انـه حلـم مـگـيول
للماغمضة عيـنة
وهذا انـه جـرح بالـگاع
يضـحك والمساحي تسولف ابطيـنة

احـن واشتاگـلك عز الشـتة الـمالوم
شـوگ الشمس للـوردة
تعال اعيـوني كلها انجـوم
وحـدة تسولف الـوحدة
انـه اول عشـگ منـهوب
ليش اللام لو گلت الدروب اذنوب
تسبيح العطش للماي
يرسم بالفياي احـبوب

مرتضى مطشر

ياحبيبي ولا اتخاف
احنه كلما نبعد نرد للبدايه
گاع ربنا مدوره ومامش نهايه
ويجي يوم الگاع تفتر ونتلاگه
وكل وسيله تصير غايه

يجي يوم الزم اچفوفك
واوكف بگلب الولايه
يجي يوم وبالحلال بزفه افضحك
يجي يوم اهمس بذانك
همسه العرسان ذيج
المدري شيگولون بيها
المهم تضحك

يجي يوم ابفرد ماعون انتعشه
يجي يوم وتغفى فوگ ضلوع صدري
واحسب بنمشات وجهك نمشة نمشه

واني ناذرلك اجيب الزفه ممشة
وموش بالليل الصبح نغبش عليك
الرايد يجيب الرزق يغبشله غبشه

انت يالماتشبه احد
دائما من ارد اوصفك اصفن واحتار بيش
انت خصله براس كل ليله مضلمه
خصله محطوطلها ميش
شلون تعقلها اهدك
وانه غرگان ولگيتك حدري گيش

انه احبك گد حلاتك
لا اتـگلـي اتـحبني لــيـش
انت تدري عيونك مسويتلي واهس حتى اعيش ؟
انت تدري خدودك اترف من شكو بالدنيا ريش ؟
انت تدري بلون شعرك على لون الليل طاغي ؟
انت تدري الاوردة المتفرعه بيدك
كلها متفرعه بدماغي ؟

انت عندك علم برموشك يضحكن ؟
تدري بيهن بالخجل مرات يحچن ؟

انت ماعندك علم بيهن هذني
انت لو تدري بهذني
غازلت روحك غزل حتى احلى مني

اضحك اگبال المراية وشوف روحك ...

حسين البهادلي

اولى بحزنك انت من الجريبين
مرة اختار روحك كون تختار

اشتحط للطين ؟ من كون اليزل طين
وياخد ؟يلتگيله وضال محتار

السبات الليلهم ليلك سوادين
مادام البراسك كلهن كبار

المن عايف ؟ وتشتاك بعدين
والمن سيفك وگظيتها بصار

بيك وماتعلگ عالحياطين
غير افطورهن ماشوف تذكار

اجيت وواهسك صبح البساتين
وتتزعل واليراضوك خطار

ورحت وعيونك اعمى من السجاجين
التظن غاطيها دم وهو زنجار

نگلة جدمك اتجفل الدرابين
ورجفتك بالنبوة تحسس الغار

ومغيمة سماك وصارله سنين
نگر شصك ومطرت وانت مندار

حطب ناگع وعمره يطول ال يلين
لچن لين الگلوب اعمارها كصار

هيس كاعك البوّرها الونين
چم دوب البواچي تصيرلك كار

عفت فيك وحاير بالروازين
مايحتر مچانة السولف اسرار

انت الطايح المتعوب ..وتعين؟
وحملك عوزه ريشة وينحسب ثار

على كل رفعة ايد من الدعا آمين
غوث من الگلاده اتضيكها سوار

جروح وباچر يصيرن نياشين
ال على عيب اليطيبن عيب مو عار

لو سألك محمد عبد الوهاب ..
كل ده كان ليه؟؟!

شنو راح تجاوبه بـ بيت شعر؟

عباس الغالبي

حسافة تبيع عمرك سكتة بشموعك ..
يطيح الليل من حيلك
وحسافة تشيل حمل الرازقي ومايه
وتدور گمبرة تشيلك ..
يـ تيهة ديرم بـ حِنّة ..
تخيّر سـچة جروحك ..
حكومات الدمع مو الا تبچيلك
وتخيّل دنيتك نثية وبچت بشليلك ادخيلك ..
وخذت طينك ..
سواتر بللت مايك .. لوَن محرابك السنبل يمل حچایته بدينك ..
وگالتلك .. حوافر خيل المرايا ..
يسبّگ شوفك بكيفه،
بعد يا جفن يحلالك لوَنك طايح بعينك
ولا تندم، الشمس مو ستر للظلمة ..
بس الصبح فيّ بيوت ..
يطيح من العذاب إنسان .. ويسولف فرح للموت..
جا المن تصير إنسان وأنتَ من الزغر للموت ..
ﭼـفك مو الك .. للخصر، للتابوت ..
جدمك مو الك .. للگاع .. لـ اغنية غيابك لوَن سچة تفوت ..
عينك مو الك .. لمراية الغيمة .. سكتة وباوعت للصوت ..
شِفتك مو الك .. للندم، للشباچ، للهفة التعتّك من يصيحك توت ..
كلّك مو الك يا تيهة الديرم ..
وبعدك ما شلت عينك ..
عثر أسمك بجفنك من صحت روحك ..
وگوة من الصدى الما لايحك شلتك ..
عليمن تكتب سنينك ..
العمر ضحكة العمر يتوشّل بوكته ..
وها يمته؟ ..
الحَصد ياخذ مكانه بذلة المنجل ..
چم عثرة الـحچت للگاع عنك ما يمر صندل
چم احبيبة سوّتلك گصيبتها ليالي شموع ..
وأنت اتيّه من تندل ..
چم أغنية گالتلك .. تعال وبيعني ثياب اعلى طاريهم ..
ولا تفرش اصابيعك ..حلال برگبة المغزل ..
يخايب ما تهت تتمرجح بضيّك ..
مالك نيّة تتوضى بخمر غالي ..
صلاتك ما جزت فيّك ..
يخايب ورّد بتعبك ..
ولا سوگ الهِداك التشتري جروحك ..
تشتل "ها" وتخضر "صفنتك" رايجة بروحك ..
تحصد تحط گلبك درب للشوگ مو للشوگ
مامش درب ما مسحوگ ..
وما دام الصدگ مبيوگ ..
تاليته الفرح مبيوگ ..

مصطفى الخزاعي

هذاك أنتَ المشى بـ لونه سمار اوداع ..
وهذاك أنت العزيز الماي وجهه الگاع ..
وهذاك أنت عشت نبتة انقرت عاگول
ما ﭼـن منشتل نعناع ..
وكلمن سافر بـ نيته ..
واليعبر شواطي الليل ..ياخذله وجه وي طبگة عيونه يفز اشراع ..
وجه ما غِيرت ارسومه نوايا الگاع ..
وجهك منشتل بيه شتل گمرة ..
لمض عالمنجل الينطر شتا سواليفنا الخضرة ..
يا بيدر ضحك عذري تبده بشفة السمرة
يالحزنك عمر نخلة عراقية عشت فيّ ومتت جمرة ..
يواهس مستحة عيوني شربني النوم
عطش للما حضى بگدره ..
عطش يالمستحة عيونك مري احديثات
قريت الجايب سنيني ..
شما طاريك يذبل ..اشوفه يورّد بعيني ..
وشما تبرد اشفافي اعلى فيّ ضحكة ..
افز واذكر دفو ونيني ..
وأمطرلك بگايا الناس البروحي ..
عسى تجيبك بواﭼـينا ..
وعسى يلالي التعب نجمة بمحاﭼـينا ..
وتگول الناس ماله..
شما عبر گيظه تخضر ساجية بعينه ..
ما يدرون ..
ما يدرون من جان العمر لـچمة توضينا بغناوينا ..
ولا يدرون من جان الزعل نجمة ..
تسامرنا بروازينه ..
جانت تزغر الگمرة بسواجينا ..
وﭼـانت تندهّ الغبشة مساحينا ..
وﭼـان الزعل من يجزي ..
نعرف لذة بواﭼـينا ..
وگلتلي الموت مهرة .. اتفرزن الخيّال لو تاهت نياشينه ..
وگلتلي نعيش والدنيا قصيدة غيم لليغفو الصحو بعينه ..
وگلتلي الما يحب الناس بس الريح
والعاگول ينحر صحرة سنينه ..