**شعبان 1446ه‍-2025م
مولد الامام المهدي المنتظر عجل الله تعالى فرجه الشريف

هالليله هالليله افراح وسهر
هالليله هالليله صار المنتظر
؛★★★★★★★★★★★★★

شعبان جابلنه الفرح شهره
مولد الحجه الكلها تنتظره
فاح وترس كل الارض عطره
نبعث تهاني النرجس الحره

هالليله هالليله بيها احلى خبر
هالليله هالليله صار المنتظر
؛★★★★★★★★★★★★★

ليلة فرح وأعياد ليلتنه
جَمعة سعادة وخير جَمعتنة
ب15 شعبان فرحتنه
ميلاد ابو صالح سعادتنه

هالليله هالليله اشعر بالفخَر
هالليله هالليله صار المنتظر
؛★★★★★★★★★★★★★

ليله عظيمه وفرحه شيعيه
هالليله تشبه للغديريه
فرحان گلبي ميه بالميه
عطر ابو صالح ساكن الريه

هالليله هالليله تنعّد بشهر
هالليله هالليله صار المنتظر
؛★★★★★★★★★★★★★

بالأرض هالليله الگمر يطلع
نور ابو صالح عالبشر يسطع
تبتدي الفرحه ويختفي المدمع
ترتاح روحي بأسمه من اسمع

هالليله هالليله كل هم اندثر
هالليله هالليله صار المنتظر
؛★★★★★★★★★★★★★

بياس وورد هالفرحه نتلگه
تعم السعاده وتنتهي الخنگه
الهايم بحب المنتظر حگه
هوه الطفل بگماطه ويعشگه

هالليله هالليله يتلالى الگمر
هالليله هالليله صار المنتظر
؛★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**قصائد استشهاد الامام الكاظم عليه السلام
رجب 1446ه‍-2025م
ميمر كربلائي

مثل الگمر وأم عباس باب الحوائج اسمه
؛★★★★★★★★★★★★★★★★★★

كاظم الغيظ الما يغيظ السائل
باب الحوائج للحوائج كافل
يمه المشاكل تنگظي بالعاجل

بچفك يحط المطلوب وبالوجه يرسم بَسمه
؛★★★★★★★★★★★★★★★★★★

مثل الگمر وأم البنين الحره
موسى ابن جعفر من امرهم أمره
يگظيها كلمن حاجته متعسره

مصدر الخير الهالناس وبفضله كلنه بنعمه
؛★★★★★★★★★★★★★★★★★★

ما تبقى حاير لون تصفى النيه
وشما تكون الحاله والنفسيه
بس تدگ بابه وحاجتك مگظيه

ما واحد يكون بضيج وموسى ابن جعفر يمه
؛★★★★★★★★★★★★★★★★★★

طب وعلاج بمرقده الكل عله
الكل الطوائف بابه صاير قبله
والنعم من الكاظم ومن نسله

طيّب ومن نسل اطياب جده وأبوه وأمه
؛★★★★★★★★★★★★★★★★★★

لازم تگصده وانت بالحق عالم
وتعرف تفاصيل الإمام الكاظم
وشگد مِحن عاناها مِنّ الظالم

عاش بمعاناة سنين والهوه گوه يشمه
؛★★★★★★★★★★★★★★★★★★

ضد الظلم چان اللسان الناطق
دربه السراط وهالدرب بيه واثق
كلنه نسير بنهج إبن الصادق

للموت ويّ المظلوم حاشه نخالف علمه
؛★★★★★★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**قصائد اىستشهاد الامام الكاظم عليه السلام
رجب 1446ه‍-2025م
قصيده على لحن قصيدة باسم الكربلائي ( وداعاً يالجواد )

اصب دمعي وأون على المات بسجن
؛★★★★★★★★★★★★★★★★

موسى ابن جعفر گظت بالسَم حياته
فارگ احبابه وبقت بس ذكرياته
وسفه صارت بالسجن لحظة وفاته
عاف حسره بگلب أولاده وبناته

ترس بيته الحزن على المات بسجن
؛★★★★★★★★★★★★★★★★

من السجن طلعت الجنازه اسيره
والطبيب يصيح ما عنده عشيره
تاخذ بثاره من الما عنده غيره
من السجن للموت يا وسفه مصيره

بقيوده يندفن على المات بسجن
؛★★★★★★★★★★★★★★★★

عد بني العباس سوه رعب اسمه
چانت تهز العرش من عنده كلمه
بكل طرقهم حاولو يخفون علمه
وما لگو الهم طريقه فقط سَمّه

غدر غمّض جفن على المات بسجن
؛★★★★★★★★★★★★★★★★

بقى الآخر لحظة من عمره بقيوده
وضد حكم هارون ظل ثابت صموده
غيّر احوال السجن لحظة وجوده
بالسجن باقي اثر هامة سجوده

بقى مچانه يحن على المات بسجن
؛★★★★★★★★★★★★★★★★

وين هارون الغزه الأمه بفجوره
وين قصره أو وين گبره أو وين سوره
خل يجي ويشوف موسى واليزوره
يسطع من الگبه صوب السمه نوره

ضوه الليل اليجن على المات بسجن
؛★★★★★★★★★★★★★★★★

صح تعذب بالسجون وغدر قَتله
لچن للعالم مزاره اليوم قِبله
والملايين التجي البابه وتقبله
كل قضية الصعبه يمه تصير سهله

بشباچه الأمن على المات بسجن
؛★★★★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**الليالي الفاطميه 1446ه‍-2024م

على حيدر علي اعظم مصيبه
من انعصرت الزهره الحبيبه
؛★★★★★★★★★★★★★★

شريكة عمره حيدر فارگاها
عافت بيتها وسكنت ثراها
صاح بصوت لمّن ودّعاها
مغدوره تلگاها يطٰه

تلگه بنَيتك بدمها خضيبه
من نعصرت الزهره الحبيبه
؛★★★★★★★★★★★★★★

مشت وچفوف حيدر شيعتها
چفوفه بدمع عينه غسّلتها
خذت روحه المنيه اللي خذتها
تذبح گلب حيدر فاجعتها

گلبه يفارگ الزهره نصيبه
من انعصرت الزهره الحبيبه
؛★★★★★★★★★★★★★★

على هذا علي الله اليعينه
يشوف الزهره ميته گبال عينه
هاي ام الحسن هاي الحنينه
خلت حيدر يعاشر ونينه

تموت بيا ذنب هاي العجيبه
من انعصرت الزهره الحبيبه
؛★★★★★★★★★★★★★★

عافت تنحب بحسره ولدها
الحسن وحسين يبچون الفگدها
وزينب سكنت الدمعه اعلى خدها
يتيمه ظلت الحره بعدها

ساد الحزن من بعد النجيبه
من انعصرت الزهره الحبيبه
؛★★★★★★★★★★★★★★

الحسن ظل ينحب اعلى امه الشهيده
فوگ الراس يلطم حيل بيده
عن عينه صفت امه بعيده
التروح امه بعد ياهو اليفيده

يظل عايش بدنياته الكئيبه
من انعصرت الزهره الحبيبه
؛★★★★★★★★★★★★★

صاح حسين آ يا ماي عيني
يروحي ويا حياتي وكل سنيني
ييمه ليش بالهم تتركيني
كون وياچ يمه تاخذيني

ترى بعدچ صفت روحي سليبه
من انعصرت الزهره الحبيبه
؛★★★★★★★★★★★★★

زينب تنعى يا يمه الزچيه
اموت وياچ لو صحّت بديه
اجتچ ليش ما جتني المنيه
خلتني اون صبح ومسيه

عيني تعاشر الدمعه السچيبه
من انعصرت الزهره الحبيبه
؛★★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**ربيع الأول 1446ه‍-2024م
ولادة النبي محمد صلى اللّه عليه وآله وسلّم

صاح الوجود العالمي بأَسره
هلا هلا يا والد الزهره
؛★★★★★★★★★★★★★

هلا بأعظم بشر عالگاع شع نوره
هلا بالخله روح المحب مسروره
ابو الزهره الاجه الرحمة المعموره
بميلاده الكره الارضيه مبهوره

من ظهر حيد ومن بطن حرّه
هلا هلا يا والد الزهره
؛★★★★★★★★★★★★★

هالليله الفرح بگلوبنه تسيّد
أجمل فرحه باعظم ولدٍ يولد
الله يحب شخص بالسانه تتردد
كلمه وينذكر بيها اسم احمد

بخّر الكون بريحته وعطره
هلا هلا يا والد الزهره
؛★★★★★★★★★★★★★

قبل لا ينخلق كلشي انخلق طه
لجل عين النبي الله الدنيا سوّاها
نعمه وللبشر بارينه جاباها
على كل الأمم بالنبي نتباها

من الزغر بينه حُبه عالفطره
هلا هلا يا والد الزهره
؛★★★★★★★★★★★★★

قبل لا ينبعث چان النبي قدوه
صدق واخلاص امانه ومعرفه وتقوه
رغم ما چان عايش دنيته بقسوة
بس چان ابو طالب للنبي التچوه

والد علي مَن يوگف بصدره
هلا هلا يا والد الزهره
؛★★★★★★★★★★★★★

رب العرش هذا الفضل سوّاله
صرنه ناس بينه خير بفّضاله
نبينه ونفتخر هالشطر نقراله
اللّهم صلِ عالنبي وآله

ما عدنه غير النبي والعتره
هلا هلا يا والد الزهره
؛★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**قصيده للامام الحسن العسكري عليه السلام

عظم الله اجرك يغايب راح ابوك الغالي
يعينك اللّه يبو صالح وانتَ فاگد والي
؛★★★★★★★★★★★★★★★★★

يبو صالح عظّم الله الأجر
ودعت غالي ودفنته بالگبر
مات ابوك وبقى گلبك منكسر
تبچي عالمسوم من أهل الغدر

گلبي مجروح المصابك يالسكنت ابّالي
يعينك الله يبو صالح وانتَ فاگد والي
؛★★★★★★★★★★★★★★★★★

شگد تعذب من طواقيت الزمن
ناس عاشو بالضلاله والفتن
حاصروه من كل كتر بيت الحسن
لأن ما يردون علمه بالوطن

حاربو اهل النبوه والعليِّ العالي
يعينك الله يبو صالح وانت فاگد والي
؛★★★★★★★★★★★★★★★★★

عاش وي ناس الجرى بدمها الحقد
بين شوك شلون يرتاح الورد
مات وعيونه على الشيعه تصد
لعنة الله اعله الخليفه المعتمد

الف لعنه اعلى النواصب يدعي يا رب حالي
يعينك الله يبو صالح وانت فاگد والي
؛★★★★★★★★★★★★★★★★★

ثمانيه وعشرين عمره ودّعك
وانت خمس سنين ويصب مدمعك
وغبت عن العين والهم لوّعك
وظلت الشيعه تتاني مطلعك

انتظر يالمهدي اشوفك نصرتك تحلالي
يعينك الله يبو صالح وانت فاگد والي
؛★★★★★★★★★★★★★★★★★

يا عظم جرحك يمولاي الحزين
وانته ما ظگت الهَنه بمر السنين
تنتظر يفرج الٰه العالمين
حتى تبني للبشر سورٍ أمين

تظهر وتجعل الشيعه بالشدد متبالي
يعينك الله يبو صالح وانت فاگد والي
؛★★★★★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**صفر 1446ه‍-2024م
قصيده بمناسبة استشهاد النبي محمد صلى الله عليه وآله وسلّم

لحظة رحيلك لحظة عذابي
بويه بمصابك يبدي مصابي ★★★★★★★★★★★★★★★★★؛

انا الزچيه فاطمه يالخذت روح بنيتك
ودعت كلشي بدنيتي من لحظة الودعتك
چا هاي تاليته الزمن يا ورد يمنع شمتك
من اليوم حد آخر نبض وسط الگلب فاتحتك

هالراسي شايب وانه بشبابي
بويه بمصابك يبدي مصابي ★★★★★★★★★★★★★★★★★؛

منا وقاد بلا ضوه تگظي وراك الفتره
يا شمس غبت من السمه واظلم الكون بظهره
البيت ظل عگبك يون حجره تگابل حجره
الوياك عاش شكم سنه شله وراك بعمره

بعدك يغالي يكثر خضابي
بويه بمصابك يبدي مصابي ★★★★★★★★★★★★★★★★★؛

يالجمعتنه بخيمتك تحت الكساء الاطهر
سمّوك رادو نفترگ حسبالهم نتطشر
لكن وجودك بالارض يكمل وراك بحيدر
محد يغيّر منهجك يالمنهجك خط احمر

صوتك ندائي ونهجك كتابي
بويه بمصابك يبدي مصابي ★★★★★★★★★★★★★★★★★؛

وياك اخذني للگبر ما اريد اظل واتلوع
يالبالگلب عفت الگلب هم ومصايب يجمع
نسد باب ضحكت فاطمه وانفتح باب المدمع
بيناتنه مدة دمع والروح بعدك تطلع

انته الگلتلي يحرگوها بابي
بويه بمصابك يبدي مصابي ★★★★★★★★★★★★★★★★★؛

تنهي برحيلك رحلتي وتبدي الحياة المره
الوياك چانت بالأمس مو نفس ذيچ الزهره
بعدك ذبحني الخارجي والمر جرعته بعصره
بويه وراك تجاسرو والورد ذبحو عطره

كلمة وداعاً آخر خطابي
بويه بمصابك يبدي مصابي ★★★★★★★★★★★★★★★★★؛

جعفر عطيه البزوني

رابط القناة @Jaffarattea للتواصل** @jaffarsds

**صفر 1446ه‍-2024م
قصيدة للإمام الحسن عليه السلام

وا ويلاه يا بو محمد
فگدك آه يا بو محمد
؛★★★★★★★★★★★★★

بسابع صفر گلب الشيعه متألم
الإمام الحسن عمره منتهي بالسِم
طفه النور وبقى بيته وراه مظلِم
الدهر ضد أهل بيت النبي متحزّم

وا ويلاه يا بو محمد
فگدك آه يا بو محمد
؛★★★★★★★★★★★★★★

راح الچان ينطي ولابس الثامه
راح الچان كل الخير بايامه
صاح حسين خويه وذب العمامه
ظل يلطم بديه ويدگ على الهامه

وا ويلاه يا بو محمد
فگدك آه يا بو محمد
؛★★★★★★★★★★★★★

زينب عالحسن ظلت تجر ونه
اخوها الماكو واحد بالبشر منه
السم گطّع چبدته وگطعت الضنه
غدر غدروه يَوَسفه سيّد الجنه

وا ويلاه يا بو محمد
فگدك آه يا بو محمد
؛★★★★★★★★★★★★★★

ابو محمد البابه للخلگ مگصد
والله الداگ بابه بحاجه ما ينرد
سود دلاله تلهب جمر ما تبرد
لأن بالكرم هوه الفارس الأوحد

وا ويلاه يا بو محمد
فگدك آه يا بو محمد
؛★★★★★★★★★★★★★

الله يعين گلبك سيدي القائم
ليليه الحزن ويّاك متلازم
تخلص من ليالي حيدر وفاطم
يجن شهرين چفك عالوجه لاطم

وا ويلاه يا بو محمد
فگدك آه يا بو محمد
؛★★★★★★★★★★★★★★

الحمد للّه بنعمته انعم اعليه
وخلاني اقره عالمظلوم لطميه
يمك يالحسن صفّيتها النيه
بس كون بخدمتي تقبل شويه

وا ويلاه يابو محمد
فگدك آه يابو محمد
؛★★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**صفر 1446ه‍-2024م
قصيدة للإمام الحسن عليه السلام

راحل سورنه العالي چبير العايله الغالي
منه البيت ظل خالي فارگنه الحسن
؛★★★★★★★★★★★★★★★★★

أنا الحره العقيله الروحي تتلوه
على امصيبة اخوي البالسم اتروه
راح الينطي حگها كلمة الخوه
هيه البلوه من تفگد بشر يسوه

فگدنه رحمته وحلمه فگدنه نخوته وعلمه
فگدنه الطيبه والبسمه فارگنه الحسن
؛★★★★★★★★★★★★★★★★★

قبل ليموت مريت ارد اشوفنه
لگيته بيا وضع يصعب اوصفنه
چبده مگطع وما بقت بيه ضنه
يا زينب يگلي گوه اسمعنه

وداعاً يختي يالحره رايح لمچ الزهره
ظهري انكسر يا كسره فارگنه الحسن
؛★★★★★★★★★★★★★★★★★

شحلات الگعده من چنه سوه نگعد
كل ساعه نروح اعله الحسن ونرد
إذا ما رحنه يمه يبادر ويفگد
واحد واحد اعلينه يمر ينشد

ما تاركنه ابو محمد دوم الربعه يتفگد
اليگصد بابه ما ينرد فارگنه الحسن
؛★★★★★★★★★★★★★★★★★

شحچي عنه ادري ما يكفّيني
بمقام الوالد البيه تنترس عيني
كل ما شافني يگوم ويلاگيني
هلا باختي الاميره من يحاچيني

هلا بالخدر وبأهله الما واحد لمح ظله
هلا بطول النبي وفعله فارگنه الحسن
؛★★★★★★★★★★★★★★★★★

بيا حاله بقيت وشحچي عن حالي
بعد ما وسدينه بالگبر والي
راح الحسن والحسرات خلّالي
فارگني وترك دمعاتي تبرالي

تحارب حتى في موته رموه بسهام تابوته
ما نسمع بعد صوته فارگنه الحسن
؛★★★★★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds

**محرم 1446ه‍_2024م
ليلة 11 محرم (ليلة الوحشه)

ليل هدعش ليل المصيبه زينب غريبه
ودّعت روح الله وحبيبه زينب غريبه
؛★★★★★★★★★★★★★★★★

من حل الظلام وبده برعبه الليل
بعد مقتل حسين المنسحگ بالخيل
طلعت زينب ومهدوم منها الحيل
تعبانه عمت عيني ودمعها يسيل

ادور على الجثته سليبه زينب غريبه
ودّعت روح الله وحبيبه زينب غريبه
؛★★★★★★★★★★★★★★★★

وصلت جسد مرضوض وطعن متروس
سهم فوگ السهم مثل الزرع مغروس
لا بيه راس لا عالجسم ظل ملبوس
ما عرفت اخوها بكثر ما مديوس

بين العده هاي العجيبه زينب غريبه
ودّعت روح الله وحبيبه زينب غريبه
؛★★★★★★★★★★★★★★★★

صاحت والدمع سايل على الخدين
على ريحة الزهره اعرفت بيك حسين
اريد اگعد گبالك گعدة الماشين
خويه النوگ جهزت باچر مودعين

عايفني بالشده الصعيبه زينب غريبه
ودّعت روح الله وحبيبه زينب غريبه
؛★★★★★★★★★★★★★★★★

بالهيمه يخويه اليوم بيتتنه
محروگه خيمنه وين گعدتنه
بعد ما طاحت اعله الشط كفالتنه
وره العباس خويه اجناب حرستنه

اجناب تحرسها النجيبه زينب غريبه
ودّعت روح الله وحبيبه زينب غريبه
؛★★★★★★★★★★★★★★★★

يا حيرة اخيتك باليمر بيها
عفتلي اطفال ما بياش احاميها
باول يوم واطفالك ملوعيها
رقيه اليوم سلبوها تراچيها

حگ الخدر ياهو يجيبه زينب غريبه
ودّعت روح الله وحبيبه زينب غريبه
؛★★★★★★★★★★★★★★★★

جعفر عطيه البزوني

رابط القناة @Jaffarattea للتواصل** @jaffarsds