لاستشهاد سيدي ومولاي الامام موسى الكاظم عليه السلام

〰️〰️〰️〰️〰️〰️〰️🏴🏴
على جسر الرصافه جثْته عافوها

وين  اهله وعمامه خل يشيعوها

وين اهله يجوله الكاظم المغدور
مسموم ويعاني ابظلمة الطامور
تالي اجنازته يحملها چم مأجور

فوگ الجسر ياويلي يعوفوها

◾️◾️◾️〰️〰️〰️〰️〰️

جمع من شيعة الكاظم تعناله
دعوا ليه  الطبيب يشخص الحاله
من ايده نظرها وصدَگ بالگاله

مسموم الرجل ثاراته طلبوها

◾️◾️◾️〰️〰️〰️〰️〰️

ندري الميت الواجب يكرمونه
إمام ومفترض طاعه ويعرفونه
لأنه ابن النبي رادوا يهينونه
(عفوا مولاي)

محاسن جده شوف اشلون ردوها

◾️◾️◾️〰️〰️〰️〰️〰️

عليه گالوا غريب ابن النبي العدنان
من ِسجنه اطلعوه  وسدوا البيبان
خاف الفتنه عم الظالم اسليمان

نزل يلطم يصيح الناس جمعوها

◾️◾️◾️〰️〰️〰️〰️〰️

خل تحظر الناس وشيعته وربعه
اليوم الطيب ابن الطيب انشيعه
عدوه المنع اهله اتشوفه واتودعه

لئيم وخطته كلهم يعرفوها

◾️◾️◾️〰️〰️〰️〰️〰️

شوف اليوم وين الكاظم ووينه
هارون الطغه ابملكه ونكر دينه
الله امكرّم آله وكرَم هادينه

الضحوا للرساله اللي يحملوها

◾️◾️◾️〰️〰️〰️〰️〰️

اسدبغداد موسى سيْد ابن ساده
للعله طبيب اتعرفه رواده
ابصحنه الناس من كل قاف وفاده

يقضيها الحوائج لليطلبوها

◾️◾️◾️〰️〰️〰️〰️〰️

على نفس الجسر كم مره غدرونه
ابتفجير وذبح ما ابد خوفونه
تحدينه المخاطر واليضدونه

فدوه الكم يَساده الشيعه تدروها

◾️◾️◾️〰️〰️〰️〰️

لخادمة خدام العترة الأطهار

🖊السلميه ام احمد
(ام علي السلمي)

〰️〰️〰️〰️◾️◾️◾️◾️◾️
١٤٣٧/هجريه

لذكرى استشهاد مولانا الامام موسى الكاظم عليه السلام

🏴🏴🏴🏴🏴🏴🏴

خل نعزي فاطمه المعصومه...
انگلهه عودچ هم سمعتي اعلومه

يبت كاظم غيضه والعانه وصبر
اشلون حالچ لو وصل ليچ الخبر
لو دريتي ابْجثْته ظلت ع الجسر

يومه ماينحمل مصعب يومه

◾️◾️◾️◾️◾️

لو دريتي بي گضى ابسجنه وحيد
امْثَگله جسمه النِحَل سلسلة الحديد
تحن حَنّ النوگ روحچ ما تهيد ..

من يلومچ يَ ال عليه مهضومه

◾️◾️◾️◾️◾️

اربع احماميل غربه الشالته
العدو سمه ومادرت بي شيعته
الجمعه جاها الخبر تخلص محنته..

وصارت ابن سويد كلها اتلومه

◾️◾️◾️◾️◾️

اليوم سور الدين هدموله ركن
تون وي ونّه حياطين السجن
الشيعه ع الكاظم تولاها الحزن..

اتشوفه ويلي امغيرات ارسومه

◾️◾️◾️◾️◾️

هاذه ابن خير البشر واهل العزم
جرّعته اعداه فوگ السجن سم
انهاره صايم ليله يتعبد يتم..

شاكر الله وما شكى امن اهمومه

◾️◾️◾️◾️◾️

ياهو مثله ابهالرزيه والبله
ميت وجثته ابحديد امكبله
العدو وارث حقده من طف كربله..

ابظلم جده الغسلته ادمومه

◾️◾️◾️◾️◾️

گبره بَرض اعدا صبح مركز شفه
موسى ابن اشرف سلاله وطائفه
ينطي بيده امراده كلمن ضايفه..

وهالكرامه بيّنه ومعلومه

خل نعزي فاطمه المعصومه

◼️◼️◼️◼️◼️◼️◼️◼️◼️◼️◼️

〰️〰️〰️〰️〰️〰️〰️〰️〰️

لخادمة خدام العترة الأطهار

🖊السلميه ام احمد
(ام علي السلمي)

السلام على مولاي المعذب في قعر السجون وظلمةالمطامير الامام موسى الكاظم ◾️◾️◾️

〰️〰️〰️〰️〰️〰️〰️

ابلا وداع ..وَحده بالغربه احتظر
ابلا وداع ..ابسجن هارون انغدر

گضى مسموم ..آيمظلوم آيمظلوم

موسى ابن جعفر امام وحجة الله اعلى البشر
يا سجين المثله عانه الأمر والمثله صبر
امعذب وميت غريب ولحد امن اهله حظر
ولحد الغمض له عينه ساعة المولى احتظر

إلألم فتت چبدته ..اسموم عدوانه اسگته

امر محتوم ..گضى مسموم

آ يمظلوم..آيمظلوم

〰️〰️〰️〰️〰️〰️◼️◼️

بين جدران وزناجير اشحمل جسمه النحيل
گيد بقدامه ويحز العظم لو حركها حيل
والسلاسل جرحنه ودم من اجروحه يسيل
لانهار اليومه يعرف بالسجن لو هوّه ليل

بالسجون المظلمه ..الناس جلفه وظالمه

حرمته النوم ..گضى مسموم

آيمظلوم..آيمظلوم

〰️〰️〰️〰️〰️〰️◼️◼️

من سجن لي سجن هارون اقسى منه يحوله
يوصي سجانه يضيگ اعليه راده يذل اله
كظم غيظه اعلى الجراله والعذاب اتقبله
مبتهل لله ابقدرته يعينه يحمل هالبله

دعا ربه وقدّره..يعينه يحمل ماجرى

اتحمل اهموم..گضى مسموم

آيمظلوم..آيمظلوم

〰️〰️〰️〰️〰️〰️◼️◼️

يا ظلم مثل الجراله المولى جثته امكبله
ع الجسر مطروحه ضلت وابعباته امجلله
موسى ابن سيد البريه والأجير اليحمله
ومن نظر كفه طبيبه گال اطلبوا الثار اله

المولى مقتول ابغدر ..والجنازه اعلى الجسر

العابد اليوم ..گضى مسموم

آيمظلوم..آيمظلوم

〰️〰️〰️〰️〰️〰️〰️〰️〰️
لخادمة خدام العترة الاطهار

🖊السلميه ام احمد
(ام علي السلمي)

〰️〰️〰️〰️〰️〰️〰️〰️◼️◼️◼️

مو هاين علي انعاك
لا اتصور اغيابك

واتمنى الخبر مكذوب يالحيرت احبابك

ملكت الماضي والحاظر
تذل بعداك لازالك

خرقت اسطورة الأوهام
انت وخيرة ارجالك

يالمرعب بني اسرائيل
يالواجعهم اصوابك..~

?????????

?السلميه ام احمد
(ام علي السلمي)

على نهجك يمضي المؤمنون مولانا ياقرة عين رسول الله صلى الله عليكما وسلم..

كأني بلسان حال مولاتي زينب الكبرى عليها السلام تخاطب اخوتهاعند وصول الركب الى ارض الشؤم

〰️〰️〰️〰️〰️◼️◼️◼️

تدرون يهل الغيره لطياب

عگب المسير وألم لمصاب

وياحال ممشانه ويه لجناب

بالشام وگفونه على الباب

اليكرهونّه وتدرون اِلَسباب

حسبة ترك ما حاسبه احساب

ومنّ القهر حتى الرمش شاب..

〰️〰️〰️〰️〰️◼️◼️◼️

لخادمة خدام العترة الاطهار

السلميه ام احمد
(ام علي السلمي)