https://youtu.be/7mEExD1pZ6w?si=rOnnAyKV8b-itkla

https://youtu.be/DaSAKLmtu-8?si=F4psVk0Ji4VfDJXB

اســـولف عـــن جمال الكافل وضيه
اليــحلاله الـغزل هــوه ومــحاچـيه

المصفن الجمال بطوله والـريشــات
ابو الشارب الكضه وصــاح مگضيه

ابو عيون العليهن يســتراح حسين
ومـــا يرتاح اذا مـــاشـــافه يومـيه

الامير الخادم المنه الادب مــعروف
المـــا داير ضهر دوم بــوجـه خـــيه

بزمن چان الاخو يبيع الاخو بـدينار
نذرها اسنينه ابـوفاضل لبـــو ارقيه

الـمــا يسجد لبوفاضل حرام ايگول
عنــدي اخوان لـــو چان الـعدد ميه

لأن ديــن الاخــوه الاسـسه العباس
وغــير الدين هذا الـخــوه چـذبـيـه

يامن قبلاها اچفوفه داحـي البــاب
وصــارت بـالـمـلاحــم ايده حربـيه

النعم گالوها بس لأسم الگمر تنگال
وثـلـث تـنـعـام بس ل امه الكلابيه

بــعداد الـصـالـحـين اولـهم العباس
اليــريد ايـصير صالح الا مـــن فيه

گـــمر ويـضـــوي عــد عدنان ليليـه
يــا انـــس العقيله وواهـــس ارقيه

غــريــب الهوه ومـا تشتمه علويات
يــشــمــن ريــحــة الــعباس للــريه

وحته الماي عدهن جرم لو ينضاگ
اذا مــو هــــوه جايب بيده الاميه

ابوفاضل البي حارت اعقول الناس
ويــحلاله الغــزل هــوه ومــحاچيه

سجاد الدراجي

الحسن اول واحد تسود ادلاله
الحسن لمن يكرم تشيم افعاله
ملائكة الله ابيته تصعد تنـزل
تجي بس تتبرك عذب افضاله

حسن ،، خــالــق الـكرم
حسن ،، مــالــك الامــم
حسن ،، من اسمه كريم
حسن ،، عالـهـاك انفطم

جدره ما طفه ، مكتفه ، هم يصب بعد

يكثر بـالـهله ، وكـربـلـه ، عزبـهـا بـولـد

حيرها العرب ، وانگلب ، عاليهـم حـدر

ماشافو گبل ، هالفضل ، طالع من احـد

$$$$$$$$$$$$$$

بجمال اسمه وذكره الخلگ مفتونه
دخيل الله الحط الـعـشگ بـعيونـه
منو الما يصفن من يمر عالـمسجـد
لأن مـحـد شـايــف شـبـاب بـلونـه

حسن ،، بيده الغانمـه
حسن ،، الله امسلمـه
حسن ،، سيد الشباب
حسن ،، ابــنُ فاطمه

طــالع مـن علي ، وينجلي ، الـهم بشوفتـه

لو سار الحسن ، بالوطن ، تـذهل كشختــه

سـيـد هـاشمي ، والـنبي ، چـنـه لــو مـشـه

وناس اتزاحمت ، واركضت ، تشتم ريحته

$$$$$$$$$$$$$$

المعارك خالسها الحسن من يحضر
اذا ســرفـن ردنه البــشـر تـتـطـشر
يــويل الكضاهــم منـو يـخلصـهـم
ابـد مـا يـرحـمـهـم يـمـيـن الحيدر

حسن ،، عـاگـر الـجـمــل
حسن ،، والشافه انذهـل
حسن ،، بملاگه السيوف
حسن ،، كـالنـار اشتعــل

لو كض الرمح ، ينذبح ، عسكر بأكمله

قد حان الردم ، والزلم ، تركع كلها الـه

بفنون الحرب ، الصعب ، مايهتمله ابد

غيرة حيدرة ، باتره ، حل الـمعـضـلـه

$$$$$$$$$$$$$$

شـرف كـل الـديره بـوجـوده الطاهر
گمر شـعـشـع نـوره اعله لـيل الـغـابر
الكره من يشتد كالشمس من تگصي
لـچن فـيّ مــولانا الحسن حب كاسر

حسن ،، الحب مصدره
حسن ،، اصل المفخره
حسن ،، مولانا الجميل
حسن ،، دنـيـا واخــره

عنوان الشرف ، والسلف ، تـنـدل جـبـلـتـه
يصلح بالخلگ ، وانعشگ ، بيته وحضرتـه
بمضيفه الادب ، والطلب ، ينطيله الحسن
مـا رجـع بـشـر ، والـدهـر ، يـشهـد غيـرتـه

$$$$$$$$$$$$$$

سجاد الدراجي

سافر الضعـن
وانه عيوني بچت عتب
اضل بلاوطن
الـگـلب مايحمل وتعـب

وانتضرت تصيح الي
لـــــو تــوديـلـي علي
الاكبر بچفه ويأشرلي اعله هودج
فـوگ ناگـه وي هلـي

لچن ماصـار المــراد
ولبّست گلبي السواد
اتوادعن عيني وي عينك بالنواضر
گلي شيطيب الفـؤاد

ليش عـفـتـوني عليله وحيلـي رايح
حيلي رايح،،حيلي رايح
ماتت الضحكه اعله وجهي والملامح
والمــلامح،،والمـــلامح

$$$$$$$$$$$$$$

انــــــه فاطمه
حبيبت روحك حسين
اخذني خادمه
اخدمك بويه بالـعـيـن

حالي ابد ما ينوصف
والوجع ماضن يخف
كون وي اهلي المشو اصعد واروح
ما يضـلـلني السگف

من بعدكم راح اضيع
واليحب لازم يـطيـع
لچن خلولي اخوي وانسه علتي
علتي فراگ الـرضيع

بـــويــه خـلـيلـي سكينه لــو رقيه
لــو رقيه،،لــو رقيه
بلايه حسهم ليلي وحشه يمر عليه
يمر عليه،،يمر عليه

$$$$$$$$$$$$$$

وانتظر بقيت
صعب حاله الفگد اهـل
بدمعتي حچيت
وحيده ابيتي راح اضل

وحدي بالبيت انتظر
بهدمك اشتم الـعطـر
كسرت الخاطر يبويه ماتطيب
وداعتك مـا تـنـجـبـر

الفارگ عيون الگمر
يعيش بعيونه القهر
لطيفك وطيفه ابقه اسولف وانتظر
والله أذاني السهــر

انغمت گلبي من گلتلي انه رايــح
انه رايــح،،انـه رايــح
روحتك ماضن وراها بس نوايـح
بس نوايح ،، بس نوايح

$$$$$$$$$$$$$$

ردت وي الاهل
حرگ خيمه وارض جمر
واتيه بلايه حل
اراكـض بالـفـلـه الـضهـر

كـون للـشـام انـه اروح
وياليتامه ابچي وانوح
وامشي مسبيه وي عمتي بهالدرب
واكتم بگلبي الـجـروح

واركب النوگ الهـزل
وتنچتف ايدي بحبل
يصيرلي الصاير عليهم كون واكثر
والله ما اجزع وامل

ريـــت وي عـمـتي ابـاتـن بالـخـرابه
بالخرابه ،، بالــخرابه
حته اعيشن كل جرح وبكل مـصابه
كل مصابه،،كل مصابه

$$$$$$$$$$$$$$

سجاد الدراجي

بالـگوه يجـر حسـين الانفــاس
مكسور الضهر ويحـاجي عباس
بيـه تشـمتت يا خـويه هالنـاس

اخيّـك يـا ابـو السـجاد جـاويـن

$$$$$$$$$$$$$$

فـدوه اگـعد يخـويه النه وتعنه
ارجــع ما تـريـد الــمـاي سكنـه
تگـلي شـلون عمي ابـتـعد عنه

اگعـد لا تخلـي الجـرح جرحـين

$$$$$$$$$$$$$$

جمال الله يقاسـم فـدوه لتـروح
گـلـب رمله يعمي فايـض جروح
عـدل رادت تـزفك موش مذبوح

مـن اتـذكرك يعمي تحـنّي الايديـن

$$$$$$$$$$$$$$

شـاب الـراس ويـه نسـمه الـريـح
الجابـتله خبـر بالاڪـبر يصـيــح
خطيه حسين ضل يگـوم ويطيح

عـالاڪـبر اوليـده شيب حسين

$$$$$$$$$$$$$$

مصـيبه منـين مابـاوع مصـيبه
يحـير حسـين بخـيامه عجـيبه
غريب وصارت اخته هم غريبه

وانـدارت عـليه الخـيل صوبـين

$$$$$$$$$$$$$$

غريب وضل وحيد بلايه خوّان
لا نــاصـر الــه ولاضـلـه عــوّان
لخـيامه يـعـاين كلـهه نــسـوان

يـدري بالـيسر حـال النسـواين

$$$$$$$$$$$$$$

كـل هذا الجـره وحسين صابـر
يتـلوع دلـيلـه وحــيـره حــايـر
بح صوته الحسين بيوم عاشـر

كون من اللطم اعميهه هالعين

$$$$$$$$$$$$$$

سجاد الدراجي