МУНОЖОТ

Мен забунман. Тун қўйнида қаро тунман,
Тунд бағримга зиёларни кимдан сўрай?
Ўзим ерман, ўзим само – мен очунман,
Ўздан ўзга дунёларни кимдан сўрай?

Ишқим барбод бўлди обод шаҳарларда,
Барча кулди, мен йиғладим баҳорларда,
Юрак шабнам бўлиб томган саҳарларда
Осмонимга зуҳроларни кимдан сўрай?!

Кўкдан сўра хаёлимнинг ҳурларини,
Ердан сўра пешонамнинг шўрларини,
Мендан сўра сен дардларнинг турларини –
Мен дардимга даволарни кимдан сўрай?!

Сен тунларни – ялдоларни мендан сўра,
Хатоларни, савдоларни мендан сўра,
Сен кўзингга зиёларни мендан сўра,
Мен кўксимга ҳаволарни кимдан сўрай?!

Нетай, бордир бу тоғларнинг орасида
Оёқ изи – юрагимнинг ярасида,
Шафқат йўқдир ул кўзларнинг қорасида,
Оқ меҳрли қароларни кимдан сўрай?!

Малак, сенинг малаклигинг ёлғон экан,
Фалак, сенинг фалаклигинг ёлғон экан,
Юрак, сенинг юраклигинг ёлғон экан,
Сенга бошқа самоларни кимдан сўрай?!

Мен кўзимдан ёшлар отиб йиғлай, дўстлар,
Кўксингизга бошлар отиб йиғлар, дўстлар,
Тош бағримга тошлар отиб йиғлар, дўстлар,
Йўқотмишим даҳоларни кимдан сўрай?

Юраккинам, наво иста, нидолар қил,
Ё навосиз жонгинамни адолар қил,
Сўра, етти иқлимларга садолар қил –
Мен умримга наволарни кимдан сўрай!..

1985

Мирзо Кенжабек
(“Муножот” китобидан)

@m_kenjabek |instagram | youtube

24-март – Ўзбекистон халқ ёзувчиси, санъаткор адиб Шукур Холмирзаев таваллуд топган кун.

ВАТАН ВА ОЗОДЛИК ФАРЗАНДИ

Шукур Холмирзаев адабиёт учун ажралган шахс эди. Адабиётдан бошқа ҳаёти йўқ эди. Ижод учун ўзига қамалган бундай шахслар оз. У юртдаги сафдошлари билан мусобақа қилмас, балки жаҳон адабиётининг юксак намуналарини ўзига мезон қилиб олган эди. Зотан, ўзи айтган: «Мен бу ҳикояларнинг ҳар бирини дунё адабиёти ҳикоячилигига бўйлаб ёзганман…»

Адибнинг сўз санъатидаги беназир даражасини камтарона ҳаёти, баъзи «эркалик»лари яшириб турар эди.

Ватанни севиш, юртга фидо бўлиш санъатида у барча ватанпарвар адибларнинг хос маънавий устозларидандир.

Ватан… деганда, озодлик деганда қалби оғрийдиган инсон эди у. Ҳар ким ҳам ватанни севади. Лекин Ўзбекистонни унингдек ёниб севган, унингдек ёниб куйлай олган қаламкаш оз. Ўзбекистон тимсолида Сурхон воҳасини, Бойсун тоғларини унингдек суйиб куйлаган ким бор?

Ватанни севиш ва куйлашни, юрт тарихига эътиборни тортиб, халқ қалбига миллий озодлик туйғуларини солишни кейинги авлодлар шеъриятда Абдулла Орипов, Эркин Воҳидов, Рауф Парфидан ўрганган бўлса, насрда Шукур Холмирзаев бу бобда раҳнамо бўлган.

2010–2020

Мирзо Кенжабек

(“ВАТАН ВА ОЗОДЛИК ФАРЗАНДИ:
Ўзбекистон халқ ёзувчиси Шукур Холмирзаев ҳақида хотиралар” мақоласидан.

@m_kenjabek |instagram | youtube

Асcалому алайкум  ва раҳматуллоҳи ва барокотуҳ!
БУГУН:
ЯКШАНБА.
Ҳижрий-қамарий 1445 йил,
Муборак РАМАЗОН ойининг 14-куни.
Милодий 2024 йил 24-март.

@m_kenjabek |instagram | youtube

Асcалому алайкум  ва раҳматуллоҳи ва барокотуҳ!
БУГУН:
ЧОРШАНБА.
Ҳижрий-қамарий 1445 йил,
Муборак РАМАЗОН ойининг 10-куни.
Милодий 2024 йил 20-март.

Ё РАББИМИЗ! РАМАЗОН ОЙИНИ БИЗ УЧУН ВА  БУТУН ДУНЁ МУСУЛМОНЛАРИ УЧУН ХАЙРЛИ, БАРАКОТЛИ  – МУБОРАК АЙЛА!

@m_kenjabek |instagram | youtube

ИСААК ЛЕВИТАННИНГ
ТОВУШСИЗ КУЙИ
(Константин Паустовскийнинг
“Исаак Левитан” қиссасини ўқиб)

Кўз тикиб табиат овозларига,
Яшадим мунгларни қоғозга тизиб.
Лекин, бу дунёнинг бор бўзларига
Менинг ўз умримни бўлмайди чизиб.

Сочдим қоғозларга фасллар рангин,
Мавжланиб кўринди баҳорлар кўзга.
Бироқ манзаралар не учун ғамгин?
Нега баҳорларим ўхшайди кузга?

Борлиқ жилмаярми суратда, ахир,
Агар жилмаймаса мусаввир ўзи?
Мусаввир – борлиқнинг унсиз тилидир,
Борлиқ – мусаввирнинг айтажак сўзи:

Хазонлар – ғурбатда тўкилган умр,
Тиниққан дарёлар – сўник бир ҳавас.
Мен кузни севардим, севардим ахир,
Куз – видо олдидан олинган нафас!

Товушсиз бир куйга солдим-у уни,
Лекин инкор қилди мени табиат.
Шу сабаб титроқдир қайинзор уни,
Ва шундан нурларда паришон шиддат.

Ватаним, Россиям, бемеҳр она,
Қувғин бир шайдоман, беқадр, бебурд.
Аммо кўп юртларни кезиб, ягона
Виждоним юрт бўлди, эътиқодим – юрт!

Энди кузларингда яшайдирман мен,
Энди кўзларингда яшайдирман мен.
Энди дунёларни қўйгил, дафъатан
Англадим: бўлса ҳам нечоғ бағри кенг,
Сарсонлик ҳеч кимга бўлолмас Ватан .

1978

Мирзо Кенжабек

ИЗОҲ. Константин Георгиевич Паустовский – машҳур рус ёзувчиси. 1892 йил 19-май куни туғилиб, 1968 йилда вафот этган. “Орест Кипренский”, машҳур манзаралар мусаввири ҳақида ҳикоя қилгувчи “Исаак Левитан”, ёзувчилик меҳнатининг гўзал моҳияти ҳақидаги “Золотая роза” (“Олтин атиргул”) каби асарларини ёзган.

Умри охирида “Повесть о жизни” (“Ҳаёт қиссаси”) номли кенг кўламли саргузашт асар устида ишлаган.

(Исаак Левитан - буюк санъаткор мусаввир. Ҳамма ғояларини табиат манзаралари асосида ифодалаган.
Камина адибнинг “Исаак Левитан” китобини 1978 йилда Туркманистоннинг Небиттоғ туманида офицерлик ҳарбий ўқувида бўлган вақтимизда ҳарбий қисм кутубхонасидан олиб ўқиган эдим... Бу шеър кайфияти ўшанда туғилган.)

@m_kenjabek |instagram | youtube

Асcалому алайкум  ва раҳматуллоҳи ва барокотуҳ!
БУГУН:
СЕШАНБА.
Ҳижрий-қамарий 1445 йил,
Муборак РАМАЗОН ойининг 9-куни.
Милодий 2024 йил 19-март.

Ё РАББИМИЗ! РАМАЗОН ОЙИНИ БИЗ УЧУН ВА  БУТУН ДУНЁ МУСУЛМОНЛАРИ УЧУН ХАЙРЛИ, БАРАКОТЛИ  – МУБОРАК АЙЛА!

@m_kenjabek |instagram | youtube

Асcалому алайкум  ва
раҳматуллоҳи ва барокотуҳ!
БУГУН:
ПАЙШАНБА.
Ҳижрий-қамарий 1445 йил,
Муборак РАМАЗОН ойининг 4-куни.
Милодий 2024 йил 14-март.

Ё РАББИМИЗ! РАМАЗОН ОЙИНИ БИЗ УЧУН ВА  БУТУН ДУНЁ МУСУЛМОНЛАРИ УЧУН ХАЙРЛИ, БАРАКОТЛИ  – МУБОРАК АЙЛА!

@m_kenjabek |instagram | youtube

ИБОДАТ

Ибодат не? Яратганга
итоат ҳам ибодатдир,
Ҳақиқий бандалик бирлан
садоқат ҳам ибодатдир!

Ибодатдир, тирикликни
этолсанг маърифат боғи,
Машаққатлик илм, санъат,
қироат ҳам ибодатдир.

Онанг бирла отанг қалби
ўтар Каъба тавофидан,
Алар кўнглини шод этсанг,
шу хизмат ҳам ибодатдир.

Хабар олдингми бемордан,
қариндош, дўст, мусофирдан?
Бировни йўқласанг дилдан,
зиёрат ҳам ибодатдир.

Умрни этмайин исроф,
ўзинг рўза, вужудинг соф,
Агар пок ҳолда ухларсен,
шу роҳат  ҳам ибодатдир.

Мудом Аллоҳни зикр этсанг,
ҳалол борига шукр этсанг,
Қиёмат кунин фикр этсанг,
тижорат ҳам ибодатдир.

Бутун борлиқ, наботот ҳам,
Яратганга этар тасбиҳ,
Бобо деҳқон экиб юрса
зироат ҳам, ибодатдир.

Ибодатдир – бирор золим,
жафокорга десанг ҳақ сўз,
Ва нодонга сукут қилсанг,
сукунат ҳам ибодатдир.

Агар жуфти ҳалол бирлан
кўнгилхушлик этар бўлсанг,
Фалак шоҳид, малак ҳозир,
бу суҳбат ҳам ибодатдир.

Бу Исломдир, бутун умринг
ибодат ҳолига келгай,
Ва огоҳлик билан ўтган
шу фурсат ҳам ибодатдир.

Тамал –  иймону ихлосдир,
бу қуллик бандага хосдир,
Худо деб қилганинг ҳар иш
ва ният ҳам ибодатдир.

Севиб Мирзо, фақат дўстлик
билан дилларни обод эт,
Агар Аллоҳ учун севсанг,
муҳаббат ҳам ибодатдир!.. 

Мирзо Кенжабек

@m_kenjabek |instagram | youtube

Асcалому алайкум  ва
раҳматуллоҳи ва барокотуҳ!
БУГУН:
ЧОРШАНБА.
Ҳижрий-қамарий 1445 йил,
Муборак РАМАЗОН ойининг 3-куни.
Милодий 2024 йил 13-март.

Ё РАББИМИЗ! РАМАЗОН ОЙИНИ БИЗ УЧУН ВА  БУТУН ДУНЁ МУСУЛМОНЛАРИ УЧУН ХАЙРЛИ, БАРАКОТЛИ  – МУБОРАК АЙЛА!

@m_kenjabek |instagram | youtube

**Аср ошган шеърлар

ТАСКИН**

Насиб этгай сенга олий бахт –
Ўз осмони бўлмиш бир лочин!
Сен ҳам уни эркалаб хушбахт,
Қанотида куйламоқ учун
Ел бўласан, шамол бўласан,
Сен бир бахтли аёл бўласан!

Бошгинангнинг оғриғи қолар,
Асаб дарди бўлур фаромуш.
Ва аксингни тортқилаб кулар
Тиниқ сувлар, сен боқсанг хомуш.
Сувда қувноқ ҳилол бўласан,
Сен бир бахтли аёл бўласан.

Бегинг мамнун ишдан, ўзидан,
Гоҳ сархуш, гоҳ хушёр келади.
Бир кун... унинг тўрхалтасида
Тўрт донами анор келади:
Ўқтин-ўқтин беҳол бўласан,
Сен бир бахтли аёл бўласан.

Унутасан заҳил рангингни,
Тўлишасан, ғамларинг кетар.
Баъзан тонглар орзуларингни
Тебратади бешиктебратар.
Тағин соҳибжамол бўласан,
Сен бир бахтли аёл бўласан.

Гулга кўмар бир гўдак даҳо
Умрингни бўш кўчаларини...
Мен ҳам сева биларманми, о,
Унинг жажжи қўлчаларини?
Унда такрор аён бўласан,
Сен бир бахтли аёл бўласан.

Бахт шу сенга – тинч бўлур жонинг,
Юпатишмас, бу – вақт шиори.
Бахтдир сенга Ўзбекистоннинг
Ёзи, кузи... биринчи қори.
Ўзинг бахтга тимсол бўласан,
Сен бир бахтли аёл бўласан!

Тугамайди ҳаёт эртагинг,
Кўп йилларни тилаб яшайди.
Умр бўйи масрур эркагинг
Сочларингни силаб яшайди!..
Сен бир бахтли аёл бўласан,
Менинг учун хаёл бўласан.

1981

Мирзо Кенжабек

@m_kenjabek |instagram | youtube