Мувозанат бузилмасин...

Тутун ўрлаб булут бўлди
Инсоф дедим сукут бўлди.
Одамийлик унут бўлди
Сен паришон, мен-да ҳайрон.
Мувозанат бузилмасин,
Онажоним табиат...

Бугун бизни қуршаб олган
Синоатлар исканжаси.
Қаро бағрингга қоришган
Саноатнинг чиқиндиси.
Сен паришон, мен-да ҳайрон.
Бузилмасин мувозанат,
Онажоним табиат...

Тўрт қатор шеър битмоқ учун
Қоғоз излаб парчагина
Дарахт кесдим... барча гина...
Оҳ, ўзимдан ўтганмиди...
Нафас олгани йўқ ҳолинг...
Ўрмонларинг ўпкангмиди...
Онажоним табиат...

Қонхўрликка даъвоим йўқ,
Қон ичмайман, дедим-у, лек,
Сўрдим қора мой — қонингни,
Олтин, кумуш, олмос дея
Бағринг титиб тош қидириб
Оғритдимми тош жонингни,
Онажоним табиат...

Паймонангни тўлдирдим-у,
лек ҳолингни сўрмадим-ми,
Виждонимни ўлдирдим-у,
Бўм-бўш бағрингга кўмдимми
Қилғиликни қилиб қўйиб,
Сўнгсиз хаёлга чўмдимми...
Бузилмасин мувозанат,
Онажоним табиат...

05.01.2025.
Тошлоқ.

Абдул Боқий

https://t.me/Mohiyat_Abdul_Boqiy_ijodiy_kanal

Бузилган тарози...

Ёз бўйи тентираш бўлди юмуши
Панд бердими инстинкт, ички туйғуси
Қишда ухлолмаса айиқда не айб
Оч қоринга ахир келмас уйқуси...

Баҳор кетиб кузда келарди қарға,
Қағ-қағлаб юрарди қиш-қаҳратонда...
Йўлини тополмай юрибди ҳамон
Қирқ даража иссиқ, ёз-саратонда...

Бўриларнинг ҳамон ошиғи олчи
Қўрада кўп ҳали юввош қўзи-қўй...
Бўрибосар бир пас мизғиб олса бас
Овлоқда бошланар базму-жамшид, тўй...

Арслон ўрин олди қизил китобдан
Куни туққан сиртлон бе ор, бесубут...
Ола қанотларнинг даври келдими
Нега кўринмайди биронта бургут...

06.01.2025-й.
Тошлоқ.
Абдул Боқий

https://t.me/Mohiyat_Abdul_Boqiy_ijodiy_kanal

Халқона

Ўзим неки бўлиб бўлдим,
Тўкилдим, ҳам тўлиб бўлдим,
Ҳазонимни соғинган, дўст,
Ўлиб бўлдим, ўлиб бўлдим.
Гарчи яшаб бородирман.

Кўзларимдан тинмас ёмғир,
Бирам оғир, бирам оғир.
Кечалари мен ухласам,
То тонггача юрак оғрир,
Дилим, сендан хавотирман.

Сенга борсам, айт қандайман,
Ширин тушлар кўргандайман,
Ақлим билан келишмайман,
Ижарада тургандайман,
Ўз кўнглида мусофирман,

Тўрт тарафда кезар соғинч,
Юрагимни эзар соғинч,
Мен ўрганиб қолдим чоғи,
Энди жоним безар соғинч,
Манам Бобурман, Бобурман.

Ўлмасой Нишонова

05.01.2025

https://t.me/U_Nishonova

Ҳечдан кўра кеч...

Пул ёмон, одамни бузар, дейдилар,
Пулга муккангиздан кетманг, одамлар.
Пулни яхши кўриб бўлмас, дедилар,
Пулни яхши кўрган яхши одамлар...

Қулоқ солиб, ҳар дам қаноат қилдим,
Мол-дунё ортидан чопмадим асло...
Фарзандлар тўлдирди қучоғим бугун,
Рўзғордай тўлмас ғор топмадим аммо..

Кам ортидан камлик келар галма-гал
Бир-бирини қувлаб, қуритиб тинкам...
Бошимни ўрасам оёғим очиқ ...
Чопоним йиртиғ-у, калтадир кўрпам...

Ёшим ҳам элликка етай деб қолди,
Бирим икки бўлмай толди мадорим,
Ҳали у кам дейди, ҳали буни кам,
Кўзимга мўлтираб қарар аёлим...

Картошка-пиёз ҳам, ун, ёғ, ҳатто сув...
Туз ҳам пул тураркан, гугуртдан тортиб.
Косанг оқармаса қийин эканда...
Оқ яктак киймадим, рўзғордан ортиб...

Пул ёмон, одамни бузар, дердилар,
Болаликдан пулни ёмон кўрардим...
Ўрганган кўнгил-чи, ўртанса қўймас...
Пулдорларнинг рангин сомон кўрмадим.

Миллиардер бўлишни истамайман-у,
Миллиардларим бўлса йўқ демас эдим.
Камбағал бўлишдан зерикдим чоғи,
Энди сафингизга қўшилгим келди...

Пул иши — иқтисод — бу ҳам бир билим
Эканин англадим сал кам элликда...
Уқиб-ўрганиш ҳам керак эканда
Иқтисод илмини шўх болаликда...

Бой бўлгим келмоқда, Ҳечдан кўра кеч...
Илмга — сўздан то Ал-Жабргача...
Бежиз айтмаганлар, яхши одамлар —
Илм ол бешикдан то қабргача!

Илм ол бешикдан то қабргача...

02.01.2025-й., с. 23:45 мин.

Абдул Боқий

https://t.me/Mohiyat_Abdul_Boqiy_ijodiy_kanal

Ассалому алайкум ва роҳматуллоҳи ва барокатух! Келаётган янги йил ҳаммамизга ҳайрли ва барокатли бўлсин!
Юртимиз тинч, осмонимиз мусаффо бўлсин!

https://t.me/U_Nishonova

Ассалому алайкум ва роҳматуллоҳи ва барокатух! Келаётган янги йил ҳаммамизга ҳайрли ва барокатли бўлсин!
Юртимиз тинч, осмонимиз мусаффо бўлсин!

https://t.me/U_Nishonova

Ўринсиз Дунё

Дунёнинг дардида сарсон дунёсан,
Қадринг йўқ, қадрдан арзон дунёсан.
Менинг дунёимда ўрнинг йўқ сенинг...

Ишқдан бино бўлган мендаги дунё,
Дунё йўқдир менда, ишқим бир дунё...
Ишқим дунёсида ўрнинг йўқ сенинг...

Қўй, Дунё, мол-дунё асли у надир?
Ҳунар бил, ҳунардан дунё унадир.
Ҳунарда илмдир, илм бир дунё,
Илм дунёсида ўрнинг йўқ сенинг...

Билки, Менинг дардим одамгарчилик
Диёнатдан агар йўқ сенда асар...
Ҳақиқат деб ёнар менинг дун, дунё,
Ёлғонга бўккансан, ўрнинг йўқ сенинг...

Билки, ҳақиқатни айтолган инсон,
У менинг дўстимдир, чин дўст У, ишон,
Ва яна дўст менга тақдирим азал,
Эзгуликка чорлар Китоб, куй, ғазал,
Дунё, ҳеч бирида ўрнинг йўқ сенинг...

Ва яна чин дўстдир ота-ю, она..
Бу дўстлик қўрғони тотув оила...
Борлиқни яратган Аллоҳ ягона
Расуллари дўстдир. Бир сен бегона
Ўртамизда асло ўрнинг йўқ сенинг...

Кўзимни тўлдирган, дунё, Кўзим тўқ...
Кўнглимда ўрнинг йўқ, бир сенга жой йўқ.
Гар чиндан дўст бўлсанг, кел, ёнимда тур,
Майлига, ҳамиша чўнтагимда юр...
29.12.2024-й., с. 20:55 мин.
Тошлоқ.
Абдул Боқий

https://t.me/Mohiyat_Abdul_Boqiy_ijodiy_kanal

Таҳрирсиз шеър...

Куз — саҳоватпеша...
Юзлари қизарган олмани тишлаб
Кўз ташлайман...
жилмайиб...
Ёқутларин кўз-кўзлаб...
Ўзига чорлайди
Қорақай анор
Илҳомим жўшади...
Шеърлар қоралайман...
Янгидан янги...
Садо бера бошлар туйғуларим жаранги...

Куз..
Ҳазонрезги...
Қовжираган барглар...
Шамол шовуллайди
Тўзғийди ҳислар...
Гугурт ...
Ўрлайди, ўрмалайди тутун...
Энди томорқам топ-тоза...
Кайфиятим чоғ...
Дилда қолмади ҳижиллик, тугун...
Куз...
Сокин фасл...
Сокин тун...
Тушимга кирибсан...
Она табиат...
Бошингда сап-сариқ рўмолинг...
Эгнингда...
кўкимтир кўйлак...
ис газидан тикилган ...
Ялонғоч дарахтлар оҳ чекар...
Маюс кўзларингдан тинмай оқар ёш...
Шамол шовуллайди...
Дилдирайсан, титрайсан тинмай...
Э-воҳ!
Ёқиб юбордимми ёпинчиғингни...
27.11.2024-й., с. 21:51 мин.
Чоршанба. Тошлоқ.

Абдул Боқий

https://t.me/Mohiyat_Abdul_Boqiy_ijodiy_kanal

https://t.me/U_Nishonova