موشحات مولد البضعة الطاهره فاطمة الزهراء عليها السلام

بصلاتي اعلى النبي اشفاهي اوضيها
قبل أسم الطهر فاطم يمر بيها
ويمن تسمع ذكر لزهرا طاريها
صلاتك لازم اعليها تعليها

رحمه بمولدچ ياحره تتنزل
يمن بيچ الرسل للباري تتوسل
اجينا يا ام حسن هالليله اونسأل
وكل صعبه بصلاة اعليچ تتذلل

حسن الناصر
1445هـ

(ذلك ومن يعظم شعائر الله فإنها من تقوى القلوب)
مولد سيدتي ومولاتي فاطمة الزهراء عليها السلام
-------

الله الـعـالـم بـفـاطـم وسِرها
فـاز الحَـبـها مـن گلـبه وسَرها
أعلن فرحتي الليله وما أسرها
بـمـولـد بـضـعـة الـهـادي الـزچـيّـه

-------

لـو لـفَّـيـت هـالـعـالـم ودُوره
وعن أطيب نسـل أبحث وادَوْرَه
مـايـحـيـر الـفـكـر بـيَّـه ودُورَه
غـيـر الـزهـره مـاكـو بـالـبـريّـه

حسن الناصر
1444هـ

(ذلك ومن يعظم شعائر الله فإنها من تقوى القلوب)
مولد سيدتي ومولاتي فاطمة الزهراء عليها السلام
-------

ياهلا بمولد الزهره يا هلا
ياهلا بمولد الزهره يا هلا

شيعه خلوني اقلكم هالخبر
نور من سابع سما لينا ظهر
زهرة الكونين وبت خير البشر
انْولدت ابِّيت الطهاره والعلا

نهنِّي امها اليوم ويْ بوها النبي
نفرح و ما يهمنا أبداً نَّاصبي
والفرح هذا اعتقادي ومذهبي
كل عملنا اليوم احنا انْعَطّلَه

بْمولدچ يافاطمه نعمل حفل
انتي حبل الله يازهره المتصل
بسمچ الدعوه يا حره تنقبل
يبرى كل معلول بسمچ من بلا

نلهج احنا اليوم بسم الطاهره
فاطمه يافاطمه احنا ترى
نبگى خدامچ يا تاج المفخره
للمنيه هالعهد ما نْبدّله

الدنيا مليانه فرح ويَّا سرور
نور فاطم ياخلق ما مثله نور
هذي هيَّه أم الحسن ام البدور
زوجة الكرار عالي المنزله

عدنا دعوه اليوم يارب العباد
بْكل سنه هالفرحه لينا هم تعاد
ويا مهدينا الفرح في كل بلاد
ابطلعته تبقى السعاده مْكمّلَه

ويّا مهدينا ونبني لچ ضريح
مع گبَّه امْذهّبَه و صحنٍ فسيح
او بالصّحن لمّن نجي له و نستريح
تنجلي عنّا بعد كل مُعْضِلَه

حسن الناصر
١٤٤٤هـ

(ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ)
في ذكرى وفاة السيدة أم البنين (عليها السلام)
-------------------
أم البنين محبّين نعاهد بالدمه
طول السنين للحسين نضحّي ونخدمه

بالقمر بوفاضل ورايته وچفوفه
ماتمچ يالحرّه احنا لا ما نعوفه
لو قست دنيانه والدهر وصروفه
نعتني لچ وانتي بالكرم معروفه

اهل للجود ومانعود نحصّل مكرمه
طول السنين للحسين نضحّي ونخدمه

الفاتحه لچ نقرأ و بصفاء النيّه
واللي يخلص لله حاجته مقضيّه
ما تردي خادم يقرا لچ مرثيّه
واليجي للماتم يخدمچ يوميّه

ما يملّون يخدمون يا تاج الغانمه
طول السنين للحسين نضحّي و نخدمه

منّچ اتعلمنا التضحيّه للوالي
والذي نمتلكه نرخصه للغالي
واحنا يا مولاتي بالعدى ماْانبالي
ثابتين اوياكم اوّل اوبالتّالي

غيره واحساس اوعباس عهدنا نسلّمه
طول السنين للحسين نضحّي ونخدمه

أربعه اولادچ للحرب جبتيهم
واعلى خيهم دايم چنتي توصّيهم
ذولا همَّ ابنينچ بالحرب شوفيهم
رافعين الرايه بو الحمى مربيهم

أربع سيوف بالطفوف وفوا يالعالمه
طول السنين للحسين نضحّي و نخدمه

ساميه غايتنا نرضي السادتنا
الوالده ربّتنا بالنعي ناغتنا
بوعلي والينا لخدمته عدتنا
وشكثر عالماتم هيّه هم وصتنا

رفعة الرّوس والدروس محبة فاطمه
طول السنين للحسين نضحّي ونخدمه

قسم نقسم كلنا ما نعوف الخدمه
بالعزا اتشوفينا شيعتچ ملتمّه
واليحبكم والله ناذر إلكم دمّه
من خدمكم لاشك توصّلونه القمّه

ابخدمة حسين نقر عين اوننال المرحمه
طول السنين للحسين نضحّي ونخدمه

نسأل امن الباري نوصلچ مشّايه
حيدريّه اوبسمچ تنعقد لقرايه
اوبالدرب تتوالى رايه ابصف رايه
امسجّلين اعليها شيعتچ وفّايه

نقصد ابآه اويلاه اوقبرچ نلثمه
طول السنين للحسين نضحّي ونخدمه

اوهالطلب يالحرّه منّچ اتمنّينه
متى نقصد كلنا ازياره حق بواسكينه
نعتني للحضره والعلم بيدينه
اوتالي نقصد للي قطّعوا چفّينه

نزحف انروح اوبالنّوح تضجّ ارض اوسما
طول السنين للحسين نضحّي ونخدمه

باقي بس هالطلبه والمهج مفطوره
متى يطلع لينا حجة الله اونوره
بلا الدنيا ايكشفه عن الشيعه اوجوره
اوندل قبر الزّهره هالتي معصوره

المهدي نتناه او ويّاه سعاده دائمه
طول السنين للحسين نضحّي ونخدمه

نال شرف النظم :
سجاد العديل
ناصر الخميس
حسن الناصر

1446هـ

(ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ)
وفاة السيدة أم البنين عليها السلام
-------------
يمه يا أم البنين يمه يا أم البنين

بُوصف الحال وانادي يمَّه يم الأربعه
آنا بوفاضل اوليدچ باسي حيدر منبعه
من نوى ايْسير ابْعياله حسين ابن الشافعه
حارس ابْعيني المحامل وزينب بيَّه تستعين

الغاضريَّه من وصلنا شلت رايه باليمين
تقدموا صَحبَه امامي و للمنيَّه گاصدين
هذا ضارب هذا طاعن هذا سيفه ما يلين
وفاضت أرواح الكرامه لجل بواليمه الحسين

أحمي يا يمه المخيّم وأسگي الاطفال ابْعجل
أجلي ابْسيفي الأعادي ومن دنى جاله الأجل
ما يهمني كم عددهم كلهم ابْخوف و وجل
بهيبة الكرار بويه منِّي فروا هاربين

من تصيح اسكينه عمِّي ماي عطشانه أريد
بيدي حامل للّوا والعدى كلها أبيد
واعلى تربيتـﭻ يايمه ما ارتشف قبل العضيد
وأگلب الحومه برجوعي وعزمي حاشه مايلين

بالغدر گطعوا يميني و سيفي شلته باليسار
أذبّح و ثابت يقيني چني بويه ابْذُو الفقار
حتى من قطعوا يساري صرت اشعر بنتصار
كل شي قدَّمْت لإمامي ذاك بن طه الأمين

عيني صابوها ابسهم وهمي أوصَل للخيم
ماي اوصِّل للطفل بعطش لايموت وألم
وسفه هالماي انْحدر صابوا الگربه ابْسهم
وطحت عالغبره بجراحي وانده الخويه بحنين

ابْيوم عاشور الظهيره خويه وحده ابْكربلا
حتى طفله فوق صدره گطع نحره حرمله
ودَّع الحوره وگصد لعد مهرا و اعْتلى
خاض فصفوف الاعادي بحجر صابوا له الجبين

ليت گلبي ابْدال گلبه تصوَّب ابْسهم الرجس
ليت صدري ابْدال صدره ابْخيل گوَّه ينرفس
الف مره يِگَص نحري و نحره لا ما ينلمس
لكن اشْبيدي يا وسفَه وروحي طلعت بالأنين

وزادت الحسره عليَّه تنضرب بنت النبي
من بعد عز العقيله فوگ هزّل تنسبي
شبعت اهيا امن المذله و يامر اعليها أجنبي
من بعد ظلِّي المصونه تنشتم منّ اللعين

وسفه هالموقف اقلـّﭻ آنا يا يمه اعتذر
راحت الحره سبيّه امگيّده ابْحبل الأسر
زينب ونادت عليّه خويه ليَّه ما تْحَضر
يمه ودِّي جاوبتها ابْحالي إنتِ تعلمين

حسن الناصر
1444هـ

(ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ)
وفاة السيدة أم البنين عليها السلام
----------------
سلام الله على الضحت بالبنين
سلام الله على حبيبت حسين

سلام الله على ام النجابه
سلام الله على سر الإجابه
سلام الله على ذيچ المهابه
الحوايج تنقضي عند ام البنين

سلام الله على الواست الزهره
تبچي المنقطع بالسيف نحره
و خيل الداسته و كسَّرت صدره
مرمي عالترب من غير تچفين

سلام الله على ام الفضايل
سلام الله على حل المشاكل
سلام الله على الجابت الكافل
يحمي هالخيم ويا النساوين

سلام الله على بوالغيره عباس
سلام الله على صاحب النوماس
سلام الله على المامثله بالناس
لحق خيَّه فِدَى راسه و اليدين

سلام الله على ايمينه و شماله
سلام الله على جوده و جماله
سلام الله على كل جرح جاله
راسه منفضخ بالعمد نصين

سلام الله على الظلت تنادي
يا بواليمه إلك أفدي أولادي
حزينه و الدمع بالخد بادي
ظلت تنتحب تنعاه كل حين

سلام الله على الشاركت زينب
سلام الله على الويَّاها تنحب
على ذاك الخدر هاللي تسّلب
وعلى ادخول العقيله بالدواوين

سلام الله على مشجونة الحال
سلام الله على مشغولة البال
سلام الله على التبحث بالاطفال
رقيه مالقت والدمعه صوبين

سلام الله على قبرچ الطاهر
سلام الله على قلبچ الصابر
سلام الله على دمعچ الهامر
على بابچ ياحره كلنا تدرين

حسن الناصر
1444هـ

(ذلك ومن يعظم شعائر الله فإنها من تقوى القلوب)
فرحة فاطمة الزهراء عليها السلام
--------

الله الـعـالـم بـفـاطـم وسِرها
فـاز الحَـبـها مـن گلـبه وسَرها
أعلن فرحتي الليله وما أسرها
بفرحة بـضـعـة الـهـادي الـزچـيّـه

-------

لـو لـفَّـيـت هـالـعـالـم ودُوره
وعن أطيب نسـل أبحث وادَوْرَه
مـايـحـيـر الـفـكـر بـيَّـه ودُورَه
غـيـر الـزهـره مـاكـو بـالـبـريّـه

حسن الناصر
1444هـ

(ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ)
في استشهاد الإمام الحسن العسكري عليه السلام
-------------
للعسكري في هاليوم هذا العزا امسوّينه

نلطم اعلى الصدر قوّه اوما نسينا امصيبته
اوندري المهدي ولينا ذب ياويلي اعمامته
يلطم اعلى الرّاس اوينحب بويه مردوا چبدته
بويه ما رحموه الاعادي وافجعوها امّيمته

وسط العزا نشوفه حاسر وسف مهدينا

يظل مولانا مصابك بينا يسعر چالجمر
مثل ما چبدك يويلي يسعر ابسم الغدر
نذكر احنا اللي جرى لك والمدامع تنهمر
تعذّبت وانت ابشبابك وانقصف منك العمر

افراقك ولينا يفجع سهم الدهر چاوينه

جسمك الطاهر تغسل بعد ما العمر انختم
وعلى جسمك يا امامي صلّى مهدينا بألم
ويلي عاللي ماتغسّل ابو الغيره والشيم
بالجراح امتلى جسمه وقلبه مشلوع بسهم

وبكل حقد هالجمّال ويلي قطع چفّينه

يبومحمّد يا ولينا سلم منّك هالجسد
ما إجا طاغي يويلي وابنعل صدرك صعد
كبّك اعلى الوجه قوّه اوقطّع المنحر بعد
مثل بواليمّه ياوسفه ابخيله داسه بن سعد

جسم ابواسكينه بالقاع خيل العدا امطشرينه

يمتى مهدينا نشوفه وراية الحق ترتفع
نسمع الصرخه تدوي ويمه كلنا نجتمع
ناخذ ابثار الايمه ويه ثارات الضلع
نقلّه ما انهاب المنيه هالعهد منا استمع

بدم النحر يمولاي هذا الشرف شارينه

تحت ايدك يا امامي كلنا جند امجنّده
نقسم بهيبة محمد قلب فاطم نسعده
وكل عدو ليكم ياغالي بالتراب انوسّده
وننتظر بس امر منّك فقط انت تحدّده

يمتى يجينا هاليوم والله شكثر تانينه

سجاد العديل
حسن الناصر
1446هـ

ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ)
في استشهاد الامام الحسن العسكري عليه السلام
-------------
آه على امصاب الحسن

فاطمه الزهره تصيح
قلبي لوليدي جريح
الليله بفراشه طريح
لو وقف يهوي ويطيح

شاف المآسي والمحن
آه على امصاب الحسن

وردة شبابه اتذبلت
الشيعه لمصابه ولولت
ولجله البواچي اعتلت
سامره حزن تحولت

مسموم ضنوة بوالحسن
آه على امصاب الحسن

الاملاك لجله لاطمه
ماجور ياحمي الحمه
تنادي الارض ويه السمه
مأجوره يا فاطمه

جينا نواسي ام الحسن
آه على امصاب الحسن

هذي العدى ماخلته
مرّات هيه سجنته
تالي بحقدها سمته
فجعوا عليه اميمته

في غربه وابعيد الوطن
آه على امصاب الحسن

جينا نواسي المنتظر
قلبه على ابوه انفطر
غمض عيونه واحتظر
عزو النبي خير البشر

هالليله احداد وشجن
آه على امصاب الحسن

حسن الناصر
1446هـ

(ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ)
في ذكرى استشهاد الامام الحسن العسكري(عليه السلام)
-------------------
شوصّيت المهدي يالغالي يبن الاطهار
أتصوّر بالعبره اتنادي لحسين الثار
الحشى ذايب بالسموم    وتحن ويلي يامظلوم
يالمهدي الثار يالمهدي الثار

انسقيت السم يامولانا وسرى بجسمك
وتغيّر لونك وهالسم مرد چبدك
والمهدي يهل دمعه قعد يمّك
و بجبينك يقّبلك وبألم ضمّك

ابترحل عنّه وعمره خمسة اعوام
وعيونه ماشبعت منّك يبقى بآلام
انفطر قلبه بالهموم    وتحن ويلي يامظلوم
يالمهدي الثار يالمهدي الثار

مواريث الامامه المهدي اودعته
وامانه شقد عظيمه امن الله حمّلته
ثار حسين هاللي حزوا ارقبته
وخيول اللي عاري رضضو جثته

مذبوح بغربه بواليمه وماذاق الماي
ومفجوعه اوخيته وتقلّه انهض ياحماي
ضرب نلقى من القوم    وتحن ويلي يامظلوم
يالمهدي الثار يالمهدي الثار

وصّيته ابوگت جفنك تغمضنّه
يغسلنّك و يكرم جسمك بدفنه
آه اعلى ابواليمه والف ونّه
الظل عريان وابنه ابَّاريه ايچفنه

جمّع اوصاله بوالباقر وادموعه اتسيل
كل ما يرفع جانب منه جانب ايميل
سابح جسمه بالدموم   وتحن ويلي يامظلوم
يالمهدي الثار يالمهدي الثار

اكو اوصيّه لا تنساها يا بومحمد
للنصره ياخذنا ويده تنمد
مهدينا وعن أمره مانتمرّد
النفس نبذل وحق طه النبي احمد

ناخذ ثار احسين وصحبه منّ الظلّام
ناخذ ثار الحورا زينب ويّه الايتام
بإشاره منّك انقوم     وتحن ويلي يامظلوم
يالمهدي الثار يالمهدي الثار

طال اغيابه المهدي ويزيد الشوق
ويذبح عاشقه لو يبعد المعشوق
الفتن حاطت علينا چنها اضيق طوق
الضماير تنشرى وتنباع چنها بسوق

والماحصّن دينه ونفسه سهل التضليل
شيعه خلونا للقائم ندعوا التعجيل
نظل ندعي له كل يوم    وتحن ويلي يامظلوم
يالمهدي الثار يالمهدي الثار

حسن الناصر
1445هـ