تلك المدينة (المنورة) كانت مظلمة ليلة استشهاد الصديقة الزهراء صلوات الله عليها
فكأن الحال فيها :

طبع المسه .. ايلم الشمل
وكلمن يرد دياره
ومن وحشته .. ايوج الشمع
من يبتدي سماره

ودار اظلم بقى بهذا المسه من دون الاديار
بي حَنّه وانين و وحشه ، بي صوت لبچي صغار
يكسر خاطر المر منه وايسايل على الصار
اثر نار اعلى بابه المحترگ ليش اشتعل نار

مو چان امس ضيه يشع
شو هسه بي طافي الشمع
چان اسمه دار ام الحسن
وعگب ام حسن دار الدمع
__
صب دمعتك .. وگرّب بعد
وشبي أثر يخبرك
عن الجره .. يم عتبته
وساعتهه عوفه صبرك

بَلايه الشوف گلبك يعرف و تُوضحله الاسباب
الدم بالعتبه من ياهو نزف؟ ، عاصرمن الباب؟
صدى صوت ام خنگهه اليدفع و منهه الضلع عاب
اثر رجله على الباب اتخَبر عن عظم الاصواب

لهذا الجره عيونه بچن
لام الحسن نوح الحسن
شاف الدمه ونار وحطب
وامه تموت ابهالمحن
____
صوت لطفل .. وهزّة مهد
هاي امنيه اذبحوهه
زهرة علي .. مو بالضلع
بالمحسن افجعوهه

نست كل الألم بس همهه لا يآذون ابنهه
مو ع اللي جره وياهه على المحسن حزنهه
حنينه فاطمه وماتلهه ابن ما يهده ونهه
وبچي المكسور ضلعه معضله الما شفنه منهه

ايلهيهه بس وجه الحسين
لو شافته ينوح وحزين
اتصبره على المحسن اخو
اويا تبتسم تمسحله عين
__
هذا الطلع .. محني الظهر
يتوچه ع الحياطين
هذا علي .. الظهره انكسر
من فارگ ام الاحسين

اذا تنام الخَلَگ حيدر ولا يغمضهه عينه
يشد الثامه واينگعه بدمع عينه الحزينه
بظلام الليل يمشي ولازم اصفاحه بإدينه
على گبر الزچيه يگعد و يحچي بونينه

يا فاطمة آنه علي
ما ظل صبر بعدچ الي
ردي تره گلبي انشلع
و هَم خاطري ما ينجلي

اللهم عجل لوليك المنتقم الفرج

يا رسول الله يريتك
تفك بابه گبرك .. واتضمني بايدك
بويه عگبك ما رعوني
گومك ولوني .. وهساعه اريدك

بويه گوم الحگ لَبنتك .. ردلي وانشدني اعلى حالي
عيونك امن اتصد لَعيني .. تختصر كل الجرالي

نار وباب .. واثمنطعش شمعه وجنين .. وبيهن آثار الإدين .. نار وباب
نار وباب .. ولو آنه لو ذاك الجدار .. وتاليهه صار الخفته صار .. نار وباب

يالتنوجع من انوجع
شموصي بيّه وبالضلع؟!
جيت ارد اگلك واِستمع .. بنتك غريبه
حرگوهه دارك بالحطب
وغصباً عدوك ليهه طَب
اسألني يا خد انضرب .. بنتك غريبه
_____
بيك مرتين اجرحوني
مرّه انعى روحك .. ومرّه ابچي ذاتك
لفگدك انحب ولغيابك
وابچي اعلى حيدر .. ضاع بمماتك

چفه من فقّاره خالي .. صمهه حيل وما فتحهه
بالوصيه انگطعت ايده .. وبالصبر روحه ذبحهه

الأشجع ذاك .. گادو ثلثمية جبان .. شيسوي لو دار الزمان
.. الاشجع ذلك
الأشجع ذاك .. وفّه بچلمته وظل صبور .. وبگلبه دمه ظل يفور .. الأشجع ذاك

كلشي يهون و لا علي
هو حياتي وكل هلي
بضلعي ولا بيهْ ابتلي .. يهون الجرالي
(خلو ابن عمي) اطلع صحت
امن ايدي خَذوه وفرفحت
وانه لغربته من نحت .. يهون الجرالي
_____
صرت اتاني الليل اريده
وما غمضه جفني .. حتى ابچي وحدي
وانه الامصبرتني چلمه
الأسرع لحوقاً .. گتلي انتي بَعدي

گالو امأذينه نوحچ .. وانه عن حيدر خفيته
ثاري مآذيهم وجودي .. وراحه للكل موتي شفته

دار احزان .. يا بويه گبرك داري صار .. وطلعوني من ذيج الديار .. لدار احزان
دار احزان .. امن ابعيد ازورك وابچي ليك .. شيصبّر ادموعي عليك .. دار احزان

لا رادو ابچي لفرگتك
ولا اشكي هضمي بغيبتك
شلون بگلبهه ابنيّتك .. آه يا عذابي
هظموني وآذوني تره
ورادوني اسكت ع الجره
بنتك تراهه امحيره .. آه يا عذابي
__
واكثر اليجرح دليلي
حيدر يبويه .. لو عفته وَحده
نار بابي بگلبه شبَّت
ايون لونيني .. وبس آنه عنده

يمشي للبير ويسولف .. عن غربته وع اللي صابه
لا گلتله الصار بيه .. ولاهو سولفلي بعذابه

شلونچ گال .. گتله فده عيونك اروح .. امسح دموعك لا تنوح .. شلونچ گال
شلونچ گال .. گتله المهم يمي انت كون .. و كل الجره اعليه يهون .. شلونچ گال

شلون من اعوفه ابغربته
ويّه اليتامه و دمعته
آه ياهضمته و لوعته .. حيدر حبيبي
شينشف ادموعه الجرن
يعين الله گلبه اعلى الچفن
ويدفن بديه ام الحسن .. حيدر حبيبي

يجي الليل واضِيع الحد طلاع الروح
يم گبرچ واذا بالدار نفس النوح
يَ ستر ادموعي ما ضمهن جفن بعدچ
الفرق بس النَفس ما بيني والمذبوح

حيدر العفتي وراچ .. كونچ اتشوفينه
تغيَّر هواي بجفاچ .. ماظن اتعرفينه
لاهو مات ولا نساچ .. ولاهي نشفت عينه

شگد غريب و فگدتچ .. وطن چنتيلي
مأوى روحي وسَكنهه .. و ظهَر شَد حيلي
تالي بيچ اكسروني .. ومنو ايتچيلي

ويّه ضلعچ ظهري
انكسر وإسوَد عمري
واشيجبره لكسري .. اه يزهراء

اه يزهرا
______
أنه الما كبّرت باذن ابني لمن صار
منّ امه ودفنته شلون چان اصيار
بوكت واحد وگعتي اويا على العتبه
الچ لو لابني اركض لو اطفي النار

شلون طيحه گبالي هاي .. حرمتي و وليدي
حگي احير ومالي راي .. اشتعل دم اوريدي
الهضمه من عفته بگفاي .. وماكو سيف بايدي

و اشيبرد غليلي .. و يِطَيب اصوابچ
تالي بيدي دفنتچ .. واهيل اترابچ
وبعده يشتم هوه الله .. الدفعلچ بابچ

امگابَل ايلاگوني
وآنه ادير اعيوني
اموصّه چي يدروني .. اه يزهراء

اه يزهرا
___
ادورچ سالمه ابكل ليله من ارجع
اسلم ماكو صوت وبس صداي اسمع
رديلي بجفن محمر ، ضلع مكسور
المهم رجعيلي گلبي اخلافچ اتگطع

شلون ما رديتي الي .. راضي كونچ يمي
تره ما ظل من علي .. باقي الي بس اسمي
الليل وادموع اتهلي .. غيرن كل رسمي

وين الاگي اليعوضچ .. و اصبّر حالي
منين اجيب اليشبهچ .. و اَسمّي غالي
يا حزن روحي چَنه .. يظل للتالي

على فراگچ مَگدر
بغربتي واتحسر
ياهو يفهم حيدر .. اه يزهراء

اه يزهرا
____
يوديعة محمد بيش رديتي
يَروحه وروحي ، غاليته ويغاليتي
گلب من صدره اخذتچ من اجيتيني
ورجعتيله بضلع مكسور من بيتي

لو يسألچ انتي هاي .. گولي ما راعوني
باب والحايط وراي .. وگومك الدفعوني
گولي ما شفته لضناي .. طاح من عصروني

گولي حيدر تركته .. بعذابه وناره
انجرت ايده شفتهه .. وسكت عن ثاره
ما تركهه الوصيه .. وترك فقاره

سيفه ظل ابغمده
و أمّنَو من عنده
انعاف اخوك لوحده .. اه يزهراء

اه يزهرا

عهد معهود .. وصبر مگيود
سكوته اللي يذبحه من عهد معهود
علي الضرغام .. بدموعه ينام
ويفز ابإذنه صرختهه بگلب ممرود

فحل الفحول اشعلامه
ما يرخه جفنه لمنامه
معقوله ليل الله عَدَّه
ومهضوم امير الشهامه

يا ليله .. البيهه حيدر هَضمِته ذابحته
يا ليله .. ال من فقاره اتأمِن الخايفته
يا ليله .. العاش كل عمره علي كاسرته

حِمله شگد چبير .. يا جرح الامير
__
علي معذور .. الصبر مگدور
واذا يجزع على الزهره علي معذور
صعب والله .. مصيبه وآه
حَرِگ باب وسِگط خلفه وضلع مكسور

اثلثميه بابه احرگوهه
وام بيته خلفه اعصروهه
وچف اليبيد الكتايب
ترجف غضب عاينوهه

حسراته .. يطفه جمر الباب بس ما تطفه
حسراته .. ألوصيه ابّين سيفه وچفه
حسراته .. وي ضلعهه جرحه ابد ما يشفه

من ضلع الكسير .. يا جرح الامير
___
حنين الروح .. لورد مذبوح
لعزيزة گلبه شيهَوده حنين الروح
أنين وشوگ .. ونفس مخنوگ
غريب امسه برزيتهه يون وينوح

يذكر لَمَن ماله ناصر
وبحبل ادي وسفه حاير
واتنادي خلو ابنَ عمي
تناست ألمهه و تِكابر

الماذيته .. أمر عبده النذل حتى ايردهه
المآذيته .. العدهه بس حيدر ترد وحدهه
المآذيته .. گوه تمشي اطفالهه اتسندهه

امصاب الما يصير .. يا جرح الامير
_____
بواچي الليل .. تهد الحيل
نصيبه بدنيته حيدر بواچي الليل
البشر ترتاح .. وعلي نوّاح
ينامون ويظل وحده يشوف الويل

غسلهه بيده ام عياله
الما خالق الله بكماله
ومن ايده جاست ضلعهه
حيدر ظهر ما بقاله

فاطمته .. العود اعيونه على نظرتهه
فاطمته .. تموت مقتوله بأثر عصرتهه
فاطمته .. انكسرت وظلت على كسرتهه

عيونه المن تدير .. يا جرح الامير
_____
اشيريد ايگول .. علي معزول
منو اليفهم حزن گلبه اشيريد ايگول
جريح احساس .. وغريبه الناس
بوحشته وحزنه وامساهَر ليالي اتطول

يآنس وحشته ابگبرهه
يركضله كلما ذكرهه
بكلشي گدر يمه يصبر
وفرگتهه لا ما گدرهه

حنّيته .. تخنگه وايطيح اويه دمعة عينه
حنّيته .. حرگت ابعمره خضار اسنينه
حنّيته .. گبر (فاطم) لو (علي) امضيعينه؟!

حار الما يحير .. يا جرح الامير

يا ساقي .. الحُب والمعرفه
يا كامل .. وامچمل الوفه
يالگلبي .. منك و اكتفه .. مالك شعوره

الناقصني .. بحبك يكتمل
چف ايدك .. ما ضيَّع قبل
ايحبه الله .. العنده ابو الفضل .. مالك شعوره

قمر .. في كُلِ عين
قمر .. شمسُ الحسين
قمر .. بَينَ الخيام
قمر .. امُ البنين

من زغره وملكــ..ــهه الگنطره
بالحومه يِسمــ..ــوه حيدره
عين لفاطمه .. و چف الحسن
وظهر احسينه حيــ..ــن الزمجره
_____
يا كافل .. خدر اهل الشيم
اتباوعلك .. واتأمن الخيم
ما تضمه .. المثلك عدهه عم .. ساقي العطاشه
يموزع .. غيره اعلى البشر
ما يوگع .. التلزمله الظهر
ذاك انت .. واگف ع النهر .. ساقي العطاشه

نهر .. عد فاطمة
نهر .. يروي الضمه
نهر .. لاهل الارض
نهر .. لاهل السمه

يا قاهر الــ..ــوف المشرعه
انتَ (الْقَارِعَة .. مَا الْقَارِعَة)
نيران العذاب .. ابيمنتك
والدنيا ليســ..ــارك طَيّعه
___
يدوم الحب .. لو بيك ابتده
ياللي اسمك .. گلبي موعده
ابو فاضل .. نبضي ايردده .. ادخيلك دخيلك
ما تشبه .. خوّه خوّتك
وما مثل الـ.. الحرّه الجابتك
ما ضاع الـ..ـلاذ برحمتك .. ادخيلك دخيلك

دخيل .. غيرة علي
دخيل .. انه وهلي
دخيل .. من الضياع
دخيل .. شبل الولي

يا حصني الحصيــ..ــن ويا كهف
يالذكر اسمك .. اشرف كل شرف
صنع ايدك يِحيــ..ــرهه العقول
مايك بينه لــ..ــسه وما نشف
___
بحب ضعنك .. يجري بعرگي دم
اركعلك .. لو رف العلم
بتسيارك .. كل هاي الخدم .. عباس اميري
رازقنه .. دمعه لكربله
ومن جودك .. غيره ومرجله
يا سيد .. عمري وكافله .. عباس اميري

امير .. اعلى الضعن
امير .. ابكل زمن
امير .. اعلى الخدم
امير .. انت و وطن

يا كبش الكتيــ..ــبه الهاشمي
يا خدر العقيــ..ــله الفاطمي
يمذوب رقيــ..ــه ابهاللطف
يا أُنسي ودمــ..ــعتي و راحمي
___
يطيحني .. ذنبي وانكسر
وانخاك و .. كسري ينجبر
يم بابك .. اسجد واعتذر .. وايدي امدهه
الما خيب .. گبلي اي احد
سِد عالي .. للماله سند
ايرجعني .. مو عاداته ابد .. وايدي امدهه

سند .. فَي رايتك
سند .. يا شارتك
سند .. ادخيل الشهم
سند .. و عد كلمتك

بئس العبد انه وجاي استجير
ونعم السيد انت وخير امير
يابن ام البنيــ..ــن ابشاربك
وماهمَّن وراهه اشما يصير
_____

السلام على من قضت نحبها بسحق الخيول
السيدة عاتكة بنت مسلم بن عقيل
صلوات الله عليهما

مسلم يا مصابه ابچتل الاولاد
الدهر بفجاع گلبه رايح و راد
يوم بطاهر و مطهر يبچّي
وببنيته حميده امصابه يزداد

والتفجع بعد اكثر .. ابنيه من حميده اصغر
اسمهه عاتكه چانت .. ابسبع اسنين غصن اخضر

احتارت باليتم ياهو اليباريهه
الله اليعلم ابدمعه اللي تجريهه
تصبرهه حميده و هي اشد منهه
منو ايصبر منو الاطفال ما بيهه
__
إهي واخوانهه گعدو سويه
ايد بايد والدمعه جريه
اصغر وحده چانت بين الاخوان
والاصغر يكبر الشوگ اعلى ابيه

واحد لآخر ايباوع .. عطشهم بالوجه طالع
ذبلو بالضمه وبالحر .. الباقي يلزم الواگع

اضعفهم غدت كل ساعه مغشيه
تدور بالخيم ما دبرت اميه
وعمهه اتأخر لصوب النهر رايح
واشكبره الوجع ما تدري تاليه
__
ابو اليمه يودع راد الاخيام
الوجع بيهه غده امضه من الاسهام
من شافت بناته ايودعنه
وإهي واخوانهه بلايه ابو ايتام

واتذكرت حنان الاب .. ومن كثر البچي تتعب
عزيزة مسلم اتريده .. بس شيفيد من تنحب

گبال عيونهه ذبحو عمام الهه
وي اخوانهه محد تكفلهه
وصار الراي والتمو على زينب
اكفلينه يعمه عاتكه اتگلهه
__
ومن صار العصر بمراكض الخيل
طلعو من خيمهم شافو الويل
امن السجاد سمعت گال فرن
مرعوبه اركضت ماعانهه الحيل

الامخيم تشب ناره .. ابخيل انترست اكتاره
وعنهه ضاعو اخوتهه .. وين تروح محتاره

ومن كثر الرعب طاحت لمن عثرت
تريد اتگوم بس مابيهه ما گدرت
ومثل ما عمهه مسحوگ بحوافر خيل
رضتهه الخيول وداست وعبرت

السلام على الاكبر الذي ضجت له مخدرات الخيام بالعويل والنياح
حتى خاطبته اخته سَكِينة قائلة :

يمدري شماخذ وياك .. صدك ع الموت منواك
اوداعك هد الاخيام .. (علي) لتدير مكفاك

اشبقى بكلبي بهالاوداع .. مشيت وطحنه ع الكاع
يروح اسكينه لتروح .. حيلي بروحتك ضاع

اخوي وما يهون وداعك وياي
وين الكه بعد مثلك يوفاي
مثل عباس وي زينب جنتلي
الدرب كله عليه طولك افياي

يا شمعة خواتك
تعوف امدللاتك
ايضيعن وي مماتك .. وجهك لا تديره
____
ذابحنه تره الخوف .. وضاع الراي والشوف
بالاخيام الفواطم .. وتسمع ضرب الاسيوف

عدل بعدك يعطشان .. وحال امك صعب جان
تراقب وجه الاحسين .. وگلبهه اعليك لهفان

يضامي منين اجيبن ماي وارويك
الخيل تريد حيل وانت مابيك
ومن حر الحديد الحيل مهدود
وفوگاهه العطش خويه گسه اعليك

يَخَي والله مصيبه
تدري اختك غريبه
الماي منين اجيبه .. حيره والله حيره
_
سمعنه اتهوس الناس .. و وگفت الطم على الراس
ابوي اعليك يركض .. وصاح الحگ يعباس

عجت خيل وتراب .. صحت وابگلبي الاصواب
اشصاير يالهواشم .. ياهو ايجيبلي اجواب

ياهو الشايلينه يا ضوه العين
ليش بجيته يتمايل احسين
ويتچه على عمي وينوحون
يالتنوحون حاجوني اَخَي وين

گالو يا اسكينه
علي هالشايلينه
اخوج امگطعينه .. يكسرتنه الجبيره
_
ليلى شلون بيهه .. منو اليلحگ عليهه
خفنه تموت فوگاك .. فجعتنه ابّچيهه

ابوك اعليك مكسور .. داير جسمك ايدور
روحه اعليك طلعت .. حاير ينعى منحور

ما صح اليصبرني بمصابك
ولا صح اليعوضني بغيابك
صارت والخيم خسرت اعز شاب
خواتك حگهه لو تنعى لشبابك

يالفاجع عمامك
وكاسر گلب امامك
مصيبه وبخيامك .. الاولى ومو الاخيره

السلام على علي الاكبر
السلام على من أحرق قلب ابيه بموته

يا علي .. من تروح .. على روحي اقره السلام
يا علي .. احتار ابوك .. وفرفحت مثل الحمام
___
مو غريب اللي ارتحل
ولا غريب الماله اهل
الغريب المثلك ايودع شباب

طيحتني من رحت
وانه مو انه صرت
حَسبَة انداريت لنه راسي شاب

بگلبي نار .. تچوي بضلوعي
من مشيت .. شافو دموعي

يا علي .. مَگدرت .. اخفي دمعي اعلى الخيام
يا علي .. احتار ابوك .. وفرفرحت مثل الحمام
____
ضاع شوفي من صحت
ومدري يا صوب افزعت
ركض محروگ اركضت ما ادري وين
الك گصدي من الألم
رحت اركض ع الخيم
يا ضواي انعمه شوفي انطيني عين

انت وين .. يابني دليني
يالعليك .. دمعي عاميني

يا علي .. منين اجيك .. عيوني غاشيهه الظلام
يا علي .. احتار ابوك .. وفرفحت مثل الحمام
_
اشمرت روحي من المهر
جمر طاح اعلى الجمر
ومددت طولي اعلى طولك يالولد
مره اشم خدك صرت
ومره بجروحك متت
ردت انام بصدر ومارِد بعد

ردت اموت .. و لا ارد خالي
بويه گوم .. وياي يالغالي

يا علي .. لو ترد .. لو بصفك ابقى انام
يا علي .. احتار ابوك .. وفرفحت مثل الحمام
___
لوما زينب صوتت
يابني چا روحي اطلعت
بس خدر عمتك يغالي أغلى چان
گمت تارسني الدمه
وظهري عمك لازِمه
وضعت ماادري الخيام بيا مچان

امصيبه هاي .. الهدّمت حيلي
وابجفاك .. اعداك تبچيلي

يا علي .. شرد اگول .. ارد انوح ابلا كلام
يا علي .. احتار ابوك .. وفرفحت مثل الحمام
__
انت ميت لو أنه
ويا ظهر بينه احنه
مالي حيل افتح جِفن راجع غريب
شايلينك للخيم
وآنه ذابح گلبي هَم
خايف اعلى امك تموت من النحيب

يا ضناي .. اعلى امك اشبيدي
من تصيح .. ذبحو اوليدي

يا علي .. كربله .. مني ماخذتك حرام
يا علي .. احتار ابوك .. وفرفحت مثل الحمام
_ليلى اجتك يا علي
ومو دمع منهه ايهَلي
طاح من دم الدمع يبني عليك
كل حجي اليهضم حجت
شافت الدم و نعت
طاحت وتتحسر لمدت اديك

اتون عليك .. وتكسر الخاطر
يا ذبيح .. باول العاشر

يا علي .. هم دريت ..امك امناطرهه شام
ياعلي..احتار ابوك..فرفحت مثل الحمام

يا قاسم بن الحسن

جسامي .. يا ورد احلامي
طاشه اسنيني على اورودك نِده
جسامي .. يا حلاة ايامي
وبيك اشد حيلي على ايام الرِده

ع الگلب هونك .. فدوه لعيونك

تذكر بيوم الگلتلك سدهن عيونك
هيج ظلمه ايامي تصبح يبني من دونك
وكتلك احلامي الجبيره اتشيلهه امتونك

اتمنيتك .. اتعوض امك ع المضه اتمنيتك
تانيتك .. ليله ليله ابهالعمر تانيتك

وكدامي عودك شَب خضاره بكل جماله
يالشايل اوصاف الحسن يا كل خِصاله
يا درّة امك .. بيا ضلع اضمك
امبرگعته وجهك والعَجَب ظَل ايتلاله

من عين اليحسدون .. جم حرز رايد
من عين اليحسدون .. اسم الله يالواحد
____
محلاتك .. معرس ومحلاتك
سر خَفي وباچر  جمالك ينعلن
محلاتك .. لو اتكشفْ آياتك
لا تضم عن گلبي كل هذا الحِسن

انشر جعودك .. وافرِع بعودك

زيد تعذيب الگلب خل حسنك اينوله
خل اصب دمعة وداع ءوياها هلهوله
الحومه شعرك ما تَعَرْف اتغازل بطوله

يا جاسم .. ارويني من طولك بعد يا جاسم
مو دايم .. الليل گرّب ينتهي مو دايم

غير ابلذيذ العاطفه غصنك رويته
ومن گلبي گطعت كربله غصن الهويته
ظل جفي خالي
وضايع دلالي
ذاب اويه شمعة زفتك حلم البنيته

هم هاشمي وعريس .. بيك مجموعه
هم هاشمي وعريس .. وطفو اشموعه
___
تانيني .. وخلهه تشبع عيني
فكلي ذرعانك حضن گلبي برد
تانيني .. خل اودع اسنيني
كربله امن امك تريدك يالولد

يا بدر سعدي .. غيرك اشعندي

وين جنت احلم يغالي و وين تاليتي
امنيتي ازفك مو لموتك جانت امنيتي
جنت اظن اثياب عرسك ثمن حِنّيتي

مو بيدي .. امك انطر زفّتك مو بيدي
يوليدي .. واحسب احساب العرس يوليدي

امبارَك على الحومه ابضنه رمله و رِباهه
طالبتك امن اخيامك و بِلغَت مُناهه
وثغرك تِبسَّم .. بيهه انت تحلم
بسيفك يجاسم حومتك غصَّت عساهه

نار الكلب تسعر .. وكلبك البارد
نار الكلب تسعر .. والدمع شاهد
___
يا غالي .. بيك كل آمالي
لاويه اچفوف الليالي بهالرِبه
يا غالي .. مالي غيرك والي
وانت من عودك إليه اجمل هِبه

يا سند ظهري .. ويا ثمر عمري

شاعله العشره شمع يالما مثل حسنك
و طفَّت اشموعي الحرب لمن حچت عنك
رايح وهالروحه روحه وما ترد چنك

يمهاجر .. اتموت التفارك ولد يمهاجر
وبالعاشر .. كلمن وجرحه اليون بالعاشر

وآنه امك و تدري بحنيني وبغلاتك
آنه اولى بيك امن النسه جنت بحياتك
لانصب عزيتك .. واقره لرزيتك
ما صارت و بيك انغلب حتى بمماتك

لاتوسط النسوان .. وانعى مذبوحي
لاتوسط النسوان .. وافرش اجروحي
_____

السلام على قلب رملة المفجوع بولدها القاسم

روح الجمال .. اتمثل بشر
حسنك خيال .. لامك ظهر
يا واحد احلامي
وشمعة ضوه ايامي
ضامي الگلب ضامي .. وعينك نهر
___
يالما تدري .. تلون عمري
من فكيت عيون بحضني
ام و حگي .. يكبر عشگي
كلما اسمع يمه من ابني
جسامي .. جسامي

جن الله ناطيني النظر .. بس حتى اشوف عيونك
يالحرزك عيون الحسن .. من عين اليحسدونك
هو انت يبني أي ضنه .. وعن امك يبعدونك

اذبل وراك .. من تلتفت
شلون بجفاك .. لو طولت
والحومه ما تدري
طولك ورد عمري
اسود وجه دهري .. و وجهك گمر
____
مهجة رمله .. رسومك تحله
وكلما تعطش تحلى عيونك
وسارح بالي .. بطول الغالي
شعرك يلمع فوك متونك
جسامي .. جسامي

عطشانه بس ما بينت .. ماريدك اتهم بيه
هيج بدلالك كابرت .. شجره والك محنيه
اسهر وابديلك عمر .. موتك حوه تاليّه

دلالي حار ..راح الولد
وبكلي نار .. وگلبك برد
من افهمت نيتك
وموتك غده امنيتك
مذبوحي سميتك .. وظهري انكسر
__

شنطي الدنيه .. وترجع ليه
رايح وسيوف متانيتك
حربك عيدك .. و ام تريدك
تبعد واشتاگ لحنّيتك
جسامي .. جسامي

كشفت جمالك خيمتك .. وگلبي رجف من خوفه
بيّن بياض بمنحرك .. وسيوف الك ملهوفه
شاب ابني يا عالم صحت .. واحلم احني اجفوفه

الخيل اشتريد .. متعنيه الك
ودربك بعيد .. ما وصّلك
جاسم على بختك
ميت عدل صحتك
غير انه ناطرتك .. مامش اثر
____
معقوله انت .. هذا الشفته
تراب ودم برموشك نايم
يمه ارسومك .. ماهي رسومك
ماظل شي من عندك سالم
جسامي

انه اوله بيك من الترب .. مجويه ليش خدودك
شلتك على حضني وشفت .. متلولحات زنودك
يمناطرك ياس وشمع .. جا وين ذيج وعودك

شعر الحلو .. مشطته الك
وجسمك منو .. ايلمه لهلك
يا ناس هذا ابني
متوذر بحضني
وذباحه ذابحني .. من النحر
____
اركض المن .. خيام احتركن
وجسمك بيهن جنت انعاله
تتراكض خيل .. وانه بلا حيل
وما بيني وبينك خياله
جسامي

الحگ على امك يالولد .. جتالك الحاديهه
الذابح عمامك واخوتك .. بين الغرب سابيهه
وراسك يماشيني برمح .. بدروب ما ماشيهه

صار المحال .. وصرت بسبي
وضاع الدلال .. بحبل اجنبي
من اتغير الوالي
راسك بجه لحالي
يدري الخدر غالي .. ودمعه انهمر