اجيتك بربعينك روحي نحلانة
واشكيلك يخوية عالجرة ويانة

يم گبرك وصلت والطم الهامة
وروحي لشوفتك يبن امي محتامة
خليني اشتكي من الشام والامة
اجيتك ذابلة وامتوني ورمانة

من يوم الخذونة ورحنة بالگوة
شفنة الظيم واللوعات والبلوة
من سوط الشمر الايتام تتلوة
وحفاي بطريق الشوك مشانة

ابحر الشمس ياخوية مشونة
وكلساعة يبوسكينة يضربونة
ومن نبجي عليكم مايخلونة
وعد جتالكم يبن امي ودانة

گابلنة اللعين امجلسة وشفناه
گبال الناس يشتم بيكم اسمعناه
بخرابة گعدونة وياحسافة واه
ورقية اهناك فزت بيك حلمانة

بتك رادت اتشوفك يواليها
تبجي ويسمع الظالم بواجيها
گلهم راس ابوهة خلة بيديها
ولمن شافتة ماتت الوجعانة

بالغربة ادفنتها ابلا عزة وعيلة
كلها امذبحة وماعندي الاشكيلة
وهاي انة اجيتك يالولي انحيلة
من گبرك دگوم اگعد تلگانة

تلگاني يخوية وگلي اشلونج
وشمسوي البجي ياخوية بعيونج
انشدني يغالي اشصاير ابلونج
هد حيلي السبي وامرافگ اعدانة

فرگاكم يبو اليمة شعمل بية
خلاني يبعد اعيوني محنية
اگعد يالولي نتسامر اشوية
لصوتك يالحنين اهواي لهفانة

بقلم✍خادمة تراب الزهراء(ع) الكربلائية فاطمة علي صالح الحلفي
غير برئ الذمة امام الله والزهراء من يحذف الاسم والرابط او يأخذ من القصائد وينسبها له
https://t.me/fatimaalialhilfy

قناة اليوتيوب
https://youtube.com/@um_hasan_f

قصيدة للامام السجاد عليه السلام

اه يالوعة مصابي شلون اهيد
ولسة اذكر والدي الذبحوه شهيد

والله ماانسة الجرة بطف كربلة
من بقة المظلوم ما واحد الة
وذبحتة الگوم وبقة بحر الفلة
من القفا ياناس گطعولة الوريد

شفتة ذاك اليوم مرمي عالثرة
وجثتة بحر الشمس متوذرة
اضلوع صدرة ويلي كلهة مكسرة
منة ماسالم ضلع لاحتى ايد

حتى من ايدة اگطعولة اصبعة
الخنصر الضاع ابفجيعة مصرعة
من رحتلة وجسمة بيدية اجمعة
ابقيت ادگ عالراس وبوني ازيد

مصايب المرت علية مو قليل
من خذونة لليسر وانة عليل
گبالي ركبو عمتي فوگ الهزيل
ومن دخلنة لمجلس الطاغي يزيد

هالاجاني الموت وانة ابياوضع
حسرة خنگتني وعمة عيوني الدمع
مانسيت احسين من ظل منصرع
ولانسيت اهلي واخوتي والعضيد

اخ منك يازمان شهالمحن
ماسلم منك بزر ام الحسن
شگد مصايب علة العترة تكاثرن
عتاب وي هذا الزمن لامايفيد

بقلم✍خادمة تراب الزهراء(ع) الكربلائية فاطمة علي صالح الحلفي
غير برئ الذمة امام الله والزهراء من يحذف الاسم والرابط او يأخذ من القصائد وينسبها له
https://t.me/fatimaalialhilfy

قناة اليوتيوب
https://youtube.com/@um_hasan_f

نعي للامام السجاد"ع"
❥❥ـــــــــــــ❁❂❁❂❁❂❁ـــــــــــــ❥❥
گضه العمر بالهم والاحزان
يبچي عالغريب المات عطشان
واللعبت عليه الخيل ميدان

يتذكر ابو وشلون موتة
وشلون شاهد ذبح اخوتة
واويلي عليهم هذا صوتة

الله يساعدة دلالة ذايب
من طف كربلة شاف المصايب
ماخلت اهل يمة وحبايب

كل اهلة گضو بالغاضرية
گطعو روسهم عدوان امية
ياعظم المصيبة والرزية

فوگ الجرة سمو العدوان
واتگطع دليلة وحيلة خلصان
عمت عين الدهر ياناس خوان

ملتمة بنينة اعليه تودعة
والباقر يصيح ويجري دمعة
فجعانة مصابة اشلون فجعة

ودع بنينة وغمض العين
وراح ومنفطر دلالة نصين
ونو اعليه. وابچو يامحبين

لمصابة ونو ولطمو الهام
وعازو عيلتة باحزان والام
مارحمت ابحالة الگوم ظلام
❥❥ـــــــــــــ❁❂❁❂❁❂❁ـــــــــــــ❥❥
بقلم✍خادمة تراب الزهراء(ع) الكربلائية فاطمة علي صالح الحلفي
واسألكم الدعاء والفاتحة لروح جدي وامواتكم ودعواكم لي بالنجاح والموفقية
غير برئ الذمة امام الله والزهراء من يحذف الاسم والرابط
https://t.me/fatimaalialhilfy