تلم حسين زينب. ماتلم عون
الشعر مهما وصفهه. ماتلم عون
الخيل ابيوم داست ماتلم عون
ردت لبن امي بس ماصح بديه

كل خادم ابئشواك رددلك السانه
وتحزم ابئخلاص  يستقبل احزانه

__
انته الأمير اوصاح صوت الحزن بينه
وحنه اعله هذا الصوت بالهمه ردينه
مانرضه غير حسين بس هوه غالينه
اوهاي السمه كل عام تنضر روايانه
____
من غيره وسط الروح متربع أو كاعد
صوت النبض يحسين الله علي شاهد
باقي العهد وياي وفتخر متعاهد
كل عمري لجل حسين جي شفته ذبلانه
_____
دنيا ابلايه حسين ماالهه كل معنه
حسين الابو والشيخ وحسين يجمعنه
كل الدموع اهات يعرفهه واقعنه
بس يم ابو السجاد فرحة مدامعنه
_____
اتسابق اويه الخيم بالخدمه لحسيني
ولطم وعجب الريح ويه اليعاديني
ديني لطم زنجيل واني أفخر ابديني
همه اوعزم وجنون من عابس اورثنه
__
موبس عشرت ايام ونكول هاهيه
عينك تشوف الحال محبوبي يوميه
باقي العزه يحسين للاربعينه
كل ماشربت الماي للغالي اذكرنه
__
للشاعر حسين عبدالرسول الخفاجي

أبوذيات محاوره  بين ابوفاضل ع والعقليه زينب ع
_
ضربتك كل زلمهم.    ماردتهه
اوعلي الدنيا بدونك.   ماردتهه
الحسره الروحي كلش.  ماردتهه
بلا روحك عسن لاروح بيه
___اعذريني يسلطانه.           بلادين
اويضل الركبج هزله.         بلادين
الزمن تافه يفر طولج          بلادين
اويجر عباس حسره اعله الوطيه
__
انه سجيل عالضلم.                 بله انشاف
ايخسي من كال ستر اختك.     بله انشاف
لجن دمعاتي ياخويه               بله انشاف
انه عشرة عمر وياك اليه
__
يلبوه ابنص ذئاب الشر.    البيتي
سعيتي اودعوة حسينج.    لبيتي
لون رديتي يازينب.            لبيتي
دكولي الأمي نفذهه الوصيه
__
بدوي أو غيرته ابنته.          ولدهه
تضن شترضع ابعقلك.          ولدهه
العجب عباس بي شفته.       ولدهه
ينازع والعذر دزاه اليه
__
يحره ادري نياط الكلب.            ولعن
اويحرك جسمي خويه النوح.     ولعن
الج جفيني فدوه اتروح.           والعن
اوفداج الروح والهامه سويه
__
يمن وكت الامانه اعليك.      شار أب
ماي الغيره بس عباس.          شار أب
اوعلي اتذكر اذئ رف يوم.     شار أب
اجي اكباله وكله ابلا اذيه
__

ليل الوداع. يركض ابساع
____
موش ليله جنهه لحضه انكضت ويه حسيني
اخ منج كربلاء اوبعد شتشوفيني
انه من ليلة وداعك خويه نشفت عيني
بعد عينك والله صعبه ياهو اليباريني

كلبي ملتاع. يركض ابساع
____.
لاتوصيني عليهن كلهن ابنياتي
هلله هلله بيه خويه خل امش دمعاتي
الهن ام او اب اصير اوحضرت شكفاتي
لاطلع باجر يريت اولاتشب خيماتي

باجر اوجاع. يركض ابساع
____
يعني باجر لامحال اتروح من بين ايدي
يعني باجر شمر يصرخ هذا يومي اوعيدي
اه يازينب لخوتج كثري ون اوزيدي
ريت وي نحرك يخويه انه كطعو جيدي

التعب ضاع. يركض ابساع
____
اليوم احجي وياك واكف باجر احجي ويه الجسد
ونته قران الديانه ونته شمس المعتقد
الله لايرضه عليهم والعذاب ايكون اشد
بالطمع كضت عمرهه ناس مليانه حسد

أحقر اطباع. يركض ابساع
____
حسين خويه اشلون باجر لذني يوصل واسمعه
عضم صدرك يلحبيب من الحوافر تفقعه
اعليك اصد اواه اصيح اونوبه اصد للمشرعه
والله احير اوجسمك انته ياهو باجر يجمهه

مدمي عالكاع. يركض ابساع
____
للشاعر حسين عبد الرسول الخفاجي ٢٠٢٤

يمه عبدالله //بالكلب عله //يل غبت عني
____
روحي وي كلبي تون وتصيح بسمك
ياهو غيب ياحبيبي اليوم نجمك
ارجع ارجع يافرحت اسنين امك
انه مخنوكه ييمه اورت اشمك

المهد خالي يبني يلغالي زيدت وني
يمه عبدالله. بالكلب عله. يل غبت عني
____
عليك متعوده افك عيني ابصباحي
جن حمامه بدونك اتكسر جناحي
يمه لوادري تجي ابدمعي اونياحي
اله ارج الحومه بونيني اوصياحي

يمه ماينفع نوحي والمدمع. والبعد هدني
يمه عبدالله. بالكلب عله. يل غبت عني
____
يمه متلهفه عليك اوكلبي لاهب
والله دنيا اوفاركينه احنه الحبايب
اه منج كربلاء ام المصايب
خذت مني شمعتي اودلالي ذايب

السهم صابه. ودع احبابه. غفله فاركني
يمه عبدالله. بالكلب عله. يل غبت عني
____
حسين من جابك يعبدالله اليه
انه صحت العمتك تلحك عليه
حيل ماعندي اشيلك بين اديه
انته قربان السمه بلغاضريه

اه يلغالي غابت امالي حالك الهدني
يمه عبدالله بلكلب عله. يل غبت عني
____
قبل ساعه اتناغي هسه ماتجاوب
يمه قصتك عجبت كل العجايب
ليش يمه صوبك سهم النوايب
انه بعدك وين اروح اوياهَو اعاتب

حرمله باجر. صافن اوحاير من يجاوبني
يمه عبدالله. بالكلب عله. يل غبت عني
____
للشاعر حسين عبدالرسول الخفاجي ٢٠٢٤

طبهه بصرار جنه كرار
____
زمخ زمخه الهسه تدوي الهذا يومك بيهم
همه نقمه اوهوه نعمه الله لاينطيهم
يله ياسجيل حيدر غضب صب اعليهم
موفقط من الحياة أمن الوجود امحيهم

خلهه طشار. جنه كرار
____
هلا بالذل الاعادي اونزل بسم حسينه
هلا بالكام ايتخير روس وينه الوينه
صال والحومه كلبهه يسرته اعله ايمينه
النشمي منهم مايواجه لايخف رجلينه

والله من غار. جنه كرار
____
حمل سيفه أولو اكلك شنو صار بحالهم
كطعو الأنفاس كلهم منشده ضل بالهم
الأكبر ابكل المحاور خطف يبرك جالهم
اسيوف مالحكت ترفع خافو أمن اخيالهم

والذبح صار. جنه كرار
____
الشمر صاح الاف انتو اوهوه الأكبر واحد
ليش طشرهه الكتايب والجمع شو شارد
رد عليه جندي يكله ذاك الأكبر صامد
رفع ايده ابكل ثبات اوصاح وين القائد

دك الانذار. جنه كرار
____
هوه مو كلمن يطبهه الحومه يفتك بيهه
الكاع من اولاد حيدر ترتجف ندريهه
الشجاعه اتلَوك لسمه اوهوه لاك اعليهه
صاح عباس اعله الأكبر عفيه ابني افنيهه

كله اي صار. جنه كرار
____
للشاعر حسين عبد الرسول الخفاجي ٢٠٢٤

صوب الحومه انزفه //بشمعه اودمعه اولهفه
____
ويه ام جاسم هاي اليله انعيش أجواء الفاكد زين
لوهلينه اليوم الدمعه رمله اتصب عالقاسم عين
شد اعمامه اوحاسم أمره اوصاح ابشر ياعمي حسين
ولعاداكم لا مايسلم راسه ابسيفي ايصير اثنين

جسام لحسين صمد //ماهمه جيش اولاعدد
سيفه ايلوك ابجفه
ابشمعه اودمعه اولهفه
____
الموقف يثبت والماعنده موقف رايح الله وياه
جاسم حاسب زين احسابه اندل الزين اوهل سواه
يبرك سيفه ابشمرت حيدر عاشت يسراه اويمناه
اصغير اوذل الروس الخشنه اوضل تاريخه ايشع لساه

ونعم تربات الحسن //طشرهه عباد الوثن
اليگرب ياخذ حتفه
ابشمعه اودمعه اولهفه
____
الدنيا اتخيرك وتوضحلك بين الذل اوابن الزود
كلمن يتبع للي ايريده طبع الحيد ايحب احيود
القاسم جندي حسين القائد للقاسم كل احنه اجنود
راد الدم ابدال الحنه اوضحه العمه ابكل مجهود

افديله روح افديله دم //حسين غالي للفهم
خضب وجهه ابنزفه
ابشمعه اودمعه اولهفه
____
القاسم وضح قصه اتعجب ريح ناس أمن التفكير
كال الزلمه ايضل بصراراه اومايتغير مهمه ايصير
كلمن يكعد وقت الموقف يحسب راح ايدوخ ايحير
هيه الغيره ادور همه موشرط اله ايكون اجبير

السيف شاهد عالجره//خله الزلم متنثره

الكل محتار ابوصفه
ابشمعه اودمعه اولهفه
____
الماسامع يسمع مني اوخل ايركز بآخر بيت
كاع الطف انقسمت بالنص هيج اتخايلت اوحسيت
صوب حسين ايشع بنوره اوضلمه ابصَوب الثاني الكيت
مثل اليل اتلاشو كلهم جنك شمس الله اوهديت

حته المؤرخ ماله اثر//يكتب طلع خلف الشجر
ذل الناس الصلفه
ابشمعه اودمعه اولهفه
____
للشاعر حسين عبدالرسول الخفاجي ٢٠٢٤

عباس عباس يااحن كافل
عباس عباس ياابو فاضل
____
سيد الغيره صفاته ماكو منهه
يل حروف اسمك عسل بالساني جنهه
والشهامه منك اتفرع غصنهه
الجنه بيك اتشرفت هيه اوعدنهه

فراس فراس يسطر العايل
عباس عباس ياابو فاضل
____
وين مامشي يرن اسمك بذاني
ياامير اتحكم ابزوده ابزماني
تايه بدونك يبو الغيره تراني
اني عباسي الوجود ابكل كياني

عالكوم عالكوم جن صكر نازل
عباس عباس ياابو فاضل
____
قائد أركان المجالس والعزيات
علمتنه اشلون نحمل احنه رايات
تبقه شي مبهم رغم كل الروايات
واليكول اعليك ميت صحنه مامات

موجود موجود صرح العاقل
عباس عباس ياابوفاضل
____
علمتنه الخدمه موذله كرامه
لليريد ايعيش بلخير اوسلامه
خل يذوب ابحب ابو اليمه أمامه
حسين قائد بس اله اتلوك الزعامه

وياه وياه دومه متواصل
عباس عباس ياابوفاضل
____
هاي خدامك يعباس انضرلهه
انته للحاجات باب الناس كلهه
الله خصك منزله ماصح مثلهه
الكفاله قبل شخصك من َوصلهه

صنديد صنديد رايته حامل
عباس عباس ياابوفاضل
____
للشاعر حسين عبدالرسول الخفاجي ٢٠٢٤

ياحسين ياحسين ياحسين. ياحسين
____

يبو اليمه أنصار عندك ماتعبر العيله
واليغث حسين كلمه مايصبح ليله
شهد الله اعله الكلام اوياه شهد جبريله

أشما نقدم نحس ماناطينك
اي وحك شيباتك اويه اسنينك
اتروح فدوه الهيبتك سبعينك

يايقين اويايقين ياحسين ياحسين
____
الرأيد ايزامط نكله هاي حومه اويله طب
الفرق بين المقاتل والمخنث موصعب
الزلمه كلبه ايكون ميت والمره يرجف كلب

السيف ميزان الرجال الصامده
اتبين الشجعان من الشارده
هذا عابس ياهو راد يعانده

مانلين اومانلين. ياحسين. ياحسين
____
حسين الله اختار زلمك صرت الهم غايه
اتخاف كلهه أمن الممات اوهَمه اجو عنايه
الماله اساس اولابدايه ماله كل انهايه

راية حسين الرفعهه يرتفع هم بيهه
واحد ايشد عزم واحد عالنجم عليهه
عيشت الذل مانحبهه اوابد مانشريهه

صامدين أو صامدين. ياحسين. ياحسين
____
هم صح سبعين لاجن ذلو السبعين الف
حسين خيرهم ولاكن مايضيعون العرف
اشلون تقبل دمنه سالم ونته دمك للنزف

وعد قبلك نلتقي وقت الحرب
باجر اتشوف العواصف من تهب
حسين هاي أنصارك الماتنغلب

جاهزين أو جاهزين. ياحسين. ياحسين
____
سيدي انصار عندك وضحو معنه القيم
وصلو حبك رساله الماقره هم افتهم
قبل أنصار ابزمانك هسه خدام اوخدم

هاي نعمه اولاتفرط بيهه
خدمتك بالروح دوم اشريهه
اتلوك للزين اويلوك اعليهه

ثابتين. أو ثابتين ياحسين. ياحسين
_
للشاعر حسين عبد الرسول الخفاجي ٢٠٢٤

الجنه صار اسنين ياحيدر تتاني
             مابعد تصبر عله افركك ثوني
    دخيلك        رحيلك          يهدم الحيل
__       هذا ملك الموت محتار اعله بابك
            بين جنه الله والدنيا اوغيابك
         الدنيا والبيهه علي ينوح المصابك
             والملايك نزلت اتقبل ثيابك
جهزولك جم قصر حيدر توكل
               والبشر تبجي ابعتب لالالترحل
مصيبه       عجيبه        اويبجي جبريل
دخيلك       رحيلك          يهدم الحيل
___          الدنيا بعدك لافلا كل معنه الهه
            اولوتحل المعضله ياهو اليحلهه
             علي بجيت الخلايق وي رسلهه
          ياامل زينب الجن رايح املهه
  يالي رديت الشمس افتح عيونك
              خل تنضرك زينبك ماتبقه دونك
بنينك         لعينك          تسهر اليل
دخيلك         رحيلك      يهدم الحيل
_____           كبالي ماصدك علي ممدد وشوفك
      اوحرز من الجان جنت الفض حروفك
            يالتريد اتعوف بنتك ماتعوفك
          بالامان اشعر اذى امسك جفوفك
  مالي غيرك بالخلك يعطف عليه
                   بعدك اتمنه ردت بويه المنيه
يغالي      اشبقالي      غير العويل
دخيلك     رحيلك       يهدم الحيل
____      وين ابويه اولامته اودرعهةاوحسامه
            اولونزل حومه يحل يوم القيامه
           بالحسن وحسين بعدك جم علامه
              انرسمت عليهم ملامح لليتامه
  ذبلواوماضل خلك الهم يبويه
      اوشفت اخويه ايصبر ابدمعه الاخويه
نعينه        ولينه        بمدمع ايسيل
دخيلك      رحيلك       يهدم الحيل

_____           مايطيب العيش دونك ونته راحل
           هزنه فكدك بويه جن عزت زلازل
           كلهه ملجومه عليك بدمع نازل
            انه والحسنين والعز ابوفاضل
حته محرابك تحير
                    من نضر دمك تفجر
فعلهه         وصلهه         اوصحنه ياويل
دخيلك       رحيلك          يهدم الحيل
__
الشاعر حسين عبد الرسول الخفاجي