«Perfectum»нинг 37,5% улуши «Uzcard»нинг асосий акциядорига, 12,5% улуши эса «Uzcard»га алоқадор шахсга ўтди

Яширинча хусусийлаштирилган «Perfectum» мобил алоқа операторининг юридик шахси ҳисобланган «Rubicon Wireless Communication» МЧЖнинг 37,5% улуши «IMC-CAPITAL» МЧЖ ХКга, 12,5% улуши эса Акбаров Камрон Анваровичга ўтган. Бу ўзгариш ноябрь ойининг иккинчи декадасида содир бўлган.

«IMC-CAPITAL» МЧЖ ХК 2022 йил август ойида давлат рўйхатидан ўтказилган корхона бўлиб, устав фонди 212 млрд 750 млн сўмни ташкил этади. Унга 100% улуш билан БААда рўйхатдан ўтган «Berill Holding Company Limited» хорижий корхонаси эгалик қилади.

Шунингдек, «IMC-CAPITAL» МЧЖ ХК «Yagona umumprespublika protsessing markazi» АЖ — «Uzcard»нинг 75% улушига эгалик қилади. 2024 йил 24 феврал ҳолатига актуал бўлган маълумотга кўра, «Uzcard»нинг қолган 25% улушига Акбаров Камрон Анварович эгалик қилган. «Perfectum»нинг 12,5% улуши ҳам айнан Акбаров Камрон Анваровичга ўтган.

«Perfectum»нинг қолган 50 фоизи Иминов Абдумалик Валижоновичга тегишли бўлиб турибди. «Панама архиви»да унинг исми ҳам келтирилган.

«Uzcard»нинг асосий акциядори бўлмиш «IMC-CAPITAL» МЧЖ ХКнинг 100% улуш билан эгаси ҳисибланган «Berill Holding Company Limited» 2023 йил 15 июнда Бирлашган Араб Амирликларида рўйхатдан ўтган. Устав капитали 1000 доллар бўлган компаниянинг раҳбари сифатида Азиз Юсупов келтирилган. «Yagona umumprespublika protsessing markazi» АЖ («Uzcard») кузатув кенгаши аъзолари қаторида Юсупов Азиз Азаматович шахсига дуч келиш мумкин.

Эслатиб ўтиш керак, «InfinBank» нинг асосий акциядори (76%) Маматджанов Фарход Фахритдинович 20 август куни «Perfectum»ни хусусийлаштириб олдик» деб айтган эди.

Очиқ маълумотлардан фойдаланиб, бориш мумкин бўлган нуқтагача келинди.

@xojayinuz

«Нефт ва газ журнали» МЧЖ «Ўзбекнефтгаз»дан «Saneg»га ўтди

«Ўзбекнефтгаз» АЖга аффилланган шахслар рўйхатида ўзгариш бўлди. Унда шу кунгача компания боқиб келган ва 100 фоиз улуш билан эгалик қилган «Нефт ва газ журнали» МЧЖ аффилланган шахслар рўйхатидан чиқарилган.

«Нефт ва газ журнали» МЧЖ 1997 йилда ташкил этилган. Фаолият тури бўйича журналлар ва даврий нашрлар нашр қилиш билан шуғулланган. Бугунгача турли шартномалар билан «Ўзбекнефтгаз» АЖ молиялаштириб келган. Корхонанинг устав фонди 175,3 млн сўмни ташкил этади.

Очиқ маълумотлардан ойдинлашишича, «Нефт ва газ журнали» МЧЖнинг таъсисчиси ўзгариб, 100 фоиз улуши «GEO RESEARCH AND DEVELOPMENT COMPANY» МЧЖга ўтган. Яъни «Ўзбекнефтгаз»га тегишли бўлган «Нефт ва газ журнали»га эндиликда «GEO RESEARCH AND DEVELOPMENT COMPANY» МЧЖ эгалик қилмоқда.

Канал орқали эълон қилинган «Saneg’нинг болалари» сарлавҳали хабарда келтирилган ўнлаб МЧЖлар қаторида айнан «GEO RESEARCH AND DEVELOPMENT COMPANY» МЧЖ ҳам бор эди. Ушбу корхонанинг 75 фоиз улушига «Саноат энергетика гуруҳи» («Санег») МЧЖ ҚК эгалик қилади. Хулоса қилиб айтганда, «Санег» билвосита «Нефт ва газ журнали» МЧЖнинг янги эгасига айланди.

ПҚ-102 сонли қарорда «Нефт ва газ журнали» МЧЖ оммавий савдолар орқали тўлиқлигича сотиладиган корхоналар қаторида қайд этилган. Хусусийлаштиришнинг отаси ҳисобланган Давлат активларини бошқариш агентлиги бу битим бўйича бирор ахборот эълон қилмаган.

@xojayinuz

Айтишларича, ДХХ раиси Абдусалом Азизов лавозимидан озод этилиб, президент ҳузуридаги Хавфсизлик кенгашига ўтказилди.

ДХХнинг янги раҳбарини тайинлаш маросимида Абдусалом Азизовнинг ушбу лавозимда эришган ютуқлари ва унинг давлат хавфсизлиги тизимини ривожлантиришга қўшган ҳиссаси алоҳида таъкидланди.

Абдусалом Азизовнинг янги лавозимдаги фаолиятида ҳам улкан мувафаққиятлар тилаймиз.

@xojayinuz

Яна ERIELL GROUP. «Мустақилликнинг 25 йиллиги» конида содир бўлган техноген ҳодиса ҳақида

1 сентябрь куни соат 15:17да Сурхондарё вилояти, Бойсун тумани, «Кўлқамиш» МФЙ ҳудудида жойлашган «Мустақилликнинг 25 йиллиги» (М25) конига қарашли 604-сонли қудуқда бурғулаш ишлари олиб борилиши вақтида технологик жараённинг бузилиши натижасида водород сулфид гази чиқиши кузатилган.

Хорижлик лақабли ўзимизнинг қоракўзларга берилган эксклюзив ҳуқуқ

2023 йил февраль ойида энергетика вазири Жўрабек Мирзамаҳмудов бир гуруҳ «танланган» журналист ва блогерларни йиғиб, тақдим этган маълумотига кўра, Ўзбекистонда мавжуд 250 дан ортиқ газ ва нефт конларининг фақат бир донаси, яъни айнан «Мустақилликнинг 25 йиллиги» газ кони «инвестор»ларга эксклюзив ҳуқуқ асосида, даромадни 50/50 қилиш шарти билан берилган. Мазкур эксклюзив ҳуқуқ бўйича келишувга 2017 йил апрелда Ўзбекистон номидан собиқ бош вазир ўринбосари Ғуломжон Ибрагимов имзо қўйган (бу одам шахсига олдинроқ тўхталгандик).

Бош пудратчи – бегона эмас, бир қараса россиялик, яна бир қараса сингапурлик, тез-тез кипрлик инвестор сифатида кўринадиган, аслида ўзимизнинг қоракўз Бахтиёр Фозилов.

Бурғилаш ишларини Eriell компанияси, газни қайта ишлаш заводи, инфратузилма объектлари, газни йиғиш, тайёрлаш ва етказиб бериш тизимини лойиҳалаштириш, ускуналарни етказиб бериш ва қуриш ишларини «тайёр ҳолда топшириш» шарти билан Enter Engineering компанияси амалга оширади.

Бу ёмон хабар биринчиси эмас

2024 йил 20 феврал куни Олмалиқ кон-металлургия комбинати (ОКМК) таркибида 3-мисни бойитиш фабрикасида ҳам бахтсиз ҳодиса содир бўлганди. Ҳодиса оқибатида қурувчи компаниянинг 32 нафар ишчиси (барчаси Ҳиндистон фуқаролари) жабрлангани, улардан 3 нафари воқеа жойида вафот этгани айтилганди. Тасодифни қарангки, бу ердаги қурилишдан ҳам Enter Engineering номи чиққан.

ERIELL GROUP ва Enter Engineering

Сурхондарёда 1 сентябрь куни кузатилган техноген ҳодиса бўйича ижтимоий тармоқларда тарқаган видеоларда айнан ERIELL GROUP ишчиларини кўриш мумкин. Юқорида эса бурғулаш ишлари билан айнан ERIELL GROUP шуғуллангани таъкидланди. Бу компания, Enter Engineering ва бошқа яна кўплаб компаниялар асосчиси эса охирги йилларда номи кўп тилга олинаётган олигарх Бахтиёр Фозилов ҳисобланади.

Пурмаъно

Кон – «Мустақилликнинг 25 йиллиги», техноген ҳодиса содир бўлган сана – айнан Мустақиллик байрами куни, 33 йилликда. Балки бу ишорадир...

@xojayinuz

Хўжайинлари янгиланган олий таълим хўжайинларга ёқишга уриниб кўради(ми)?

Олий таълим, фан ва инновациялар вазирлиги чиновниклардан бошқаси кузатмайдиган давлатнинг “Ўзбекистон 24” телеканали билан 400 млн сўмлик шартнома қилди. Бу орқали вазирлик йил охиригача пиар материалларини ушбу телеканалда жойлаб боради.

Шартнома орқали “Ўзбекистон 24” телеканалига реклама материалларини жойлаш бўйича олий таълим вазирлиги бошқа вазирликлар ичида 400 млн сўмлик сумма билан рекорд қўйди. Бу йил ҳисобидан ҳали ҳеч бир вазирлик “Ўзбекистон 24” телеканалига бунча пул тўлагани йўқ эди.

Олий таълим вазирлиги раҳбариятида яқинда ўзгариш бўлиб, янги вазир ва унга икки ўринбосар тайинланганига кўп бўлмади. Демак, янгиланган раҳбарият раҳбарларга ёқишга уриниб кўришини англаш мумкин.

@xojayinuz