#Карвон_қўнғироғи

ЕРНИНГ ҲИКМАТИ

Нима учун одамлар “Отамдан қолган ”,”Бобомдан қолган ”, “Онамдан қолган” деган ибораларни яхши кўрадилар. Нима учун одамлар ўлими яқинлашганда ота-боболари ётган қабристон сари интиладилар? Буларнинг ҳаммаси тупроқнинг ҳикмати билан боғлиқ. Ҳеч ким отасидан қолган пул ва бойликни намойиш қилиб эътибор қозонмайди. Бу нарсаларни намойиш қилишга эҳтиёж ҳам сезилмайди. Чунки бу ўзбекликка хос эмас. Балки, улар бир қари дарахт, ё бир қари чолдеворни, ё бир парча ерни кўрсатишиб , бу “Отамдан қолган” деб дардли-дардли фахрланишади. Кимдир “бу отамни кўриб қолган” деб бир дарахтни тавоф қилаётган бўлса, ё яна кимдир “бу киши онамни кўриб қолган” деб бир кекса кампирнинг кафтларини кўзига сураётган бўлса, буни ўзбеклик деб тушунмоқ керак. Буларнинг ҳаммаси Ернинг ҳикмати билан боғлиқ.

✍️ Эшқобил ШУКУР, "Ўзбеклигим — ўзлигим" мақоласидан.

@Eshqobil_Shukur_ijodi

*ҲУРРИЯТТол бешикка гулдай таянган синглим,
Саҳар-саҳар қушдай ўёнган синглим.

Ўнг тиззангга ул олиб суяр бўлдинг,
Чап тиззангга қиз олиб суяр бўлдинг.

Тол бешикка тўданалар тақасан,
Тов бошидан сочалалар сочасан.

Уй тўрига улинг қуллуқ бўлсин-а,
Дил тўрига қизинг қуллуқ бўлсин-а.

Қўш бешикка эгиз қамар беланган,
Бешик боғи осмонларга уланган.

От бошида дардим бор, айтиб ўтай,
Элдан ният қарзим бор, айтиб ўтай:

Худо қабул қилсин, хуш ният бўлсин,
Боланга бош давлат Ҳуррият бўлсин!

1998-йил
✍️ Эшқобил ШУКУР*@Eshqobil_Shukur_ijodi

Ассалому алайкум, ҳурматли каналимиз мухлислари! Барчангизга мамлакатимиз Мустақиллигининг 33 йиллик айёми муборак бўлсин!

Мустақиллигимиз абадий бўлсин!

Ҳурмат билан,
Эшқобил ШУКУР

@Eshqobil_Shukur_ijodi

​​#Карвон_қўнғироғи

ВАТАН ҚАЛБИ

«Қишлоғим дарё бўйидан бошланиб, адирлар ва қирларга туташиб кетади. Адирлар ортидан тоғ бошланади. Бу тоғни Боботоғ деб атайдилар. Алқисса, мен туғилиб ўсган жуда хушманзара бу қишлоқ Боботоғ билан Она Дарё оралиғида жойлашган. Дарҳақиқат, бу тоғ – менинг бобом, бу дарё – менинг онам! Мен учун Ватан адабиёти ҳам, жаҳон адабиёти ҳам шу қишлоқ этагидан бошланади. Мен минг-минг йиллик эртаклар ва афсоналар ичида улғайганман. Момоларимдан эшитган бу эртакларни оддий чўпчак деб эмас, балки ҳаёт деб тушунганман ва ҳаётнинг ўзи катта адабиёт эканлигини англаб борганман. Болалик йилларимда қишлоқдошларим билан оқинларнинг ҳайқириб айтган достонларини тонггача тинглаганмиз. “Алпомиш” эпоси шу қадар катта ҳажмга эгаки, оқинлар уни баъзан ўн кечагача куйлаб ҳам тугатолмасдилар. Мен оқинлар куйлаётган бу достонда халқим ва ватанимнинг тарихини, энг муҳими, қалбини ҳис этиб борганлигимни энди англаяпман. Мен дунёнинг бир чеккасидаги хилват бир қишлоқда эртак ва достонлар тинглаб, Тилнинг қудрати ва мўъжизасини ҳис этиб борардим. Кейин англадимки, бу эртак ва афсоналар, достонлар менинг мўъжазгина қишлоғимдан бошланиб, жаҳон адабиётига туташадиган ғаройиб йўллар экан. Мени она қишлоғимда эртаклар ва афсоналар оламига етаклаб кирган ўша момоларим ва боболарим энди йўқ. Улар аллақачонлар бу ёруғ оламни тарк этишган. Лекин мен бир нарсани англадимки, улар халқ даҳоси билан яратилган нодир дурдоналарни онггу шуурида муқаддас оятлардай асраб-авайлаб келганлар. Қоғоз ё китобга эмас, балки ўзларининг онгги ва руҳига тошбитиклардай ўйиб ёзилган бу асарларни ўз авлодларига ҳадя қилганлар. Улар шу билан миллий адабиётнинг қадимий булоқларининг кўзларини ёпилиб қолишдан асраганлар...»

✍️ Эшқобил ШУКУР

П/С: устоз шоирнинг Жанубий Корея ҳудудидаги Пажу шаҳрида бўлиб ўтган халқаро Адабиёт симпозиумида ўқиган нутқидан парча.

@Eshqobil_Shukur_ijodi

#Ўтганлар_ёди

Эшқобил ШУКУР адабиётда умрнинг узун ё қисқалиги аҳамиятсиз эканини яна бир бор исботлаган, атиги 47 йил умр кўрса-да ҳамон юраклардан-юракларга кўчаётган шоир – Тилак Жўра ҳақида.

МТРК маҳсулоти.

@Eshqobil_Shukur_ijodi

ГИНА

Эй жон, сенда нечук мунча таманно,
Ақлим сийратида шунча тавалло.

Тилимнинг сўз дея тергани — ёлғон,
Сабаби, кўзимнинг кўргани ёлғон.

Ақлим, ҳар лаҳзада ғавғо қилурсан,
Руҳни тупроқ бирла савдо қилурсан.

Бўйнимга осилиб, нозланар дунё,
Нафсим нафасидан безанар дунё.

Бир оёқ истаги — осмон, мардона,
Бир оёқ истаги — шу қиморхона.

Мен қаён борайин икки том оша,
Бир вужуд саҳнида шунча томоша.

1998 йил

✍️ Эшқобил ШУКУР

@Eshqobil_Shukur_ijodi