هَل الشهر بأفراحه بأحله المواليد
نشتم عطر قداحه بأحله المواليد
.............
ننترقب هلاله نطرنه ليومه
والعاشك لهذا الشهر مالومه
مثل الفضه ويزهي بضياء نجومه
وهاي القصيدة بل كَلب منظومة

وانحفضت بسباحه بأحله المواليد
نشتم عطر قداحه بأحله المواليد
...........
لحسين نبعثهه التهاني بعيده
هذا النزف للدين دم وربده
والطير غنه غرد بتغريده
كلمن يحبه سجل إسمه بكيده

يضوي فجر مصباحه بأحله المواليد
نشتم عطر قداحه بأحله المواليد
...........
كافل خدرهه زينب معيدينه
رابع شهر شعبان هل علينه
ونهني بالمولد (علي) والينه
باجر محبته بالحشر تنجينه

نسمة وتهب فواحه بأحله المواليد
نشتم عطر قداحه بأحله المواليد
...........
والساجد بهذا الشهر ميلاده
إنهني طه وحيدر وأولاده
كل الأماني لفاطمه بأعياده
جبريل بإسمه للملايك ناده

هذا النريد ايضاحه بأحله المواليد
نشتم عطر قداحه بأحله المواليد
............
يتلاله نور الأكبر بشعبانه
شبل الحسين إتميز بعنوانه
تشبه لجده صورته وإيمانه
وينه اليحبه خل يعيد ويانه

بالأنفس المرتاحه بأحله المواليد
نشتم عطر قداحه بأحله المواليد
.............
والمهدي عنوان الفخر والهيبه
ننطر لثاره من تخلص الغيبه
وبراية المهدي نصلهه لطيبه
قايد حشدنه من شباب وشيبه

يبقه البطل بالساحة بأحله المواليد
نشتم عطر قداحه بأحله المواليد
...........

الشاعر الحسيني
مؤيد غازي الأسدي

السلام عليك يا أبا طالب
السلام عليك يا أبا طالب

يل صنت دينه هادينه يابو الغانمه
نهجك نعرفه مايخفه ياضي السمه
بيرغك عالي للتالي يانعم الحمه
يانبع صافي وتوافي بسنين الضمه

السلام عليك يا أبا طالب
........
دورك الفايز والبارز ماننسه أبد
واضح المعنه نتعنه وي طير السعد
نبجي لمصابك احبابك جينه عل وعد
يل علِه شانك بإيمانك دين الحك شهد

السلام عليك يا أبا طالب
........
عابد لربك ويكتبك بكتاب الوفه
لله ناجيته يم بيته عندك معرفه
ابرهه وفيله بسجيله لاهب ماطفه
لبه دعواتك اهاتك ربك ماخفه

السلام عليك يا أبا طالب
..........
نهجك انتبعه ونسمعه ياشيخ العرب
والشبل منك هذا أبنك ياأشرف نسب
والنبي بجالك بأفعالك بأولهه الرتب
يللي متميز ببك العز ياأطهر حسب

السلام عليك يا أبا طالب
....... .
خادم الحسين عليه السلام
د.مؤيد الأسدي الطريحي

نزله.

عظم ألله لكم الأجر والثواب
بوفاة سيد البطحاء أبوطالب ع
.........

الله وصه باليتيم وگال يمي الكافله
وابوطالب كفل طه ونال اعظم منزله

اية نزلت باليتيم
والكفل مؤمن كريم

وابوطالب كفل طه ونال اعظم منزله
.................
الله وصه ... بنص كتابه.... جُملة أحكام وعبر
وعله طه....نزل وحيه.....ودين توحيده انتشر
وابوطالب....صان دينه....عنه ما يوم اعتذر
واليحامي.... هل رساله.... .مؤمن ولا ما كفر

وال تِربهَ ببيته حتمآ ماخذ أجملها الصفات
هذا عمه اليحمي دينه ومستمر حته الممات

هذا عنوان الرحيم
والكفل مؤمن كريم
................
باقي ذكره....ومانسينه....ال جّفّه مليان بعطاء
واليشك....بإيمانه لازم ....كَلبه غارك بالرياء
هذا والد ...علي حيدر.....إبنه سيد الأوصياء
من نسل ....طاهر تَراهم.... وامتداد الأنبياء

هذا سيدهه الجزيرة وَي نجد وارض الحجاز
نال أشرفهه المراتب والمهم يَم الله فاز

جاء بالقلب السليم
والكفل مؤمن كريم
...................
ماتأخر....عن نصرته......وواجه جيوش الجهل
وبفطرته...يوحّد الله ......وماسجد يوم لهُبل
واليحبه .الباري.. عنده ...خالص تشوفه العمل
والقره بأبيات شعره.... يصيغ عدله من الجُمَل

منهج إبراهيم دينه ووّرّثَه لحيدر علي
صيته عالي بهل وجاهه يبقه لاماينجلي

حصل العز والنعيم
والكفل مؤمن كريم
...................
يوم هاجم.... كعبة الله..... الأبرهه بفيله اعتزم
راد يهدمه.... وتخلت.... كلهه عن بيت الحرم
شال جفه...الشيخ يدعي....الباري وببيته آعتصم
ساعة لن...سجيل مطرت....وأبرهه بجيشه أنعدم

هذا عام الفيل سَجّل موقف لسيد العرب
وانتصر مؤمن قريش وهذا تأريخه انكتب

نازل بذكرهَ العليم
والكفل مؤمن كريم
..................
دافع ...بسيفه....ويمينه...... ماترك لحظه الرسول
حين حضرتله...المنيه...... انصاب والدها البتول
والشبل...كمل طريقه..... ونعم من فحل الفحول
حيدر... بنهجه ....ودفاعه....إتحيرت كلهه العقول

للنبي تواسي برزيته كل مهجنه الناحبه
والله يستاهل نذكره ونلطم عله النايبه

موقف يسجله العظيم
والكفل مؤمن كريم

..............
لشاعرها ...
خادم الحسين عليه السلام
د.مؤيد الأسدي .
.

يم خديجة الليله حضرت فاطمه
حضنت امها وتنزف العين الدمه
........................
يم خديجه الليله مهضوم الگلب
حضنت امها وعل وجن دم اليصب
صعب يوم أم الحسن كلش صعب

ساعد الله بهل مسه حامي الحمه
..........
إتلاكن وسيل الدمع ماينگطع
حضنت أمها وحيل ياذيها الضلع
والگلب وناته حتما تنسمع

لأمها تشكي أحوالها ومتألمه
.......
تشكي آهات وعذابات الزمن
عاينت لأمها وتلوع أم الحسن
نايباتي تگلها لا ما ينسن

وبهضمها بجت عيون السمه
........
ظلت أيتامج تگلها أم البتول
تبچي وتلوذ بكتر فحل الفحول
لاچن إشتاگيت إلج ويه الرسول

والدج مشتاگه روحه وهايمه
...........
تسولف الصار وحصل للوالده
عن طفلها اللي سگط وتشاهده
عن جرايمها سقيفة ساعده

عن سبب سطرة جفنها المؤلمه
........
الشاعر الحسيني
مؤيد غازي الأسدي

موشح

هذا اليوم خل نبجي عله المصاب
عل كسروا ضلعها بدفعة الباب
......................
ماننسه الضلع من صابه بسمار
بيوم الفزعت عله الزهره الاشرار
جمعوا كل حطبهم شبوا النار

صار الباب لام حسين الحجاب
..................
نذكر فاطمة ودمعات العيون
ليش من الزجيه الحگ يسلبون
والباب بحقد گاموا يدفعون

وين أهل العقل خل نسمع جواب
....................
من چلمة... وإن.... فزعت شياطين
ضربوا فاطمة وسطروهه بالعين
وبگلب الصميدة النار نارين

متگيد بوصيته نشوف ابوتراب
.............
من يوم السقيفه اتبدل الحال
وسفه ام الحسن منهه الدمع سال
زينب ياوضع حين النعش شال

مكسورة گلب بالمهجه الصواب
...............
ملعون الدفع باب السماوات
منه اتسببت كل المصيبات
من يوم الضلع بانت علامات

والگوم التضد ماتسوه العتاب
.................
الشاعر الحسيني /
مؤيد غازي الأسدي

يحبيبة اعتنيتج ما تحاجيني
زينب طفلة يمه شلون عفتيني
...............................................
يحبيبة اعتنيتج والدمع جاري
ماتطفه بدليلي إتظل تشب ناري
لمچانج ييمه مشابحه أنظاري

عيني مساهره وما بطل ونيني
..............
طفله ويتيموني وعذبوا حالي
شينشف دمعته اليفگد الغالي
بفراگج يزهره إتلاشت آمالي

مشتاگه أرد أشبگج يا بعد عيني
.................
يم گبرج وصلته وهاجت آلامي
يا يمه النوايب كلها جدامي
من زغري وعشتها اللوعه بأيامي

خليني أرد أنام وياج خليني
....................
حاجيني أرد أسمعج والله مشتاگه
فوگ الخد ييمه الدمعه حرّاگه
يَم گلب الحنين اليصعب إفراگه

وفراگج تراهُ العذّب سنيني
.......................
شيسكنه لونيني وانتي ماهيه
عذبني المصاب وعيني معميه
يل عفتيني وحدي وما إلج جيه

مثلج باجر آنه إعداي تاذيني
.........................
الشاعر الحسيني
مؤيد غازي الأسدي

طاح سيد يثرب وعنوانها
هَل مضايف خَل تسِد بيبانها
................................................
طاح سيد يثرب بسَمّ الغدر
للحزن عل نايبهَ ماظل عذر
نار بگلوب الموالي تستعر

مِن يِهل سابع صفر بأحزانها
.................................................
لطمت اليوم السموات بخجل
والأرض تبجي عله َ بن خير العمل
بالحسن سهم الغدر تالي شعِمل

هذا ابن سيد العرب والسانها
......................................................
صوبوه وشاعت أجواء الحزن
والعقيله إگبال ابو محمد تِوِن
تندب عله مصيبته ام گلب اليحِن

هذا حال الما نست خُوّانها
....................................................
طاحت أركان العقيده بطيحته
بالطشت زينب تشاهد جبدته
گبالهَ أبو اليمه ويعاين حالته

جمره گلبه ما طفت نيرانها
.....................................................
طاح المعزب والي مفتح المضيف
هذا المعدل وابو الگلب النظيف
ياوكت نتعنه للصحن الشريف

وِبْحَضِرتهَ نِلطم بديوانها
................
هذا يوم الفاجعه ويهَ النايبه
هذا يوم البيه جبدته مصوبه
زينب بفگد الحسن متعذبه

تندب بصوت الألم وليانها
..................................................
نزله نجفيه... موشح
الشاعر الحسيني //
مؤيد غازي الأسدي.

يل ناوي لاجل حسين مشاي
گوم اگصدلها كربله وياي
......
گوم اگصد لشباج الحسين
وعله السبيه هامله العين
وصلت لخوها تطلب معين

وتگله وين الشايل لواي
.....
گرّب ضعنها للسبايه
وينه الوصلها وشال رايه
يمشي عله جدمه عنده غايه

ويطوف گبره الماشرب ماي
.........
خل يگصدلها كربله يگوم
كلمن يصيح حسين مظلوم
يوصل عضيده يبجي مالوم

وبهل مسيره واضح الراي
......
خل يندب لزينب يسمعه
وعله الرزيه يجري دمعه
بيوم القيامه مايضيعه

وامه الزجيه تصيح بحماي
...
واگصد مخيمها العقيله
وعليها دم عينك تسيله
وأذكر رقيه والعليله

وابجي لخوله وصيح شجاي
......
شارك رزيته زين العباد
ليش بسلاسل گيد ينگاد
وبدربك امشي وطلب مراد

يگظي الحوايج دوم وفاي
.....
لاتنسى والدلال ذايب
تدعي لخدام المواكب
إبجاه اخوها ام المصايب

يوم الحساب انحصل افياي
.....................................................
لخادم الحسين ع
مؤيد غازي الأسدي
...نزله كربلائيه...
بلحن... انا العليل المسبي للشام
للملا الحاج باسم الكربلائي

عمه بيا حال زينب تدرين
ليش بهل يوم عني تروحين
شبساع إگطعتي ونينج
غمضتي ونامت عينج
عمه بيا حال
......................................................
بخرابة بديرة الغربه إنخطف لونج
يتيمه انتي بضربهم ورمت متونج
عزيزة گلب أبوج مساهره عيونج
ألف وسفه بحچيهم هل يذلونج

چفنج صابوه ضيعتي الشوف
ماشفتي حسين بس راسه يطوف
بعدچ بأولها سنينج
غمضتي ونامت عينج
عمه بيا حال
.....................................
يعمه شما يون گلبج يأذيني
ويهيج كل مصابي وأبقه بونيني
أنه ادري بونتج هي التعزيني
أظنها تگول خل نبچي عله حسيني

واندب وياج وأصرخ بالويل
وألطم عل راس ودموعي تسيل
عل فرگه الباري يعينج
غمضتي ونامت عينج
عمه بيا حال
.....................................
شكثر مرت نوايب ما حملتيها
رغم عينج عموها وماشهدتيها
لچن بإحساس البگلبج عرفتيها
يبت حسين چم لوعه الجرعتيها

لچمات البين أصعب لچمات
ويه الأنفاس أسمع شهگات
مجتوف بحبل إيمينج
غمضتي ونامت عينج
عمه بيا حال
...................................
نويتي إعله الوداع وحالتج حاله
اليسر والطف يعمه وموتج چماله
أبوج بكربله ومتگطعه أوصاله
ونه گبالج دمع وأحزاني تبراله

صوتج آهات وي صوت الموت
والراده حسين لازم مبخوت
لحظات البينه وبينج
غمضتي ونامت عينج
عمه بيا حال
..............................
شبگتيه بالطشت راس الأبو المذبوح
عگب نوحج جسد ظليتي وبلا روح
لچن عفتيني مسبيه بگلب مجروح
وأبدالج لَگضّيها الليالي إبنوح

رحتي وظليت أتنطر يوم
أرجع للشام والموت يحوم
أهلج يمي إمأمنينج
غمضتي ونامت عينج
عمه بياحال
............................................
الشاعر الحسيني / مؤيد غازي الأسدي.

لأجل الجواد عله المتن نلطم بإدينه
وبالمجلس آثار الحزن نلطم بإدينه
.........................................................
لأجل الجواد عله المتن نلطم للمصاب
نور النقي وابن التقي بسم الغدر غاب
بمصابه ياشيعة علي دين النبي إنصاب

ليلة مصابه وطيحته صعبه وحزينه
.........
بالمجلس آثار الحزن والونه والنوح
ليش الجواد عله السطح ياشيعه مطروح
يشبه لجده بكربله إعله الغبره مذبوح

گلب الموالي بمجلسه تسمع ونينه
.......
بعمر الشباب بيا ذنب ياوسفه سموه
نوره اليضوي إعله الخلگ بغيابه طفوه
صابوا چبدته وكل محب دلاله صابوه

واجبنه نحيي مصيبته ويشهد بجينه
..........
جن جعده أم اللا فضل ملعونه لليوم
غدرت جواد أه‍ل الكرم موقفه معلوم
سمت چبدته وعافته يتلوّهَ مسموم

وبذاك يومه إبن الرضا غمضها عينه
............
ناحت سماوات العله وأرض الله تنعاه
مثل الحسن عمه إنچتل متلوع بآه
واجب مصابه إنجدده ونبجي عله بلواه

ونواسي جده المصطفه وعترة نبينه
........................
رغم الحصل واللي جره تشييعه مهيوب
مو مثله جده إعله الثره ومسلب الثوب
گطعوا وريده ومنحره كل جسمه مصيوب

وأخته السبيه إعله الهزل راحت رهينه
......................
الشاعر/
مؤيد غازي الأسدي

لطميه ٣ دگات