"Реал"нинг салобатини ижтимоий тармоқлар орқали ҳам билиб олса бўлади. Клуб Мбаппени сотиб олди. Энг қиммат ва айни вақтда дунёнинг энг яхши футболчиси ва у ҳақида ҳозиргача ўз инстаграм саҳифасига атиги иккита пост жойлади.

Тасаввур қилинг, "Барселона" Флик, юқори классдан бироз пастроқ мураббий билан шартнома имзолади. Ва у ҳақида 13-14 та пост жойлади.

Бундан ташқари, Мбаппени жуда ғалати таништирди. Шунчаки, унинг голларидан иборат 3:20 дақиқалик Highlights. Албатта, бирор оригиналроқ ёндашув ва бироз ваҳималироқ видео кутгандик. Аммо шу ерда ҳам клуб чамамда бир пайтлари келаман деб алдаб кетган футболчидан аламини олишни уддалаяпти.

Эртага у жамоага келган тақдирда ҳам у ПСЖдаги каби бренд юзи бўлмаслиги ва қолганлардан кўпроқ кўкларга кўтарилмаслиги эҳтимоли юқори. Агар унинг ўзи ҳаддан зиёд зўр ўйнаб юбормаса.

Бунча мағрур бўлмасанг-а "Реал"?

Карим Ҳудойқулов

@vardagi_hakam

«Вест Ҳэм» ва Бразилия терма жамоаси яримҳимоячиси Лукас Пакета бутун умрга футболдан четлаштирилиши мумкин.

У бир нечта ўйинда атайлаб сариқ карточка олгани иддао қилинмоқда ва бу учун тотализаторда кўп пуллар тикилган. Айблов аниқ исботланса жазо энг камида 10 йил бўлиши мумкин.

Қизиғи, ўтган йили «Нюкасл» Пакета билан жиддий тарзда қизиққанди. Тасаввур қилинг, бир йилда Тонали ва Пакета учун 100 миллиондан ортиқ пул тўлаган «Нюкасл»ни :)

@vardagi_hakam

Мбаппенинг «Реал»га ўтиши аниқ бўлди. Твиттерда шундай ёзишганини кўриб қолдим: «Мбаппе келса, энди Чемпионлар Лигасини ютишимиз осонроқ бўлса керак».
Дарҳол хаёлимга 2002 йилда «Реал» ушбу турнирда ғалаба қозонгани ва ўша ёздаёқ бразилиялик Роналдо трансфер қилингани келди. Балким ўшандаям бирор мухлис ўйлагандир - энди Чемпионлар Лигасини осонроқ ютамиз.

Ундай бўлмади, «Реал» кейинги Чемпионлар Лигасини ютганда орадан 12 йил ўтиб кетганди.

Аммо бу билан Роналдо трансфери хато бўлганини, аксига, «Реал» кучсизланганини айта оламизми? Йўқ, албатта.

Ҳар қандай футбол клуби доимий шаклда ўзгариб туришга мухтож, бир нуқтада тўхташга уриниш ортга кетишни англатади. Мадридликлар анча йиллардан бери Европада чўққида турганининг ҳам сабаби шу - Роналдонинг кетиши, кейин Бенземанинг кетиши, Беллинҳэмнинг келиши, энди Мбаппе, бу ўзгаришлар жамоадаги доимий янгиланишни таъминлайди, келаётганлар янги саҳифа ва мотивация билан келар экан, эскилар бошқа шериклар, бошқача тактикаларда ўйнаш орқали доимий иштиёқда бўлади. Муҳим жараён.

Иккинчидан, «Реал» - қироллик клуби, бу фақат ном эмас, аввалдан Мадрид футболнинг пойтахти бўлишга, урфларни белгилашга интилади, клубнинг энг бой, энг мухлислари кўп бўлишининг сабаби ҳам фақат совринлар эмас. Масалан, Бекҳэмнинг киноси чиқди яқинда, унинг тарихида «Реал» саҳифаси бор, Кака ўйнаб кетган, Зидан, Роналдо, яъни «Реал» энг зўр юлдузларнинг ҳикояларида ўз изини қолдиришга уринади, ҳар даврда «Реал» номи бўлиб туриши катта аҳамиятга эга. Ёш болаларда, ёш мухлисларда Мбаппега бўлган қизиқиш жуда катталигини пайқашингиз мумкин, у ҳар томонлама энг етук, энг зўр футболчи сифатида гавдаланади. Табиийки, бундай футболчи «Реал»да ўйнаши керак. Клубда шундай ҳисоблашади. Унинг жамоани қай даражада кучайтириши, кимларнинг ўрнини олиши-ю, Винисиус билан муносабати тарих олдида жуда кичик, майда масалалар. Асосийси, буни футболчилар ҳам билиб туришади. Ҳар бир топ клуб интилиши керак бўлган юқорироқ даража.

Бундан ташқари, Мбаппенинг айнан Анчелотти даврида келиши ҳам муҳим. Менимча, айнан шу фактор Анчелоттини яна бир йил олиб қолишда аҳамият касб этган. Маълум схема ва услубга таянадиган ёш мураббийлар учун қўшимча муаммо бўлиши мумкин эди бу, лекин Карло учун эмас.

Қаердадир яқинда ўқидим, Анчелотти «Парма»да ишлаган йиллари Баджодан воз кечган экан:
- Баджони  «Парма»га ўтиш варианти бор эди, аммо уни жамоамда тасаввур қилолмадим, чунки одатда «ўнлик» позицияси менда йўқ эди. Кейинчалик, хато қилганимда пайқаганман. Мени «учинчи антибаджо мураббий» деб атай бошлашди. «Ювентус»га ўтганимда Зидан билан шундай схемада ўйнашга тўғри келганди. Аслида, юлдуз футболчилардан ҳеч қачон воз кечмаслик керак, доим уларга мос ўрин топиб бериш мумкин. Агар вақт машинаси бўлганида, қайтиб, Баджони сотиб олган бўлардим, - дейди Карло Анчелотти.

Бу шунчаки фикр эмас, фаолияти давомида Анчелотти буни исботлаб келди. Ҳатто «Эвертон»га Хамесни олиб келганини ҳам эслаймиз - юқори савиядаги футболчилар ҳеч қачон ҳалақит қилмайди.

«Мен ҳатто тасаввур қилмаган қобилиятларимни Анчи кашф этди» - дейди Жуд Беллинҳэм. Ўзига яраша эгоси бўлган Жуд ва Винисиуснинг бир бирига «Олтин тўп» «тортиқ қилаётганини» кўриб, Анчелоттининг «Реал»ида Мбаппе ҳеч қанақасига ортиқча бўлмаслигини тан оласиз.

«Реал» Мбаппе билан қанчалик кучлироқ бўлади, келаси йили Чемпионлар Лигасини ютадими, ишонинг, бу бошқа масала. Бугундан туриб, эски «Реал»ни эслаганингизда бразилиялик Роналдо ҳам гавдаланади, тўғрими? У Чемпионлар Лигасини ютганмиди, йўқми, жамоа қанчалик кучайганди, буларни ўйламайсиз ҳам.

Ҳамма гап шунда. Мбаппенинг «Реал»да ўйнаши, ўйлайманки, йигирма йилдан кейин эсланадиган зўр воқеа. Чемпионлар Лигаси совринлари бундай тарихдан кичикроқ. Камида «Реал»дан ўн беш баробар кичик...

©️aslanov

Телеграм канал:@vardagi_hakam

Умуман олганда АПЛ кучли. Аммо ЛаЛига клублари ЕЧЛда анчайин хавфли. Сабаб нимада?

@vardagi_hakam

Ўзбекистон миллий жамоаси июн ойидаги ФИФА кунларида ЖЧ 2-саралаш босқичининг сўнгги икки учрашувида Туркманистон (6 июн) ва Эронга (11 июн) қарши баҳс олиб боради.

@vardagi_hakam

Айни пайтда Жанубий Кореяда фаолият олиб бораётган ҳамюртимиз Икром Алибоев ўғил фарзандли бўлди.

Табриклаймиз.

Европа топ-клублари юқори даражада тажрибали бўлган, масалан, Эмери, Де Дзерби, Хау каби номлар турганида, нега Маккена, Мареска, Флот, Аморим, Компани каби мураббийларга кўпроқ эътибор қаратаётгани бироз ғалати туюлиши мумкин-у, лекин мантиқ бор.

Масалан, Компани “Бавария”га тайинланди. “Бёрнли” билан АПЛда 19-ўринни олган мураббий. Нега?
Менимча, клуб мураббийнинг сўнгги йилдаги натижасига эмас, умуман, фаолиятига, услубига, салоҳиятига баҳо берган. Компани деганда, таркиб жиҳатидан рақибларидан кучсиз бўлган “Бёрнли” билан АПЛ жамоаларига қарши ўйинлари эмас, кўпроқ Чемпионшипдаги ишини тушунамиз.

Қуйи лигада рақибларга нисбатан “Бёрнли” кучли таркибга эга эди – жамоа 100дан ортиқ очко тўплади, 10 очколик фарқ билан чемпион бўлди. Бу дегани, рақибларга нисбатан кучлироқ ёки рақобатбардошроқ таркиб билан ўша мусобақада доминант футбол намойиш этиш салоҳиятига эга. “Бавария”га айнан шу керак. Умуман барча топ-клубларда тенденция маълум – жамоа ҳужумкор ўйин кўрсатиши, ўз ўйин фалсафасига, таниш услубига эга бўлиши муҳим. Моуриньо ёки Аллегрининг, агар ўзгаришмаса, даври ўтгандек.

Нидерландия ёки Португалияда чемпионлик учун курашган, пешқадам бўлган жамоалардаги фаолият кучли лигалардаги ўртамиёна даражадаги клуб билан яхши натижа кўрсатишдан юқори туради, назаримда. Чунки, қандай лигада тўп суришингдан қатъи назар, агар пешқадам бўлсанг, доим биринчи рақамда ўйнаш тажрибаси бўлади, рақиб сенга мослашиб турли тактикалар қуради, шу шароитда доимий ғалаба учун ўйнаш катта босим ва қийинроқ.
Шунинг учун ҳам Де Дзерби, Поттер ёки Эмери ҳар қанча таҳсинга сазовор ишламасин, катта клублар учун доим риск бўлади.

Винсент Компанининг шу пайтгача топ-клубда ишламагани муаммодек кўриниши мумкин, лекин у узоқ вақт “Манчестер Сити” сардори бўлган, футболчиликда қўлга киритган мартаба билан ҳар қандай бугунги юлдузга ўрнини кўрсатиб қўйиши мумкин.

@vardagi_hakam

Акалар сал ишлар кўпайиб кетти. Каналга қаролмадим. Орада каталонияга бориб Хавини сургин қилдим. Ўрнига бошқа мураббийни қўйдим. Перес билан ўтириб Реални чемпионлигини нишонладик. Бобой ёмон симираркан ўзиям. Шу билан Парижга бордимда Мбаппега Мадридга кетиши учун тандир ва қурт бервордим. Кругдагиларга берадида:)

Англияга ўтомадим. Пепни бошини кўрсам кўзим қамашади. Арсеналга ҳамлардлик билдиришни учун телефон қилиб қўя қолдим. Хуллас, буёғига активроқ бўлурамиз. Теша тегмаган гаплар кўп!