بلكي الله طارش من اهلي يوصل
وين الله تفرج ولوحدي مااضل
بلكي قميص حسين يجيبه..... مو لعيوني!! فراگة نهيبه
..................................................................
ردت اروح وما خذوني والعثر حضه يموت
والتگع بأسر المتانه شبيدها غير السكوت
عگب ابوي البيت وحشه منين ما اصدلها اخاف
الحايط الشايل عباته صار رزق العنكبوت

ما گالولي....... ولا صاحولي
ساعتها انهد حيل عيوني
وضليت اصرخ بويه اخذوني
مجان وياهم ما حسبولي

من صار الغروب صار الضوه دموع
جا هو الحسين تسد وحشته شموع
اني الجارح كلبي طبيبه ......مو لعيوني فراگه نهيبه
........................................................................
بين جفه وحلم گلبي ماتت شگد امنيات
بحضن ابوي امنيتي اغفه حالي من حال البنات
مثل روج البحر حزني ابد ما لاحه الركود
جنت ابات بسد حنانه وهسه مهضومة ابات

كلشي اتحمل..... كلشي اتقبل
بس وياهم كون محمله
حتلو اصعد فوگ الهزله
ما كلفهم حتى بمحمل

وي حرمل الدار كلبي حرگته
يمتى ابو البيت يفگدها بنته
المن عايف طفله غريبه.... مو لعيوني فراگة نهيبه
...............................................................
گمت اركض بلكي اصلهم بحجة المروا سراب
السجه من يضيع اثرها ما توصل لصواب
واليحط ايده اعله خده ويبقه ينطر بدروب
يضيع مثل الندى الغابش من يلاگيه الضباب

لساني تردد....... ما ضل احد
گمت اركض بلكي الحگ بيهم
جا غير حنان اهلي ادريهم
بلكي اكسر خاطرهم واصعد

لملمت الثياب ومحضرة دواي
بس مال اضل هيج ما حاسبة لهاي
گلبي سهام الصدمة تصيبه..... مو لعيوني فراگة نهيبه
...........................................................
وحشة الحيطان تكتل والغروب يريد حيل
بطارف عيوني دمعتي وگلبي يتوجه اعله ويل
بطيف من مر بيه الأكبر وجايب وياه محملي
فزيت وهدومي جمعتهن ويامن يخلص الليل

امنيتي زغيره........ وانه بحيره
من الليل امحضرتها هدومي
بلكي اسمع للمحل گومي
المن ضلتي بهاي الديره

گلتلهم اشلون حالي يتدهور
سوولي جاره وعوفولي الاكبر
قصة كلبي قصه عجيبه.... مو لعيوني فراگة نهيبه
..........................................................
أشد من علتي وألمها جان ضيم الانتضار
واني اصبر روحي كوه وادري بالدنيا اختبار
أخضر ويابس تحركة النار مكروه لسان
عش على الشجره امنياتي وجيب اليطَفيي النار

كل آلامي........ من اوهامي
جنت اتخيل تفرح عيني
وعمي العباس يداريني
خيط الضلمة يگود احلامي

راح ابقه اتاني يم عتبة الباب
بريتي طبع صار تشتم بالثياب
شماله احساسي يكلي مصيبه...... مو لعيوني فراگة نهيبه
.................................................................
مرتضى عامر الشمري

يآ كَربلا ماذا جَرىٰ
ضَيفٌ بكِ لَم يُنصرا
ما هٰكذا الظَنُ بكِ
هذا حُسينٌ بالعَرىٰ

اشگال گلبج كربلا
خليتي ابو اليمة بفلا...... ودايرته الخيول
يا كربلا شنهو العذر
رد للخيم خالي المهر ...... گلب اخته شيكول

فوك الصحاري.. ضل جسمه عاري
اشلون المصيبه تهون
الهضمة الجبيره.... تلمة الحصيره
هذا ابن سيد الكون
...................................................................
لمَ الفراتُ جآرِيا
وَذا حُسيناً ضّاميا
مآ حَنَ قَلبٌ عِندكِ
كَيفَ الحُسينُ عاريا

يا كربلا شعندج گلب...... خليتي ابو اليمه بغرب
ما مش غطه اعلي
بعد الذبح ضيم اليجي.... يسحك على صدره اعوجي
ومحد يباري

ع الغبره جسمة... محد يلمة
وازها زينب ليل
صابتها خوفه... تلمة تعوفه
خافن تهد الخيل
.....................................................................
وصُبْحُكِ كَم جآرحُ
فَكَيفَ حُزني يَبرحُ
يآ كَربلا أعييّتني
مآ ذَنبُ طفلٍ يُذبحُ

اهتز كلبه جن هزة سعف... لمن حليب امة نشف
وفرفح على الماي
ما صايره بواحد قبل....... ست أشهر يذبحه النبل
ما تنعقل هاي

شيفك حزنها.... الميت ابنها
صعبه بعد ترتاح
ضل مهده خالي.... بس لا تبالي
تلوليه فوك رماح
........................................................
فِي بَحرُ فِكري غارقُ
كَيفَ الخِيامُ تُحرَقُ
أينَ تلوذُ زَينبا
وأيُ بابٍ تَطرِقُ

الما طالعه بغير الكفل...... اهنا بده بيها الخجل
من شبت النار
تضل بالخيم كلش صعب..... وبس تطلع تلاكي الغرب
للحيره اثار

ليل وضلامة... وكَثره الليتامة
زينب بعد شتصير
يهود حزنها.... لا ما اضنها
جا حكها من تحير
................................................................
ذاكَ العجابُ الاَعجَبُ
فَوقَ التِلالُ زينبُ
مَنْ ذا يُراعي قَلبُها
وأهلُها قَدْ خُضِبُ

يا كربلا هنا بت علي...... لحكوا تنادي ياهلي
وما تلكة عوان
والخيل غارت ع الخيم....... وما هو شيال العلم
والحومة دخان

ليل ومصيبه... وزينب غريبه
خوف وبواجي ايتام
ما عدها خيمة..... والدنيا هيمة
ومدري الزمان شضام
................................................................
مرتضى عامر الشمري

عمه يا علي...
روحي بأمانة شيبتك..... احسبني سبب من علتك
داويني بالآه
عمة يا علي....
غسلني اقرالي جرح...... ماي بثواب المنذبح
المتفطره شفاه

غطي عيوني بالرايه أثر عباس بعيوني
بهيده بلحدي نزلني اخافن تلجم متوني

وحشه الجنازه عمه بلايه هلي... ولا كافلي... يشيل النعش
الغربه خذت عيوني لطف كربلا.. والمعضله.. نفس العطش

وجهني اعله كربلا حن گلبي لدلال
غمض عيني خل اموت وانسه شوغة الحبال
الموت أهون من الهزل ما خلت عليه حال
................................................................
عمة يا علي...
بالطف كسرني الاعوجي... وهنا كسرني الما يجي
لدفنة اخيته
عمة يا علي...
مشدوه عيني اعله الدرب... بلكت اخو يبرد للكلب
وينعة اعله ميته

شريج بعمري صار النوح كل ليله احنه نتلاگة
مثل ملاگة راس حسين وي بنته عله الناگة

ما بيه عالهضيمة عمه كلبي ارتعش.. غطي النعش.. لا ينكشف
خزتنه عمة عين الوادم قبل.. شام النذل... ما بي عرف

يا عازة متن هلي يشيل جنازة العفاف
متن حسيني لو حضر من يا غربه انه اخاف
سنين الخير إذا كضن شيخصلهن العجاف
..................................................................
عمة يا علي....
لو مروا الليله اخوّوتي......... كلهم سببها موتتي
من جرح الفراگ
عمه يا علي....
لمن يشيلون النعش...... كلهم گلب زينب عطش
للملگة مشتاگ

يمتى تغيب شمس الضيم واتلاگة انه واخواني
اريد اشكيلهم ع الشام واگلهم حيل اذاني

وازاني عمة شوگي لجف اخوتي.. يا غربتي.. بلايه اهل
جلمة غريبة عني عمة انحجت. انطيني بخت.. وين الكة حل

غير اليحتضر يريد ولده منگبه وتون
وانه ابني العطش خذاه حزن مرادف بحزن
هنا عازة اخو الجبير يبجي يبلل الردن
.................................................................
عمة يا علي...
ماله دوه هذا الجرح.... التتصابح عيونه برمح
ويمسي بحبال
عمة يا علي .....
من فكري ما راح الرعب.... بليل وخرايبهم نطب
ما ينسه الحال

ما عندي عرف بالشام عرفي باگته الهيمة
من اذكر قصرهم ذاك كلبي يحن عله الخيمة

ذيج الخرابه ظلمة بلايه ضوه.. وحشه الهوه.. يمر ع الخدر
سوگ وتطبله زينب هذا كلف.. ما ينوصف.. هذا الكسر

مو هينه اخت ابو الفضل تبات بلايه في علم
شكد بكربلا السهام بس الغربه أشد سهم
وكلما عاينت ضلام اذكر وحشة الخيم
.......................................................
عمه يا علي.....
اتحمله اتراب الگبر..... ولا احمل سياط الشمر
وعيون الاجناب
من الناگة اشوه حفرتي.... محد يشاهد غربتي
لو ظمني التراب

تمنيت اهلي عد راسي يا عازة هلي عازه
منگب واكف العباس واخوتي لنعشي جنازه

من يعتك الجرح يطيب بلايه أثر.. وانة كبر.. جرحي الندي
شام وهلاهل وطبلها اتحسهه.. ما ينسه.. ولوحدي

لياحد ابقه بالعناء غريبة وما إلي ولي
الغربه ابلغ من الخيول لزينب لحكو يا هلي
متني اسود من العباه كلبي بغربه مبتلي
...............................................
مرتضى عامر الشمري

شوكت اصحه.....
ويمتى اصير انسان واعي
وافتهم حگ العليه
وليش محطوط الصواع بنص متاعي
انته داعيت بحقوقي بوكت صنته
واني نكراني لجزائك ماله داعي
وجم قطيع ذنوب عدي وسارح بأخضر جميلك
ومن وره خشمي اسلم وانه راعي
وقدرتني وگتلي هاك الگاع وافلح
ولا تحط اشواك بيها!!!
خافن تأذي بناتي
ما اكو مثلك......
اعله گد نيتي احبك وانته منطيني اعله گد واهس رحمتك
كون فكري يصير عاجر
ولا يجيب افكار ما بيها خدمتك
يأول حب عليك عيوني تتوازه
من هزة المهد حد شيل الجنازه
بخدمتك سيدي انهابيت
تنهاب العصي من تصير عكازه
شوكت اصحه....
ويمتى اعيش بوجه واحد وانزع ثياب التردي
امنيتي الگة بگلبك مجان اعله گدي
ساومتني الدنيا بأنواع المفاتن
واني گلت لنفسي ردي
يضيع عمري ولا يضيعن ماي وجهي
مو شرف من يعله صيتي... وتدنه نفسي اعله المفاخر
الشرف من اذبح ال آنه (أنا) بضميري
من اگل لروحي وي حسين سيري
فرق بين الينتضر والراح يسعى
وعلى الخدمة ما اساوم بجلمة ال الله كريم
حتى عزة نفسي اذبها وگعد بصحنك اجدي
وعلى جرحك ما اجامل انه هيج انسان حدي
لجن تقصيري اتجاهك ماله حد شوكت عين امالك بفعلي اكحل
سيدي بخدامك الناس اتنومس اعذرني مولاي انه افشل
شوكت اصحه.....
هاي دنيا الينطي ياخذ
واني ماخذها اعله گد طينة فطرتي
اني اسف..
هسه مولاي استحيت وگفت بعيني غلطتي
اني ما قدرت زادك
يا فشلتي..
بجرحك ولا مره مهتم اني كل همي بسمعتي
واعله رازونه غفلتي داورت شمس الزوال
حتى موعد ذنبي خلص واني بيه الشك تماده
وما ثبت عدي الهلال
عايف الدنيا واجيتك مال اعوفك لا محال
حاشى جا يطردني جفك وانته ابو گلب الجبير
لامنه بواسع حنانك وانته لموك بحصير
انته عابر كل سبيل.... الخيل ما كدرت تعبرك
ومثل طبع الورد نحرك.. منكطع ويفوح عطرك
انته فاعل بالرمح مرفوع راسه
والفعل ما ناسب اجواء القداسه
ولن ضمير الماي غايب
جان تقديره عطش بشفاف اليتامه
الماي ناهب بالطفوف احله ابتسامه
بحكم ري انباعت هناك المروءه
والدنيئه انفوسهم سلبو عمامه
وكلشي طاح بطيحتك حتى الخيام
وكلشي سلبو من خيامك حتى ثوبك حتى قرأن الاله
لجن عجزوا سيدي يسلبون من عدكم كرامه
هذا نهجك واضح ليوم القيامة
خلكك اطول من رمحهم
ناس عميه وبالخساره انطوا ربحهم
وهذا اني شكد جرحتك
وكلبي ما صافي اعله راي
يوم احبك يوم اتعبك
كاعي صبخه وما توالم عذب كلبك
امنيتي اقدم شي يعجبك
ارئف بحالي وشبابي وانته مشيني اعله عرفك
وهيئ لعيني سبيل من المدامع
وبالنهايه انطيني جفك
خاف اصير ابدون جاره...
بماي كصتي خاف اساوم من اجل حكم الاماره
موقف يبيض الوجه ما عدي يمك
قدرتني ولبستني ثياب خدمة
النعم ينرادلها احترام
من اجل احضى بغنايم واكف بصف الأَمام
هي هاي الغفله هاي
دللتني ودللتني لحد ما اني نسيت انته امام
مو بديه بكلبي رجفه!!!
خاف اذبل بالنهايه اسكيني رئفه
الها حوبه دموعي يمك والالم ما جان صدفه
يمن ما تيهك حافر باجر لا تتيهني
بالحشر كلمن وعرفه
...................................................................
مرتضى عامر الشمري

بكلشي قابل.....
انته فصل وانه البس ولا تذبني بوسط حيره
حسين هنتلله بشبابي وعني وجهك لا تديره 
ارد اخيط فتگ ذنبي واصلح عيوبي الغزيره
وعله ضفاف اجروحك امشي هلبت اتلاكة بحصيره

القلق لحدوده عابر..... وانه يا مولاي حاير
خاف انطي احجايه واطلع موش كدها
هاي جلمة بخت صعبة....... تريد واحد ينطي گلبه
عگده وبماي الوجه مربوط حلها

حبر ذنوبي مغطي أوراقي
وما ادري انه بعمري شباقي
بلكي الله يفك اسر دموعي
وابجي لجرحك من اافاقي
(مولاي... هل من توبه)
.........................................................................
ما اكو مثلك....
تفك صدرك انته اليه وذنبي اشبه بالحوافر
لو نشف نهر الندامة مالهن داعي الگناطر
رايح وراد اعله دربك طبع جن طبع المناشر
خاف اخون الملح وانسى وكلبي وي غيرك يعاشر

اني ما ثابت مجاني..... يوم احبك يوم اعاني
انه موش ابنادم الگلبك يريده
مرة اقبل مرة ادبر..... وبالفرص يوميه اهدر
وقافلة حزني عن دروبك بعيده

التوبه التوبه وما تتكرر
وراح انطيك حجايه اتغير
وصفحه جديده ابديها بحبك
ما اريد اكضي ايامي اتعذر
..............................................................
والله فشله...
مستحي مولاي هسه وكصتي متروسه بفشلتي
بفاس حبك راح اكسر  صنم لذاتي وغفلتي
دورت صيت بجروحك واعترف هذي غلطتي
اخ لو معتني بجرحك مثل ما همي بسمعتي

قصرت ادري اتجاهك..... لا تأدبني بجفائك
وخاف اطيح ابنار ما ترحم ضياعي
يمتى اقدم دمعي ديه..... وافتهم حگ العليه
وليش محطوط الصواع بنص متاعي

يا اول خير يمر بيه
بغير ايدك ما حط ايديه
الله يطول خلگ عيوني
وابقه ابجيلك يابو رقيه
.............................................................
اني اسف...
الصعبه من يصحه ضميري والكة روحي مأذي كلبك
يا خسارة ماي وجهي ما عرفت اشلون احبك
يستفزني الذنب واصحه والكة روحي بغير دربك
وللاسياد الخدم راحة اعذرني مولاي انه اتعبك

حاسبتني الناس قدوه..... وذنبي اسود والله بلوه
وتدري بيه وانته بيدك ضام سري
بالشدد اطلب وكفتك..... وبالرخاء بسرعه عفتك
وتمدلي ايدك واني امس منطيك ظهري

جلمة زلمة ولزمة شارب
من هلحضه وعبدك تايب
ما اريد اوگع من عيونك
وجرح ذنوبي بأسمك طايب
....................................................................
وحگ جرحك....
من الكبر ما اخافن بگد ما اخافن من عتابك
خاف تسألني اعله ايدي لئن دگت غير بابك
رايد استغنم فطرتي وارجع لسجة عذابك
وكون ما تغريني دنيا وما اقدرها بترابك

مستحي يابو رقيه....... حبال جرحي انه رخيه
ورغم اهلي وياي ما وكفوا وكفتك
لا تهدني اني احلفك...... ما اثق بغير جفك
واعترف غلطان وبايدي لجمتك

باجر محد يستر عيبي
وذنبي يرافكني لحد شيبي
وكدامك خافن اتفشل
خاف اخباثي اكثر من طيبي 
........................................................................
مرتضى عامر الشمري

يا بني أسد.... هلبت تجيبولي حصيره
يا بني أسد.... رايد الم شيخ العشيره
يا بني أسد.... حار الرمل وحسين عاري
يا بني أسد.... ما ينحمل حر الضهيره

شلون اقنع گلبي اهل فوگة الترب
موش بس ايدي رجف حتى الگلب
استوحدتني أفكاري من شفته طريح
حسين ما يرهم يضل وسط الغرب

مدري المه مدري اغطيه حسين فوك الترب عاري
ومثل ضيعة خنصر ايده ضاع يا  وادم قراري
هنانه ياشلعان الگلوب الرمل ماخذ لون نحره
ما اكو وادم تنغر اعليه وحاره شمس الضهاري
((آه... ليت امي لم تلدني))
........................................................
يا بني أسد... بجفوفه باقي تسع اصابع
يا بني أسد.... من جفه خنصر جنه ضايع
يا بني أسد..... عينوني بالتربان ادوره
يا بني أسد..... بي محبس أخضر حيل لامع

و ماي جيبولي ابرد منحره
وارش گبره بلكي اجبر خاطره
جسمة صاير سالفه بحلگ الشمس
هذا ثالث يوم مرمي اعله الثره

اطول من الرمح خلكه بكثر ما شايل محنه
جسمه مطروح اعله غبره وراسه فوگ يعاين النه
گلبي مثل شفافه مفطور  من كثر حزن النعاوي
وگلبي وما ينطيني يا ناس اشلون ابوي بأيدي ادفنه
...........................................................
يا بني أسد... خلوني احط جفوفي حدره
يا بني أسد.... مرضوض من الخيل صدره
يا بني أسد.... وحشة الجنازه بدون الصياح
يا بني أسد...... غير اليموت اهله تحضره

من تحفرون الگبر وسعوا بعد
بحضن ابوه يندفن هذا أصغر ولد
خاف يستغرب لئن بعده طفل
صدر ابوه المنكسر يصبح مهد

سلبوا مني راحت البال وادم السلبوا عباته
وراسه لسه برمح مرفوع وحسرة الماي بلهاته
شده بال عيوني الحسين من شمر ماخذ مجانه
عكب عينه  عيون الاجناب كامت تباري بناته
..........................................................
يا بني أسد..... هاي المصيبه التاخذ الروح
يا بني أسد..... من الگفه ابن الزهره مذبوح
يا بني أسد..... متروس صدره سهام وحجار
يا بني أسد..... حسين العزيز بهيمة مطروح

يوسدون راسه الميت بحيطة وحذر
اشلون يتوسد الي بطرگ النحر
نريد راس حسين ما ردنه فصل
خاطر ندفنه ونشيل بلا أثر

ارد اندهه وحاير اشلون خاف ينشدني اعله زينب
واني گوه مصبر الروح مره اسكت مره انحب
بيدي خله الحبل اثار وخاف حس بجرح ايدي
گادني التفكير للماي واعلة گلبه الجان يلهب
..........................................................
يا بني أسد......سوه الغراب بگلبي عِلة
يا بني أسد...... ليش الدفن بالترب خَله
يا بني أسد..... تمنيت ابوي بحضني ادفنه
يا بني أسد.....ولا بيدي فوگة الترب أهله

حسين فاتحته عله النوگ الهزل
وشلون تلطم مره مجتوفه بحبل
للسبات الليل والراحه انخلق
واحنه نگضي الليل مدمعنه يهل

اليرد من الدفنه متعوب الناس غير تكوي حيله
وأهله تتلكاه بالثغيب الشيخ فاتحته ثجيله
تراب ابوي بثوبي نيشان اشلون من تشوفه زينب
الليله يمكن زينب تموت هاي بالله اشلون ليله
...........................................................
مرتضى عامر الشمري

ابني.... ميت عطش
ابني.... بلايه نعش
ابني..... بشمس هدعش
موته اهله ولد عمه..... ياهو اليطلب بدمه
حسين يا يمه
.......................................................
بضهرية الوداع رد مهر الحسين
وحسين ما رد والضعن متروس لجمه
حار الرمل جان ومغطي نحره
بخت ال هاشم ع الترب مهدور دمه
ومن صار الغروب لموا غنايم
وحسين ع الغبره بقه محد يلمه

يا وسفه ابو رقيه..... ما حصل اميه
يا حلال الله يعطشونه الغرب 
يذبحونه جدامي... عمت عيني ضل ضامي
ما بيه اشوفه منذبح فوگ الترب

ضامي.... من الصبح
ضامي.... وكله جرح
ضامي.... متاني رمح
سلبو منه العمامه..... وضل مفرع الهامه
................................................................
ارد اعتب الخيل  وانشدها بالحال
اشكدها كاع الله شعجب فوك ابني تسحك
الما عنده شيمه يسلب بالثياب
وبكربلا ما مش كصص بالفشله تعرك
واليكطع ارحام يكطع ابصبعه
وطَلابة الحگ ع الترب من ياخذ الحك

واليوكع بشده.....خوانه التسنده
شحال الاخوته ع الثره كلها صفت
تهضمني سالفته.... صاب الحجر كصته
يبقه ثلاثه اعله الترب مرمي البخت

عاري.... انحز منحره
عاري.....فوك الثره
عاري.....ما مش ذره
تسحك صدره خياله....... وهو يعاين اعياله
.......................................................................
جا غير مذبوح شعدهم يسحكوه
ومن اثر شمرات الحجر محفور خده
وتكربت ليه... وحاولت اشيله
ومنين ما اشيله يكع ماي وتبده
مو بس شفافه مفطور كلبه
الله يعينه من العطش ملجوم جبده

ابني واعرفنه....... ما ينشبع منه
وحيلي انهدم لمن شفت ابني يون
ارد اشبك وليدي... بس هذي مو بيدي
ما ضل مجان بصدره من كد  الطعن

ويلي..... يكوم ويكع
ويلي..... كلبه انشلع
ويلي.... راسه انكطع
ما ضل بي كتر سالم..... بجسمه تفرهد الوادم
....................................................................
من صار الغروب.... يم جسم الحسين
زينب لفت مدولبه وكامت تحاجي
الحظ والبخت ليش ع الغبره مطروح  
رادت تشبكة وما لكت سالم كتر بي
فوگ الشمس هاي... مسلوب الثياب
وكلشي احترك وي الخيم بيمن تغطي

ما مش غطه يلوحه.... ومكشفه جروحه
عاري ضل الجان امس ساتر هله 
سكنه اكربت منه...... بويه اكطع الونه
كالتله ترضه تنجوي المدلله

وادم....... ابلا شيم
وادم... ترمي سهم
وادم...... تحرگ خيم
والد مثله ما شفنه.... بحضنه يندفن ابنه
...............................................................
ابني واعرفه مو مالت اتراب
شجاب التراب بكربلا وبات اعله شفته
شيصبره كلبه اهونله لو مات
ولا يسمع ابين الغرب من طلعت اخته
جدام سكنه داسوا بصدره
بلا ذمه ذبحوا واضحكوا بعناد بنته

جا بالعرب فشله.... الشيخ وسبوا اهله
شبعت هضم من كربلا نوب السبي
الما ينلمح ضلها.... يسلبون محملها
ومكشوفه تصعد ع الهزل بنت النبي

زينب..... تكسر كلب 
زينب.... بين الغرب
زينب.... متيهه الدرب
حرمة مذبحه اخوتها...... بيش اداوي علتها
......................................................................
مرتضى عامر الشمري

بين الخيل وبين الوادم يم نحرك جابتني اللهفه
عمية من الدخان عيوني بلكي بشم قمصانك تشفه
جيت اشكيلك حالي وضيمي بس من شفتك رأي اتغير
عطشان وكل حيلك رايح وفوكك حافر هاي الكلفه

هذا الماي
بلل ريجك خويه وكوم..... ما لايگلك هذا النوم
للخيمة اكعد رد وياي
كوم وشوف
بحال اطفالك شوف شصار...... بين المجوي والمحتار
ودايرهم خياله اطوف

ما اكو اي قرار
لو ننسحگ....... لو نحترگ.... ما عدنه حل اخر جان
ضاع الاختيار
بليل اهدعش.... غربه وعطش.... ومامش حمة ولا صيوان
..................................................................
اذكر فَي خيامك وانحب كلما شمس الطف تجويني
مو من طبعك يابو الشيمة احجي وياك ومتحاجيني
هاي اول مره اطلع وحدي وما اندل ارجع لخيامي
راح اتبع دخان الخيمة  بلكي الدخان يدليني

بنص دخان
من وازاني خويه الليل.....  اركض جيت ابين الخيل
عازتها عازه الخوان
وين الگاك
تدري شكد دورت عليك.......... بلكت تتنفس الگيك
بس الحافر گبلي خذاك

لحگوا ياهلي
الما عدها حل... منواها تل... وتصيح ادركني حسين
ما بقه ولي
وين اتجه... وانطي الوجه.. وما ادري اروحن لاوين
..................................................................
عبدالله بفي خيمة ادفنته ما يتحمل شمس الصحره
بلكي الله يصبر گلب امة ميت بس عيشتها بعطره
طفل وحسبوا راسه غنيمة وركضوا للخيمه يطلعونه
بلايه مناغة بلايه اسم الله جدام امة وحزوا نحره

وين نروح
منا جمر منا خيل........ وتدري الركض رايد حيل
ومن العطش كلها تنوح
حل انريد
ما بينه احد ما محروگ........ باجر شيصعدنه النوگ
وضيم الهجر بينه يزيد

كربلا عذاب
احمل ضمة.... واحمل عمة.... بس لا غيابك عني
وحشه واغتراب
ليل ودمع.... حتى الشمع... ما نازف بگد حزني
......................................................................
ما متعوده اطلع من دونك ولا درب الهيمة اني اندله
فشله من اطلع بين الوادم وفشله يشوفوني اعله التله
بالگوه وصلتك ياخويه ارحم حالي واحجي حجايه
گوه اتنفس موش بخاطر بين الميته وبين العدله

صار الليل
لا في والي ولا خيمات...... خويه الليله وين نبات
ما يخلص بالطف الويل
غربه وخوف
وعطرك هب بوكت غروب....... وشيصَبر گلبه المنكوب
بينه البجي گام يطوف

جابوا الحبال
وكلبي انلجم.... فوگ الألم..... باجر غريب الحداي
ضايع الدلال
بت النبي... وامشي بسبي... ولا والي يطلع وياي
.................................................................
هدت خويه الخيل اعلينه وزينب طلعت كونك داري
شبت نار الخيمة وهفتت لجن ما ظن تهفت ناري
ضليت اركض خيمة لخيمة بلكت شي ما مسلوب الگة
حتى نسوي  فياي لجسمك موش ابن الزهره يضل عاري

ما معقول
هذا انته يا ابو الأكبر...... جا ليش هيجي موذر
نهبت جمالك الخيول
بس لحضات
خليني اگضيها وياك....... باجر بعد وين الكاك
باجر ع الرماح تبات

والدرب طويل
يزيد الجرح... عكب الذبح... باجر وراك انته رماح
ما اكو مستحيل
ام الخدر.... تمشي بيسر.... الما الها اخو ما ترتاح
............................................................
مرتضى عامر الشمري

جنت انه اخاف عليك يمه يحسدونك
واشلون اشوف الكوم يبني يوذرونك
حلمي عرس وبخور عمامك يحنونك
و يهوس العباس لمن يزفونك

انطيني نحرك خل اشمه     
وعرس  المبارك  ييمه
دايفه  الحنه  بدمعتي
وبالهلاهل صوت لجمه

عفت الحرب تكتل         وبثيابك تعدل
ليك فزعت    لمن شفت   خيل الرفس تصهل
....................................................
يا سلسبيل الروح متبدي بالميدان
واول عرس شفناه بي تلطم النسوان
المثلك ورد متروس مو تنذبح عطشان
وترسوها دم و رمال صينيتك العدوان

ثياب عرسك من لكوها
بخيمه اسكينه احركوها
ويا صواني العرس ذيجه
بخيلهم شو طشروها

ما ينشبع منك          واشلون اعوفنك
لا تبتعد     بخدك ورد     خليني اشمنك
.....................................................
موذر  يبعد امك  و ما ميزك  باالعين
بس  يبني  نيشانك هاالحنه باالجفين
امنيتي الف مبروك ايكلي اكون حسين
و ع الخير يا رمله ولد ابنج اتشوفين

بعرسك الهلهوله ونه
واهليه نطش دمعنه
الخيل لاينطيها الله
جفت صينيه الحنه

ومرتك اجوا ليها          وباكوا تراجيها
لو تنسلب   لو تنضرب    لو تنجوي ايديها
...............................................
عريس و اجمل شاب يا  فرحه ايامي
الحنه وصواني الياس طشروها كدامي
بعين الحقيقه تموت يا اجمل احلامي
يمه اعله بخت الماي من تنذبح ضامي

وين اكو ام عريس تنعه
وابدال كل هلهوله دمعه
وع الرمح باجر ازفك
بكل خرابه احط شمعه

ما نثرت امك ياس            نثرت رمل ع الراس
لمن طحت     كافي اسمعت   سكتني العباس
...................................................
ثوب العرس جسام يبني عليك يلوك
بس ما شفت عريس بحافر فرس مسحوك
كونك تشم عطاب كلب امك المحروك
من تسمع  بمرتك  باجر  تطب  لسوك

شفت واحد اجه علينه
كلت ابني رجع لينه
ثاري واحد لبس ثوبك
وحرك خيمتنه وبجينه

مهنه يبعد امك        يالحنتك دمك
لعرسك عفت     ما قصرت  يسوه الذبح عمك
..................................................
مرتضى عامر الشمري

الضمى استحوذ على خيام العفيفات
ودگ صدره الگمر گال انه سگاي
حط بمتنه جوده وشد اللثام
وبرز خيال هاشم گاصد الماي
سد عين الشمس بعجاج التراب
من گد ما عليهم رايح وجاي

رجيف وكلشي ضل مايل..... الشامخ بس ابو فاضل
والعين شوكت تتعله ع الحاجب
روس الكوم صارت صوف..... مغزل سيفه بيها يطوف
وعله متون القدر بالمعركة راكب

رهبر...... من صوب الخيم طالع الرهبر
قسور......يشبه والده ذاك الغضنفر
يرعب.... مو بس سيفه حتى عيونه عباس
كَبْر..... وحده وما ثبت جدامة عسكر
...........................................................
هاشم لو برز من عدها خيال
الحبر ما يلحك يعد الخساير
عمية الغاضريه وطبها عباس
كحل عينها بدم العساجر
ارث عنده الشجاع ابن الشيوخ
بجثثهم ع النهر سوه الكناطر

ثنة ركبة وترس جوده...... وحاشه تغره البروده
وكسر خشم النهر من ما شرب منه
الماي أخرس مشه خامل........ شبع ضيم من ابو فاضل
ولگد مهره ورجع شيمنعه عم سكنه

واهم.... الفكر ينجوا منه هذا واهم
حالم... يلبس شيلة امة الينجو لازم
غاير..... شمر روسهم يم ضفة الماي
نادم.... جيش بكبره ضل  بروحه لايم
..............................................................
رغبة سيفه عبرت فكرة الموت
سيفه القارعه وبس بيها ينقاس
جا وين الجيوش التحرس الماي
اشو محد ثبت من طبها عباس
تنقاس الزلم بالموقف الحار
بس من الكفل بلشرده تنقاس

من الراية كلشي يغار..... لئن شايلها جف مغوار
مقياس الشهامة شارب الكافل
كض الحومة بجفوفه....... وهف نصها عله الكوفه
وطشار الزلم  لشام واصل

فارس...... طب وما ثبت جدامه فارس
لابس...... درعه ويرتعد هل من منافس
جندل.... كلف ومعدل اربات ام البنين
واهس... نار وما تخلي اخضر ويابس
...........................................................
يطب لريته ثاري الهوى المحظوظ
الهوى الما مار زينب ما يشمه
كاسر ضهر جيش اعداده الاااف
بس لحسين ما كاسرله جلمة
مثل رجف السعف رجلين الجيوش
وع الشرده بعد ما بيها همة

كباله ما وكف احد....... خشنه حجاية المبرد
مد و جزر صار مدافع الناس
واحد ودع الثاني....... فوت انته وراك اني
جيش شكبره ماخذ رأيه وهواس

كافل....... رفرف بيرغه وضهضب الكافل
شايل......... غيرة حيدره وبارز يقاتل
شسوه... خله الخيل فوك الزلم تصعد
كامل..... وثلث تنعام من زود ابو فاضل
..................................................................
ثلثين الولد ع الخال يا ناس
بس عباس طالع كله الحسين
الريشه براسه كام توازي الغيوم
وابد ما يثني طگته بحرب مرتين
فروا منه فرة غنم من ذيب
رغم ما جانوا اعله نهر صوبين

بعد ما تنفع التوبه..... اليريد يضل يذب ثوبه
ضل حتى ابزرهم يطلع الخوف
ابد ما كابله واحد...... شارد يعثر بشارد
من كد الرعب ما يسلم الشوف

ديه....... يذبحهم نوه الخيمة ديه
ريه...... . تشتم بس هوه ولد الزجيه
يرعد.... بعده للحرب ما راخصه حسين
أخَييه..... لو راخصلة يمحي الغاضريه
..............................................................
مرتضى عامر الشمري