ونقولك علي ما غبت مازال لك غلا
ومازلت عندي يا الغالي غالي

ونقولك انك خاطيك ما والي ملا
عيوني ولا حتى يجي في بالي

ونقول لو اتريد نقول مازال ماانتهىٰ
ولو اتريد نسكت منتهي موالي

مامن اللي من قبل في شوقي مشا
امغير راه كيفك ما شغلني والي

ولا لي ابما قتلك طمع فيه اللقا
ولا لي طمع في نشدتك عن حالي

انريد بالكلام امغير همي ينجلا
و بالك انحوددبه غياب دلالي

وكونه ركيك ركيك لكن ينعبىٰ
عليه وين ما طيفك يزور خيالي

افواهق و فيه أنواع واجد للبكا
و فاهقي عليك ارياف شين لفالي

ونقولك لقيته فيْ ماره للوفا
حتى والعلل مرات ما ايحلالي

يا بعيد مني فالمسافه والدنا
يا زهوتي يا مطلبي و منالي

مصطفى الفاخري

انكان قلتلك ننسى سريبك بكره
علي طول نصّبّح عليها عاجز

ويا عزيز نلغي مالاساس الفكره
اتقول بينا نا والنسيّه حاجز

ننسى غير فيْ
اتسير ادعوه وتردّك عليْ
أغلى من قبل

ننسى فيه حاجه
اتخلي في طارب للمراجا
ولا هالقسم نيّس من عواجه
نرد نقول نبقى لك وفيّ
راي وكل ما جَد انتفاجا
بيه و بيك واخرى زاد بي

في عقلي اتسير
بصيره نين في رايي انحير
انحاول فيه نسيانك امغير
أفكار الليل فيك اتجيب لي
امغير امعاي بالك راه خير
ويبقى خير طيفك لو ابقي

ننسى هو كلام
وقلته غير مره والسلام
لك مازال ف الخاطر غرام
و نرجا فيك ياغالي تجي
وماعد جيت ياللي له عوام
العقل امعاك تكوي فيه كي

ننسى وين نمسى
وقبل شروق ثاني يوم شمسه
لك نشتاق قبل تجي الخمسه
خمسه ونص واتضوّي شوي
ونلقى فيه راي النَّسو طمسه
هو الصحيح والرّاي السوي

ننسى و إن غفيت
امعاه النوم نلقى فيك جيت
وتخطر كان من نومي اوعيت
مع ذكراك يخطر كل شي
ونلقى فيه كي قتلك انسيت
العقل اتقول ما عمره انسِي

ننسى فيك مره
مره غير مالفعل ايتبرّا
عندي عقل ويعاود الكرّه
راي ايدير يلوي به إيدَيْ
ونا الفراق مره ذقت مره
وحالي نين منه بات سَيْ

ننسى للنسيّه
عندي عزم نقتلها السيّه
غير العين شورك وين هيا
قالت قلت نمشو طول هي
يا البعيد ننوي لك الجيه
واللي فيْ مات يرد حي

ننسى غير فيْ
اتسير ادعوه وتردّك عليْ
أغلى من قبل

مصطفى الفاخري

أفكار يخطرن م الليل لآوان الضحىٰ
أفكار جادّات وما عرفت أسبابهن

أفكار ما لهن تفسير ويريدن دها
أفكار كان نفهمهن انصكّر بابهن

أفكار جايبات الغيظ والضيق والعنا
أفكار موش داير ف الزمان حسابهن

أفكار غامضات وموش دَي وينحكىٰ
سراب غير مو كيف السراب سرابهن

أفكار كيف مَن صَالَح وعَاهَد واعتدىٰ
أفكار ريبةً فيهن أفكار انهابهن

أفكار حرت فيهن ما معاهن شِي نجا
أفكار من خطاهن ما يبان صوابهن

أفكار حارمات العين م النوم و الهنا
أفكار وين باديهن ووين عقابهن

أفكار نين منهن ضاق بالي وامتلىٰ
الخاطر اهموم و طال فيْ عذابهن

أفكار خَلّفن ستهه مع موح وشقا
أفكار خاطري مني بعيد مشا بهن

انريد غير طاريهن يغيب وينتسىٰ
أفكار ريت زينتهن مثيل اعطابهن

مصطفى الفاخري

أفكار خذنّي للأوهام
امعاهن هام
العقل و لكن في الختام

ركيك إن تما هالكلام
و فيه اخطيت
أسمحلي راني دوب نشيت

امغير انجلّيبه الغمام
و فيه إلهيت
انحتحت في عقلي حتحيت

شهر طال إلا تسع أيام
اللي خطّيت
أبيات قصيدي بالتوقيت

ل هالابيات مع السلام
انكان صغيت
امودّه مني لك أهديت

خذنّي للأوهام و جيت
أفكار مشيت
امعاهن مشوار و رديت

مصطفى الفاخري

نظرها يسّارق و اتريد
اتعدّيبي مليانه شوق

اتقول اقريّب موش بعيد
وهو منهن غادي امعزوق

أوهام الخاطر فيه اتكيد 
ان قلتلها قالتلي سوق

رحيلك لاقدّام و زيد 
اسمع مني و اسّاع اتروق

اطري عندك م القول رصيد
ان ما قتلي تبقى امحقوق

انظمهن مهّدلي تمهيد
ابهن ما ترقى بي لا فوق

ل هالمشوار أبيات قصيد
اطريلي بانن لي ابروق

انك لاقيلي صوب جديد
انريده غير علي ايتوق

أصحى راك اللي صار اتعيد
اتحوّسني و العقل اتعوق

أنساه و خذ مني الأكيد
انسي طاريك علل موثوق

ادعي مولاك ايكون مديد
العمر وما تضياق اخلوق

ايكون اختامه ع التوحيد
و ذكر أعداد النجم يفوق

ابهن تظلّل يوم صهيد
ومن ناره تبقى امعتوق

وقلت آمين و راي سديد
و زاد دعيت
الله يلطف بي ادّاعيت

خذنّي للأوهام و جيت
أفكار مشيت
امعاهن مشوار و رديت

مصطفى الفاخري

أفكار خذنّه ساعة غر
ونا داير
اعزوم و عالعقل اندبّر

لقيت أفكاري مني شر
عليه اسهيت
انزرّ ونا زادف انزرّيت

ولمواهيم ابقي غافر
ونا عانيت
بلاه و لاعد بيه ازهيت

غياظ و موح و زيد جضر
امعاهن هيت
شقا و امواجع كان حكيت

املذّع ياماني ناظر
و فيه اسقيت 
امرار اغياب اللي غاليت

صبرت امغير اسمي صابر
رجا و رجيت
و ما طلت اللي فيه سعيت

منام يجي ويجي خاطر
انكان اوعيت
ايرافقني لا وين أمسيت

و لاني قوّال و شاعر
وعندي صيت
و لا بين الشعّار اطريت

امغير أفكاري بي تبحر
ان فيه رسيت
أماني قالن لي اعليت

عليه اللي كبدي مرّر
بعد ضميت
انطق و زاد اغنا غنّيت

عزيز انريده يذكّر
اني وفّيت
الكيل و حق العيش عطيت

و فيه مسكت اللي تقهر
و لا ارتخيت
عليه و كي راح تلافيت

غلاي اللي بالحيل انضرّ
امعاه افنِيت
وخيذه ناللي به اعتنيت

خذنّي للأوهام و جيت
أفكار مشيت
امعاهن مشوار و رديت

مصطفى الفاخري

أفكاري شور الخلّي شق
ايطاوعهن بيه ايشقّن
ايريد ايحيدن عنه نق
الحن و شوقي عارفهن
و وافقهن قال لهن حق
صحيح الراي اللي دارن
امرايف و اسماه العاشق
ان شالنّه و ان ما شالن
العقل اللي مني انسرق
و بين أوهام ابقي يامن
و راح احسبته ما ينطق
اقريّب للسان تلكّن
اليوم لقيته دق وثق
منيع امعزز و امحصّن
علي غالي كان و فارق
ايرد اردود هذي ماظن
ابروحه رايق و امرونق
و راحة بالي لي ضمن
صباح و عصر و وان غسق
و وين علي الليل ايجنّ
الله الله كنت اتصدق
امقلقزني في نومي حن
و عزمي منه نين ايرق
اريافي ع اللي فيْ دفن
غلاه وفي غيري عالق
ابقي و أيامي ناسيهن
ونا تميت ابعود انطق
ابكا و بكيت
و بيه ابريت
ابكاي و بالقول ادّاويت

خذنّي للأوهام و جيت
أفكار مشيت
امعاهن مشوار و رديت

مصطفى الفاخري

ابقي لو ناشد لو منشود
ابروحه مو قابل شي حد
أفكار غريبه فيه اتقود
امغير عليش العقل ايبد
عليه الماضي كان ايعود
غلا ترجيب و حن و ود
ابكل اللي موجود ايجود
عزيز بلا مَن و لا عدَ
غلا ما له بالحيل حدود
جميع اللي داير تاجد
معاطي موش سلف مردود
علي قيس النية حودد
اخرب ما عندي فيه اسعود
غلا عام انعدّه بلّد
امغير هضا طابان العود
ان جيته يسرح بي و يمد
امفضّي بالي جاه الجود
بعد جمّيت
اللي طقّيت
ابعودي وافواهق طقّيت

خذنّي للأوهام و جيت
أفكار مشيت
امعاهن مشوار و رديت

مصطفى الفاخري

خذنّي لمياميه السود
اللي منهن ما ريت أسود

وخيذة فردي بين حشود
اعدا وابها بلكل ما رد

صمد ما طوّل في لصمود
و طاح علي عزمه انسند

امواجع من ساسه امغرود
لراسه وين يجن لجدد

و يرجا بالقمره موعود
امصدقها مطيوح سعد

اوخذت أربنّي هد اهدود
أفكاري هدّن عقلي هد

مصطفى الفاخري

وين خذنّي
ما هننّي
لا ليلي نرقد خلّنّي

هاناك امعاهن شالنّي
نَفْي انفِيت
ابروحي بين أوهام ابقيت

و زاد الذكريات غَزَنّي
وين غفيت
ابعبره من نومي فزّيت

وقلت الغالي مو هاينّي
وين اوعيت
لقيت اني مَنسِي و انسيت

و فيه لقيته خايب ظنّي
عمرك ريت
اللي الآمال امعاه بنيت

جفاني و الياسات نوَنّي
فيه ارزِيت
و لكن في لاخير ارضيت

خذنّي للاوهام و جيت
أفكار مشيت
امعاهن مشوار و رديت

مصطفى الفاخري