TURAQ JAYLAR HÚJJETLESTIRILEDI

Ózbekstan Respublikasınıń "Ózbasımshalıq penen iyelep alınǵan jer uchastkalarına jáne olarda qurılǵan imarat hám obyektlerge bolǵan huqıqlardı tán alıw haqqında"ǵı 937-sanlı Nızamı 8-noyabrden kúshke kirdi.
Nızam tiykarında Kadastr agentligi tárepinen tastıyıqlanǵan reje grafik tiykarında xatlaw ótkerilmekte.
Kadastr.uz saytında reje-grafik tiykarında 2024-2025 jıllarda Qaraózek rayonında xatlaw ótkeriletuǵın máhellelerde grafigi járiyalandı hámde basqa máhelleler qosımsha kiritilip barıladı.
Ata makan MPJ da 08.11.2024
Ǵarezsizlik gúzarı MPJ da 20.12.2024
Berdaq APJ da 06.02.2025
Esimózek APJ da 06.05.2025
Qutlı makan MPJ da 06.06.2025
Qaraózek APJ da 28.08.2025
Quralpa APJ da 30.09.2025
Reje-grafik tiykarında kadastr qánigeleri úyme-úy úyrenip, kóshpes múlkińizdi xatlawǵa kelgende ólshew jumıslarına shárayat jaratıp beriwińizdi, eger sırt elde bolsańız aǵayinlerińiz benen baylanısıp úyińizdi ólshewge imkaniyat jaratıp beriwińizdi soraymız.
Ózbekstan Respublikasınıń 05.08.2024-jıldaǵı ÓRN-937-sanlı Nızamına tiykarlanıp 2018-jıl 1-may kúnge shekem jeke tártiptegi turaq jay qurıp ózbasımshalıq penen iyelengen jer hám ondaǵı imarat hám obyektler kórip shıǵıladı dep kórsetilgen. Nızamda názerde tutılǵan tiykarlarda hámde tártipte tek ijara huqıqı, usı jer uchastkalarında qurılǵan imarat hám qurılmalarǵa bolǵan múlk huqıqı tán alınadı. Bunda ijara múddeti jeke tártiptegi úy-jaylar iyelegen jer uchastkaları ushın toqsan toǵız jıl, basqa jer uchastkaları ushın qırıq toǵız jıl etib belgilenedi.
Nızamda huqıqlardı tán alıwdıń tiykarǵı shártleri hám anıq belgilengen.
Atap aytqanda puqaralar tárepinen 2018-jıl 1-mayǵa shekem jeke tártipte úy-jay qurıw arqalı ózbasımshalıq penen iyelep alınǵan jer uchastkasına bolǵan ijara huqıqın hámde onda qurılǵan imaratlar hám qurılmalarǵa bolǵan múlk huqıqın tán alıw ushın usı jer uchastkası basqa fizikalıq hám yuridikalıq shaxslarǵa ajıratılmaǵan yáki elektron onlayn-auksionǵa qoyılmaǵan bolıwı, basqa fizikalıq hám yuridikalıq shaxslarǵa ajıratılmaǵan yáki elektron onlayn-auksionǵa qoyılmaǵan bolıwı, usı jer uchastkasınan paydalanıw júzesinen fizikalıq hám (yáki) yuridikalıq shaxslar ortasında kelispewshilik bolmawı, usı jer uchastkası ushın jer salıǵı boyınsha, onda qurılǵan imaratlar hám qurılmalar ushın mal-múlk salıǵı boyınsha qarızdarlıq bar bolmawı sıyaqlı shartlerdiń bárshesine ámel etilgenligi tiykar boladı.
Sonday-aq, Jeke tártipte úy-jay qurılǵan jer uchastkasına bolǵan ijara huqıqı;
1) eger jer uchastkası 1998-jıl 1-iyulǵa shekem iyelengen bolsa,-bárshe aymaqlarda 0,24 gektardan kóp bolmaǵan ólshemde;
2) eger jer uchastkası 1998-jıl 1-iyuldan 2018-jıl 1-mayǵa shekem iyelengen bolsa,-Tashkent, Nókis qalası hám wálayat oraylarında 0,06 gektardan, qalǵan aymaqlarda 0,12 gektardan kóp bolmaǵan ólshemde tán alınadı.
Nızam 2028-jıl 1-yanvarǵa shekem ámel etedi. Nızamnıń qabıl etiliwi puqaralardıń "Ózbasımshalıq penen iyelep alınǵan jer uchastkalarına ijara huqıqı, usı jer uchastkalarında qurılǵan imarat hám qurılmalarǵa bolǵan múlk huqıqı tán alınıwı, úy-jay kadastr hújjetlerine iye bolmaǵan puqaralardıń kadastr hújjetlerine iye bolıwı, olardıń múlk huqıqlarınıń támiyinleniwine, ámeliyatdaǵı kelispewshiliklerdiń aldın alıwǵa xızmet etedi hám eń baslısı puqaralardıń kóp jıllardan berli sheshilmey kiyatırǵan mashqalalarınıń sheshimi boladı dep oylaymız.

Jeńisbaev Iskender
Qaraózek rayonı Ádillik bólimi Mámleketlik xizmetler orayı jetekshi qániygesi

👉 Bizdi sociallıq tarmaqlarda baqlap barıń ↘️↘️↘️
📍 Telegram 📍 Instagram 📍 YouTube 📍Facebook