***Yashadim vujudim soʻz bilan toʻlib,
Soʻz bilan bir ishni bitkazolmadim.
Oʻzim oʻz soʻzimdan soʻzona boʻlib,
Oʻzgaga soʻzimni oʻtkazolmadim.

Koʻplab soʻz sultoni chiqdi yurtimdan,
Qanchasi soʻz bilan oldi olamni.
Men esa boʻgʻzimni yirtib, ortimdan
Ergashtirolmadim bitta odamni.

Gohi gardanimni ezdi bu qaygʻu,
Gohida beumid soʻkildi bandim.
Menga hurmatini izhor etar-u,
Ammo aytganimni qilmas farzandim.

Bir kuni hammasi chiqar yodimdan,
Manzilga yetaman qoʻymay qadamni.
Bitta soʻz aytmay, jim yotib, ortimdan
Ergashtirib borgum yuzlab odamni ...*

JOʻRABEK RAMAZON

*Яшадим вужудим сӯз билан тӯлиб,
Сӯз билан бир ишни битказолмадим.
Ӯзим ӯз сӯзимдан сӯзона бӯлиб,
Ӯзгага сӯзимни ӯтказолмадим.

Кӯплаб сӯз султони чиқди юртимдан,
Қанчаси сӯз билан олди оламни.
Мен эса бӯғзимни йиртиб, ортимдан
Эргаштиролмадим битта одамни.

Гоҳи гарданимни эзди бу қайғу,
Гоҳида беумид сӯкилди бандим.
Менга ҳурматини изҳор этар-у,
Аммо айтганимни қилмас фарзандии.

Бир куни ҳаммаси чиқар ёдимдан,
Манзилга етаман қӯймай қадамни.
Битта сӯз айтмай, жим ётиб, ортимдан
Эргаштириб боргум юзлаб одамни ...*

ЖӮРАБЕК РАМАЗОН**

@JorabekRamazon

***Men ertadan kutaman najot,
Men bugunning jabrdiydasi.
Ikkimizni qiynadi hayot,
Uzrning ham yoʻqdir foydasi.

Men ertadan umid qilaman,
Siz ertaga aniq kelasiz.
Siz hammadan yaxshi, bilaman,
Men hammadan yomon, bilasiz.

Oʻrtanaman, yuragim xira,
Nima qilay sogʻingan boʻlsam?
Ogʻrinmasmi koʻnglingiz sira
Ertagacha bexosdan oʻlsam.

Bilmam qancha asrlar kerak
Yana bir bor quyosh chiqquncha.
Koʻrguligin qoʻymaydi falak
Birimizni yerga tiqquncha.

Men oʻlimdan qoʻrqmayman, axir,
Har qadamim tahlika, urush.
Biroq mingta oʻlimdan ogʻir
Sizni boshqa birovga berish.*

JOʻRABEK RAMAZON**

@JorabekRamazon

**ONA TILIM

*Olamshumul sado boʻlib yangrading
Toʻmarisning metin qalqonlaridan.
Men esa nomingni topmoq istadim
Navoiy va Bobur devonlaridan.

Nodira qalbiday kuylasang yonib,
Poyingga tiz choʻkar Koʻhiqof togʻi.
El yashamoq boʻlsa sendan-da tonib,
Bukila boshlaydi Hisor oyogʻi.

Olamni larzaga solgan toʻrtta harf
Toʻrt tomon emaklab ketdi toʻxtamay.
Unutsam, umrimning goʻzalligi hayf,
Kuylash kerak boshqalarga oʻxshamay.

Qodiriy boʻlmadim, boʻlmadim Choʻlpon,
Umr — uzun arqon, dil — qorongʻu uy.
Yuragim jonimdan soʻrganda oʻlpon,
Sizilib chiqadi tomirimdan kuy.

Yurak, aylan Danko qalbiga endi,
Kubro misol shior tanla, vijdonim.
Koʻzimiz yoshidan chechaklar undi,
Baxtdir oʻz tilingda kuylamoq, jonim!*

JOʻRABEK RAMAZON**

@JorabekRamazon

**Bu bulbulga kelmas havasim,
Koʻr qilmishi koʻksim tiladi —
Qancha goʻzal boʻlmasin sasi,
Ozodlikda nola qiladi.

JOʻRABEK RAMAZON**

@JorabekRamazon

***Hammasi oʻzimdan, oʻzimda gunoh,
Unutdim gullarning erta soʻlishin.
Va men yoqtirguvchi shu sirli nigoh
Menga qaramasa yaxshi boʻlishin.

Esimdan chiqarib qoʻydim baribir
Yoʻlimiz, dilimiz boʻlakligini.
Hattoki unutib boʻlganman, axir,
Kimga sigʻinishim kerakligini.

Kelsang, soʻramaysan ketmoqqa ruxsat,
Istagan vaqtingda tez xayr aytasan.
Goh mayna qilgandek, qayrilar fursat
Jilmayib, ohista ortga qaytasan.

Sen nimaga buncha erka yaralding,
Mumkin-ku ketgancha ortga boqmaslik.
Shu shoʻr peshonamga qaydan atalding,
Bu na muhabbatu va na yoqmaslik.

Qarshingda haykalday turaman beun,
Na oldga, na ortga qoʻymayin qadam.
Garchi UCH BOʻGʻINLI SOʻZni aytish-chun
Uch soniya menga yetib-ortsa ham...*

JOʻRABEK RAMAZON**

@JorabekRamazon

TAKLIFNOMA

Shu yilning 1-iyul kuni soat 11:00da Oʻzbekiston Yozuvchilar uyushmasida Yoshlar kuni munosabati bilan “Rahbar va yoshlar” uchrashuvi boʻlib oʻtadi.  Anjuman doirasida Yozuvchilar uyushmasi aʼzosi, yosh shoir Hasan Asrayevning “Ezgu niyat” nomli kitobi taqdimoti bo‘lib o‘tadi hamda bir qator yosh ijodkorlarga Yozuvchilar uyushmasi aʼzolik guvohnomalari topshirilishi rejalashtirilgan. Tadbirga barcha yoshlarni va qiziquvchilarni taklif etamiz.

Manzil: O‘zbekiston Yozuvchilar uyushmasi katta tadbirlar zali. Mo‘ljal: metroning "Milliy bog‘" bekati.

O‘zbekiston Yozuvchilar uyushmasi Axborot xizmati

Vatan

Ne sinoat mujassam
Tarixing tomirida;
Yo Osiyo tegrasi,
Yo uning Pomirida.
Necha ming yillik qo‘shiq
Bor nolang zamirida.
Qulamasdan turibdi
Hanuz ko‘hna qo‘rg‘oning.
Alining Zulfiqorin
O‘tkir dami biz edik,
Necha Zulqarnaynning
O‘yi, g‘ami biz edik,
Jami o‘tgan shohlarning
Qariyb yarmi biz edik,
Bugun shahzodalarga
O‘xshaydimi o‘g‘loning?
Vatan dedim, bo‘g‘zimni
Achchiq alam to‘ldirdi;
Kimdir Bibixonimni
Zahar berib o‘ldirdi,
Bir nomard Ulug‘bekning
Yulduzini so‘ndirdi,
Quladimi osmonga
Tik qo‘yilgan narvoning?
Ulfat bo‘lib uch kishi
Suhbat qurish mumkinmas,
Bobongdan qolgan bog‘da
Xayol surish mumkinmas,
Daladan bo‘lak yerda
Javlon urish mumkinmas,
Tuzing ichib, tuzluqqa
Tupurdimi mehmoning?
Ko‘z olaytdi ko‘rkingga
Shoqolmi u, tozimi,
O‘zing qolib, erkingga
Allakimlar qozimi?
O‘g‘lonlaring, qizlaring
Buguningdan rozimi,
Ertang-chun kurashmoqqa
Yaraydimi qalqoning?
Sen Kubroning shiori,
Qodiriyning armoni,
Boburning Andijonga
Yetolmagan karvoni.
Endi bo‘lar husningga
Ular ruhi kayvoni,
Porlagay osmoningda
Son-sanoqsiz Cho‘lponing!

Jo‘rabek Ramazon

@JorabekRamazon

ЭЛАНИШ

Яшамадим гарчи ер бўлиб,
Лекин лозим гоҳо тан бериш.
Ажабланманг агар эр бўлиб,
Эланишим туюлса эриш.

Мен тақлиднинг тарафдоримас,
Ўзгаларга ўхшаб бўлмайди.
Кўкни билмам, ерда ҳар нафас
Эланмасдан яшаб бўлмайди.

Болаликдан сиғмай танамга,
Орзуларга беланган эдим.
Илк бора шу азиз Ватанга
Озод бўл, деб эланган эдим.

Онамга ҳам аввал тик туриб,
Мен ғурурли боламан, дедим.
Шундан кейин секин эланиб,
Севганимни оламан, дедим...

Хуллас, бундай мисоллар бисёр,
Атасангиз майлига авом.
Токи бизда юрак бор, ишқ бор,
Эланишлар этади давом.

Ҳамон шўнғиб болалигимга,
Туйғуларга беланаяпман.
Ҳозир эса жажжи ўғлимга
“Дада де” деб эланаяпман..

Jo'rabek Ramazon

@jorabekramazon