بعد ما حسبت إني نسيت
‏ذكرتك أول ما تجلى الظلام
أول ما أشرقت الأرض بشمسٍ تواري كل دُجى الليالي

عليك الغلا والشوق ينساق لك بإهدار
أساس المشاعر انت يا سيّد اشواقي

فدا طلّتك قدامي الدار واهل الدار
ابيع العمر كلّه فدا حْضورك الراقي

أنا كلّما شفتك نبت فـ ضلوع ازهار
دخيل العيون الناعسه ترخي وثاقي

وش الحب لولا طلةٍ تخطف الانظار
من المبسم الآسر مغيبي ومشراقي

أملّ الاماكن والبشر واكره التكرار
ومعاك اعشق صغار التفاصيل باعماقي

سريتك عمر ماقلت يا طول هالمشوار
على جرتك سقت الخطى وانكسر ساقي

كبير القدر دايم جروحه تصير كْبار
وانا مابكيت إلا على هونت فراقي

عقوقك دمَحْها الحبّ لانّه الابن البار
عداك الملام وشرهتي واشين اخلاقي

عذرتك جعل عذري فدا كذبة الاعذار
اذا ماتت الاعذار؟ ظلّ العمر شاقي

عسى قلبك الخيّر يخالف هوى الاشرار
وترجع على خبري وعلى هقوة الهاقي

عرفتك كريم ومجلسك مدهل الخطّار
جعل دكّة خطاهم فدا صيتك الباقي

أمانه تشحّ بضحكتك كبْر واستهتار
بلا ضحكتك وشلون ينشاف برّاقي؟

اببقى على عهدك مدام الغلا مدرار
لنا ماضيٍ لاجله رميت آخر اوراقي

خطاطيبي الواجد رفضت ايهم اختار
أنا ما أبي إلا -انت- يا كلّ عشاقي

يهون الفراق وسيفه الدامي البتّار
اذا ان الوفا ما وقّف بوجه خفّاقي
- مها

‏ترا من فقد بسمتك ما عاضته قمرا الليال
‏أنا تبسّامك هو اللي كان يضوي لي دروبي

‏أسعد الله صباح اللي غلاه أمتلكني

هلا في كل شيٍّ فيك .. وانت احلى مساييري

‏ماكان للشِّعر طاري .. لين ثار الشعور
‏وما صرت كلّي عذوبه ، لين ذقت العذاب

"ما كنّك إلا هلا من مبسم الطيِّب
‏تشوفها في عيونه قبل ينطقها"

‏لا الصبح صبحي عقب فرقاك صدقني
‏ ولا الليل ليلي لو ان الكل مساني

‏صباح الخير

‏على كثر ما كانت ليّال الوصال قصار
‏على كثر ما كانت طويلة بذاكرتي