وبهاي الولاده // غمرتنه السعاده

اليوم احله ميلاد
وبهاي الأعياد
                        شوك المحب زاد       بميلاد الحسين
اليوم السموات
عدها احتفالات
                     وزفت بشارات      ومساهره العين

بمضمون الاراده // غمرتنه السعاده

حسين اغله محبوب
وساكن بالكلوب
                       منه فلا توب         لو وذروني
بعيوني شلته
وما لحضه عفته
                        كلش عشكته       واعلن جنوني

جبريل يمه ناده // غمرتنه السعاده

شع نور الانوار
بميلاد الاقمار
                         بشمه الهوه احتار      صلو على احمد
حته الفراشات
كتبت شعارات
                 وبيها احله كلمات     هوه المؤيد

كلمن وعتقاده // غمرتنه السعاده

ح**ضرت الشموع
وضميت الدموع
                    بشفافي مطبوع      اسمك حبيبي
والعني يحجون
خلهم يلومون
                     بيك انه مجنون      وانته طبيبي

يالحبك عباده // غمرتنه السعاده

طير الاماني
وياه خذاني
                  ابعث تهاني      وي النسايم
وبهاي الافراح
عطر الورد فاح
                  وكلب المحب صاح    بيك انه هايم

والورد عنده عاده // غمرتنه السعاده
**تمت
تحسين الخفاجي

ساكن وسط العيون   يا ابا عبد الله
ميلادك ضوه الكون   يا ابا عبد الله
واكلوب العشكتك // هامت بمحبتك
*انته حبيبي ودنيتي وهيامي
ويحسين الك ما ينوصف غرامي
وي النسيم ابعث الك سلامي
بفضلك يبو اليمه كبر مقامي
حبيتك من اسنين   يا ابا عبد الله
وغيرك ما حب يحسين  يا ابا عبد الله
واشواكي نادتك // هامت بمحبتك

بهاي الولاده اتنورت دنيانه
وكل عاشك بأسمك لهج لسانه
طيور النوارس عيدت ويانه
وضل واكف ابابك وحي الديانه
هز مهدك جبرائيل   يا ابا عبد الله
وباس ايدك ميكائيل   يا ابا عبد الله
والحور اتعنتك // هامت بمحبتك

دمع الفرح هليله ضل ايلالي
غالي انته والله وماكو مثلك غالي
مشتاك ازورك ياهوه الشمالي
كل لحضه بسمك ضل يدك دلالي
انه بحبك ولهان   يا ابا عبد الله
والشوفتك عطشان يا ابا عبد الله
يا محله صورتك // هامت بمحبتك
*رب البرايه للعقيده اختارك
وبين الحجب ضلت تشع انوارك
اصحاب العقول اتسولف بأفكارك
وطير السعد اصبح يحوم بدارك
هالبشره انزفها نريد  يا ابا عبد الله
الحيدر ونحني الايد   يا ابا عبد الله
والناس بجيتك // هامت بمحبتك

يهل الوفه اشموع الفرح علكوها
اليوم الهلاهل ترتفع خلوها
ليله سهرنه للزجيه احيوها
وبمولد حسين السبط هنوها
خلونه نصيح بصوت   يا ابا عبد الله
لا منعوفك للموت   يا ابا عبد الله
يحسين وبيعتك // هامت بمحبتك

تمت
تحسين الخفاجي

مواويل وهوسات للشعبانيه
*بطاقه للعباس ع

انه يا عباس احبك من زمان   
  وكلبي بمحبتك يبو الغيره ارتوه
والهوه الما جاب ريحه أمن الضريح
    هذا يا عباس ما سمي هوه
ومن كثر ما شايل امروه وثكيل
يابو فاضل عالجرح تنحط دوه

هوسات للعباس ع

اريد افرح وعيد طش بيدي الياس
واقره أجمل قصيده بمولد العباس
هذا الهد رسنها وطكها رأس براس
ودخيلك صاحتله الحومه

نزل ليها أبو فاضل والحرب صفنت
وسره اعله الموت خلالها الزلم لزمت
ويله النيته صاح بكربله اختلفت
واليحجي اليوم اسحك راسه

بطاقه للحسين ع
*انه عاشك والعشك خلاني اهيم
وبالغرام المركز الأول خذت
حسين مدرسه الوفه وسر الحياة
وأنه من عنده الأصول اتعلمت
امي صاحت يا علي بوكت الطلوك
ويا حسين انه بعلو صوتي صحت

هوسات للحسين ع
*يحسين الملائك كلهم اتعنوك
وضل حته الفراش امكابل الكاروك
وسليمان كلالك الف مبروك
وامعيد جبريل الليله

يحسين انته غالي واغله من غالي
وبسمك ضل يدك كل ساعه دلالي
ويحلالي السهر هليله يحلالي
والدنيه اليوم امضويها

بطاقه للاكبر ع

بمولد الأكبر سرح تدري الخيال
وكام يخفك عالمهد طير السعد
زينب اتكمطه وتصلي اعله الرسول
وكل وكت تقره الفلق عن الحسد
والله لو نسوت مصر موجوده جان
ينغمي اعليها وتطيح اعله المهد

هوسات الأكبر ع

بوصافك يالاكبر حارت الأفكار
ومن شدت جمالك حته يوسف غار
الليله بمولدك تتغازل الأقمار
والحور بحبك ولهانه
*شع نور الهداية والنجم أزهر
ومثل هيبة محمد هيبه الأكبر
الورد من شاف حسنه صفن وتحير
ومن نوره شمس الله انخلقت

بطاقه للسجاد ع

كلبي يالسجاد ضل ينشد عليك
وروحي من كثر العلل متمرمره
انه شايلك عشك فاق الخيال
والحنان البي ما تتصوره
انته كبرك جنه وايشافي العليل
والمريض ايطيب لو شافك تره

هوسات للسجاد ع

شهر شعبان اجانه وهلت الأعياد
وغمرتنه السعاده بمولد السجاد
اجت حته الطير اتريد منه امراد
ولو ضاكت بيك اتعناله

بده عكلي يعالم بالعشك يسرح
وللسجاد كلبي اشلون ما يفرح
الكمر بثياب عيده ايريد يتوشح
وتغازل بالكمره عيونه

انته نور الله الذي بي يستضاء
وانته يالمهدي الوتر والبسمله
بيك شمرت حيدر وزعل الكفيل
وبيك يالموعود كل المرجله
اتكطع اكماطك جنت لو كمطوك
يمكن اشتميت ريحه كربله

هوسات للمهدي ع

هليله الفرح لهل المكارم حان
والكون ابتهج بخمس طعش شعبان
انولد هليله راعي الغيره والايمان
والناس امعيده ووفرحانه

انه خيري جثير وتدري متبدي
وضل طول العمر متمسك بعهدي
افدي منحري وما عوفن المهدي
واليته وجددت البيعه

تمت
تحسين الخفاجي

ياعلي منك ردت هاي الوصيه
طلبتي گبري علي ودفني خفيه
من الجره وصار.       هاي الاسرار
هاي الوصيه
==========
ياعلي بعد الجره وصار اعل حالي
ماتِرّجع هالطلب تدريه غالي
بداعة العشرة علي وذيج الليالي
ادري تدري بطلبتي وتعرف سؤالي

بليل اظلم دفنتي وحدك اريدك
ياعلي گبري تحفره انت بيدك
عندك اخبار.        هاي الاسرار
هاي الوصيه
==========
ياعلي حان الاجل هاي المسيه
الله اليعينك على مصاب الزجيه
بدمعتك شد حيلك ودمعك تجيه
الليل اظلم وانت تحفر بالوطيه

دمعك البلل لحيتك لفگد الاحباب
وانت دافن ياعلي شمسك بالاتراب
بگلبك النار.         هاي الاسرار
هاي الوصيه
==========
ماردت ذاك النذل يحظر دفنتي
غاضبه وماسامحه وتشهد دمعتي
حسرة بيه من الالم يدري بحسرتي
بت رسول الله واجه وسبب كسرتي

غاضبه عليهم يحيدر واجري دمعي
الجان يتسمه صحابي كسر ظلعي
والزمن دار.        هاي الاسرار
==========
من بعد دفني علي اخفيلي كبري
انه مكسورة ظلع شيطيبه كسري
بالگبر لالا تظن مايطفه جمري
للعلي الباري العدل سلمته امري

من الظلمني الباري ياخذ حگي مرتين
وحگ اريد من الذبح بالطف الحسين
رايده الثار.          هاي الاسرار
==========
ياعلي نفس العصابه ادور صوبين
على وليدي بگربله وعطشان الحسين
النار هيه النار ذيج البصواوين
هناك بالعاشر اروح واسچب العين

هناك زينب حايره مجروحت احساس
من تشوف حسين واكع يمه عباس
ليه تندار.            هاي الاسرار
هاي الوصيه
=========
الشاعر علي النائلي

على فاطم وأويلا..
،،،،،،،،،،،،،،،،،،،،،،،،،،،،،،،،،،،،،،،،،،،،
يله ياجـرحـي انـــــته شد حزامك
لجرح فاطــــم سود خلها ايامــك
وخلي نزفك هوه سر أحــــلامك
لجـــمت البسمار رزق الآمــــــك

فاطمه تلوج بوجعها .. ومحسن أهوايه فجعها .. فاطمه
مثل زينب هم تنوح .. عاشت بحسره وجروح .. فـاطمه

فاطمه أم حسين مـفـجـوعـه يــنـاس
عله المحسن والجرح ضل بالانفــاس
ناس ماعدهـم رحم لا أكــو أحـسـاس
،،،،،،،،،،،،،،،،،،،،،،،،،،،،،،،،،،،،،،،،،،،،
من وره الباب ودفعـها ابـن اللـعيـن
وكع محسن منها واحمرت العــــيـن
أنگسر ضلع ام الحسن وام الحسـين
علي راحت روحه من گد الـــــونين

حيل حزنانه السما .. اليوم متروسه دما .. عـلَه فاطـمه
علي بحزنه ولوعته .. وتصب ضلت دمعته .. علَه فاطمه

يصبرك الله اليوم ياحامي الحمه
لهل مصاب تعينك أملاك السمـه
أعله أم أبيها فاطمه وسيل الدمــه
،،،،،،،،،،،،،،،،،،،،،،،،،،،،،،،،،،،،،،،،،،،،
ليـــــــوم وحشه وزينب بحيره والم
تشوف ابوها بوحده كل حيله نهدم
طاح اخيها النـــــــــاس مابيها رحم
وگع محسن والضلع طاح و تهشـــم

كسر ضلعج بينه اثر ..وكلب زينب راح ينطر.. يمه فاطمه
راح نفگد طولج احنه .. وتمشي وياج المحنه ..يمه فاطمه

ثگل هـمـنـه هـواي يايمـه تـــره
ليش هذه ويانه بس احنه جـره
النار عد الباب ليش يمه موجره
،،،،،،،،،،،،،،،،،،،،،،،،،،،،،،،،،،،،،،،،،،،،
اليـــــله زينـب حيلها نهد ونسلب
ولحســـــــــين گبـالها كلش تعب
والحســـن عد راس امه وينتحب
يعينك الله ياعلي الموقف صعب

يامصيبه وشگبرها .. گسروه الفاطم ضلعها .. واه فاطمة
حيـــــره ام وابنها .. طيحو وردت عمــــرها .. واه فاطمة

مارعو بنت النبــي اهـــــــــــل السقيفه
تأمرو كلهم ابابه ومارضــو حيـدر خليفه
وجوهم مابيها رحمه والايادي مو نظيفه
،،،،،،،،،،،،،،،،،،،،،،،،،،،،،،،،،،،،،،،،،،،،

#اللهم_عجل_لوليك_الفرج
الشاعر سيد حسن الياسري

قصيدة في شهادة الزهراء عليها السلام  ،،،،
ـــــــــــــــــــــــــــــــــــــــــــــــــــــــــــــــ

عَيلة  وتِهمِل  العَبرة
بيوم الماتت  الزهرة
وتِسعَر بالگلب جمرة

ـــــــــــــــــــــــــــــــــــــــــــــــــــــــــــــــ

بنُواعي أصبحَت دار الوَصي حَيدر
ونَعَت للفاجعة  الكعبة  بدمع  أحمر
وحِداد أعلَن عليهه  بجمرته المَشعَر
وبِچَى حَتّى الجَبل  لِمصيبة  الكوثَر

مُظلِم  حَيدرة  بِيتَه
دَمعه غَرّگ ٱلحِيتَه
نار  وشَبّت  برِيتَه
وبركان الحِزن صَدره

ـــــــــــــــــــــــــــــــــــــــــــــــــــــــــــــــ

لِيلة وَحشة هالليلة  شيِعَدّيها
تِرِد  بزينب  أفكار وتُوَدّيها
بحَنانه ودَمعِته الوالِد يِهَدّيها
الحَسَن يَمها يِصَبُّرها ويِفَدّيها

گالِلها  بدَمِع  يِنصَب
صَبراً يَختي يا زَينَب
أدري  بنارِچ  التِلهَب
ورَبنا  النافِذ  بأمرَه

ـــــــــــــــــــــــــــــــــــــــــــــــــــــــــــــــ

لِيلة علَلحَسَن مَصعَبهه هالليلة
يَتيم  ومِنهِدم مِنّ  الزغر حَيلَه
يِصِدّ  لوالِده  والمَدمع  ٱيسيلَه
يِكلّم خالقه وبالحَسرة  يِشكيلَه

بعَينه ضاگت الوَسعة
مگابل  والده  ويِنعَى
يِهمِل دَم على البضعة
ونارَه من الحِزن كبرَة

ـــــــــــــــــــــــــــــــــــــــــــــــــــــــــــــــ

أبو اليِمّة  حَزين  ونارَه  لَهّابَة
وعلى أمه البتول ٱدموعه سچّابة
رَحيل الوالدة الما حَسّب ٱحسابَه
يَتيم  وللزمان  ايوَجّه  ٱعتابَه

يِهضُم حاله أبو ٱسكينة
ولزينب  تِصِد  عَينه
تِبچي الصخرة لونِينه
فاگد يِجذِب الحسرَة

ـــــــــــــــــــــــــــــــــــــــــــــــــــــــــــــــ

هاي أول  مِسيّة  ٱتمُر بلا فاطِم
وتِبات العَيلة بهموم ودَمع ساجِم
لا  گلب  اليِهيد  ولا  جِفِن  نايِم
واحِد وَيّه  واحد  حِزنَه  مِتقاسِم

فراگ  الزهرة  أذّاهُم
وجَمر الحَسرة چوّاهُم
دنيا  وأگصَت  ٱوياهُم
بيت ومنشِعِب كسرَه

ـــــــــــــــــــــــــــــــــــــــــــــــــــــــــــــــ

حزينة  الليلة  سورة  هَل أتى والتّين
وتِنوح الكوثر وص وضُحى وياسين
على افراگ  أم أبيها  دَم تِهِلّ  العَين
ويِظل  مأتَمها  قائم  حتى يوم  الدّين

كِلهه  تِجتمِع  باچِر
يَمّ   الواحِد   القاهِر 
ويِفضَح كِل فِعل غادِر
وكِلمَن يِنعرِف قَدرَه

ـــــــــــــــــــــــــــــــــــــــــــــــــــــــــــــــ

بقلم الأستاذ / ستارعذاب الحچامي  .

صاحتلي وكالتلي _ عن الما يخطر عالبال
من اتكبرين بالخمسين _ تنشد بيدج راح احبال
كالت زينب مااوصيج * تكبرين الطف متانيج
///////////////////////////
انه وياهه _ نكعد نسولف _ تهل دمعهه
تسولف وتسكت _ كوه تتنفس _ من ظلعهه
ارفع جفوفك _ خويه خل ندعي _ عالصفعهه

متأذيه من ظلعي هواي _ لو بيدي ابد مااعوفج
كالتلي بس تكبرين _ ينشد حبل بجفوفج
يذبج زمانج بالشام _ بحسرة عزيز يشوفج

فاطمتي محيرتني _ بقمصانك تشتم يحسين
اسألهه وتكلي _ بعدين اهناك اتعرفين
راح الدنيه ادور اعليج *** تكبرين الطف متانيج
///////////////////////////

يمهه صاحتني _ تلمست متني _ وكلبي حاير
السوط والسطره _ هم يلوحني_ بيوم عاشر
تدري حته اسمي _ راح يتبدل _ خويه باجر

انطتني عبايتهه تكول _ بس بالسبي تلبسيهه
التصابح ابوجه حسين _ راح الرمح يعميهه
الما طلعت الباب البيت _ تنطي الجمر رجليهه

اتجوه واتحمل _ وامشي بدرب الما مسحوك
بس بهاي كلي شلون _ صعبه اعليه طبت السوك
تجيبج حسبه وتوديج*** تكبرين الطف متانيج
///////////////////////////

نطتني سبحتهه _ البيهه ريحتهه _ تكلي ذكره
وبيك وصتني _ من تودعينه _ بوسي نحره
حسين من يكبر _ يسحك الحافر _ ظلوع صدره

مفجوعه وادري تفهمين _ شنهو حجي المفجوعه
من اطشر الغالي الخيل _ تلمين اريد اظلوعه
ومسحي التراب يأذيه _ من ركبته المكطوعه

باالاامك واسهامك _ لو حاجيتك احجي وياي
تذبحني لو كتلي _ يازينب ما عندج ماي
جم موقف راح يبجيج*** تكبرين الطف متانيج
///////////////////////////
كون مااكبر _ حتى ماافكدك _ ياابو الاكبر
وكون مااشوفه _ بدمك ملطخ _ شيبك احمر
ركضتي صعبه _ اكبال شماتي _ خويه واعثر

امنيتي اظل انه وياك _ بهذا العمر يحسيني
انته يتانيك السيف _ وانه السبي متانيني
يضيعك عليه الدخان _ بس جيب اليدليني

اتمنه واتمنه _ عمرك كله تضل مرتاح
صدكني شما تكبر _ يكبر وياك الذباح
دمعج كالتلي يواسيج*** تكبرين الطف متانيج
///////////////////////////
حظرت روحي _ وحزمت صبري _ للمصايب
غربتي غربه _ ودهري ما يسوه _ بيه اعاتب
ثلث من عمري _ يخلص بلحظه _ بالخرايب

القهرتني طبت الديوان _ مامره اجتي ابالي
معقوله بت اهل البيت _ تبات بخرايب تالي
جتالك حسين الماي _ وانه الحزن جتالي

يتعبوني يعذبوني _ لا ام عندي ولا خوان
كالتلي هم يصير _ زينب عندج بيت احزان
شيب الحركه يبين بيج* تكبرين الطف متانيج
///////////////////////////
تمت ____ علاء الزيدي

(( #فتوة_أرهاب **))

……………………………………………………………

كلمة ( وإن ) اول فتوة ارهاب
لا عتره وامامه اليوم تنهاب
بدت من الضلع والمحسن ودمه
دستور و تطبّق جوره عاليمّه

……………………………………………………………

مرجعهم ابيوم الدار . اطلق هاي الحجايه
امير و للنواصب شيخ . لحرب آل الله دگ ثايه
اذا بالكفر اولى ابليس . هو اعليه صعد بايه
هو امراية الشيطان . و لله ام زينب امرايه

احجاية اطبّقت قول و فعل صار
نتيجتها ضلع و آهات بسمار
مكسوره وصعب حتى الهوه اتشمه
دستور وتطبّق جوره عاليمّه

……………………………………………………………

الـ ابراس الهرم يبدي . بعد ما عنده خط احمر
احجايه الذبحت الزهراء .سيف ويطبر بحيدر
اكو استاذ لابن ملجم . من قنفذ الدور انقر
يقلد خالد الـ بالسوط . خله الزهره تتعثر

حيدر ما يون من طبرة الراس
من عين ام حسن مجروح الاحساس
من عصرة الحايط بيه الف لجمه
دستور و تطبّق جوره عاليمّه

……………………………………………………………

اجت بت الخليفه النوب . احجاية ( وإن ) عادتها
(وإن )يعني الحسن گالت . اجنازة امنعت دفنتها
غيره وحسد للزهراء . ببنها الحسن ظهرتها
ما كفّاها ضلع الباب . اجنازه ابسهم ضربتها

هي استاذه و التلميذه جعده
سمّنه الحسن و الگبله جدّه
جيل ايوصي جيل ابحقد ويعلمه
دستور وتطبّق جوره عاليمّه

……………………………………………………………

لا تبقوا الـ اهل هالبيت . انعادت ( وإن ) بالعاشر
امس فاطمه اليوم حسين . والكاسر صبح ناحر
خاف الجذع ما يكفي . لبنها امحضّر الحافر
مثل طش الورد والهيل . جسم عالغبره متناثِر

( وإن ) محسن صگط بالجمر والنار
( وإن ) عبد الله من حر السهم فار
( وإن ) حدر الهدم ضماها عن امّه
  دستور و تطبّق جوره عاليمّه

……………………………………………………………

( وإن)عالأم حجاها اصهاك . وعالبت شمر عاداها
اسياط الضربت ام حسين . اعله متن ام عون رداها
من الغبشه جهّز نوگ . احبال اليسر مدّاها
مثل شّدة جرح مفتوح . ادين ام عون شدّاها

ادين الشعلت اعله ام الحسن نار
ردت و اعله بتها اتگاطف احجار
يزيد انطاها حقها اهواي هالكلمه
دستور وتطبّق جوره عاليمّه

……………………………………………………………

أميه و كل بني العباس . خذوا كلمة (وإن ) عاده
كل ايمام حكمه الموت . غَصب تتهجر اولاده
والملويه شاهد ضيم . بنوا طابوگ عالساده
  ابحبل مصطفى العذاري . داعش طلع احقاده

و اتصفگ فرح ربع الخليفه
مثل ما صفگت يوم السقيفه
ولازالت ( وإن ) عالشيعه متحزمه
دستور و تطبّق جوره عاليمّه

……………………………………………………………
✍️ ( سيد خضر الزاملي )**

((( #مـحكـمه**)))

……………………………………………………………

محكمه • بالسمه • نادو الشاهـد حضر
عالضلع • والدفع • احجي ياباب القدر
أنقـل للـعـالـم  صـوره
عن الطاغوت وجوره
محكمه •• محكمه

……………………………………………………………

انا باب الزهـره انا  • و الله كرمّـني بـشرف
و النبي اجلال اليه • يامـه عل عتـبه وگـف
كل صباح وكل مسيه • انتظر من عنده چف
وابرهه عگبك يـ طه • ابفيله عل كعبه زحف

خانتك • صحبتك • ما نفع بيهم مـلح
بالنكر • و المكر • كسروا الحيدر جنح
كـلها ادافـع مـأجـوره
عن الطاغوت وجوره
محكمه •• محكمه

……………………………………………………………

مـن هـجم كالوله فاطم • جاوب ابكلـمة و إن
جايب اثلث ميه واكثر • والحطب فوگ المتن
شـحه عـدهم بالمراجـل • مـركز الذل والجُـبن
والرجس حضّر شعلته • وللحرگ سرفـن ردن

يالعرب • باللهب • نحرگ الرافض علي
و المره • الثائره • هسـه لازم تصـطلي
تحجي الوادم مبهـوره
عن الطاغوت و جوره
محكمه •• محكمه

……………………………………………………………

مـن سمـع فاطـم ورايـه • ليّـه وجـه رفسـته
اثنين اديه اعـليه حطـهن • يدفـع بكـل قـوته
چن لحـد  وانشـل نفـسها • ياقسـاوت عصـرته
وصارت العصره ابضلعها • واسمعت طگ كسرته

للـصـدر • كالجمـر  • عده بسـمار الخشب
من وصل • للطفل • محسن اعليه انصلب
لاذت فاطم مـجـبوره
عن الطاغوت وجوره
محكمه •• محكمه

……………………………………………………………

چنه وحشي وبيده رمحه • بين الضلوع استقر
محـسن يحامي اعله امه • وانكطع منه النحر
الشمـس شافاها تصـرخ  •  للارض طاح الگمـر
لا مهد لا قطعه بيضه  •  عل الترب صار القدر

ياجرح • منذبح • عينه ما شافت ضوه
يا فجر • منعصر • ما عرف نسمة هوه
يشهد محسن عاشوره
عن الطاغـوت وجوره
محكمه •• محكمه

……………………………………………………………

شاهـدت منظر يخـلي • تنگلب ارض و سمه
قنفذ المايسوه عانه • بسوطه يضرب فاطمه
والرجس خالد صفعها • و النظر عـدها انعمه
ما تهم بس همها كله • يم علي حامي الحمه

خل علي • يرد الي • لو افرّع للدعه
لا بشر • لا شجر • كلها تبقى مروعه
اشكي الرب المعموره
عن الطاغوت وجوره
محكمه •• محكمه

………………… .................................……

ماتت الزهره و عذابي • مستـمر ليل و صبح
ابعين الحسين واخيه • شوفتي مراية جرح
زينب ازغيره و جرحها • يدي و الچمها ابملح
امي و بداري حمامه • و انت كسريت الجنح

ما گلت • عدها بت • تفگد امها ابهل عمر
و انفجع • بالدمع •  اگظي كل ليلي اليمر
ذكره و ظلت محفوره
عن الطاغوت و جوره
محكمه •• محكمه

……………………………………………………………
✍️ ( سيد خضر الزاملي )**

#تراث **موقف السيدة الزهراء روحي فداها في المحشر

فكر يا صحيح الـدّيـن بالبضعه ورتبتها
واخلص بالولايه زين واتبصّر شكايتها
ــــــــــــــــــــــــــــــــــــــ
صاحت يا عَـدِل ياللي ابكل اللي سدى تدري
اجهلو قدري واريد الـيـوم يارب  ينعرف قدري
يجيها النّدا من الجبار أمرچ بالحشر يجري
وتطب للحشر والاملاك ملزومه بطاعتها
ــــــــــــــــــــــــــــــــــــــ
للموقف تطب وتشوف كل واحد بعنوانه
امن ابعيد اليواليها بجبينه يلوح نيشانه
تلگطهم بعفو الله و تظل أمّة الخسرانه
وهَـبْـهَبْ تلگط الباقي وتْكَـرْدِسْـهُم بحفرتها
ــــــــــــــــــــــــــــــــــــــ
الموقفها بعد ترجع ويأتيها ندا الباري
أبوچ المصطفى والـزّوج قاسم جنتي وناري
الجنه بشيعتج دشي وقري اليوم بجواري
تجر ونه وعلى الخدين لازم تهل دمعتها
ــــــــــــــــــــــــــــــــــــــ
وتنادي احكم يرب الناس بيني وبين عدواني
خصوص البالجزل والنار جاني المنزلي عاني
واريد انـظر عزيزي حسين ذاك القرح اجفاني
ومن تنظر الشخص حسين اه ياعظم  صرختها
ــــــــــــــــــــــــــــــــــــــ
تنادي مهجتي يَحسين ياهو الگطع أوصالك
ظامي تنذبح يبني  وتگضي بالظما اطفالك
يبني والخيم بالنار شبوها على عيالك
وچم حرمه وطتها الخيل يبني اباب خيمتها
ــــــــــــــــــــــــــــــــــــــ
وتالي ترفع ايديها ومنها الچبد موجوعه
وتضج الرسل والأملاك والكل تهمل دموعه
تشوف ايدين مرفوعه وبيها چفوف مگطوعه
وتنزل غضبة الباري على أهداها بدَعوتها

الشاعر المرحوم ملا عطية الجمري**