تنۆک تنۆک
لەو دیو شووشەی پەنجەرەوە شەو ئەبارێ
پەنجەرەکان ئەکەمەوە
باوەش باوەش بۆنی باران دێتە ژوورێ
-تۆ دەس ئەبەی کەمانچەکەت هەڵئەگری-
نێوچاوانی مۆنی بێدەنگی شەق ئەبات.
هەتا بەیان
لەگەڵ باران سەما ئەکەین
سەمایەکی نەبینراو
ئاوازێکی نەبیستراو
ئیتر شەو و بێدەنگی و خەو
ئەزڕێن و تنۆک... تنۆک
ئەتوێنەوە و ئەبن بە هەڵمێکی نامۆ
پەنجەرە ڕێگایان ئەدا
ئەو دیو شووشە
بۆنی سنگ و بەرۆکی عاشیقان ئەکا
باران...باران
باران چاو و....باران دڵ و...باران دەر و باران بان و
باران هەموو ژوورەکەمی پڕ کردەوە.
نەمانزانی چەندان ساڵە
چەندان مانگ و ڕۆژ و کاتە و
لە کەیەوە لەگەڵ باران سەما ئەکەین
کە خۆرەتاو
بزەیەکی پڕ بەختیاریی تێ گرتین
بووین بە وشە و لە شێعرێکی بارانیدا
بووین بە گۆرانیی
ژینێکی هەتا هەتا....

🔸ژیلا حسەینی

@Jilahosaini

هەر کەس لە تابووتی لەشی خۆیدا نێژراو،
ئێمە سەیرترین مردووی ئەم جیهانەین.
فیفتی هابیل، فیفتی قابیل

#مارف_ئاغایی

https://t.me/Jilahosaini

گەرووی شەو، ڕوانینم قووت دەدا
کەند و قووڵک: هەنگاوم
نیشتمان: ئەندێشەم.

#مارف_ئاغایی

https://t.me/Jilahosaini

مناڵەکان کە بەیانان لە خەو هەستان،
هەتاو بۆ نێو دەروونتان بانگهێشت بکەن؛
کە خەوتان هات،
سەر بنێنە سەر کەروێشکەی گەنمەکان و
مانگ بنێنە ناو خەونەکانتان!

ئەگەر بۆ شوێنێک ڕۆیشتن،
پێ لە ڕووبار قەرز بکەن،
دەنگ لە تاڤگە،
ڕەنگ لە بەهار.

ئەگەر لە شوێنێکدا ون بوون،
لە پەپوولە پرسیار بکەن.
مناڵەکان ئێوە هەر زوو
ڕەنگ لە ئاڵا وەرگرنەوە و
بیدەنەوە بە وەرزەکان

دەنگ لە تفەنگ وەرگرنەوە و
بیدەنەوە باڵندەکان؛
هەر لە پێش چاوی ئاسمان،
هەموو چەترەکان بشکێنن؛
بەڵکوو هەور ئاشت بێتەوە و
تینوایەتیمان بشکێنێ!

هەر کەسێکتان چاو پێکەوت
نیگایەکی مناڵانەی پێ ببەخشن،
خۆی لەبەر گەرم دابێنێ؛
کۆڵان بە کۆڵان ڕاکەن و
لە دەرگای هەموو ماڵێک دەن،
بڵێن فەرموون:
وشەی ون بووی برایەتیمان دۆزییەوە،
تکایە چاک بیپارێزن!
با ئەمجار لێتان ون نەبێ!

بە شەقامەکاندا ڕاکەن،
هەر کیژێکتان چاو پێکەوت
چەپکێک گوڵی ڕەنگاوڕەنگی
لە کراسە ڕەنگ مردووەکەی دەن.

مناڵەکان! ئەمشەو بۆ ئێوە دڵپڕم.
نا، نامەوێ ئەمشەو بگریم،
بەڵام چ بکەم؟
خۆ فرمێسک پرسیارم پێ ناکا!
نامەوێ شیعر بنووسم،
وشە تەگبیرم پێ ناکا!

شێعر بۆ هەتاو دەنووسم،
سێبەر وەڵام دەداتەوە؛
شێعر بۆ ئاگر دەنووسم،
دووکەڵ وەڵام دەداتەوە؛
شێعر بۆ باران دەنووسم،
تفەنگ وەڵام دەداتەوە!

#مارف_ئاغایی

https://t.me/Jilahosaini

لێوم پەنجەی باغەوانێکە،
چاوەڕوانە
بەری ماچێ لە داری بەژنی تۆ بچنێ.

#مارف_ئاغایی

https://t.me/Jilahosaini

سەرمامە و کڕێوە
            لە بەژنم ئاڵاوە...

برسیمە و سەهۆڵی کەشک ئاسا
    بۆ توێشووی ئەم ڕێیەم دانراوە.....

بێ پەنام،
هەر ڕنوو مەنزڵمە.
    تەنیام و هەر تەمەن هاوڕێمە...!!!

#مارف_ئاغایی

https://t.me/Jilahosaini

بۆ پاراستنی فەرهەنگ و فێربوونی زانست پێویستمان بە پاڵپشتی ئێوەی ئازیزە.

گۆناکانم
گەڵای زەردن
پاییزانێ،
لە داری ژیان وەریون
لێوەکانت
دوو شکۆفەی شلێرەن و
بەسەر گەڵای پاییزانا،
ناچەمنەوە ...
‌
#مارف_ئاغایی

https://t.me/Jilahosaini

دار ڕەنگە بتوانێ بڵێ
چەند فرمێسکی زەردی گەڵا
لە چاوانی هەڵوەریون
هەور ڕەنگە بتوانێ بڵێ
چەند پەپوولەی سپیی بەفر
لە چاوەکانی فڕیون
نا، نا، تۆ ناتوانی بڵێی
کە چەندە داری ئاواتت
گەڵایان لێ هەڵوەریوە
چەندە هەوری چاوەڕوانیت
فرمێسکیان لێ باریوە...

#مارف_ئاغایی

https://t.me/Jilahosaini