" - كيف تخطيت كل ذلك وبقيت كما انت؟
‏- لا أحد يتخطى و يبقى كما كان ، مع كل تخطي هناك شيء بتر منك و احتل الخوف مكانه"

لما بتقول “كيف تخطيت كل ذلك وبقيت كما أنت؟” الجواب هو إنو ما حدا بيقدر يتجاوز الصعوبات ويمر بالتجارب الحياتية القاسية بدون ما يتغيّر من جوّاتو
لأنو كل تجربة، خاصة إذا كانت صعبة أو مؤلمة، بتترك أثر، وهاد الأثر غالباً بيغيّر شي بشخصيتنا أو طريقتنا بالتفكير

إنك تتجاوز شي وتبقى نفس الشخص هي نوع من الخيال أو الوهم
يعني، كل مرة منواجه فيها تحدي أو صعوبة، في جزء مننا بيتغير أو “بينبتر”، سواء كان هالجزء هو البراءة، الثقة، التفاؤل، أو حتى الأمان النفسي

وأكتر من هيك، المكان اللي كان فيه هالجزء المفقود غالباً بيجي الخوف ليحتله
الخوف هون ممكن يكون خوف من المستقبل، من تكرار التجربة، أو حتى من الألم نفسه
يعني مثلاً، إذا شخص خسر حدا عزيز أو عاش تجربة مؤلمة، هالشي بيخلق عندو مخاوف جديدة، سواء من فقدان ناس تانين أو من تكرار نفس الألم

الفكرة الأساسية إنو التخطّي مو عبارة عن نسيان أو تجاوز كامل، بل هو عملية معقدة بتخلّف وراها آثار مُتراكمة
الشخص بيتغيّر بطريقة أو بأخرى، وبينفقد منو شي، بس بنفس الوقت بيتعلّم شي جديد
الخوف اللي بيجي مكان الجزء المفقود هو جزء طبيعي من هالتجربة، لأنو لما منخسر أو منمرّ بصعوبة، منبني ميكانيزمات دفاع جديدة ومنصير أكتر حذرين ومنتعلم، على أمل انو ما نوقع بالجورة اكتر من مرة مرتين تسعة 🌚

زبدة الحشي:
ما في حدا بيتخطى الصعوبات ويبقى “نفس الشخص”
دايماً في تغيّر داخلي بيصير، سواء كان ظاهر للناس أو مخفي، ودايماً في شي جديد من الخوف أو الحذر بيحل محل الجزء اللي اتغيّر فينا، والوقت بيشفي يعني 🫶🏻

والسلام عليكم 🧉

#فلسفة
#دخيل

الفيلسوف سينيكا قال: "ليس هناك أي حصن يحمينا من القدر ، لذلك علينا أن نبني دفاعاتنا في دواخلنا ، إذا كان حصننا منيعاً وآمناً يمكن مهاجمتنا ، لكن لا يمكن احتلالنا "

القدر أو الظروف الصعبة بالحياة هنن أشياء ما فينا نهرب منها أو نمنعها بشكل كامل
الحياة بطبيعتها فيها تحديات، مصاعب، وأشياء ما منقدر نتحكم فيها
فحتى لو بنينا “حصون” مادية، متل مال، منصب، أو قوة خارجية، هالحصون ما بتكفي لتضمن سلامنا أو راحتنا
ليش؟
لأن الظروف الخارجية دايمًا ممكن تهاجمنا وتتغير الأحوال

لهيك، الحل الصحيح هو إنو نبني حصن داخلي جواتنا، بمعنى إنو نشتغل على حالنا نفسياً وعقلياً لنوصل لمرحلة من القوة والثبات الداخلي اذا طرأ اي تغيير خارجي ف نحنا مستعدين إلو
إذا كنا واثقين من حالنا ومن مبادئنا، وعنا تحمّل وقدرة على التعامل مع الصعوبات، حتى لو هالظروف حاولت تضغط علينا، رح نقدر نثبت وما ننهار

الفكرة متل مثال الشجرة القوية: إذا كانت جذورها عميقة ومتماسكة، الرياح القوية ممكن تهزها بس ما رح تقلعها
أما إذا كانت ضعيفة من جواتها، مجرد هزة صغيرة رح تكسرها قدرما كانت عملاقة

سينيكا عم يدعونا نكون متل هالشجرة القوية، نعتمد على قوة داخلية بدل ما نعتمد على أشياء خارجية دايمًا معرضة للتغيير 🤌🏻

والسلام عليكم 🧉

#فلسفة
#دخيل

"سوف تكتشف متأخراً بأن الأخطاء التي شكلت كثير من معاناتك كانت آتية من أن نفسك لم تكن على رأس اولوياتك، في محطة من محطات الحياة سوف تكمل وحيداً مع تلك النفس التي ارهقتها الأيام"

بعد فترة من الزمن، رح نوصل لمرحلة من الوعي الذاتي وقت نكتشف انو سبب كبير من معاناتنا كان ناجم بشكل اساسي عن إهمالنا لنفسنا ومشاعرنا

لما الإنسان ما بيحط نفسو وأولوياتو على رأس اهتماماتو، بيصير يعطي وقت وطاقة لناس أو أمور بتستنزفو بدون ما يحس، بحجج مثل “المسؤولية”، “التضحية”، “الواجب" أو حتى "الحُب"

هالمسميات الناعمة، بتضل عم تسحب من طاقتك النفسية والجسدية شوي شوي لحتى تلاقي نفسك مُنهك، وخصوصا وقت تكون هالمسميات بدون جدوى…

كتير ناس بيفكرو إنو الاعتناء بالنفس أو إعطاءها الأولوية هو نوع من الأنانية، بس بالحقيقة هالشي هو عين العقلانية
لما ما تكون مرتاح مع نفسك أو ما عم تعطيها حقها، ما فيك تكون فعّال بأي جانب من جوانب حياتك سواء بشغلك أو بعلاقاتك مع الآخرين

نفسك هي الأساس، وإذا ما اعتنيت فيها، كل شي تاني رح يتأثر

وفي مرحلة معينة من الحياة، الكل بيوصل لمكان بيحس إنه مهما كان حواليه ناس أو علاقات، بالنهاية هو رح يكمل لوحده مع نفسو
متل ما قال سارتر : "الجحيم هو الآخرون"

هون بيجي أهمية الاهتمام بالنفس من البداية، لأنك إذا ما كنت مرتاح وعم تعتني بنفسك، رح تحس بتعب كبير لما توصل لهالمرحلة وما رمرتقدر حتى انك تعتني بالآخرين بطريقة صحيحة

انت بحاجة دايماً تحط حالك وأولوياتك بمقدمة اهتماماتك، مش لأنو العالم ما بيستاهل أو ما في ناس يستحقوا اهتمامك، بس لأنك إذا كنت منهك ومهمَل، ما رح تقدر تعطي أي شي لأي حدا أو لأي شي بطريقة صح 🫶🏻

والسلام عليكم 🧉

#فلسفة
#دخيل

‼️ عاجل :

قالت صحيفة "معاريف" العبرية، إن الهجوم الذي استهدف العاصمة السورية دمشق، الخميس، جاء بعد وقت قصير من وصول علي لاريجاني مستشار المرشد الأعلى الإيراني علي خامنئي

وأعلن الجيش الإسرائيلي أنه شن هجمات جوية على مواقع مرتبطة بحركة "الجهاد الإسلامي" في العاصمة دمشق، فيما قالت وزارة الدفاع السورية إن القصف استهدف عددا من الأبنية السكنية في حي المزة بدمشق ومنطقة قدسيا بريف دمشق، وأسفر عن مقتل 15 شخصا وإصابة 16 آخرين بينهم نساء وأطفال ووقوع أضرار مادية في المباني المستهدفة، في حصيلة غير نهائية للهجوم

#سياسة
#سوريا
#دخيل

نحنا البشر عادةً منبني تصورات مسبقة عن الأمور من خلال التربية، الثقافة، الدين، والمجتمع يلي منعيش فيه
وهالتصورات هي بتصير متل عدسات لعيوننا، بحيث كل شي منشوفو و ومنختبرو بالحياة بيتوضح وبيتفسر من خلال هالعدسات

يعني، لما منكون عم نقرأ أو نتعرف على ثقافة جديدة، معتقد جديد أو أفكار ما منعرفها، ما عنا أي شي سابق نحكم عليه، فممكن نشعر بالدهشة، الجمال أو حتى التسامح مع هالشي المختلف عننا
بس لما نجي على موضوع نحنا عنا خلفية مسبقة عنو، سواء من خلال الدين أو التربية أو المجتمع، بيصير أصعب نتعامل معو بموضوعية

ليش؟
لأن عقلنا من بداية الموقف بيكون عم يحاول يأكد أو ينفي شي هو أصلاً مبرمج عليه

التحرر من التصورات المسبقة هو شي مو سهل أبداً

لازم الواحد يكون عندو إرادة حقيقية ليتعلم ويشوف الأمور بطريقة جديدة
لما الإنسان يبدأ يتحرر من هالتصورات، بيكتشف إنو العالم أو الأمور حوالينا ما هي بهالتعقيد يلي ممكن كنا متصورينو، وإنو الاختلافات بين البشر أو المواقف او الأفكار هي غالباً نابعة من أفكار وصور عقلية تم غرسها فينا من إحنا وصغار، يعني تصورات مسبقة عن أمور لا نعلم عنها شيء

كل ما كانت هالتصورات متجذرة أكتر، كل ما بيصير صعب نتقبل أفكار جديدة أو نحاول نفهم الآخر
وهون بيصير في نوع من “الموقف النفسي” يلي بيرفض فكرة الفهم
يعني بدل ما نحاول نفتح عقلنا للفهم، منوقف بوجه هالفكرة و منتمسك برأينا أو بموقفنا، وهالشي بيخلق تفاوت بين الناس بكيفية تعاملهم مع الواقع

بالنهاية، التحرر من التصورات المسبقة بيطلب وعي و جهد كبير والخروج من الـ comfort zone بيتطلب شجاعة كبيرة جداً

مو بس إنك تقرأ أو تتعلم، لازم يكون عندك الرغبة إنك فعلاً تشوف الأمور من منظور مختلف وتكسر هي الحواجز العقلية 🫶🏻

والسلام عليكم 🧉

#فلسفة
#دخيل

"إذا كنت متدين سوف يتم انتقادك
‏إذا كنت ملحداً سوف يتم انتقادك
‏إذا كنت مفكراً سوف يتم انتقادك
‏إذا كنت جاهلاً سوف يتم انتقادك
‏إذا كنت غنياً سوف يتم انتقادك
‏إذا كنت فقيراً سوف يتم انتقادك
‏عش نفسك ، يشعر الإنسان بقسوة النقد كلما عاش بغير حقيقته"

مهما عمل الإنسان، دائماً رح يكون في حدا ينتقدو
إذا كنت متدين، رح تلاقي ناس تنتقدك لأنك متدين
إذا كنت ملحد، رح تواجه نفس الشي
نفس الموضوع إذا كنت غني، فقير، مفكر، أو حتى جاهل
يعني، النقد دائماً موجود مهما كان خيارك أو طريقة حياتك
الموضوع بيرجع لطبيعة الحياة الاجتماعية والمجتمع، يلي بيخلينا نشعر دايماً اننا تحت المجهر

بس النقطة الأساسية، واللي هي أهم شي، إنو الإنسان بيحس بوجع النقد أكتر بكتير لما بيكون عايش بطريقة مو حقيقتو
بمعنى إنو إذا كنت عم تحاول ترضي الناس وتعيش بطريقة مغايرة لشخصيتك الحقيقية، وقتها كل نقد رح يكون مؤلم أكتر بمراحل
بينما لما تكون عايش على حقيقتك وما بتكترث لرأي الآخرين، بيصير النقد أقل أهمية وما بيأثر فيك بنفس الدرجة لأن الإنسان لما بيعيش حياة مغايرة لحقيقتو الداخلية، بيحس بضغط أكبر

زبدة الحشي:
النقد دايماً رح يكون موجود، بس كيف نحس فيه بيعتمد على مدى توافقنا مع ذاتنا الحقيقية. لما منكون متصالحين مع حالنا، النقد بيصير مجرد صوت بالخلفية، ما بيأثر فينا بنفس القوة لأنو من جواتنا مرتاحين وعايشين حقيقتنا 💃🏻🙅🏻‍♂️

والسلام عليكم 🧉

#فلسفة
#دخيل

كيف رح يكون تاثير فوز ترامب على الوضع بسوريا؟

1. الوجود العسكري الأميركي: بفترة ترامب الأولى، قرر سحب جزء من القوات الأميركية من شمال سوريا، وهاد الشي ترك مجال لتركيا لشن عمليات ضد الأكراد، يلي كانو حلفاء للولايات المتحدة ضد داعش
   إذا رجع ترامب للرئاسة، ممكن يرجع يطبق نفس السياسة ويفضل تخفيف الوجود العسكري الأميركي، وهاد رح يخلق فراغ أمني ممكن تستفيد منو تركيا أو حتى روسيا وإيران لتوسيع نفوذهن بالمنطقة

2. العقوبات الاقتصادية: ترامب كان وراء فرض قانون قيصر يلي شدد العقوبات على النظام السوري، واستهدف الاقتصاد بشكل مباشر
   فوزو ممكن يعني استمرار هالعقوبات أو حتى زيادتها، وهاد الشي رح يزيد الوضع الاقتصادي بسوريا صعوبة، خاصة على الشعب يلي رح يتأثر بشكل أكبر

3. التعامل مع النظام السوري: إدارة ترامب ما كانت مركزة على تغيير النظام بدمشق مثل إدارات أميركية سابقة، وكان اهتمامو الأكبر بمحاربة داعش والحد من نفوذ إيران
   إذا فاز ترامب مرة تانية، غالباً رح يضل نفس التوجه، يعني ما رح يكون في ضغوط كبيرة على النظام السوري لتغيير سياساتو
   واللي بيدعم هاد الرأي هو تدهور النفوذ الإيراني بالمنطقة ومن الوارد انو النظام السوري يرجع يعيد النظر بالتحالفات السياسية تبعيتو وبخص بالذكر حزب الله وايران

4. الدور الروسي والإيراني: ترامب عندو علاقات معقدة مع روسيا، وأحياناً بيحاول يتقرب منها ولكن العلاقة بيناتن افضل بكتير من علاقة الديمقراطيين (بايدن مثلا) مع روسيا
   إذا صار في نوع من التفاهم بين أميركا وروسيا، هالشي ممكن يأثر على التنسيق بين البلدين بسوريا
   بس من جهة تانية، ترامب معروف بمواقفه المتشددة ضد إيران، وهاد ممكن يزيد التوترات خصوصي إنو إيران إلها دور كبير بسوريا

بالمختصر، فوز ترامب رح يؤدي غالباً لاستمرار الضغط الاقتصادي على سوريا مع تركيز على محاربة الإرهاب وتقليص التواجد العسكري الأميركي، وترك النظام السوري واللاعبين الإقليميين مثل روسيا وتركيا وإيران يتنافسوا على النفوذ

هاشتاغ سيادة وطنية
هاشتاغ لحمة بعجين وطنية
هاشتاغ أنا سوري اااااااااه (بصوت مجدي ووجدي) يا نيالي

#سوريا
#سياسة
#دخيل

فوز ترامب رح يكون الو تأثير كبير على منطقة الشرق الأوسط وخصوصاً على الصراعات الدائرة بغزة، لبنان، وإيران

بما يخص غزة ولبنان، ترامب معروف بدعمو القوي لإسرائيل، وهاد الدعم رح يكون على الأرجح بدون شروط
من المتوقع إنو يعطي نتنياهو “الضوء الأخضر” ليستمر بعملياتو العسكرية ضد حماس بقطاع غزة وضد حزب الله بلبنان بدون ما يواجه ضغط كبير من واشنطن لوقف التصعيد أو لتحقيق وقف إطلاق النار
صحيح ترامب وعد بانهاء الحروب بالشرق الأوسط وتحقيق السلام، ولكن ما قال كيف…
الكيفية بتوقع انها تكون بانهاء حماس وحزب الله وحركات المقاومة الإقليمية وضرب جماعة الحوثي باليمن والجماعات الشيعية بالعراق بما انو اميركا عندها قواعد عسكرية بالعراق
+ والاهم : تحجيم دور ايران بالمنطقة
وبعدها بالنسبة ل ترامب ممكن يصير في سلام

إدارة بايدن حالياً عم تدعم إسرائيل كمان، بس الفرق إنو بايدن وهاريس عم يحاولو الدفع باتجاه وقف إطلاق نار
مع شخص مجنون متل ترامب، هاد الشي ممكن يتغير باتجاه المزيد من العمليات العسكرية الإسرائيلية ضد “محور المقاومة” الممتد من غزة للبنان وصولاً لإيران

بالنسبة لإيران، رجوع ترامب رح يعني العودة لسياسة “الضغط الأقصى” اللي كان متبعها، واللي شملت فرض عقوبات شديدة على صادرات النفط الإيرانية، وتضييق الخناق اقتصادياً وسياسياً
كمان، في احتمال أكبر إن ترامب يسمح لإسرائيل بتنفيذ ضربات عسكرية مباشرة ضد المواقع النووية الإيرانية، وهو شي بيخوف إيران لأنها عم تشوف حالياً تصعيد متزايد بين إسرائيل ووكلاء إيران بالمنطقة مثل حزب الله وحماس

بالتالي، فوز ترامب ممكن يزود فرص التصعيد العسكري بمنطقة الشرق الأوسط ويزيد من تعقيد الأوضاع بغزة ولبنان وإيران وصولاً إلى تحقيق السلام في الشرق الأوسط 🤷🏻‍♂️💃🏻

#سياسة
#دخيل

ليش مهم جداً كل فترة والتانية نعمل استراحة دورية من الكتابة، الأخبار، السوشيال ميديا، والتواصل الاجتماعي؟

في عدة أسباب:

1. تقليل التوتر والإرهاق العقلي: السوشيال ميديا والأخبار بتخلق نوع من التوتر الدائم لأنك عم تتعرض لمعلومات وأحداث سلبية بشكل مستمر
   كمان التواصل الدائم مع الناس ممكن يكون مرهق عاطفيًا
   الاستراحة بتساعد الدماغ يرتاح ويستعيد طاقته

2. تحسين التركيز والإنتاجية: من بعد فترة طويلة من التعرض لمصادر تشتيت مثل السوشيال ميديا، بتلاحظ إنو تركيزك بينخفض وإنتاجيتك بتقل وبتقضي اغلب وقتك عم تقلّب بالريلز وتحمل العاب سخيفة 🌚
   لما تاخد استراحة، بيكون عندك فرصة تسترجع قدرتك على التركيز والعمل بشكل أكتر فعالية

3. الصحة النفسية: الارتباط المستمر بالعالم الرقمي والعلاقات الاجتماعية ممكن يأثر سلبًا على صحتك النفسية، سواء من خلال الشعور بالضغط من العروض المستمرة لحياة الآخرين أو الانغماس في المشاكل العامة والخاصة للمُحيطين
   الاستراحة بتساعدك تسترجع توازنك وتعتني بنفسك

4. تحفيز الإبداع: لما تبتعد شوي عن الروتين اليومي والضغوط، بتصير عندك فرصة تكتشف أفكار جديدة، وهالشي بيساعدك تكون أكتر إبداعًا سواء بالكتابة أو بالعمل بشكل عام

الاستراحات ضرورية لتجديد الطاقة والحفاظ على التوازن الداخلي، بين كل فترة والتانية خدو استراحة والتفتو لنفسكن 🫶🏻

مرحبا 💘

#دخيل