فرحان فرحان بالولاده

يا حبيبي الغالي هالعشك يحلالي طفح بحر امالي يابو صالح
وبهواك العذري كلبي هايم تدري رخصتلك عمري وبيك رابح

مشتاك مشتاك كلبي ناده
فرحان فرحان بالولاده

حلوه كمرت ليلي وشوكي ضل يحجيلي راح اصيح بحيلي اهواي احبك
عطرك اشتميته والكمر ضويته والورد طشيته عله دربك

مبروك مبروك هالسعاده
فرحان فرحان بالولاده

فاحت ارياحينك وعيني تربي العينك يبو صالح وينك هاج الاحساس
الشمعه ضويناها وحنتك جبناها الرايه علكناها بصحن عباس

وسلطان سلطان القياده
فرحان فرحان بالولاده

يمك اتعنينه وعالنبي صلينه جم ضرف ودينه بشاطي الآمال
الدنيه يا مولانه بمولدك فرحانه الكمر غنه ويانه عبر الاجيال

هاليوم هاليوم الله راده
فرحان فرحان بالولاده

عيني يمته اتشوفك غازليت اطيوفك انه لا ما عوفك كلبي ناداك
عايش بوجداني وحيرت اذهاني يلي ما تنساني اشلون انساك

تنهاب تنهاب كل اراده
فرحان فرحان بالولاده

اشكد جميله اوصافك وينسه همه الشافك خسر كلمن عافك الله يشهد
يمته ترجع لينه امن الهجر ملينه كافي تكطع بينه نحمل اشكد

مولاي مولاي عندي عاده
فرحان فرحان بالولاده

تمت
تحسين الخفاجي

يعباس حبيتك حبيتك
يعباس وهويتك وهويتك
يا نبض دلالي // ماكو مثلك غالي

هليله خل يحله السهر
وجهك مثل فلقت قمر
اسمك بدلالي انحفر
عطشان الك وانت النهر
هالكلوب ولهانه ولهانه
والعيون سهرانه سهرانه
هالعشك يحلالي // ماكو مثلك غالي

صوت الموالي يعتلي
يالبيك كل هم ينجلي
انته حبيبي الاولي
جنك علي وشابك علي
الفرح لاح بعيونك بعيونك
والعكل صار مجنونك مجنونك
عذبيت احوالي // ماكو مثلك غالي

يمك خفك طير السعد
وحسين هز بيده المهد
راعي الوفه اليوم انولد
واعليك اخاف من الحسد
فرحانين بعيادك بعيادك
ضوه الكون ميلادك ميلادك
الدنيه بيك اتلالي // ماكو مثلك غالي

زينب سعيده بشوفتك
عدها جبيره معزتك
جابت بديها رايتك
وحطت بحضنك جربتك
بالجفوف توميلك توميلك
وعالطفوف تحجيلك تحجيلك
خلي راسك عالي // ماكو مثلك غالي

هليله ضوينه الشمع
وعالكون ضل نورك يشع
بيك الامل ما ينكطع
اصوات الهلاهل ترتفع
بايعناك بدمانه بدمانه
والاملاك فرحانه فرحانه
دوم سورك عالي // ماكو مثلك غالي

تمت
تحسين الخفاجي

مواويل وهوسات للشعبانيه

بطاقه للعباس ع

انه يا عباس احبك من زمان
وكلبي بمحبتك يبو الغيره ارتوه
والهوه الما جاب ريحه أمن الضريح
هذا يا عباس ما سمي هوه
ومن كثر ما شايل امروه وثكيل
يابو فاضل عالجرح تنحط دوه

هوسات للعباس ع

اريد افرح وعيد طش بيدي الياس
واقره أجمل قصيده بمولد العباس
هذا الهد رسنها وطكها رأس براس
ودخيلك صاحتله الحومه

نزل ليها أبو فاضل والحرب صفنت
وسره اعله الموت خلالها الزلم لزمت
ويله النيته صاح بكربله اختلفت
واليحجي اليوم اسحك راسه

بطاقه للحسين ع

انه عاشك والعشك خلاني اهيم
وبالغرام المركز الأول خذت
حسين مدرسه الوفه وسر الحياة
وأنه من عنده الأصول اتعلمت
امي صاحت يا علي بوكت الطلوك
ويا حسين انه بعلو صوتي صحت

هوسات للحسين ع

يحسين الملائك كلهم اتعنوك
وضل حته الفراش امكابل الكاروك
وسليمان كلالك الف مبروك
وامعيد جبريل الليله

يحسين انته غالي واغله من غالي
وبسمك ضل يدك كل ساعه دلالي
ويحلالي السهر هليله يحلالي
والدنيه اليوم امضويها

بطاقه للاكبر ع

بمولد الأكبر سرح تدري الخيال
وكام يخفك عالمهد طير السعد
زينب اتكمطه وتصلي اعله الرسول
وكل وكت تقره الفلق عن الحسد
والله لو نسوت مصر موجوده جان
ينغمي اعليها وتطيح اعله المهد

هوسات الأكبر ع

بوصافك يالاكبر حارت الأفكار
ومن شدت جمالك حته يوسف غار
الليله بمولدك تتغازل الأقمار
والحور بحبك ولهانه

شع نور الهداية والنجم أزهر
ومثل هيبة محمد هيبه الأكبر
الورد من شاف حسنه صفن وتحير
ومن نوره شمس الله انخلقت

بطاقه للسجاد ع

كلبي يالسجاد ضل ينشد عليك
وروحي من كثر العلل متمرمره
انه شايلك عشك فاق الخيال
والحنان البي ما تتصوره
انته كبرك جنه وايشافي العليل
والمريض ايطيب لو شافك تره

هوسات للسجاد ع

شهر شعبان اجانه وهلت الأعياد
وغمرتنه السعاده بمولد السجاد
اجت حته الطير اتريد منه امراد
ولو ضاكت بيك اتعناله

بده عكلي يعالم بالعشك يسرح
وللسجاد كلبي اشلون ما يفرح
الكمر بثياب عيده ايريد يتوشح
وتغازل بالكمره عيونه

انته نور الله الذي بي يستضاء
وانته يالمهدي الوتر والبسمله
بيك شمرت حيدر وزعل الكفيل
وبيك يالموعود كل المرجله
اتكطع اكماطك جنت لو كمطوك
يمكن اشتميت ريحه كربله

هوسات للمهدي ع

هليله الفرح لهل المكارم حان
والكون ابتهج بخمس طعش شعبان
انولد هليله راعي الغيره والايمان
والناس امعيده ووفرحانه

انه خيري جثير وتدري متبدي
وضل طول العمر متمسك بعهدي
افدي منحري وما عوفن المهدي
واليته وجددت البيعه

تمت
تحسين الخفاجي

مجروح كلش علي وبجرحه اذاني
يابير كلي تون من تسمع احزاني
عالزهره من هظمته يحجيلي عن حالته ما تنحمل كسرته وبجرحه اذاني

حيدر بير وانه البير ومحد يعرف اشجواي
حيدر بيه مدري اشاف وطاحت دمعته فوكاي

اول مره اشوفه ايذب النكاب
وابو تراب اعله راسه ايهيل التراب
القالع باب كسرو ضهره بالباب

يا بير تدري بعلي بكسره كلب جايك
شيصير بيك اعترف لو فاركت مايك
هز راسه شفته ورجع ومن صدره كلبه طلع وكبالي نوحه ارتفع وعالزهره بجاني

خذت حيله مصايبها وفلا ينعدن جروحه
حيدر يمشي بس اخيال ودافن بالكبر روحه

وامبين علي امن الدنيه متعوب
والمحبوب فارك اغله محبوب
تره حيدر دمعته امبلله الثوب

من فاطمه الفاطمه خضر علي شيبه
راحت بعد زهرته والراح شيجيبه
وياها عشرة عمر وراحتها صار الكبر ضل يبجي باب الصبر والنور عافاني

بين الباب والحايط هظيمه الزهره عصروها
الخادم بيتها جبريل اعله خدها اشلون سطروها

دفعها الظالم وضيع هواها
وره الباب انتهت والدم خذاها
اعله محسن طاحت وزينب وراها

البسمار صاب الضلع والعصره اذتها
عكب النبي فاطمه الاصحاب ظلمتها
عالباب لمو حطب وحته الله منهم غضب موت الزجيه كرب وتشمت الجاني

انه البير بير اسرار اليسولفلي اضم سره
بس حيدر يكلي احجيه سري ولازم اتنشره

يصيح امن الالم حاجيني يابير
علي بلا فاطمه جا كلبه شيصير
وكف عالمغتسل وبناظره ايدير

خلاني صاحب اله ومن دنيته ايعاتب
وطبع اليصاحب صدك ما ينطي بالصاحب
سولفلي سره وبجه وحيدر عليه انتجه البير انترس من حجه وزيدها نيراني

علي كتله ولا تهتم يبعد البير وعيونه
هاي الناس ما ترحم اليخاويهم يذمونه

الملح شتحطله ووياهم يغزر
بس تكضي شغلها الناس تنكدر
حكك يا علي من تجرع المر

الناكر جميلك علي معروف شيطانه
لو مو وصيت النبي ما وصلو اهنانه
ناسك شفت باعتك والدنيه ما نصفتك بيرك سمع ونتك يا مالك احساني

تمت
تحسين الخفاجي

ثلاث دكات

اضلوع الزجيه اشلون. كسروها بالباب
وانته القلعت الباب. بيدك يبو اتراب

بكل حيله اجه وعالباب خصمك عصرها
وياحيدر البسمار. صوب صدرها
وبقوته اعله العين. رد وسطرها

ودار النبي المختار. حركوها الاصحاب

عندك علم بالصار. هجمو عليها
ماتت عصر والنار. تسعر بديها
وام الحسن كل حيل. ما تلكه بيها

طاح الضنه وما طاح. من عدها الاحجاب
*--
وكت الحروب نشوف. جانو يرجعون
ومن الرسول ايصيح. كلهم يلبدون
بس انته للميدان. تبرز يعرفون

حيدر الك صفين. تشهد والأحزاب

ميت علي يكولون عكب الشهيده
وبالكوه طاست ماي. يلزمها بيده
تتسند اعله الكاع وانته الصميده

بعده الجرح لليوم. عالزهره ما طاب

وينك يحامي الجار. يالتحمي جارك
ما تنحط اعله البال. محروكه دارك
وانته انعرف جبريل. حد ذو الفقارك

دخن يراعي الزود. سيفك بالكراب

انته علي ولولاك. ما قام السلام
بعد الوصيه اعداك شو صارو ازلام
لو زلم جان وين ذنيج الأيام
هجمو لان يدرون. معروفه الأسباب

تمت
تحسين الخفاجي

هيه زينب زينب

الدنيه كلها تنورت بعيادها
عمة الساده هله بميلادها
كلشي يصفن لو نعد امجادها
تموت خل اهل الحقد بعنادها

نعلك شموع الفرح والكلب همه نشرح
زينبي العالم صبح وبالارض كلشي وضح

هاي زينب والحجي عنها يطول
اليوم بالميلاد فرحان الرسول
كمطتها الحور بكماط البتول
بالعقيله احتارت اصحاب العقول

بالضبط تشبه علي هيه روحي وكل هلي
بيها كل همي ينجلي صوت حبنه يعتلي

بزود اخوها تزامط المهيوبه
الله ميزها شكثر محبوبه
من عشكها ما اكول التوبه
والتبعها الباري يمحي اذنوبه

هيه باء البسمله والاميره بكربله
والمسير اتكمله هله بزينب يا هله

من العفاف ايغار ضل حته الكمر
ماكو شاعر شفنه وصفها كدر
وياها تتمنه الشمس تاخذ صور
بليله الميلاد خل يحله السهر

واخت سبع الكنطره هيه ستر الله تره
بيها تحلف كل مره هله بغيرة حيدره

علي بيده امن المهد شالاها
والحسين بضحكته ناغاها
والحسن بعيونه يحجي وياها
الله زينب بالسمه سماها

والكواكب هلهلت والنجوم اتزينت
والطيور اتباركت اباب زينب عيدت

تمت
تحسين الخفاجي

ودوني لخوتي بساع ودوني
اريد اعله الجفوني اعميهن عيوني

انه ام الخدر ما تخلص احزاني
اجيت الكربله ومضيعه اخواني
شو محد فتح كبره وتلكاني
تدرون المصايب غيرت لوني

اسيره وعالوجن تهمل دموع العين
وكلها اتكلي زينب وين وجهج وين
وصيح بحيرتي ودوني يم حسين
من الناكه ارمي بنفسي خلوني

اجيت اعله الهزل والناكه بيه تميل
ودرب الشام يخواني يهد الحيل
انه حرمه وغريبه اشلون انام الليل
امشي وروسكم بيها تحرسوني

اشلون الماي اضوكه وراح طعم الماي
درب الشام اخذ يحسين مني اهواي
رقيه ما جبتها الكربله وياي
بالشام ادفنتها وخابت ضنوني

افتر بالمكابر والدمع يجري
وفراك الحنين اشكد كسر ضهري
ما ادري اروحن وين ما ادري
بكبر ابن امي اصيح بعبره دلوني
**"
تمت
تحسين الخفاجي

شكر من زينب الكم يالخدمتوها
تكلكم هالمجالس لا تعوفوها

بس هالليله والموكب تطيحونه
وباجر فارغ الموكب تعوفونه
السواد اشلون بيه من تنزلونه
ما قصرتو والخدمه حييتوها

احضر للمجالس انه يوميه
وتلكاكم اباب الحسينيه
الطم عالوجه وضلوعي محنيه
غريبه اليوم زينبكم تعرفوها

تعبتو والتعب ما اثر اعليكم
باجر بالحشر رايح نجازيكم
حسين بدفتره سجلها اساميكم
رايات المواكب دوم ارفعوها

اريد الباري ما يحرمكم الخدمه
مو كل واحد ايحصلها هالنعمه
بخدمتكم نصرتو حسين ابو اليمه
افرح من اشوف الدمعه تجروها

كضت جنها وبعد كلمن يرد لهله
وكل خادم بجه وشفته اختلف شكله
غيور وما يريد الموكب ايحله
ودمعته بطارف عيونه يشوفوها

بعد راح انتظركم للسنه الجايه
يعني الفركه راح اطول اهوايه
تره الزهره الزجيه تحب القرايه
واسوها ببنها حسين واسوها

مشكورين ما قصرتو ويانه
الما خدمة لبو السجاد خسرانه
بس اهل المواكب كلها ربحانه
يلي اعماركم النه نذرتوها

تمت
تحسين الخفاجي

خدم خدم نتباها خدم خدم

راية عشگنه بكربله شلناها
والخدمه يمك صارت اشمحلاها
النيه بصحن عباس صفيناها
وكلمة احبك بس الك كلناها

يماكو بحلاتك
وتحير صفاتك
حلفنه بغلاتك
بهواك نرزقنه

تره احنه مجانين
نحب بس الحسين
وبالخدمه ماضين
بمحبتك صدقنه

علم علم نرفعلك علم علم
خدم خدم نتباها خدم خدم

ماكو احله يبن الزهره من خدمتنه
ملاجنه وتعرفنه من طيبتنه
يحسين كلش تختلف طينتنه
ومولاي شفنه بموكبك راحتنه

خدمتك سفاره
وتدلي الحياره
نسيم الزياره
نشمه بضريحك

ركبنه السفينه
وعبرنه ونجينه
واذا قصرينه
العذر نستمحيك

قيم قيم تتفايض قيم قيم
خدم خدم نتباها خدم خدم

يحسين احبك ما احبن ثاني
انه امن اضيع بحضرتك تلكاني
اسمك حبيبي يسري ويشرياني
طبيت يمك والله كلشي انطاني

عشگتك لانك
جزء ماكو منك
حرت شحجي عنك
ملكت المشاعر

قريبي وحبيبي
ولكيتك نصيبي
يجرحي وطبيبي
يكحل النواضر

قسم قسم ماعوفك قسم قسم
خدم خدم نتباها خدم خدم

تحاربني ليش وجاهل تسميني
وين الضرر من الطم اعله حسيني
دينك الك خليه وانه بديني
بالدنيه بس حسين تارس عيني

احبن خدمته
وابد ما تركته
حبيبي وعشكته
حجيت الصراحه

شفت عقلي كامل
لان رايه شايل
وغيض المقابل
اللطم عندي راحه

نعم نعم نادينه نعم نعم
خدم خدم نتباها خدم خدم

هوه اليحب مفضوح من عيونه
والحب الحسين وعلي خيعونه
اهل الوصف ما كدرو ايوصفونه
ونور الحسين بكربله يشوفونه

يهل الناس احبه
وعشگ روحي اكتبه
الوقت صرت احسبه
وحسيني هويتي

بهواه كلبي هايم
وصرت لجله خادم
ابكل المواسم
مصدر قضيتي

رسم رسم كل عاشك رسم رسم
خدم خدم نتباها خدم خدم

تمت
تحسين الخفاجي