#أبوذية **مولاتي العقيلة روحي فداها

يفز گلبي بتوالي الليل .. ويريد
هلي .. وابيش اسكته انوب .. ويرد
هَيج ويرجع العباس .. ويرد
وحريج السبي يطفه الواج بيه**#اللهم_عجل_لوليك_الفرج

**يالتناشِد عالعقيله اشلونها
اتغيَّر ابطف النوايب لونها

عن وضعهه اتخيَّل ابعين العَقِل
من عگب وليانهه الخلصو چتل
ادموعها اعله حسين والكافل تِهل
وخُوَت من كثر البواچي اعيونها

اشتحسب امن اجروح زينب واشتِعِد
بعدما بالطف گضت أهل المجد
للسبي وذيچ المخاطر تستعد
او وسفه بنت المرتضى يسبونها

آه من درب السبي وضيم اليسر
ابگلب زين اعبادها يسعر جمر
ايشوف عمته اخلاف عباس البدر
تالي ضل يحدي الشمر بضعونها

چلمة البويه وهَله ويَمدَلِّله
هاي كلهه غابت ابطف كربله
ضلَّت ابكيف الشماته العايله
والحچايه التذبح ايسَمعُونها

اتلاثه واثمانين لوعه امن الضِّمَه
والشفاه الصارت ابلون السِّمه
چم مصيبه العَذِّبَت بِت فاطمه
اشصار بيهه الباري كان ابعونها

يكسر الخاطر ضعن بيت الإبَه
ابگاع صَحره والوجوه امترِّبَه
روس اهلهه اعله الرماح امخضِّبه
والشماته عَمداً ايهزُّونها

ابكربله وبالكوفه والشام الجره
خَلَّه نيران الگلوب اموجَّره
نبقى نبچي وننحب البت حيدره
والخَدَم كل مآتم ايواسونها

سيد علي الموسوي

خدر الفواطم
لنشر القصائد الحسينية (@Alfoatm3)**#اللهم_عجل_لوليك_الفرج

اتمنيت نعشي اتحمله خواني
وحسين اخوي ايصير دفاني
حاجيني يالايام شتريد مني الشام
كليلهم ما تنكظي احزاني

عافوني وحدي بغربتي وعالخد دمعتي اتلالي
واشما اغمضنه الجفن الكه الحبال اكبالي
ويا دنيتي صوط الشمر كل لحضه يتراوالي
واشلون انسه كربله وبيها انذبح جم غالي

واكبال راس حسين ضربوني
وخلوها زركه صارت امتوني
وشتدت الالام شتريد مني الشام
كليلهم ما تنكظي احزاني

جنت بعمر خمسين انه وركض رحت للتله
حسبالي ابو فاضل عدل عالريحه اخوي اندله
ياهو اليخبره بالجره وياهو اعله حالي ايكله
من طاح شيال العلم بانت يناس الخله

عباس فوك المشرعه نايم
وبخيمنه كامت تحرك الوادم
وما خلت النه اخيام شتريد مني الشام
كليلهم ما تنكظي احزاني
*
هاي انه زينب بت علي والكربله مشتاكه
واشخله بيه اشكد صحت يمه الحسين افراكه
من عندي جم ضلع انكسر لمن صعدت الناكه
ضلينه انه واخوتي بس بالرمح نتلاكه

وحده اويوحده بحبل شدونه
وكبالهم كامو يشتمونه
واحنه حرم وايتام شتريد مني الشام
كليلهم ما تنكظي احزاني

ونيت وجبيني عرك والموت بين عيوني
بهل لحضه وانه بحيرتي ردت اخوتي ايحضروني
كربت منيتي والاجل حان وتغير لوني
اتمنيت اموت بكربله وبكربله ايدفنوني

جنازي كون حسين جنازي
وخلف الجنازه تنحب اعزازي
كلبي اشكثر محتام شتريد مني الشام
كليلهم ما تنكظي احزاني

بالشام شفت اشجم جرح لليوم ما ناسيته
يحضر يشيل اجنازتي اهواي الاخو اتمنيته
مليت كلشي بدنيتي بس دمعي ما مليته
دمعي عله اعزاز الكلب مثل المطر خليته

اوحيده رقيه وغربه غربتها
ويمها تريد تموت عمتها
لحضه الجفن ما نام شتريد مني الشام
كليلهم ما تنكظي احزاني
**
تمت
تحسين الخفاجي

خدر الفواطم
لنشر القصائد الحسينية (@Alfoatm3)**#اللهم_عجل_لوليك_الفرج

**مشتاگتلهم بآخر انفاس
لحسين اخوي وگلبي عباس
كلش بعيده كربله كلش بعيده
ياهو اليگلهم تنتظر زينب وحيده
مشتاگتلهم

--------------------------------------------

خلاني دهري بلا أهل والعله بيه
ما سافرو جوى الترب بالغاضريه
يا شام روح الكربله واخذ الوصيه
وصل رساله من الاخت لاهل الحميه

گلهم جنازه بدون الاخوان
ترضون نعش ام عون بردان
زينب يهلهه اتريد دفان
موعد رحيل ام الخدر حان

وين اليغمض عيني وينه
من الطف لهسه وملتقينه
وين الكفل خدر الضعن گلوله اريده
ياهو اليگلهم تنتظر زينب وحيده
مشتاگتلهم

---------------------------------------

حنيتلك يابو علي وللكافل هواي
ياهو اليبشرني ب أجو وانطيله عيناي
لمتنه ترجع لو حلم وآنه احلم بهاي
ترجعلي راية كربله وما ريدن الماي

چف الكفيل بعيد يا ناس
وجه الحسين شلون ينباس
بعيوني صوره ضلوع تنداس
شفت الرمح بس فوگه يا راس

يرجعلي منظر سحگ الخيول
ومنحر طفل بسهام مشتول
بكل ساعه اشوفن كربله بدمعه جديده
ياهو اليگلهم تنتظر زينب وحيده
مشتاگتلهم

------------------------------------------

مريوده يا ناس الاهل مريوده الاحباب
عين الغريبه التنتظر مشدوده علباب
وآنه اهلي بالطف خلصو ومصوبه صواب
يا روحي موتي من البعد موتي من العتاب

ظليتي وحدچ وشتتانين ؟
جوه التراب عيون الحسين
موتي اعله كيفچ همه ميتين
بس لو لفو حگچ تعدلين

شده الوداع وعن بعد صار
بلحظات موتي وعيني تندار

واتذكرت طف وسبي وسكنه وحميده
ياهو اليگلهم تنتظر زينب وحيده
مشتاگتلهم

------------------------------------------

ردولي محتاجه استمع يا خويه مشتاگ
اسمعهه من صوت الكفل موتني الفراگ
بلشام كل لحظه التمر انفاسي تنباگ
ياهو اليجيب حسين الي ونتشابگ اشباگ

اشتم عطر أمي بحظنته
يرجعلي اخو ميته اعله شمته
ليهسه اتاني بدمعي سكته
محلى الاخو من ايگابل اخته

يا روحي موتي اخوانچ ابعاد
ما فاد نوحچ والله ما فاد

ظلتلي ذكرى اعله النهر دم من وريده
ياهو اليگلهم تنتظر زينب وحيده
مشتاگتلهم

-----------------------------------------

غمضت عيني وبالنعش منتظره بالشام
وين الچفوف اتعطلت تابوتي محتام
عباس اريدك بالدفن لا تغفى وتنام
ها يا كفيلي چم جرح بالملگى يلتام

خلصت بعد وبحسره ظليت
بنص اللحد عباس تانيت
منتظره اخيتك وانته ما جيت
برمل الگبر نمت وتغطيت

قصة جرحنه بذمة الگاع
خوه ابتدت ما تنتهي بساع

ظل شاهد اعليهه النهر وعيونه وايده
ياهو اليگلهم تنتظر زينب وحيده
مشتاگتلهم

كلمات الخادم / رعد الفريجي
28 / جمادي الاخرة / 1446
ثوابها الى روح والدتي

خدر الفواطم
لنشر القصائد الحسينية (@Alfoatm3)**#اللهم_عجل_لوليك_الفرج

**لِوجهِكَ الدامي .. وجهتُ آلامي ..
يا سيدي الظامي...

••••••••••••••••••••••
من عبدك طلب ، مولاي ..واعرف ما ترد حاشاك
ردني الفطرتي ، الراحت .. الذيچ الفطرة ردني وياك
يجرني اهواي چف دنياي ..ولازمني ابحنانك ذاك
ردني الدمعتي الما چان ... تطيح إلا ابذكر طرواك

خُذنِي مِنَ النَّفسِ .. ضَيعتُهُ درسِي
في سَهوِ أيامي ..يا سيدي الظامي
••••••••••••••••••••
أمس بس عينك اتهمني ... وادور عن رضاك اوياي
اتركت لجلك اماني الروح... يبو اجروح العزيزة اهواي
صدگ انسه العطش ماذيك .. ورضيعك يصرخ ابلا ماي
وانه ابحزنك صرت انسان .... بلا حزنك ضعت مولاي

رضيعُكَ الأصغَر .... ماذنبُهُ يُنحَر
يُروى بِأسهامِ ...يا سيدي الظامي
•••••••••••••••••••
اعله گلبي اكتظ غبار اوهام ... ليل ألْيَل ، جفاه النور
اوّرود الخدمة ذبلن حيل .... وصارت عيني ابعاشور
ما ريدن حزن چم ليل .... وسنين ابلا حُسين أدور !
معذور البچة ابطاريك .... والما يبچي ما معذور

فقَلبيَ القاسِي ....مُضِيْعُ إحساسي
ليسَ بمُقدامِ ...يا سيدي الظامي
•••••••••••••••••••••
لا يشغلني شاغل غير .... جمالك ، والعطش ، وخيام ..
يا اجمل عشگ مذبوح .... العِقل بيك ، ابجروحك هام
" يحسين ابضمايرنه "..... نشيد بكل مسه وأيام
ترست الدنيا ،حُب وخير ... وگلبك تارسته اسهام

وخدُّك الأنعم ...... مُرمَّلٌ بالدِّم
فلتبكِ أحلامي ...يا سيدي الظامي
•••••••••••••••••••••
وضّيت ابدموعي الروح ....وألهج باسمك وطاريك
واحس لان الگلب مولاي .... من طاحن دموعي اعليك
شكو بروحي ألم يحسين.....الك لازغر جروح البيك
ولو كل الجروح اكبار ....... واعرف زينب اتبجيك !

بزينبِ الصَّبرِ .... اقبلنِي كالحُرِ
بِلوعةِ الشامِ .... يا سيدي الظامي

قاسم المالكي

خدر الفواطم
لنشر القصائد الحسينية (@Alfoatm3)**#اللهم_عجل_لوليك_الفرج

**انت امي وانت ابوي .. شعندي غيرك ثاني
انت بالشدات اخوي .. وبالعشگ سلطاني
حسين .. وي الهوه ابعث الك سلامي
حسين ..انت حبيبي ورجوتي وامامي
شعندي غيرك ثاني
ــــــــــــــــــــــــــــــــــــــ
عايش دنيتي ابجالك .. مجدي لنظرت اعيونك
عبد خليني واتنومس .. ومَلك ماريد من دونك
كلشي اتريد خليني .. ولو حافر لميمونك
تراب ابدربك اجعلني .. ويسحگوني اليزورونك

لو عفتني وين اروح .. وياهو يفهم حالي
بدون شخصك مالي روح .. ولا بشر يبرالي

حسين .. بدموعي اريد اختم الك كلامي
حسين .. وانت حبيبي ورجوتي وامامي
شعندي غيرك ثاني
ــــــــــــــــــــــــــــــــــــــ
اخذني وصير ملاچي .. وعبد بعتابك اجعلني
ابوس اتراب زوارك .. واعيش ابهاي متهني
ابچي ابصحنك ابهيده ... بلكي وعبد تقبلني
ما مل النواعي عليك .. ولا دمعاتي ملني

الف عابس اني اصير .. بروحي اضمن راسك
عبد عندك يالامير .. اي وحگ عباسك

حسين .. بداعت العباس بس اسمع هيامي
حسين… انت حبيبي ورجوتي وامامي
شعندي غيرك ثاني
ــــــــــــــــــــــــــــــــــــــ
الموته بمجلسك يحسين… چبيره عليه وهوايه
بداعت فاطمه اقبلني .. واموتن كون بقرايه
اموت وبيه حرگت شور .. بوكتها اعيوني بچايه
وحگك الطم مرهدن .. واشد احزامي بالرايه

ادگ صدري وراسي حيل… بلكي افووخ روحي
الويل اليه والف ويل .. كون اهم بجروحي

حسين… لطمت جبيني وصرختي اوغرامي
حسين.. وانت حبيبي ورجوتي وامامي
شعندي غيرك ثاني
ــــــــــــــــــــــــــــــــــــــ
حبيبي حسين ياعالم .. واعز من روحي وانفاسي
حسين الخير والطيبه .. وقاري و شيب البراسي
اشوفك ضحكت الفقره… ومحبتك تارسه احساسي
كلشي بهالحياة حسين .. زوودي وديرتي وناسي

انت باب الله الجبير .. وانت ابو الحنيه
انت الاول والاخير … وروحي الك مسبيه
حسين .. گطرة نده حروفك احس يضامي
حسين .. انت حبيبي ورجوتي وامامي
شعندي غيرك ثاني
ــــــــــــــــــــــــــــــــــــــ
عليك ابداعت اسكينه .. بداعت بچي المسبيه
تقبل خدمتي ونوحي .. وترضى يالولي اعليه
وحلفك بيش !!هنه هواي ؟؟… عليك ابطيحت ارقيه
عليك بداعت العباس… ولهفته وذاك ماضيه

بداعت الصاحت وراك… ومن الخيم توميلك
رايد انجن ابهواك… وكون دم ابجيلك

حسين .. كون بطريقك ينكتب ختامي
حسين… انت حبيبي ورجوتي وامامي
شعندي غيرك ثاني

خالد عبد السادة البديري

خدر الفواطم
لنشر القصائد الحسينية (@Alfoatm3)**#اللهم_عجل_لوليك_الفرج

**((سؤال الباب))

سؤال الباب جوابه أخيام
والبسمـــــار جوابه اسهام
الچف ألي سطر فاطم
نفسه ألي ذبح جــاسم .. ذبح جاسم

"""""""""""""""""""""""""""""""""""''''''''''

الحرگ بابچ حرگ خيمه وطك يتيمه
الهــد عليكم هـــد عليهن ودنـيا هيمه

الجرح نفسه بتفاسيره
نفس الصوره والسيره
اهـــنانه النار مشعوله
وبالطف نارهـم حيره

والضـــلموج مو أسلام
والبسمار جوابه اسهام
الماخــــله ضلع سالم
نفسه الي ذبح جاسم .. ذبح جاسم

"""""""""""""""""""""""""""""""""""''''''''''

نفســـه هوه السحگـ محسن اسمه حافر
الحرگ چفچ حــــــرگ چفها بيوم عاشر

الدفع بابچ يبت طه
نفسه أرقية ضرباها
ماخذ منها تـــرچيـه
هوه نفسه سلبـــاها

والأذوچ اهـــــل الشام
والبسمار جوابه اسهام
وَبّــــــابچ رمح ساهم
نفسه الي ذبح جاسم .. ذبح جاسم

"""""""""""""""""""""""""""""""""""''''''''''

المنع حگچ منع حگـــها ويسراها
نفسة قنفذ سوطة نفسه اللوعاها

الذَبـــچ بالترب گوه
ذبــــها وهـــيه تتلوه
وماگالت أرحمــوني
گالت والعشگـ يسوه

العشگـ ذابح نحور احلام
والبسمــــار جوابه اسهام
واليظـــلم گلب هايم
نفسه ألي ذبح جاسم .. ذبح جاسم

"""""""""""""""""""""""""""""""""""''''''''''

الچتف حيدر چتف زينب بيا رزيه
الأخذ ارثــــچ هوه يصرخ يــاسبيه

اليضدچ عمـره ماصلى
ذبح بســهامه عــبدالله
وعَطَشّ طفله ملچومه
وبفعـــاله نــكر ( الله )

والخلووّ بســهر ما نام
والبسمار جوابه اسهام
والبيده الگلـــب ثالم
نفسة الي ذبح جاسم .. ذبح جاسم

"""""""""""""""""""""""""""""""""""''''''''''

الكسر ضلعچ سحگـ ضلعه بيامصيبه
الهــــدم بيتچ صاح زينـب يــــاغريبه

نفسه ألي سحگـ صدره
چَـوه جفــــوفچ بجمره
شيطان العمـــــــر هوه
الشمر هم قاتل الزهره

الجرح ماطاب ولاهوْ التام
والبسمار جــــــوابه اسهام
اليضدج دينة ماسالم
نفسة الي ذبح جاسم .. ذبح جاسم

"""""""""""""""""""""""""""""""""""''''''''''

من السقيفه المونضيفه كل مصابچ
ياعـــــــزائچ كـــربلائچ هــوه بابچ

حرگو خيمةّ ضعــونچ
وشافت كلشي عيونچ
مــــــــولاتي وبعد أكثر
السوط النفسه بمتونچ

بعد لاوين سبي والشام
والبسمار جـوابه اسهام
نفس الحاكم الحاكم
نفسه ألي ذبح جاسم .. ذبح جاسم

عبد زينب
محمد الابراهيمي

خدر الفواطم
لنشر القصائد الحسينية (@Alfoatm3)**#اللهم_عجل_لوليك_الفرج

#الليالي_الفاطميه_الاولى **حزن عينك .. جرحني اهواي
ألم ضلعي .. يحيدر مـاي
••••••••••ـ

اشوفك حاير و روحي .. تلوج بحرگه وبسكته
دريت ابهضمتك تكبر .. يحيدر كسري هدئته
صدگ هوا الجرح بيه .. وانته بهضمتك عشته
لـوّن ينـدار كل حزنك .. فـوگ البيه الي درته

تهم روحي .. يلب احشاي
ألم ضلعي .. يحيدر مـاي

••••••••••ـ

اذ مو من كسر ضلعي .. اموتن من كسر گلبك
ترا مو بس أنا ايهدني .. يهد ابزينـبك تعــبك
انا ضلعي انحنى تدري .. مثل ما تنحني الربك
ولكـن كــابـرت لجــلك .. عـلي انه بكـثر حبك

كسر گلبي .. ؤنينك ناي
ألم ضلعي .. يحيدر ماي

••••••••••ـ

علي اعذرني الچمنك .. ترا الحالك نزل دمعي
تحط ايدك على گلبك .. اذ انه الـزمت ضلعي
تذم وكتك تحيّر اهواي .. يشغلك كل وكت وضعي
تره صعبه النذل يمك .. سطرني وهسه گمت انعي

شفت ويلاه .. حمّر عيناي
ألم ضلعي .. يحيدر ماي

••••••••••ـ

ذبل ورد الأمل بيه ،، الرسمته اوياك ياحيدر
سوه يگضي العمر ردته .. لچن هساعه اتعذر
اضنه للـوداع انـوه .. يحيـدر گـلـبي ما يـگـدر
اعيش ايامي بالگوه .. وتره ابكـل ليله اتحسّر

الى گبري .. كتبت احذاي
ألم ضلعي .. يحيدر ماي

••••••••••ـ

سلاماً من گلب حاير .. يعيش ابؤنته وبكسره
يحيدر گربت حدها .. واضنها تنتهي العشره
صبرنه اشكد عله الدنيه .. عله الحلوه وعله المره
بهدوء الليل الى گبري .. اخذني وروحي منتظره

احس بالموت .. گربلي وجاي
ألم ضلعي .. يحيدر ماي

••••••••••ـ

- خيري الصفراني

خدر الفواطم
لنشر القصائد الحسينية (@Alfoatm3)**#اللهم_عجل_لوليك_الفرج