لا تشتكي وانت السبب يوم قفيت !
‏حتى لو عيونك .. من أجلي تباكت

‏شفني تعبت من المفارق وعانيت
‏لكن على رغم المعانـاه سـاكــت

‏والله وجابولي مع الوقت طاريك
‏مل الصبر , وانا اتحرى اتصالـك
‏َ
‏ما ذكروني فيك ماني بناسيـك
‏دربك سلام ودرب غيرك مهالك .

, , ,

لا تطرّين المطار وطاري البعد وعذابه
‏خلّي الرحله تجي وتروح لا تحكين عنْها

‏واذكريني لا صعدّتي فوق واغوتْك السحابه
‏وامطريها لا فقدتي شي وادفعلك ثمنها

‏هو سؤال وخايف انك تحرجيني في جوابه
‏الغريبة كيف تضحك في وطن ماهو وطنها

‏من يرد الصمت في بال الكلام ومن درابه
‏والرسايل حبرها يبكي على منهو حزنْها

‏يا عظيمة من يلوم اللي تبرّا من شبابه
‏والهقاوي في زمن ما تامنه تامن زمنها

‏لا على الدنيا سلام ولا ملام ولا غَرابه
‏وآهنيّ اللي حياته مسألة وقت وضمنها

‏متّبع سيرة محمد وامتطى نهج الصحابة
‏والدموع لْيا تساوت في طرف كمّه كفنها

‏وانتي اللي ما تركتي للحنين الا مصابة
‏والهدايا تحتضنّي واشتكيها واحْتضنها

‏لملمي بعض الليالي والليالي في كئابه
‏قمرةٍ في كل ليلة تحتويك وفيك منْها

‏سافري وانتي عوض ربي ودعوة مستجابة
‏منتظرْك الشاعر اللي كل عسراته دفنْها .

, , ,

مازال في داخلي لك هالشعور الغريب
‏لو كنت ابيّن بقلب من المشاعر خلي

‏ان كانك تشوفني مثل ماشوفك حبيب
‏لمح لقلبي أمانه .. لا تخبي علي

‏أخاف يبرد شعوري و اتناسى و أغيب
‏و يكون لي شي في قلبك ولا بان لي

, , ,

وش الومك عليه ؟ و خاطري دون الملامة طاب
‏ياوجهٍ يوم أشوفه كنت أشوفه وجهي الثاني

‏كذا أستكثرت الراحة على قلبي بدون أسباب
‏كذا ترضى لي عصف الشتات بعز خذلاني ؟

‏مثل ما كنت أشوفك حقيقة في زمن مرتاب
‏لقيتك زيفٍ يشكك عدوي كل ما جاني

‏ذخرتك طلقةٍ ترمى بصدر الصاحب الكذاب
‏لعل سلاحي موجه على صدري و شرياني

‏وقفت وقفةٍ صلبه ، بعد ما صفوا الأغراب
‏و جابوا لك حطب صدري و ولعت موقد أحزاني

‏و أنا ورب الفلق والناس والأحقاف والأحزاب
‏ما كنت أحسب حساب لساعةٍ يربط فيها لساني

‏أعاتب من؟ و الدنيا بخطاها ماعليها عتاب
‏مثل ما جابني درب الزعل .. لهناك ودّاني

‏هناك لوين؟ مدري بس أعرف إن الطريق غياب
‏غيابٍ كل ما طال الطريق ، تخف نيراني

‏كسرت الباب أبو مزلاج حزن ولا بقى لي باب
‏و دانيت الجفا حتى لو إني كنت ما أداني

‏فمان الله ، و اللي بيننا يبقى ليوم حساب
‏أخاف أسامحك يوم الحساب و أنجرح ثاني

, , ,

يالله ياللي تسجد الناس لرضاك
‏يامحيي الأموات ياخالق الكون

‏اسألك عفوك قبل لا أموت وألقاك
‏واسألك عيشه مابها غبن وحزون

‏انت القدير اللي ترجيت رحماك
‏وانت العليم بحاجة العبد والعون

‏يالله عسى عفوك وغيثك وسقياك
‏نورا على الاموات حتى يفيقون .

في البعد والقرب ولا فالمجيَ والقعاد
‏من حبك وذكرياتي معك مالي مفر
‏ِ
‏لو اقضـيّ العمر كله من بلاد لبلاد
‏غلاك اشله معي كنه جواز السفر ):