أكثر من رائع
لا يفوتكم اصطحابه في رمضان بإذن الله

مهم جدًا
لا يفوتكم سماعه خلال تلك الأيام

إلى أين يا صغيرتي، رحابة الأرض لم تعد تسعك؟!
من فلاة إلى أخرى، بحثا عن مأوى هانئ بعيدا عن أصوات الصواريخ والدبابات.
كل البيوت تهدمت، وسادتك كافية لزحام أفكارك الثقيلة ورأسك الصغير!
ألا لله الأمر، وحسبنا الله ونعم الوكيل.

والمهم دلوقتي إن ربنا يشوفنا في مكان السبب، ومش مهم النتيجة
وسواء لقيتها أو لا.. إنت عبد لله سلم لأمر الله وخليك عارف إنه هو ده الخير ليك
وده... كان رابع درس اتعلمته: اتوكل على الله واسعى ولو استحالت الأسباب
———————————————————————————
رجعنا لنفس المكان اللي ضاعت فيه.. باب 72
وسألنا تاني ولفينا تاني وملهاش أي أثر
ومن التعب ( مشينا كتير جدًا يجي 3 ساعات ده غير إن العمرة نفسها متعبة ) قعدنا وسندنا ضهرنا على حيطان الحرم .. ويعتبر فقدنا الأمل
لقيته بيكسر الصمت وبيقولي: إنت مش قلتلي إن موبايلك نوعه آيفون؟
قلتله آه.. قالي طيب ما فيه خاصية اسمها البحث عن آيفون ما تيجي نشوفها
وبالفعل قمنا واستأذنت عسكري في الآيفون بتاعه عشان أسجل حسابي وأشوف موقع الموبايل
وسبحان الله لقيت الموبايل قريب جدًا من مكاني.. بس لسة مش عارفين نوصله بالظبط

ربنا وقتها سخرلي غير العسكري ده 2 تانيين يساعدوني وفتحولي موبايلاتهم ويدوروا معايا
لحد ما لقينا موقعه بالظبط عند عربيات الزبالة اللي بتكبس الزبالة في وش باب 72 مباشرةً

يعني كل ده كان قدامي
بدأ الأمل يرجعلي.. وفضلنا نرن عليه وندور عند عربيات الزبالة لحد ما سمعنا صوت.. وأخيرًا لقينا الشنطة!!!!!

سجدت لله شكر ومصدقتش إني لقيتها.. وحضنت كل اللي ساعدوني وبوستهم ودعيت للعساكر

ولقيت أحمد بعدها بيقولي: ياخي سبحان الله.. أحسب أنك عزيز عند الله!
قلتله: أنا؟ ياعم متقولش كده بالله عليك
قالي: لما ربنا يسخرلك كل الأسباب دي تعرف إنها رسالة من ربنا إنك عزيز عنده
ربنا سخرلك كام واحد من عباده وسخرلك غباء السارق إنه مقفلش الموبايلات ولا قفل النت
وغيرها حاجات كتير كل ده عشان تعرف قيمتك عنده
وما يعلم جنود ربك إلا هو
ولقيته قال دعاء:" اللهم يامن فرجت عن عبدك هذا في الحرم فرج عني "
وعرفت منه إنه بيدعي الدعاء ده على طول من ساعة ما سابني

وبعد أربع ساعات بحث.. في تمام الساعة 3:30 جه وقت إني أودع الراجل اللي مشي معايا 4 ساعات من غير ما أعرف اسمه حتى
سألته عن اسمه وعرفت إنه من المنيا ( اللي كان منها بالمناسبة أطيب وأجدع صحاب عرفتهم في الجيش ) وطلبت منه رقمه وسجلته في الورقة فوق زي ما انت شايف وأصبحنا أصدقاء ولله الحمد وهو موجود عندي وهيشوف البوست ده بشكل صامت لأنه طلب عدم الظهور بأي شكل

وأهم درس استفدته من الموضوع ده
إني حرفيًا مليش غير ربنا
ضاع مني كل حاجة حرفيًا وكان ممكن أترفد من شغلي، وكان ممكن تضيع عليا تذكرتي، وتضيع مني فلوسي وكنت مش عارف أي حد حواليا حرفيًا
لكني.. لقيت إني فعلًا مقداميش ملجأ غير ربنا
فـ لجأت له سبحانه..
وحسيت إنه الحكمة من الموضوع ده إن ربنا بيعلمني بالعافية إني مليش غيره وإنه مالك أمري أوله وآخره من رزق وزواج وغيره

أكيد فيه دروس أكتر من كده بكتيييير
ولكن أنا قلت الحاجات اللي حسيتها من وجهة نظري لوحدي

بس صدقني: لازم تعرف وتتأكد.. إن مهما عظم البلاء ولو حتى لا قدر الله سُجنت ولا اتعزلت في أقصى الأرض لوحدك ومفيش مخلوق حواليك
مش هيبقالك ومش هيآنس وحشتك ولا هيطمنك غير رب العالمين
إحنا ملناش فعلًا غير ربنا
فاللهم لا تعلق قلبي إلا بك.. ولا تجعل حاجتي ودعائي وذلي وافتقاري إلا إليك

لك أن تتخيل إن الورقة اللي إنت شايفها دي
كانت كل ما أملك في حياتي حرفيًا في نفس المكان ده بالظبط
والشنطة اللي جنبها دي كان فيها كل حاجة تخصني بالمعنى الحرفي
وبفضل الله ورحمته على عبده الفقير
وبكثرة " لا حول ولا قوة إلا بالله " والصلاة على النبي صلى الله عليه وسلم ( الصلاة الإبراهيمية )
وبتيسير الله لي بمساندة أخٍ لم أكن أعرفه اسمه أحمد
فرج الله عني ما نزل بي

يوم الأربعاء 13/11/2024 - من الساعة 11:30 مساء إلى الساعة 3:30 فجرًا
المكان: الحرم المكي الشريف - باب رقم 72

كنت رايح أعمل عمرة بليل بعد شغلي وكنت نازل مصر بعدها بيوم لظرف مؤقت
خلصت عمرتي ولله الحمد وقبل ما أحلق شعري أو أتحلل من إحرامي
كنت جايب معايا قزايز صغيرة أملاها مية زمزم لأهلي

وأثناء تعبئة المياه، عمال الحرم كانوا بينظفوا وطلبوا مني أطلع دقيقتين وأرجع
طلعت وللأسف نسيت الشنطة الصغيرة دي عند مبردات المياه بتاعت زمزم

الشنطة كانت تحتوي على:
موبايلي الشخصي - موبايل الشغل - محفظتي ( اللي فيها إقامتي ورخصتي والفيزا بتاعتي ) - ومفتاح عربيتي
وحتى لبسي مكانش معايا

يعني حرفيًا بضياعها.. أنا اعتبرت نفسي ضايع
واقف كل أملكه هو إحرامي اللي عليا والشبشب اللي في رجلي
غير إني في بلد تانية ومش حافظ رقم أي حد فيها لأن الأرقام كلها مسجلة على الموبايلات

بدأت أدور وأعلي صوتي وأسأل كل اللي حواليا زي المجنون ومش لاقيها
لحد ما ربنا وقفلي رجل اسمه أحمد.. يعلم الله أني أحبه في الله وأتمنى له من الخير أكثر مما أتمناه لنفسي
الراجل ده بصلي وسمعني وأنا بقول: أنا الشنطة دي فيها كل حاجة
أنا كده ضيعت خلاص
لقيته رد وقالي: ضيعت؟ متقولش ضيعت دي
إنت راجل مسلم وفي بيت ربنا.. ربنا معاك مستحيل تضيع
=== وده .... كان أول درس اتعلمته: مفيش حد معاه ربنا بيضيع
———————————————————————————
وبدأ يعرض عليا المساعدة
وطلع من جيبه 75 ريال ( كانوا كل اللي معاه وهو جاي من مصر أصلًا والمفروض إني أنا اللي مقيم في السعودية ) وقالي خليهم معاك انت هتلاقيك معكش فلوس خالص
ويدور معايا على حلول ويسأل معايا كل اللي حواليا من عساكر وعمال ومشرفين الأبواب
وطلبنا من واحد منهم الموبايل عشان نرن على الموبايلات.. بيرن بس محدش بيرد طبعًا
وطلبنا منهم حد يفتحلنا نت لأنه مكانش معاه نت
وخلاني أفتح فيس من عنده والرقم الوحيد اللي لحقت أجيبه هو رقم زميل شغل معايا اسمه ( شادي ) وزي ما انت شايف اسمه متسجل في الورقة
بعد كده لما لقاني بقالي كتير بدور في نفس المكان قالي بلاش نفضل قاعدين كده تعالى نقوم نسعى ونسأل في كل حتة
=== وده.... كان تاني درس اتعلمته: المصيبة حصلت خلاص يلا نشوف حلول
———————————————————————————
سجلت رقم مشرف الباب اللي قاعد عند باب 72 في الورقة اللي قدامك
وقلتله هلف وأسأل في المفقودات وأجيلك وهرن عليك لو عرفت
بدأ أحمد ربنا يباركله يدور معايا على حلول زي: هتعرف تطلع بدل فاقد للإقامة
العربية أكيد ليها مفتاح سبير
الموبايلات ممكن تشتري غيرها
لحد ما وصل للفيزا: قالي فيها فلوس كتير؟
قلتله: آه طبعا
قالي يلا نوقفها بسرعة
وبالفعل وقفنا عسكري أمن وطلبنا منه نتصل على البنك.. طبعًا البنك في البداية مصدقنيش لأني مش فاكر أي بيانات للبطاقة بس أنا فضلت أحلفلها إنه أنا وكل حاجة ضايعة مني حتى الموبايل.. وبالفعل وقفت الفيزا الحمدلله
لقيت أحمد.. بيسجد لله شكر!!!
المنظر ده كان أول مرة أشوفه في حياتي.. إنه حد يكون شايل همي كأنه همه هو!
وده.... تالت درس اتعلمته: إن أخوة الإسلام الحقيقية.. أن تفرح لفرح أخيك، وتحزن لحزنه
———————————————————————————
دخلنا الحرم عشان نوصل لمكتب المفقودات وقسم الشرطة لأنه الناحية التانية من الحرم عند باب اسمه باب المروة ومسافة كبيرة جدًا عشان نوصلها
عدينا من قدام الكعبة لقيت أحمد وقف استقبلها عشان يدعيلي
كان المشهد أشد هيبة في نفسي من مشهد سجوده شكرًا لله من أجلي
وفضل يذكرني إني أستعين بالله وأذكر الله وأدعي أن يرد الله علي ضالتي
ودخلنا المسعى.. وعند مكان الجري قالي تعالى نجري اتباعًا لسنة النبي صلى الله عليه وسلم ( مع إننا كنا خلصنا عمرتنا خلاص )
لحد ما وصلنا أخيرًا عند مكتب المفقودات وسألنا فيه قالنا روحوا للمخفر ( الشرطة ) وسألنا هناك وسألنا في كل حتة وللأسف ملهاش أي أثر ومفيش حد قدر يساعدنا
مشيت من هناك فاقد للأمل خلاص
لقيت أحمد بيثبتني وبيقولي: إنت فاكر إن أنا جاي لحد هنا عشان مستني عبد من عباد الله يساعدنا ؟
لا إحنا جايين هنا عشان ربنا أمرنا بالسعي.. إحنا ربنا شايفنا وشايف سعينا
توكلنا عليه وسعينا في الأمر وهو سبحانه قدّر إننا لحد دلوقتي منلاقيهاش

.
في 2011 تقريباً الشيخ يعقوب في درس من الدروس كان قال جملة كانت بالنسبة لي غريبة لكن حسيت بواقعيتها دلوقت، الجملة معناها "مش بالنص" (الواحد فرحان أن عدد المنتقبات زاد، بس ليه فيه منتقبات كتير جداً في الشارع بالشكل دا؟)

الجملة وقتها معناها مكنش مفهوم بشكل أعمق زي ما أنا فهمتها من بعد ظهور السوشيال ميديا..
• ليه فيه منتقبات كتير في الشارع؟ من باب أن بقى فيه تساهل في الخروج من البيت لحاجة وبدون حاجة؟
• ليه فيه منتقبات كتير على السوشيال ميديا والريلز؟ وأحياناً بتكون مقاطع عليها معازف وموسيقى!
• ليه فيه منتقبات كتير في فيديوهات فيها هزار حتى ولو كان بنات مع بنات وضحك وخفة دم ولو كانت من تحت النقاب؟

النقاب سُترة، النقاب حجاب: والتساهل في الظهور على وسائل التواصل الاجتماعي بمجرد صورة دا ضد مفهوم النقاب، فما بالك لما يكون فيه منتقبات كثر يكثرن "البروز" و"التصدر" في الريلز وكأن الأمر بسيط ومباح وليس فيه بأس؟

لا والله، فيه بأس.. فيه بأس على سمتك ووقارك بالشكل دا!

ونصيحة والله لكل منتقبة أقولها بخالص نية لله عز وجل: أنتِ لا تدينين للمجتمع بشيء، ولا للناس بشيء، علشان تحرصي حرص شديد أنهم يرضوا عنك أو يرضوا عن شكل حجابك، وأنتِ لا تديني لأحد بشيء علشان تثبتي لهم أن النقاب جميل وخفيف ولطيف، ولا تديني للعالم من حولك بشيء علشان تثبتي أن المنتقبات دمهن خفيف ومش متزمتات ولا متشددات"

محتاجة تراجعي نفسك، ومحتاجة تسألي نفسك من البداية: لما أنا ارتديته لله عز وجل وسترة لنفسي، ليه تساهلت في التصدر؟ ليه تساهلت في الظهور للناس بالشكل دا؟

النقاب عبادة، والعبادة إجلال وتوقير = العبادة (وربك فكبر).. فلما تهزري وتضحكي وتبتسمي وأنتِ لابسة النقاب وعشرات ومئات وآلاف من الرجال يشوفوا الريلز بتاعتك، يبقى فين وربك فكبر في المعادلة؟

https://t.me/Nafae3

كيف يعيش مَن لا يُصلِّي!

«ليس في الدنيا عطب يكون شفاؤه في التعلق بأحد من الخلق»!

#مسجد_أحمد_أبو_أحمد

*? رابط الدرس على اليوتيوب :*
https://youtu.be/kRrDV_Awo0U?feature=shared

? رابط الدرس على الساوند كلاود:
https://on.soundcloud.com/bt6oX

@MsjdAboAhmed