#yangisidan_bor

МУҲТОЖЛИК

Деразангга ўзини уриб,
Потирлайди бир қуш умидвор.
Ташвишларни орқага суриб,
Шу қушчани чиқариб юбор.

Ер қуёшдан эмган каби нур,
Қоронғуда жоиз каби шам.
Бу дунёга кимни кимгадир
Муҳтож қилиб яратган Эгам!

🖋Фахриддин Ҳайит

🗒2025 йил 30 январь

📚t.me/faxriddinhayit

#yangisidan_bor

ОДАМЗОТ БОҒИ

Бошингни болишга қўйган заҳоти,
Сирлар оламига айлайсан сафар.
Баъзида тушларинг кечар ғалати,
Кезгайсан Ердан то Коинот қадар.

Бир кеча туш кўрдим, илғадим равшан,
Улкан ўрмон эмиш чексиз адоғи.
Пештоқида гажак ҳарфлар билан
Ёзиб қўйилганмиш: “Одамзот боғи”.

Воҳ, сесканиб кетдим.
Бу қандай макон?
Наҳотки, бариси рост бўлса, ҳайҳот!
Томоша боғига ошиқар шодон,
Бир-бирин етаклаб гавжум ҳайвонот.

Филлар сичқонларга этар такаллуф,
Шерлар кийикларга кўрсатар шафқат.
Ҳамма бир-бирига йўл бўшатар-у
Ҳамма бир-бирига беради навбат.

Кейин бошланади қафаслар қатор,
Панжара ичида топталар нажот.
Маймунлар мазахлаб егулик отар,
Томоша кўрсатар банди одамзот.

Улар турфа эди, адоқсиз эди:
Турфа феъл, турфа юз,
турфа тан-бадан.
О, улар ким эди, саноқсиз эди...
Биров пичирлади: “кечган тавбадан!”.

Бирдан ич-ичимни босди ваҳима,
Терладим, жунжикдим, беҳол увишдим.
“Одамзот боғи”дан – минг саросима,
Сўнгра мен ўзимни излашга тушдим.

Тўрдан ташқарида чиқмади номим,
Сен билан бир сафда эдим, одамзот!
Бундан қувонайми, бундан йиғлайми,
Менинг ҳам кўксимда бўзлайди нажот.

Уйғониб кетаман шу он, билмайман,
Бўғзимдан отилиб кетади юз оҳ!
Сен қайси саволга жавоб излайсан,
Мен қайси жавобга истайман изоҳ?

🖌Фахриддин Ҳайит

🗓2025 йил 11 январь

📎t.me/faxriddinhayit

“ҲАММАСИ ЯХШИ БЎЛАДИ”

Ҳалокатга учраган “АЗАЛ” авиакомпаниясининг ҳаволайнери борт кузатувчиси, озар халқининг жасур қизи Ҳукума Алиева хотирасига бағишланади.

Баъзан элга оғир мусибат,
Бир тасодиф билан келади.
Озаримнинг сорбургут келбат,
Тайёраси бехос қулади.

Хавф олдида бир юпанч сўзни,
Кимдир айтиш керак тўқима!
Ҳозир бўлдинг, эй турк малаги,
Ўлимга тик боқиб, Ҳукума!

Ичингдаги фарёдларингни
Калимаи Шаҳодатга чай.
Эзгуликнинг қанотларини
Замин узра мардонавор ёй!

Бу ҳаётда, билсанг, баримиз
Бир чорасиз йўловчилармиз.
Сен чора бўл, адл, бўл,
Ҳукума,
Қўнғироқдек янграсин бир сўз!

Сен дунёни уйғотиб юбор,
Гул юз билан, чарос кўз билан.
Сен дунёни уйғотиб юбор,
Шу биргина ёруғ сўз билан.

...ва "Ҳаммаси яхши бўлади!"

Эриётган муз тоғларига
Бир нажот тут, инонтир, токи,
Куяётган Ернинг бағрига
Босиб турсин яхпарча гоҳи.

Нафаслари бўғилган боғлар,
Сўзларингдан топсинлар таскин.
Меваларга ёприлган зоғлар,
Ҳуркиб кетса, шу сўздан кошки.

Етиб борсин майин овозинг
Тош босган ол лолаларгача,
Урушларда тишлаб турган мунг,
Инграётган болаларгача!

Лочин Ҳукума,
қулочингни ёз,
Шамолларга сен бўлма таслим!
Қулаётган самолёт эмас,
Қулаётган дунёдир асли!

Фахриддин Ҳайит

2024 йил 27 декабрь.

🛬t.me/faxriddinhayit

#taqdir_tuhfasi

?Ҳеч қачон йўқолиб қолишдан қўрқманг, кутишдан чарчаманг!

?Бир куни омад ўзи қулочини ёйиб келади. Аммо, Сиз бу омадни бус-бутун қабул қилишга, унинг шартларини бажаришга тайёр туринг.

?Бегимой қариндошим оддий қирғиз аёли, уй бекаси. У бир куни шифокорга кўринаман деб қишлоқдан Бишкекка борди, кечги пойтахт сайрида истироҳат боғида караокеда бир қўшиқ куйлаб, лаҳзада юлдузга айланди.

?Аёл истеъдоди билан тошни ёриб чиқди, овози оламга ёйилди. Унинг учун катта саҳналарга эшик очилди. Яша, қариндошим!

?t.me/faxriddinhayit

#yangisidan_bor

Топганингни нимкосангда жим
еб ўтирсанг, ширин туюлар.
Ҳеч бир кунинг қолмасин, элим,
туққан боланг бўлса ҳам у гар.

Олам тўлди миннатчиларга,
нима бўлса, бўлди бу замон.
Эҳсон дея жар солар ҳар гал,
бир йўқсилга тутса қотган нон.

Миннатчига қилич керакмас,
миннатчига керакмас ханжар.
Берган шаму пиликдан у кас,
пичоқ ясаб кўксингга санчар.

Йўлатманг бу элга иллатни,
бошқа гапим йўқ сизга, тамом!
Қиймати йўқ тоза ҳимматнинг,
хайр – бу бир қалбга эҳтиром
ва Худога йўлланган салом!

?Фахриддин Ҳайит

?2024 йил 20 ноябрь

?t.me/faxriddinhayit

#yangisidan_bor

Мен кўп алданганман,
шундан задаман,
Тупроқни капалаб, чайнаганман тош.
Дўстимсан, деганлар пойлаб қадамим,
Айбу нуқсонларим айлаб келар фош.

Боқсам, ҳамма сергак бу даҳри аро,
Воажаб, бир-бирин таъқиб этар жим.
Бой бердим, адашдим қайдадир,  илло,
Мен ҳам бу дунёга ҳушёр келгандим.

?Фахриддин Ҳайит

?2024 йил 16 ноябрь

?t.me/faxriddinhayit

?Рақамли технологиялар вазирлигида "Шеър азиз олам аро..." деб номланган ижодий учрашув кўтаринки руҳда ўтди...

...Айвонингда чоғ қалдирғочман,
Қалдирғочлар қўнган оғочман.
Шўрлик онам пешонасига
Тушган ажин ё оппоқ сочман:
Айтинг, мени кўрмадингизми?!

Гумбурлаган момоқалдироқ,
Балки менман, чеккандирман оҳ!
Ёки силаб товонларимни,
Эркалаган камсуқум тупроқ...
Айтинг, мени кўрмадингизми?!

?t.me/faxriddinhayit

#ijodiy_uchrashuv

Ажойиб кеча бўлиши кўзда тутилган...

Бизни таклиф этганларга минг бора қуллуқ.

?t.me/faxriddinhayit

? Эрталабдан “Temp FM”да (аввалги “Наврўз” радиоси, шу номи ўзи яхши эди) ажойиб суҳбат бўлди. Ишга келаётиб мириқиб тинглаб келдим.

?Суҳбат соғлом овқатланиш мавзусида кечди ва у ерда айтилган бир хулоса мени роса ҳайратлантирди.

?Хуллас, ҳар бир халқ миллий таомларининг ўз саломатлигига салбий таъсири борасида дунёда жуда катта тадқиқот ўтказилибди.

?Кураи заминнинг 195 та мамлакатида олиб борилган илмий ўрганишларда ўзбек миллий таомларининг умумхалқ саломатлигига таъсири энг юқори даражада деб топилибди.

?Барака топ, халқим, ниҳоят 1-ўриндасан!!!
Қўй ёғидан қази-қартали ош, тандиру сомса, жизу биқтирмани “қултамицин”га қориб, орқасидан “вижиллақ” сувларни ичиб, буни бир ювмаса бўлмайдиёв...
Ош бўлсин!!!

Сиз нима дейсиз⁉️

?t.me/faxriddinhayit