خلصت سنة يالمنتظر
وعنك ولا نعرف خبر
وغصن الصبر عودة انحنة
خلصت سنة خلصت سنة

مري بية مولاي بحلم
وفرح دليلي من الهظم
روحي علة غيابك تهم
واترجة طيفك لو دنة
خلصت سنة خلصت سنة

مشتاكة ماذيني الصبر
وبسرعة شو مر العمر
وماادري باقيلي شكثر
حيلي ذوة وعمري انفنة
خلصت سنة.خلصت سنة

مولاية بذنوبي حرت
واضح طريقك بس تهت
اتمسك بحبلك ردت
وموطن رضاك استوطنة
خلصت سنة.خلصت سنة

يمتة الفرج يبن الحسن
منتظرك ويمشي الزمن
تعبنة دولاب الفتن
وخلة النفوس مدوهنة
خلصت سنة.خلصت سنة

كل عام وانتة بمهجتي
وندبة غيابك دمعتي
العام اليجي يا سلوتي
اتامل وبيك الهنة
خلصت سنة.خلصت سنة

فاطمة المگصوصي
https://t.me/fatima73gk

نور الله الزجية
ورحمة علة البرية
سمعونا الصلوات
هنا يجعفرية

نور الزهرة موجود قبل ادم خلقهة
وبكل العنايات ربنة الباري خصهة
مو بظهور الرجال فاطم من نقلهة
وبمشكاة الانوار للهادي حفظهة
يحورية يأنسية
يتفاحة يقدسية
ينور الله ويمشكاة
سمعونا الصلوات

ظلمت كل الاكوان بعد منخلقت القدرة
وضجت كل الاملاك ولاذت كلهة بالسدرة
تتوسل لخالقهة بحيرة وتنتظر امرة
أخرج نور مشكاته نور الطاهرة الزهرة
نور الزهرة من ازهر
عل اكوان وتنور
نادوا بالسماوات
سمعونا الصلوات

تحت العرش خازنهة ومن ازمان مخفية
وبالتفاحة حولها للمصطفى مهدية
فاطم مو بشر عادي لا حورية انسية
ام العترة حجتهم الراضية المرضية
اليوم نولدت الرحمة
الشكر لله على النعمة
وعلنوهة المسرات
سمعونة الصلوات

يخسة الكالك في يوم ماعندك ولد ابتر
ربك واهبك انوار وكل الخير بالكوثر
فرحنة اليوم مو ميلاد لا عدنة الفرح اكبر
اليوم انولدت ام حسين شفيعتنة علة المحشر
التعرف وين شيعتهة
تميزنة بمحبتهة
وتغمرنا بعنايات
سمعونة الصلوات

فاطمة المگصوصي
https://t.me/fatima73gk

لمصيبة الزهراء عليها السلام
على طور قصيدة ( كبرك جمعنة )

محد نصرهة
بيوم العصرعة
بالحايط وبسمار
يافضة نادت
تسندهة رادت
من هجمو علة الدار
ياناس المصيبة
لازالت عجيبة

سر الظلامة .بحفظ الامامة
من كيد اليغدرون
سر مانعرفة .وشكد نوصفة
وكثرة الذي يسئلون
حيدر يكلي .ظالم يخلي
يضربهة كلي شلون
ملزوم بوصية
وحجاية نبية
ومحنة صبرهة
بيوم العصرهة
تخلي الفكر محتار

يشكل علية .شلون الزجية
تطلع تفك الباب
مافتحت الهم .بس جاوبتهم
اليدعون اصحاب
هجمو عليهة . وحاطو وليهة
وماراعو الهة حجاب
من شاف الزجية
ذاك ابن الردية
بحقدة وغدرهة
بحيلة وعصرهة
وجف الكفر غدار

قنفذ ضربهة. بسوطة ودفعهة
وخلة المتن مالوم
وخالد وكزهة. بسفة ورفسهة
وهذا الحقد معلوم
وذاك الدفعهة . وهشم ضلعهة
وسگط سبط مظلوم
صولة جاهلية
باحقاد ال أمية
اليجهل كدرهة
بجفة وسطرهة
وظالم وابن اشرار

يالتبغضوهة.. هاي ام ابوها
نور الله ياارجاس
بضعة محمد.. خفية اتوسد
وماتدري بيهة الناس
باب الامامة .وركن اليتامة
باب الله ماينداس
اليوكف بي نبينة
وتستاذن يمينة
نفذ امرهة
وغيب كبرهة
سر والزجية اسرار

فاطمة المگصوصي
https://t.me/fatima73gk

للزهراء ..وعينها العباس

يومية يطلع للكبر
ويلملم خيوط الفجر
ويتحسر لكسر الضلع
ويكلهة يمة وينكسر
يومية يومية
يومية يومية

يومية حيدر يفكدة
مو بالفراش الوسدة
يطلع يدورة يشاهدة
يم الزجية لوحدة
يحاجيهة ويسولف همس
وعيونة عبرة تنترس
يالاغلة عندي من النفس
واسمج عذب طارية
يومية يومية

عباس يبني شطلعك
يومية افكدك و اتبعك
يم الزجية وعالگبر
تكعد تسولف واسمعك
تحاجيها يبني وتنتحب
ومرات تغضب تلتهب
ومرات اشوفك تقترب
وتكلهة عهد علية
يومية يومية

بوية الخبر ياحيدرة
ردت اعرف الصار وجرة
كلما نشدت ام الخدر
عن الزجية الطاهرة
من تذكر مصاب الضلع
زينب يوازيهة الدمع
تاذيني زينب تنفجع
وزينب تاثر بية
يومية يومية

وبمرة بهمومي لذت
زرت الزجية تحسرت
ردت انضر بعيني الجرة
ومن الله والزهرة اطلبت
شلون اندفع باب النبي
جم زلمة طب و ناصبي
ومنهو الدفع فخر العبي
وعين ام حسن مدمية
يومية يومية

راوتني بالطيف وشفت
كل الجرة عليهة وردت
انصرهة بس تذكرت
مامنخلق وتألمت
ومن شفتك بلاية ربع
بحبال حاطوك الجمع
للبيعة كوة تندفع
وشفت الخلك مو هية
يومية يومية

وامي الزجية من انولت
وبالحايط وباب احتمت
كسر الضلع ضرب الوجه
ومن شافت المحسن بجت
شفت الجرة مثل الحلم
وشفت الزلم لامو زلم
وشفت الظلامة والظلم
والطاهرة مرمية
يومية يومية

متعجب افهم نظرتك
ويسمع ضميري حجايتك
تكول امي عالزهرة شعجب
وام البنين الجابتك
كلما تحاجيني الطهر
يبني تكلي وافتخر
افرح بچلمتهة شكثر
وابقى بامل كل جية
يومية يومية

من عدهة من يوم اسمعت
يوليدي بوية تاكدت
والزهرة ما تنطق لغو
اي انة ابنها تيقنت
وشكد توصيني علة
حسين وبناتة بكربلة
وزينب تكلي مدللة
خلافك تضل مسبية
يومية.يومية

فاطمة المگصوصي
https://t.me/fatima73gk

ميلاد العقيلة وفخر الحجاب
زينب زين ابوهة وبنت ابو تراب
اليوم العفة تتباهة
وفرحانين  وياهة
نهني الحجة ونبارك يالاحباب

زينب يا اميرة ويشهد الكون
مثلج جدهة طه مايلاكون
زينب ما دنت لخيالهة عيون
الكافلهة كمر من تطلع شلون
يمسح اثر خطوتهة
وحيدر سور واخوتهة
معصومين اهلهة وحكهة تنهاب

الزهرة اليوم فرحانة وسعيدة
الماعدهة حبايب والوحيدة
اجتهة بنية حيدر رافع ايدة
يشكر ربة عالنعمة الجديدة
يكول الطفلة اوديهة
لجدهة خل  يسميهة
ومن رب الجلالة رد الجواب

سمو الطفلة زينب زين ابوهة
هاي ام الخدر واستقبلوهة
تشوف اهوال وتشاهد اخوهة
مذبوح وبغاية يسلبوهة
تهد عروش بحجاية
وتنصر دينهة براية
وترثي حسينهة وماتنسة المصاب

فاطمة المگصوصي
https://t.me/fatima73gk

ياسلوتي وياكل هلي
يافاطمة انة علي
ياجنتي الجانت الي
يافاطمة انة علي

فتحيلي عينج يم حسن
صديلي يالعينج وطن
مو جفي يعكدلج جفن
اعكد صبر ماضل الي
يافاطمة انة علي

اخر وداع اصعب وامر
گلبي يبت طه انكسر
بعيوني خليتي أثر
فرح عدوي وعاذلي
يافاطمة انة علي

انة علي يازهرتي
ليث الحروب بصولتي
يمچ اسير بحسرتي
وبفگدج شكد مبتلي
يافاطمة انة علي

يافاطمة وهذا الحسن
دم احمر عيونة جرن
مكسور ابنة وما اضن
حزن الحسن ماينجلي
يافاطمة انة علي

وهذا الحسين يقبلچ
يتوسل شكد حلفچ
يازهرة يكسر خاطرچ
عن المنية ترجلي
يافاطمة انة علي

وزينب بجيهة بلا دمع
تتلمس بصدرج ضلع
ومن توصلة هنا تنفجع
وصبر بحزنهة يعتلي
يافاطمة انة علي

وكلثم غفت يم حجرتچ
ونامت علة مصلايتچ
زغيرة يافاطم طفلتچ
المن تضل من ترحلي
يافاطمة انة علي

ياولادي مايرجع بعد
حضن امكم الدافي انفكد
وماترجع اللمة ابد
وذاك الزمان الاولي
يافاطمة انة علي

فاطمة المگصوصي
https://t.me/fatima73gk

لمصيبة الزهراء عليها السلام

ياكاطع الشجرة التفييهة
وبفيهة خلهة تفل بواجيهة
ربك قرن بالزهرة مرضاتة
ويغضب على كلمن يأذيهة

مو كلتو نوح الزهرة ياذينة
ونريد ننسة و ماتخلينة
تشكينة لله وتنحب بحركة
بسهم الملامة هواي ترمينة
وتسمع الناس وتحزن عليهة
ياكاطع الشجرة التفييهة

كلتولة حيدر سكت الزهرة
مانسمح الهة تنوح وبعبرة
لو ترحلون ومالكم ديرة
لو تاخذون احزانكم برة
تبجي علة ابوهة مانخليهة
ياكاطع الشجرة التفييهة

العبرة كلي شلون تمنعهة
تحبس حزنهة الحزن يوجعهة
نيران حزن الزهرة ياظالم
وجمرات من توكع مدامعهة
والعبرة هم تريد تسبيهة
ياكاطع الشجرة التفييهة

كل يوم تطلع تبجي وحدهة
للبر تروح وحيل ماعدهة
تمشي بظلع مكسور ماتكدر
ام الحسن حيدر يسندهة
وحر الهجير هناك يجويهة
ياكاطع الشجرة التفييهة

شجرة سدر فيت علة البضعة
وناحت وياهة وصوتهة تسمعة
بالفاس ابن صهاك من راحت
وبكل خباثة فيايهة يكطعة
باجر تجي مكطوعة تلكيهة
ياكاطع الشجرة التفييهة

فاطمة المگصوصي
https://t.me/fatima73gk