#New 😎#2024
#revaluation🔥 #uzbek🇺🇿
#romantic❤️ #time⏱

Ketsam.🥀(2024)

✍Mahmud Toir
🎙@Davron_Ganiyev

https://t.me/MahmudToir_ijodi

Ko'nglimning ko'kida gullagan ko'shkim,
To'kilsa tugamas ko'zdagi ashkim,
Uzilgan yaproqdek poyingga tushgum,
Izingning isiga eriblar ketsam,
Ketarda gardingni teriblar ketsam.

Yongan yuragimning yog'dusi bilan,
Kuygan ko'zlarimning ko'zgusi bilan,
Dunyoning seningdek ohusi bilan,
Yo'llarni yig'latib kuliblar ketsam,
Ag'yor yuragini yig'latib ketsam.

Ketsam,ketaversam, toshlar erisa,
Ko'zlarda muz qotgan yoshlar erisa,
Kuyib ketsa, qalam qoshlar erisa,
Seni yomonlardan oliblar ketsam,
Dunyoga suronlar soliblar ketsam.

Quyosh kuyaverib qartayib ketsa,
Oyning armonlari jonidan o'tsa,
Tog'lar tulg'onishib yoqasin tutsa,
Hayratni sochingga siriblar ketsam,
Jonimni o'zingga beriblar ketsam.

Mahmud Toir

https://t.me/MahmudToir_ijodi

Маҳмуд ТОИР,
Ўзбекистон халқ шоири

БИРЛАШСАК — ВАТАНМИЗ

Бармоқлар бирлашиб, бир мушт бўлади,
Ирмоқлар жамланса, дарё тўлади,
Юлдузлар юз очса, тунни тилади,
Гуллар, чечаклардан бунёддир чаман,
Бирлашсак — ватанмиз, бирлашсак — ватан!

Миллатлар бирлашса, халқ яралгайдир,
Шу халқдан оламга нур таралгайдир,
Бирлашган элларга хуш қаралгайдир,
Осуда осмонга ярашмас туман,
Бирлашсак — ватанмиз, бирлашсак — ватан!

Гар диллар дилларга чироқ тутсалар,
Адоват, ғаразни йироқ тутсалар,
Муаззам тонгларни уйғоқ кутсалар,
Ягона вужуддир асли жон ва тан,
Бирлашсак — ватанмиз, бирлашсак — ватан.

Унутма, инсонсан, оқили замон,
Вафодан яйрайди, борки тирик жон,
Ватан ҳам вафога муҳтождир ҳар он,
Вафода якдилмиз, асралгайдир шаън,
Бирлашсак — ватанмиз, бирлашсак — ватан!

Буюк аждодларнинг номин ёд этиб,
Улуғ Амир Темур руҳин шод этиб,
Нажмиддин Кубродек эрк туғин тутиб,
Бир бўлсак, йўлолмас ёв ҳам дафъатан,
Бирлашсак — ватанмиз, бирлашсак — ватан!

Ўзбек ўзлигидан ифтихор қилса,
Юз ўттиз эл-элат бир қарор қилса,
Тенгликда бирликни барқарор қилса,
Тарқоқни бир зарба тут каби тўккан,
Бирлашсак — ватанмиз, бирлашсак — ватан!

Юртбоши нияти нурдек нурафшон,
Тинчликдан товлансин бу кўҳна жаҳон,
Бирлик, аҳилликда азиздир инсон,
Янги Ўзбекистон — бир жону бир тан,
Бирлашсак — ватанмиз, бирлашсак — ватан!

ЭЪТИРОФМиннатли мезбонга меҳмон бўлгандан,
Қадр қўрғонида қул бўлган яхши.
Ҳикмат бор, ёт элда осмон бўлгандан,
Ватан тупроғида кул бўлган яхши.

Тикондан асрасин, деймиз, Худойим,
Янтоқ еган қўйга тикон мулойим.
Қуёш ерда кўрмиш ўзин чиройин,
Тил топиб тиконга дил бўлган яхши.

Илдиз илтифоти чинорга бўйдир,
Тош топсанг, иморат пойига қўйдир.
Туш кўрсанг, таъбирин оқилга йўйдир,
Тўғри сўз қирқ ёрса, қил бўлган яхши.

Дилга кўз бўлмайди ойдайин юзлар,
Куйган дил куймоқчи бўлганни излар,
Ҳавода хазондек сарғайса сўзлар,
Булбул бўлолмасанг, гул бўлган яхши.

Жилғадек жилмайгин, ҳаёт уммондир,
Яхшига тош отсанг, Тангри қалқондир,
Маҳмуд, бил, қай дилга иймон посбондир —
Шу аҳли иймонга эл бўлган яхши.

Маҳмуд Тоир,
Ўзбекистон халқ шоири

https://t.me/MahmudToir_ijodi