يا الله

نعاوي

ذبو العكل حلّو الچراغد
وخل واحد يگابله واحد
شب خيمتي شبة كواغد
وعفته علصدر حسين گاعد

عفته وعفت بيد حديده
ويريد يگطع خنصر ايده
يهل الرحم صاير ونيده
والنبل يدبج فوگ جيده

والنبل المثلث بگلبه
والشمر ينظرله ويگلبه
وانوب سل للذبح حربه
وذاك الرسم ناوي يخربه

ذاك الرسم تدرون وشصار
خربان كدما صايبه حجار
وادم محربه وطالبه الثار
طشرو اخيي والرمل حار

حسين آل صگر

نعاوي
لسان مولاتي رقية بعدما رأت الطشت وفيه الرأس الشريف

يا هلا بمعدول المعاني
طالت الغيبه وانه اتاني
عنك يبعدني زماني
شيبت وانه احسب ثواني

شيبت عود انه الزغيره
من فاركت شيخ العشيره
اسمع حرمنه تكول حيره
يسبونه من ديره لديره

يسبونه ويشدونه بحبال
وعلينه ذاك السوط ينهال
چتالكم مو خوش چتال
جاهل گدركم وانتم جبال

جاهل گدركم يآل هاشم
بالخيل سحگوها العمايم
فدوه الك انه والفواطم
تمنيت بس كون انته سالم

تمنيت سالم خاطر تهون
وعن العبي تمسحها العيون
بويه إذا اطيحن يشمتون
يا كبر سوطه وزغر المتون

حسين آل صگر

على الغريبه ويلاه

حسين خويه السبي ماهو اولامي
وموش من عاداتي حرگ خيامي
هيج اشوف گبالي نحرك دامي
والتراب يسف على ذاك النحر

حسين خويه الترب بيها ملوحه
وادري جسمك يا غمجها جروحه
غصن سدرة علي الفنه يلوحه
فوك كتر الشجره حافرهم حفر

حسين خويه بعيني اشوفك منطرح
والخيول ادوسكم قبل الذبح
يا وسافه الكون ينشال برمح
والارجاس تشيله من ذاك الشعر

حسين خويه الهضمه من نمر عليك
من اودعك لجن ما ترفع ايدك
بلايه راس ولا جفوف وعايفيك
عالرمال التلهب وذاك الحجر

حسين خويه اختك تطر الهيمه
بالخرابه تبات موش بخيمه
ضيم وعيالك وكلمن ضيمه
هيج رهمت خويه وافتر الدهر

حسين آل صگر

خلق الإلهُ النورَ قبلَ وجودنا
حتى عَرِفنا النورَ وجهَ محمدِ
ثم تلاهُ النورُ بعد المصطفى
ولقد تبيّن إبنُ عمِ محمدِ
ولان طـه ثم حيدرا بعدهُ
خَلقَ الإلهُ النورَ بنتِ محمدِ
ولفاطمٍٍ نورٌ تجلى في العُلى
ولأجلها قد صار سبطُ محمد ِ
ثم الحسين ُ السبطَ بعد المجتبى
وبذا يتمُ اللهُ نورَ محمدِ

حسين آل صگر العبادي

وصية الرسول الاعظم محمد (صلى الله عليه وآله) لأمير المؤمنين علي (عليه السلام) قبل استشهاده مسموماً :
          علي اوصيك بوصيه
          بعدي لو جت المنيه
شمايصير ابدارك  ..  لا تسل بتارك
          بعدي لو جت المنيه
       ‏
اولا بالمغتسل وبكل صلافه
تنقلب هالامة من اجل الخلافه
بالسقيفه تنجمع زمرة قحافه
والغدر يتصدر ويفرض عجافه
انته گبل انصارك  .. لا تسل بتارك
        بعدي لو جت المنيه

ثانياً يردونك تبايع صنمهم
ويرتقون لمنبري هذا حلمهم
يا علي بتاريخك تهيّج المهم
چفك بيوم الغدير ارعب زلمهم
موقفك بإصرارك  .. لا تسل بتارك
      بعدي لو جت المنيه

ثالثاً مو سهلة بس لازم تكابر
حرگ دارك يفتح ابواب المگابر
يوم للمحسن وعندك يوم غابر
لفاطمة ولازم تكن محتسب صابر
نار تلهم دارك  .. لا تسل بتارك
      بعدي لو جت المنيه

رابعاً هالمسجد تلزمه العصابه
ومنبري من بعدك ينوح بخضابه
هالظلم يابو الحسن تحسب حسابه
والامانه ( الدين ) من الله و(كتابه)
لو دنو لاسرارك  .. لا تسل بتارك
       بعدي لو جت المنيه

خامساً ما ينتهي بهاي بلائه
والشقي يحكم أمثاله باشقيائه
هذا امر الباري او حكمة سمائه
والاشد وادهى مصيبة كربلائه
نار گلبي ونارك  .. لا تسل بتارك
      بعدي لو جت المنيه

حسين آل صگر العبادي

ردينه الك يحسين. بس شلون ردينه
مامش ملگه يشفي الروح من گبور اهالينه

ردينه عله گاع الجان بيها حسين وبحيله
من جان النجم مستور ما شايف وجه ليله
من جان الفياي چبير ما واصل ضوه لشيله
دارت والبخت ينداس دوست هاون لهيله
صارت واليطب حاجوز كون يفارگ سنينه
ردينه الك يحسين. بس شلون ردينه

ردينه عله گاع الجان بيها الگمر ضل يسطع
من جاعت الدنيا هناك أخوي من الزند وزع
من جانت الجربه بخير منها نرتوي ونشبع
حدما شفت جسمه الحيد جوه الخيل يتگطع
دارت فوگ جسمه الخيل واحترگت صواوينه
ردينه الك يحسين. بس شلون ردينه

ردينه عله گاع الجان بيها الحاكم الهيبه
بيرغ هاشم المبخوت راعي الغيرة والطيبه
من جان الدلال بخير والنه الطاير يجيبه
وسفه عله الزمن وحسين دمه يخضب بشيبه
صاعد عالرمح ويشوف لخيام بطرف عينه
ردينه الك يحسين. بس شلون ردينه

ردينه عله گاع الجان رمل البيها ما معذور
وسگيناها دم وروح عزبنه بأهل ونحور
من جان العطش فلاح واستفحل بگاعه البور
فطّر شفة العطشان وتجاسر عله الناعور
ذبل شفته وما تاب .. ذبل خوله وسكينه
ردينه الك يحسين. بس شلون ردينه

ردينه عله گاع الجان تتمنه المثلنه يمر
عليها ولو جدم لحسين مر بحجارها يخضر
مو هينه تشوف العين بصفاحه الرمح يحفر
وسهام التطگ وتطيح من جسمه وذر تنثر
والينبت يشوغ الروح ويرچ حيله بونينه
ردينه الك يحسين. بس شلون ردينه

ردينه عله گاع الجان عزت مايها الجاري
من غم رايها من گاع هيجي جازت الشاري
مو تربايتك يحسين جا ما عافتك عاري
خلت خيلهم سحگوك وانه محيره بناري
الله يعين كلمن شاف تتذبح قرابينه
ردينه الك يحسين. بس شلون ردينه

حسين آل صگر العبادي