هذي فاطمة يامـــــن تعرفوهـــا
بهيدة اويه النعش لمن تشيعوها
.......
هذي فاطمة خيرة النسوان
محبوبة محمد سيد الأكوان
بكثر النوح سموها ام الاحزان
لمصيبة الزهرة كل حزن هان
من بعد الرسول اصحابه آذوها
.......
بنت الهادي من وگفت وره الباب
مقصدها الستر وتراعي الحجاب
اجوها بلا رحم للدار الاصحاب
بنار احقادهم شبوها الاطناب
عتبـــة بابها بنيران شبوهـــا
.......
بعتبة باب فاطم لموا اجموع
دفعوا بابها وكسرولها اضلوع
ضلت بس تون وتهل الدموع
وي بضعة محمد طفوا اشموع
شمعة فاطمة ياويلي طفوها
.......
اضلوع اتهشمت من ام الحسين
اسياط اعلى المتن وامصوبة العين
ومن ذاك الضرب سگطوا الاجنين
محسن ياأمل كل هاي الاسنين
طاغوت وجبت الاثنين عادوها
.........
ماكفّى الرجس هذا الجرى وصار
اموصّى من درى بحيدر الكرار
ايچتفونا أمرهم گوم الاشرار
إصبر ياعلي اموصيه المختار
لو شفت العدى فاطم يضربوها
.........
ماتت من ظلمهم بت محمد
اعليهم ساخطة والباري يشهد
غّسلها علي والدمع عالخد
من عنده الحزن عالطاهرة اشتد
وبگلبه جرح من اللي ظلموها
.........
جهزها علي بليل ودفنها
وياها دفن همها وحزنها
فگدوا أمهم حسين وحسنها
وزينب عگب فاطم زاد ونها
زينب باللطم ياشيعة واسوها
.......
قصي الحاج غانم المنصوري

الليلة ليلة وفاء وتضحيات وفداء
.......
ليلة العز والكرامة الليلة ليلة تضحيات
لم الابنين النشامة ليلة اصرار وثبـــات
ضحت بعزها وضناها للسبط نبض الحياة
ليلة ايثار وحمية وبيها مرخوصة الدماء
.......
ياكرمها وياعطفها وياوفاهة ام البنين
كلشي بالدنيا ارخصته المخلصة بحب الحسين
الله كرمّها بقدرته الطاهرة ام گلب الحنين
باب للحاجة جعلها الكلها إيثار وعطاء
......
يامرة التوصل قدرها ميّة لو عدها ولد.
دون ابو اليمة وعيالة اتضحي بيهم تستعد
صرعى خل يوصل خبركم والسبط سالم يرد
انا وانتم كلنا فدوة لخامس اصحاب الكساء
......
أغلى مابالدنيا عدها ربّت احيود اربعة
هيئتهم قدمتهم سور فـــوكَ المشرعة
عنهم الناس اخبروها اجسومهم متوزعة
فاطمة ولدچ ضحايا ابلا غسل فوگ العراء
........
خادمة ابّيت الرسالة اتعاهدت وي فاطمة
لهاالسبب حيدر يحبها هالجليلة العالمة
امن المدينة الها وصية ابكربلا اترخص الدمة
هية تستاهل عزانا خل نقيملها العزاء
........
من رجع ناعي المصيبة ليثرب بهذا الخبر
عالنهر مصيوبة عينة ومرمي عباس الگمر
جاوبت ويهل دمعها وحسرة مصحوبة بقهر
فگد ولدي مايهمني حسين بس لجله البكاء
......
قصي الحاج غانم المنصوري

حان الدور وبسيفك
جرد روس على كيفك
من اعداك خذ حيفك
ياجسام ياجسام
......
وصل دورك يبن حيدر اخذ سيفك لتتأخر
ربوع الطف الك تشهد. عليها الدم. يسيل احمر
بالقتال ماكو واحد گابلك الا طار راسه واصبح ملك الك
والملوك بالحرب تتوسلك

يالمهيوب من صيتك
حز الروس حريتك
صار الموت امنيتك
ياجسام ياجسام
........
رغم صغرك فلا تهتم ثرى الغبرة صبغته بدم
تطك يمنتها عاليسرى بمفاخر حيدر امحزم
والألوف كلها منك في رعب. كالهشيم تنّثر لمن تطب
والجيوش تمشي بس ابلا گلب

كل الجيش بي خوفة
بس اوجوه مخطوفة
صار انذار بالكوفة
ياجسام ياجسام
......
شسع نعلك أهم منهم. عدلته ولانظرت الهم
رعبهم بس صدى صوتك. عبيد وإنت سيدهم
واليجيك راسه گدامه انفصل. يعتنيك والأجل قبله وصل
كلشي بيك من علي ذاك البطل

حامي الجار علي جدك
واگف طود على حدك
راعب جيش بس وحدك
ياجسام ياجسام
........
الحسن من دون اوصيته وبده ايودع اهل بيته
بأمر حازم إلك وصّى. ويعرفك انت تربيته
بالطفوف من تحين المعركة. للغريب يبني لالاتتركه
اتحل جحيم عالجيوش المشركة

كل اعداك خل تفهم
خيل وگوم لو تلتم
بالجيمان ماتهتم
ياجسام ياجسام
.........
بغدر لمن يصيبونك. شبل حيدر يعرفونك
الشجاع اللي برز منهم. يموت بخزرة اعيونك
لاسواك يرتجز بالزمجرة. يبني صيح انا ضنوة حيدرة
للخلود حتى تصبح مفخرة

چم صنديد منك ذل
دربه امنين مايندل
ذرهم ريح يمعدل
ياجسام ياجسام
........
قصي الحاج غانم المنصوري

عبدالله العمر مايسوه من دونك
شللي بدنيتي لو غمضت اعيونك
.......
يانبض الگلب ياشمعة اسنيني
ياذخري لون دهري يعاديني
عمية اتضل لون ماشافتك عيني
ميتة ولاشفت ميت يشيلونك
..........
ضميتك ذخر لايامي الصعبة
يبني ودنيتي ابلا ضحكتك غربة
يومية النواضر جيّتك تربى
فدوة انا اروح لضحكة اسنونك
........
يبني وردتك تواريني ابلحدي
وبحنية تقره الفاتحة عندي
لاماحسٌبت اكضي العمر وحدي
وگبلي باللحد يبني يوارونك
.......
أكضي الليل اجر ونة بأثر ونة
وبلّياك دربي شلون اخلصنه
چانت منيتي عرسك أشوفنّه
ماأدري بچفن تالي يزفونك
........
چم عيد اليمر وانا اعلى حسراتي
ياريتك تجي وتمسحلي دمعاتي
عبدالله انجرح وتزيــد آهاتـــي
طشّرت الأحبهم يادهر هونك
........
تدريني نحيلة وعالبعد مگدر
سهم البين يبّس عودك الأخضر
أگضي الليل يمة بدمعي اتصبّر
وچم موتة اموتن من يذكرونك
.........
قصي الحاج غانم المنصوري

زينب وليانچ ودعيها
زينب وليانچ ودعيها
.......
يازينب بس هاي الليلة
خوانچ يمچ والعيلة
باچر ماواحد تشكيلة
جسم حسين الدم تغسيلة

جثته اعلى الغبرة تشوفيها
.......
يالوعة مصباح العاشر
چم محنة اتمر يمچ باچر
وحسين ايضل ابلا ناصر
بين العسكر يوگف حاير

وانصاره الگوم امذبحيها
.......
ودعيهم زينب ودعيهم
بس هالليلة ومتشوفيهم
نوحي لخوانچ وانعيهم
وبصوت الفاكد حاچيهم

وشحال التفگد واليها
.......
باچر عباس تشوفينه
ابلايا چفوف وسهم بعينه
راسه بعامود امفضخينه
جوده ابلا ماي اممزگينه

شلون الأطفال ايرد ليها
......
يسفح دمهم صفوة هاشم
طفل ابمهده وهم ماسالم
مطروح الأكبر وي جاسم
شحال الأيتام الله العالم

وخيام حسين امسلبيها
......
نوحي يازينب ملهوفة
باچر تلتم خيل الكوفة
اسهام انبال حسين اتطوفه
من عالتل عيناچ تشوفه

والجثة اخيول اترض بيها
........
قصي الحاج غانم المنصوري

ليلة فرح هالليلة للمصطفى انهنينله
يامحمد يامحمد
.........
جن وإنس هالليلة اجت فرحانة
تتشارك بهذا الحفل ويانه
واتزينت لجل النبي دنيانه
نعلن فرح غصبآ على العادانه
سيد الرسل هادينا دين الهداية دينه
يامحمد يامحمد
‏..........
هالليلة ابواب الخلد مفتوحة
وعروش كسرى اتهدمت واصروحه
والكوثر اتغنت لطه وروحه
كل الصدور لجيته مشروحه
صلى عليه الباري واتجملت اشعاري
يامحمد يامحمد
‏.........
هذا رسول الله وصبح محبوبه
واليذكر اسمه اتطيح كل اذنوبه
وبيوم ميلاده سقر محجوبه
لآدم قبلها ربنا لجله التوبه
نعلن حفل ميلاده. ونبارك بأعياده
يامحمد يامحمد
‏...........
انعاهد نبينا ويمه نعلن بيعة
نمشي اعلى نهجة وأمره كلنا انطيعه
نعلن ولانا وخبر عدنا انذيعه
ميقدس المصطفى غير الشيعة
شيعة ونقدس طه وبمحبته نتباها
يامحمد يامحمد
‏............
للصادق ابعث تهنئة بميلاده
‏بسبعطعش مولد حفيد الساده
‏كل مؤمن بصوته هتفله وناده
‏حياه وحيا الله هله وأجداده
‏ياهلا بجيت الصادق. هالليلة عيده ايوافق
‏. يامحمد يامحمد
‏..........
‏قصي الحاج غانم المنصوري
‏١٦ ربيع الأول ١٤٤٥
‏
‏ ‏ ‏
‏ ‏