الشاعر حيدر جعفر
Last updated 4 months ago
سيرافقك قلبي إلى اخر العمر
- لطلب تمويل تواصل ← : @ooooow
- قناة التمويلات : @xxxxzz
Last updated 5 months, 3 weeks ago
https://t.me/hjjhhhjjnkkjhgg1234
Last updated 4 months, 2 weeks ago
**هضمه الولد لو ماتت امه
ماتت تره جفوف التضمه
كون التراب ابنج يطمه
شو من وكت __ عالأم نحت
واعله الضلع يمه طحت
مو هينه اليعيش وياك __ وبلا وداع يغرب
يايمه يايمه
༺༻༺༻༺༻༺༻
يمه اليتم ما بيه حيله
زغير الولد وشلون ليله
كون الجفوف ابنج تشيله
ليش الورد _ نام بلحد
من بعدج لموتي أعد
والدفنو امه بنص ليل __ كل عمره يكضيه مترب
يايمه يايمه
༺༻༺༻༺༻༺༻
عالموت اعتب لو عله الباب
شمسويه ويغطيها التراب
جرحج ييمه يندي ماطاب
كسرت ضلع __ باب اندفع
من ماتت الحيل انشلع
واليكضي عمره بلا أم __ عالموت يوكف محرب
༺༻༺༻༺༻༺༻
وين ابنج او وين المكابر
يا دنيا شتسوين صابر
كسرة ضلع باجر حوافر
طاحو سوه __ ضلمه الضوه
لجروحي ما خلو دوه
والغابو احنان هواي __ والموت يمهم كرب
༺༻༺༻༺༻༺༻
حيدر ييمه شلون حاله
حتى الصخر لجله بجاله
موتج على الكلفين عاله
يمه الحزن __ لابنج يحن
موتج تره يهد المتن
تراب الكبر من هالاه _ خده بدمعته يشرب
༺༻༺༻༺༻༺༻#يافاطمه قصائد الليالي الفاطميه ١٤٤٥ هجري**
حيدر جعفر
**موش وكتك ليش هسه
الموت يوجع للزغار
ليش بچيت اليتامه
وبالگلب وجيت نار
اخ حيدر يا هضمته
بالجنازه شلون حار
حسن بويه حسين عينوني اعله هاي
حيدر متيه طريقه من الحزن وبلايه راي
اليؤم حيل البيت رايح وندفن جوه التراب
اليوم اول مره ارجع والدمع يرجع وراي
انه زينب .... الفرح ماضكته ولامره بحياتي
انه زينب .... يكبر المحسن واشوفنه امنياتي
༺༺༻༻༺༺༻༻
علي بويه وين امنه
محدب وجفنك مطر
يابس اول مره اشوفه
العاش كل عمره نهر
ليش جفك بويه يرجف
ع ضلع معقوله مر ؟
بويه فدوه حاجي امنه زغار مو للفرگه دوم
التنهضم لو رادت امها تبقى بالحسره تحوم
ارد اگلها الصار بيه وارد اگلها اعله المتون
وارد اگلها الموت مرني ولا تعده اعليه نوم
انه زينب .... عاشت وماتت عمرها بالمأسي
انه زينب..... ينذبح جدام عيني اعز ناسي
༺༺༻༻༺༺༻
مايسد موتج بواچي
ولا يلم حزني حچي
كون اعيشن عمري غيمه
واسگي ورداتچ بچي
يمه يتم الطفله ياذي
و يهظم الما ينحچي
ويمه درب الشام يوجع و المصايب بيه اشكال
حرت يمه اشكف عليمن والحجي يا يمه عال
هاي تنطك هاي تنجر حايره بدربي البعيد
حسين بويه رقيه صاحت خوله تعثر بالاحبال
انه زينب ....وشلت عيني الكضتها بس بواجي
انه زينب .... وين رحتي يمه ياحلوه المحاجي
༺༺༻༻༺༺༻༻
طاحت امي وراح حيلي
والحزن منها ابتده
ورده ماشفت بحياتي
تموت وتعوفه النده
نفسه يمه الدفع بابچ
باليسر بينه حده
موتت الام حيل توجع وأسال الفاكدله ام
الفارك امه وراد يحچي ،يحچي والمدمع لطم
الليل مايرحم أمفارگ عاليتيمه من يچل
والتعود لامه يحچي بالگلب باقي يضم
انه زينب ... دمعتي الما يوم خلتني انام
انه زينب ... موتتج كلفه تعادل ضيم شام
༺༺༻༻༺༺༻༻
يمه زينب شدي حيلچ
وحَدّچ تبقين راح
يعينچ الله يمه باچر
لون شفتي حسين طاح
راس اخوچ الغالي يمه
باچر تشيله الرماح
يمه طفي وطفچ انتي بينهن مات الربه
الحرگ بابچ هوه نفسه اليسر ضعوني وسبه
هو نفسه يخلي اخوي أبلا دفن بالبر ثلاث
يحرگ خيام الدلال و شيب اخوي يخضبه
انه زينب ... من الزغر عشت الحزن مو بس كبر
انه زينب ... كل سنيني المرت اجرع بيها مر
༺༺༻༻༺༺༻༻
قصيدة _ موت ألحنان
قصائد ألليالي الفاطميه ١٤٤٥هجري
حيدر جعفر**
**عفتني وحدي بهيمه يبويه
علينه احتركت الخيمه يبويه
رقييه انا يبعد انا رقيه
༺༻༺༻༺༻༺༻
متعوده اعله شمسك ليش؟
وجهك غرب ابسرعه
موت الابو يوجع حيل
كلب رايدله ويجرعه
فدوه بابا تانيني
خلي لعمرك سنيني
يبويه يبويه
تعال شكبني بويه وشوف
عيوني اعله الارماح تطوف
يبويه يبويه
༺༻༺༻༺༻༺༻
(وحي الخيال)
ينور عيوني تهت بليل
طفله متيهه عيونك
وصلتك بويه ريت الموت
اخذني ولاشفت لونك
وينه الخنصر البيدك
رقيه جايه تريدك
يبويه يبويه
يلا بويه كوم وياي
ارجع ما نريد الماي
يبويه يبويه
༺༻༺༻༺༻༺༻
كوم وياي موته هواي
ماشافت عيوني الدم
حضنتك بويه بلكت عود
بالنومه جنت احلم
بويه حتركت الخيمه
ضعنك تايه بهيمه
يبويه يبويه
اجت زينب بنص الليل
يحيل الما مبقي الحيل
يبويه يبويه يبويه
༺༻༺༻༺༻༺༻
تعال وياي صار غروب
فايتك صلاتك ليش؟
بويه الضهر من صليت
ماهمك سهام الجيش
رقيه تخاف وحدها
كوم وعيين عمتها
يبويه يبويه
انعس بويه حضنك وين
صدرك ماكو اكضن طين
يبويه يبويه
༺༻༺༻༺༻༺༻
زينب عمتي باقي الحيل؟
متطشر وجن جسمك
ليش اعله الترب ممدود
طايح محد يلمك
زرع الله يطشرونه
كلب زينب يحركونه
يبويه يبويه
اتلم جسمك اتلم ايتام
ميته وياك هاي اولام
يبويه يبويه
༺༻༺༻༺༻༺༻
ليالي أستشهاد السيده رقيه(عليها السلام)
قصيدة ( عفتني وحدي )
محرم الحرام ١٤٤٥ ه
حيدر جعفر
اللحن?**
(للمشايه)❤**
روجة ورد تمشي بفخر
من البحر الى النحر
༺༻༺༻༺༻༺༻
للناذر بروحه _ الماطايبه جروحه
والمحد يلوحه_ شمس الله بالكاع
روجة ورد يمك _ ياحضره ونشمك
ونواسي ردنه امك _ يالحضنك شراع
نتعنه مشايه _ للخدمه وفايه
ماتنزل الرايه _ والعافكم ضاع
مشايه الك صوب الكمر
من البحر الى النحر
༺༻༺༻༺༻༺༻
بالا ربعينيه _ تتصفه كل نيه
تتعنه رجليه _ متعنيه الاحشود
حسين التعب فدوه _ نتعلم الخوه
ونتعلم مروه _ منكم يالحيود
بالخدمه نتشافه _ والخوه تتصافه
وتخبل اوصافه _ ولزينب جنود
نخدم تره كل الدهر
من البحر الى النحر
༺༻༺༻༺༻༺༻
والسفره ممدوه _ لاتضن محدوده
والخادم يكوده _ حبك يالحسين
هذا الاخذ زاير _ من فرحته حاير
وبزايره يساير _ مكعاده بالعين
واليخدمك شانه _ معروف عنوانه
و بين خوانه _ يالناصر الدين
عود الخدم بسمك زهر
من البحر الى النحر
༺༻༺༻༺༻༺༻
واليوصل الحضره _ تطفيلنه الجمره
يادين للفقره _ يمعزب الروح
يحسين اليكصدك _ ماتسأل شعندك
والحاجه من عندك _ يمداوي الجروح
دمع العشك سايل _ هم الكلب زايل
عطر الورد عايل _ ببيوتنه يفوح
لجل الحسين باجي الصخر
من النحر الى البحر
༺༻༺༻༺༻༺༻
قصيده (روجة ورد)
محرم الحرام ١٤٤٥ ه
حيدر جعفر**
**بمشيه الشام شفنه الالام
لجسم الحسين كلبي محتام
اه يالشام اه يالشام
༺༻༺༻༺༻༺༻
والله مو هينه اعوفك والرمل حار
ريت تمشي ويانه تشكف عنه الحجار
بالسبي مامش يخويه جلمة الصار
عالجبير امشي حرت لو يم الازغار
حيرتك يالشام حيره موتت حسين الجبيره
غربه وايتام ونساوين راح مني ومامش حسين
اه يالشام اه يالشام
༺༻༺༻༺༻༺༻
وين متنك ياخو زينب ناخت النوك
خويه توجعني ارد اكلك طبت السوك
يفتر علينه و يصيح خويه اليسوك
تضحك الناس وتشامر حجر من فوك
عازتك ياخويه عازه بموتتي تشيل الجنازه
للكبر ياخويه وياي موش طايح ردتك حذاي
اه يالشام اه يالشام
༺༻༺༻༺༻༺༻
ودعيتك والتفت بلكت نفس ضال
كيدونه اني وبناتك خويه بحبال
انه اخيتك خويه وحدي وكدت الاعيال
والجنت ما امشي اله بسد الاجبال
والجبل طاح وتهدم انترست الكيعان بالدم
نايم اعله الكاع عفتك مفطره من العطش شفتك
اه يالشام اه يالشام
༺༻༺༻༺༻༺༻
حسين راسك عالرمح يبجيلنه هواي
شافني بديره غريبه متيه الراي
رمحه ماتيهني يمشي كلش حذاي
شلون بعدك خويه كلي نشرب الماي
صاحت ارقيه يبابا ليش نمنه بالخرابه
وينك بجفيني اومي بالحضن متعوده نومي
اه يالشام اه يالشام
༺༻༺༻༺༻༺༻
قصيده (مشيه الشام)
1 صفر دخول الضعن الشريف الى الشام
حيدر جعفر**
Last updated 4 months ago
سيرافقك قلبي إلى اخر العمر
- لطلب تمويل تواصل ← : @ooooow
- قناة التمويلات : @xxxxzz
Last updated 5 months, 3 weeks ago
https://t.me/hjjhhhjjnkkjhgg1234
Last updated 4 months, 2 weeks ago