قصيدة بمناسبة استشهاد النبي محمد (ص)

يارسول الله ونبيه... اكتب الليله الوصيه
يايهاالنفس ارجعي ارجعي
راضيةً مرضيه
.....
النص الاول

ياخليل الدام ياناس لخليله
ولويدوم النبي جادام لجليله
رحمةالله الليله معلن عن رحيله
من الارض يم العرش ربك يشيله

صارمجلس بالسموات..ونصبت الدنيا عزائات
ومشاية الاملاك للنبي للنبي
راضيةًمرضيه

...............
النص الثاني

شكدمشاعرشايله وشكبرالاحساس
الفاتحة تقراها كامت سورة الناس
ضهرالاخلاص انكسر ومهبطةالراس
مثل الحسين انكسرمن مات عباس

مجتفه ايةاعله اية..بطيحتةطلعن سباية
ويصعدن النوگ للسبي للسبي
راضيةً مرضيه
..........
النص الثالث

الحبيب اليلةمشتاگ لحبيبه
والله اذا رايد عزيز عليه يجيبه
يامصيبه ويامصيبه ويامصيبه
وبكلام الله طلع مو ايه شيبه

ميه واربعطش سورة..كلمن اينوح اعله طورة
وتحاچي الافلاك اخشعي اخشعي
راضيةً مرضيه
............
النص الرابع

الله واشتاگ ويحب وشلون اذ شتاگ
ويارؤؤف اعله الخلك يتحمل افراگ
خلگ ماضل عدمحمد والخلگ ظاگ
كلبه مشتاگ لحبيبه وعلقاء طاگ

ليك عجل ياحبيبي...ياشفيعي وياطبيبي
ويحجيلك اشواك مدمعي مدمعي
راضيةً مرضيه
..........
النص الخامس

باخرانفاسه النبي ومجتمعه الاحباب
عين ينظر للزجيه وعين علباب
روحه مادامت اله شدوم الاصحاب
يدري بالبسمار باجر للظلع طاب

ويعصرالباب الزجيه...ويدري بالباب المنيه
ويكسرالباب اجنبي اجنبي
راضيةً مرضيه
.......

محمد ابو محمد

قصيدة ليلة الوحشة

_'

فكدكم والركض يحتاج حيل
اول مره هايه اطلع بليل

الم كمت بيتاماي...وودعه الطايح احذاي
اول مره هايه اطلع بليل
....
النص الاول

اول ليله لاخواني لاخيمه
خوات حسين ركضن كلهن بهيمه
كلبي الليله بالطف مبتلي بضيمه
اجيب ايتيمه الكه شارده ايتيمه

اجيبن وحده الكه الثانية وين
مامحتاره بس حيرني الحسين
مات وماشرب ماي ..وودعه الطايح احذاي

.......النص الثاني

فرد ركضه العده من ركضوا علينه
العطش ماخله حتى نشيل رجلينه
الاصعب من عطشنه ومن مأسينه
عكب عباس شمر الي يلم بينه

تتفرج علينه الكوم والناس
وانه بعازتك وينك يعباس
حرمه وفاكده الراي ...وودعه الطايح احذاي

النص الثالث.......

ركضت من النهر للعلكمي للتل
جبيره الطف يخوتي وبيها ماندل
الصعب موش الركض الصعبة من اسال
وانه خدري تره من الهوى يخجل

ماشافتني لحظه هاي العيون
هسا اركض سويتي الي يركضون
ياهو اليقبل بهاي .. وودعه الطايح احذاي

......النص الرابع

مريت اعله ولدي واربع اخواني
ولافلا واحد نشدني شبيج حاجاني
شعجب عباس اخويه ماتلكاني
العطش تدري يخويه يبس الساني

اودع بالركض ولدي والخوان
وياواحد امره ايكلي عطشان
زينب يبست احشاي ..وودعه الطايح احذاي

........النص الخامس

لميت الحرم واطفالي والخدر
هجموا والضعن هم بالطف اطشر
زغيره اطفالي يخواني وجبير البر
والخيل التجيه اعله الركض يكدر

شفت اطفالي هاي تكوم وتطيح
والواحد تعثره الخيل والريح
كلها تنوح وياي .  وودعه الطايح احذاي

.....

قصيدة عن سلب الامام الحسين (ع) من قبل جيش ال اميه وماكفاهم سلب خنصر وثياب الامام بل تجرئوا وقاموا بسلب راس الحسين من جسده

المستهل....
سلبوه صاحوا وكلشي بيه مالكوا
هو بس راسي عندي خذوا راسي ومشوا

شنو اليسلب يحصله
وانه صاير وصله وصله
هو بس راسي عندي خذوا راسي ومشوا

.........

اليموت وبعد موته غير يرتاح
انه اول ميت ومنتظره ذباح
كلها وكفت بيه وكفه شبيه الرماح
راسي راح وصدري راح وثوبي راح

هانت الدنيا تاليتي وحسين انچتل
وياهو مثلي بحوافرهم بكاع انسحل
الراح من عندي شيحصله
وانه صاير وصله وصله

........النص الاول

محد ايشوف العطش عادي ابقه عطشان
صعبة من تنجر اهدومي وابقه عريان
بيه نسواني تحشم وانه حيران
انه عاري وفشله اردن هاي نسوان

حيرتي حيره ابقه لو اردن للأهل
شلون ارد ليهن هدوم ماعندي وفشل
حسين ماكو انسلب كبله
وانه صاير وصله وصله

....... النص الثاني

كلشي ماضل كلشي عندي وكلشي اخذتوه
حتى خنصر ايدي مني هم كطعتوه
حسين ابن الزهره ياعالم ارحموه
عاد ثوبي اعليه يبقة ولاتسلبوه

عندي ماباقي غير الله والعطش
انه بالعاشر شلون لو صار اهدعش
جسمي جم حافر ينكله
وانه صاير وصله وصله

.......النص الثالث

شنهو ضال ايسلبونه حتارت الناس
وانه هم محتار بين اضلوعي والراس
ياهي منهن اول البلخيل ينداس
ومن ضلوعي الحافر ايوصل لعباس

الحافر منيروح مني ياخذ للكمر
ومن يرد ليه يجيب من صدره وذر
ياخذ بجسمي ويوصله
وانه صاير وصله وصله

...... النص الرابع

حيل ماضل وبقه بس حيل العيون
وكلبي يركض للخيم وي اليركضون
ماكفاهم سلبي من كاموا يسلبون
ماي جابوا يمي عد راسي ويبدون

ماتضوك الماي موت يحسين بقهر
وثنعش طبره نحري بالسيف انطبر

نشده ثاري حسين عكله
وانه صاير وصله وصله

.........النص الخامس

الشاعر محمد ابو محمد
للعام الهجري 1445
واتساب 07808247917

قصيدة ليلة الوحشة / بعد مقتل الامام الحسين ع ووضع الرأس على الرمح تطلب السيدة زينب ع من الاطفال والنساء عدم التكلم مع الامام الحسين لانه لا يستطيع التكلم وفي منحره الرمح.
_
المستهل

مو كلكم تحجون __ ميت بي تدرون
الراس الرمح متعبه هواي
حر وجروح وحسرة ماي
ميت بي تدرون
_
النص الاول
يربي راس حسين كدامي اعله رمحه
صعبة من ينزف دمه ومحد يمسحه

لاينزلونه ولاتلوحه اديه
عثر شايل راسه ودنه عليه
كول وانه انطيك شيصح ابديه
كتله ماي وكال لا بنتي رقيه

لاتعثر وتطيح __ من حسين تصيح
مااحمل واغمض عيناي
حر وجروح وحسرة ماي
ميت بي تدرون
_
النص الثاني

احجي وي اطفالي كتلهم يرجواي
حسين لاتحجون يمه انتعبه هواي

خاف نحجي وبالحجي كلش نهضمه
والترس نحره الرمح ماعنده جلمه
بلكي ينزل عاد يشتمنه ونشمه
حتى لليسئل نكله اويانه زلمه

الماخذ راس وياه __ ومكابل عيناه
ايظل ايدورله اعله افياي
حر وجروح وحسرة ماي
ميت بي تدرون
_
النص الثالث

بالدرب واطفالي كل ساعة يسألون
لينه هاي الروس يالحظه ينزلون

كلي للحادي ينزل اول اثنين
ينزل العباس كليله والحسين
ساعة وحده حتى ياعمه تنامين
ذني يومين الجزن وانتي تركضين

هيج الله ينزلون ___ وبنصنه ايكعدون
راس ويكعد صعبة هواي
حر وجروح وحسرة ماي
ميت بي تدرون
_
النص الرابع

وي مشي النوك شيوالم ركض الزغار
والله يعلم ياحسين براسك اصار

سكته ماتسكت ولاتحجي شيحجيك
وانت ذاك الرمح نابت ياوسف بيك
حيره شنهي اجوابي بالينشد تره عليك
وين الوحك وين اضمك وين اوديك

لا لوحنه بساع ___ ولاينزل للكاع
هيج والله ايكرب احذاي
حر وجروح وحسرة ماي
ميت بي تدرون
_
النص الخامس

اي حجي ويالراس فدوه لاتكولون
خل حجينه ايصير نظره ابين العيون

السبي مالت تعب مو مالت اعتاب
ومابقه من الزلم بس روس واركاب
رمح طب بمنحره وشلون من طاب
لانزود بالحجي اصوبه بصواب

الله يعين حسين __ منين يهيد منين
من هاي ايسجن من هاي
حر وجروح وحسرة ماي
ميت بي تدرون
_
الشاعر محمد ابو محمد
قصائد محرم الحرام 1445 هــ
للاستفسار
واتساب تيليكرام 07808247917

قصيدة يوم السابع: ماهو حال الامام العباس لو ان الامام الحسين قتل قبله وان ابا الفضل العباس هو الذي يذهب لمصرع اخيه الحسين وهذه المره الامام الحسين هو من ينادي ادركني يا اخي والخ.. (محاوره بين الحسين والعباس عليهما السلام)

_
المستهل

حط عينك ياخويه بعيني..واعصر بجفوفك جفيني

عيش العشته بلحظه وياي
حسين الطايح يم الماي

وانته الباقي
_
النص الاول

تخيل انته الفوك مهرك تلتفت يسره ويمين
ومابقه من ذيج اخوتك غير زينب والحسين
كلي ياخويه شتسوي وانته محتاج المعين
تكلي روح تكلي ابقه حيرتك بين الثنين

الله يعينك من نتودع ..مادري ارجع لو ماارجع
اصفن خويه وعيش بهاي
حسين الطايح يم علماي
وانت الباقي
_
النص الثاني

حسين يكصد للشريعه وانت تبقه لبلخيم
وانت روحك يابو فاضل ترف وي رفت العلم
لون شفت الرايه طاحت؟ تكدر تشيل الجدم
حسين ويكلك يخويه راسي عباس انهشم

مثل الميت يشهد ربي ..واكف بس واكف هم كلبي
لانه بذيج ولانه بهاي
حسين الطايح يم الماي
وانته الباقي
_
النص الثالث

ليك اصيح ادركني خويه وشوف الادركني شنو
عيش خويه الانه عشته وشوف شيسوي الاخو
بالخصوص الجيش يضحك منهو يوكفلك منو
خل نسحكه وخل نذبحه يلله جيش اتحضرو

من يوكف يمك جتالك..وانت عيونك صوب عيالك
شدكول وينفع ياراي
حسين الطايح يم الماي
وانته الباقي
_
النص الرابع

لوتجي وتلكه جفوفي مكطعه وضال الزند
ايدك اتمدها تسلم فارغه ايدك من ترد
كلشي ماضل كلشي عندك لاكرابه ولاولد
عيش ياخويه بمكاني وانه للموت استعد

راسي شلون تشوفه مهشم..تريد تلم جسمي ومايلم
ترجع لوله تموت احذاي
حسين الطايح يم الماي
وانته الباقي
_
النص الخامس

عيش لو بس مره وحده ترجع ومحني الظهر
ترجع وزينب تكلك وينه اخونه يالكمر
الان يازينب تكلها ظهري ياخويه انكسر
تووكع الخيمه وتكلهه عفته اخونه اعللنهر

الطف ياخذ تعب اسنينك..وانته تباوع بس بعينك
سوت ماسوت دنياي
حسين الطايح يم الماي
وانته الباقي
_
الشاعر محمد ابو محمد
قصائد محرم الحرام 1445 هــ
للاستفسار
واتساب تيليكرام 07808247917

القصيدة /السيدة ليلى ع اثناء السبي وفي الخرابه تتصور ان ولدها علي الاكبر غير مقتول و يعود الطف و ياخذ مكان الحسين  ع و ايضا عبدالله الرضيع غير مقتول ويتقدم بالعمر  وياخذ دور الامام العباس عليهم صلوات الله وسلامه

_
المستهل

بذاك الحال وكمت اتصور
لو ما مكتول ابني الاكبر
ويرجع نفس الطف هناه
وعبدالله اليكبر وياه
_
النص الاول

انه ليله بالخرابة وكثرت براسي الصور
بعد عشر اسنين لينه كربله ترد وشهر
لذاك وكته يصير زلمه هناك عبد الله كبر
مو كمر لوردت اصيحه نصيح عبدالله النهر

ياخذ دور الكافل عمه
والاكبر دور ابو اليمه
وللسهم ايحضر عيناه
وعبدالله اليكبر وياه
_
النص الثاني

هم تجي لينه رساله علينه اقدم ياعلي
وعلي نوك ايكول حظروا حتى ناخذ كل هلي
وزينب اتكله يعمه ياكفيل لمحملي
وارتجل عبد الله يمها وكال عمه ادللي
_
وشحدهم زينبيسبونج
الا ايگر عبدالله عيونج
نفس الكافل هم يشباه.
وعبدالله اليكبر وياه
_
النص الثالث: -علي الاكبر يكصدلهم اجه استاذن عمته
واللوه عبدالله شاله ويرف كام بيمنته
يدك ايده على صدره وخله ايده بركبته
وكام يحجي ويالعليله والعليله حاجته

عبدالله اطول لو لاله
لو تمشون ونفس الحاله
خلت يمنتهه بيمناه
وعبدالله اليكبر وياه
_
النص الرابع

هم وصلنه لكربله احنه واهم اجت لينه العده
المره موش حسين وحده علي الاكبر وحده
عالنهر عبدالله طاح ونطه اليمنه ويسرته
هي نفس الخيل ذيج السحكته هم سحكته

جان زغير الحافر داسه
هاي المره الرمح ابراسه
وين بيا حافر نلكاه
وعبدالله اليكبر وياه
_
النص الخامس

هم سبي ردوا علينه ونوك كلها بلا هزل
بلكي هل المره بسبيهم ماكو سب ولاحبل
الدرب بي نفسه اجينه والحمل نفس الحمل
والخرابه هي هي الشتت ذاك الشمل

شما رادوا خلهم يسبونه
كلها تطيح لرمش اعيونه
حسين اليستاهل نفداه
وعبدالله اليكبر وياه
_
الشاعر محمد ابو محمد
قصائد محرم الحرام  1445 هــ
للاستفسار
واتساب تيليكرام 07808247917

فكرة القصيدة /  تقول مولاتنا السيده رقية عندما دخلوا السوق (سوگ الشام)  وكانت الناس متجمعة جاءت اليها طفلة في نفس عمرها وبدات هذه الطفلة تطرح وتسئل السيدة رقية بعض الاسئلة ..  

_المستهل.
بطبت الشام واحنه عالنوك
التمت الناس كلها بالسوك
طفله سئلت  والدج وين
درت راسي لراس الحسين
_
النص الاول

طفلة من بين الخلك تنظر عليه
بيدهه اتاشر وانه احبال ابديه
عافت امها الطفلة ودنت اليه
شسمج وكتلها سموني رقيه
والدج وين كلها نسوان ..مبين الراس هذا عطشان
منين اجيتوا وانتم منين
درت راسي لراس الحسين
_
النص الثاني

مبين اعليج التعب يالراكظه هواي
وهاي شفتج من امس ماشايفه الماي
اليوم عدنه تفضلي ترحين وياي
لمن يرجع والدج ويشوفلج راي
وكت ماضال كرب الليل..خاف تسحك فوكج الخيل
جلجل الليل اوين ترحين
درت راسي لراس الحسين
_
النص الثالث:

المن الراس الذي يكطفونه بحجار
شما يفره الشايله يرد لينه يندار
هذا اشك جنه عرف وعليجن ايغار
النار من تكرب عليجن ينفخ النار
هذا ابونه الراسه مكطوع..هنانه راسه هناك الضلوع
هذا ابونه الصار نصين
درت راسي لراس الحسين
_
النص الرابع

كابلتني الطفلة بس شبعت بواجي
حجت وياي وضمن ذيج المحاجي
والله ماخلي بعد بذني التراجي
لمن ترجع كل زلمكم والخواجي
لمن يرجع اصبع ايده..وسيف ماكو ايحز وريده
وحجر ماكو يصيبه بالعين
درت راسي لراس الحسين
_
النص الخامس

يمي تحجي والشمر شفته منجاني
فوك دم البل الاذن طكني على اذاني
تكله بت حسين ليش؟ وشتماني
طيحاني وركباني وطيحاني
ودعتني ومشت للبيت..وللخرايب انه رديت
مشت عني واحنه ماشين
درت راسي لراس الحسين
_
الشاعر محمد ابو محمد
قصائد محرم الحرام  1445 هــ
للاستفسار
واتساب تيليكرام  07808247917

قصيدة مسلم بن عقيل ع قصيدة عبر ودروس وامثال
_المستهل

من قصة مسلم  نتعلم
ابن العم شنو وخل نفهم
بهاي القصه شكد امثال
والمايفهم مو رجال
_
النص الاول

ابنك عمك هيبتك بالك تخسره
لو شفت ضهره انحنه صير انت ضهره
بقصته ذاك الرجل دوم احنه نقره
كسر وحده وماكدر يكسر العشره

من كونك وحدك يلوونك..بولاد العم ايهابونك
كونك تقوه اتلاوي اجبال
والمايفهم مو رجال
_
النص الثاني

يصير الك مثل الاخو لو جنت غايب
صاحبه وصير انت اله هم خوش صاحب
نسمع بذاك المثل من حلك شايب
العين ماتعله ولاتصير فوك حاجب

كدامه اخضع لاتتعله...والذله اليمه اشرف ذله
كدامه ازغر صير خيال
والمايفهم مو رجال
_
النص الثالث
بالشدد لامايعوفك دوم وياك
هاي صح وبالغلط عن فعله ينهاك
موش تبقه ابلا مقر اهنانه وهناك
ولاتمد رجلك ابد اكثر من اغطاك

بين الوادم اعرف كدرك..خل اليبعد كون يخسرك
وكل جلماتك خلها اثكال
والمايفهم مو رجال
_
النص الرابع

ضحكه دوم بشفتك ماصار دمعه
افرش اضلوعك مثل ما فرش ضلعه
راح احجيلك مثل وافهم واسمعه
ابد سن اليوجعك بالك تشلعه

الناس التنظر لسنونه...والطايح سنه ايعيبونه
حجايه بكل مجلس تنكال
والما يفهم مو رجال
_
النص الخامس

الدنيا تولي الماله اخو والماله اصحاب
ذيب اذا ماصار تاكل راسه الذياب
الباب اليطب ريح منه اقفل الباب
الموت واحد بس لجن متعددة الاسباب

حسين وحط مسلم بعيونه..لمافهموا قصته ايكتلونه
يجتف ينجر بحبال
والمايفهم مو رجال
_
الشاعر محمد ابو محمد
قصائد محرم الحرام  1445 هــ
للاستفسار
واتساب تيليكرام 07808247917

قصيدة سلام من الكلب تحكي عن الم الفراق الذي حصل بين طفله ووالدها الا وهي فاطمة بنت الحسين سلام الله عليهما

_المستهل

سلام امن الكلب للغاضرية
على السحكت عليه خيول امية
هو شضال بيه السحكته الخيل
كل حافر اخذ منك اشوية
_
النص الاول

شلونك يالخذت روحي وخذت شوفي
لهسه ريحت اجفوفك على اجفوفي
نحل جسمي وصرت جن خطك الكوفي
من تكتب رسالة وينترس شوفي

تكتب بالرسالة تكولهم جاي
ولاكاتب ابنيتي تروح وياي
كل ولدي جبتهم يهل العراق
بس بالدار تبقة هنانه علويه
_
النص الثاني

ابعثلك سلامي وادري ماتسلم
وانته من النهر واصل للمخيم
مو مالت سحك يحسين مالت شم
ثكيلة الخيل وادري الخيل ماترحم

سلام المن اودي وانشد شبيك
وانت اخيول عشرة السحكت عليك
صدرك وي ظهرك صارن اطباك
ضلوعك هسا عدله الكبل محنيه
_
النص الثالث
امني ابروحي بس ادريك ماترجع
يااول ثواب بكربله اموزع
ماضل كلشي سالم جسمك امكطع
وشمر حز منحرك وبصدرك اتربع

بالخنجر يحزك بويه بهداي
وانت من امس ماضايك الماي
حار الخنجر وهم منحرك حار
متت ضامي يبوية بحسرة امية
_
النص الرابع

يبويه حسين مثلي اشتاكت الحيطان
ومثل جفني عليك امفتحة البيبان
ليش انه انحرم من ركضت النسوان
والعطشانة تعرف حالة العطشان

الماي الفاركك مالامس اشفاي
واركض بالصحن واجدامي حفاي
بس ينقصني حافر بوية يحسين
مثلك ماسحكني ولامشه علية
_
النص الخامس
الله ايعينك اعله الخيل كلها اثكال
والتسحك عليه اخيول ماينشال
شنو الضال بيك حسين شنهو الضال
ماضل ماسحك فوك الصدر خيال

فرهودك العدة ولاتكدر اتكوم
لاضل محبسك لاضلت اهدوم
صرت للخيل حصه وحصه للناس
كل هاي السوالف تمرد الرية
_

الشاعر محمد ابو محمد
قصائد محرم الحرام  1445 هــ
للاستفسار
واتساب تيليكرام
07808247917

بسم الله الرحمن الرحيم
سوف يتم نشر قصائد محرم الحرام
للعام الهجري 1445
ومن الله التوفيق